\id 1JN
\h 1 Juan
\toc1 1 Juan
\mt1 Mwer dxihtsi nin bacaꞌh San Jwahn
\c 1
\s Xchiꞌdxyi Dxiohs runiꞌhi tuhbi guelnabahan zaꞌca para laꞌhnuꞌh para tuꞌpazi
\p
\v 1 Galohyi chin nagahdxi cwixchih guidxyiyuh, desde chiꞌchi laꞌh Jesucristu
nabahanla. Naꞌh bwaꞌhaloon laꞌh Jesucristu, bihndxiaagahn xchiꞌdxyi Ñiꞌh nin
guñiꞌ Ñiꞌh loon, cun neezaa bidxiꞌ naaꞌhahn laꞌh Ñiꞌh. Naa Ñiꞌh nin runiꞌhi
guelnabahan nin naa para tuꞌpazi laꞌhnuꞌh.
\v 2 Baluuꞌyiloh Ñiꞌh loh nu, garaa
ziga naa nu xpooxtla Ñiꞌh; bidiaꞌha nu loh Ñiꞌh, niꞌchin nin rñiꞌn loh tu,
laꞌh Ñiꞌh nin naa Dxyiꞌdxyi nin nabahannee Dxiohs desde galohtiiꞌyi chin
nagahdxi xi dxiinlohtiiꞌ, per badzihn dxyih baluuꞌyiloh Ñiꞌh loh nu, yannah
nuu nabahan Ñiꞌh para tuꞌpazi.
\v 3 Cañiꞌn stuhbwelta loh tu; bachiñiꞌ nu loh
Ñiꞌh, bihndxiahga nu dxyiꞌdxyi raꞌ nin guñiꞌ Ñiꞌh loh nu, ya xigaaba nu naan
tuhsi cun xcweenta Dxiohs, cun laꞌh Jesucristu Lliiꞌn Dxiohs. Niꞌchin nin
cagaluꞌyiꞌhn xchiꞌdxyi Ñiꞌh loh tu, tin tuhsi lligaaba dxiaꞌhannee nuꞌh cun
lasaaꞌ raꞌ nuꞌh.
\v 4 Cagacaꞌhn dxyiꞌdxyi raꞌ riiꞌ loh tu, tin gaca guelnasaa
nin nuu stoꞌ nu stoꞌ za tu gaduhbilaꞌgaꞌhtiiꞌ.
\s Dxiohs naa biaꞌñih
\p
\v 5 Naꞌh cagaluꞌyiꞌhn dxyiꞌdxyi raꞌ nin baluuꞌyi Jesucristu
loh nu. Dxiohs naa biaꞌñih, nee garaa raꞌ dziꞌn nin ruhnn
Ñiꞌh, naan ganaalla dziꞌn zaꞌca. Ayi ca rdxeela nin naa
nacahyi hasta naa biaꞌñih xteenn Dxiohs.
\v 6 Sidela
gachiñiꞌ nuꞌh tuhsi naa nuꞌh cun Dxiohs nee guidiꞌhnn za
nuꞌh dziꞌn dxaaba raꞌ, rachidiiyi nuꞌh dxixiꞌhw loh nin
rachiñiꞌ nuꞌh nee cun loh nin rachidiꞌhnn nuꞌh;
\v 7 per
sidela laꞌhnuꞌh nabahan nuꞌh loh biaꞌñih ziga nabahan
Dxiohs loh biaꞌñih, tuhsi lligaaba rachidiꞌhnn raꞌ nuꞌh cun
lasaaꞌ raꞌ nuꞌh, ya llarihn Jesucristu Lliiꞌn Dxiohs rusiaa
laꞌhnuꞌh loh duhlda.
\p
\v 8 Sidela gachiñiꞌ nuꞌh laꞌhgahca raꞌ nuꞌh ayi xtuhlda raꞌ nuꞌh, laꞌhgahca
nuꞌh rasaguiꞌhi nuꞌh laꞌhgahca raꞌ nuꞌh, ya dxyiꞌdxyi nin guchii ayin stoꞌ
nuꞌh;
\v 9 per sidela laꞌhnuꞌh gatiꞌdxi cweenta zaꞌca nuꞌh loh Dxiohs garaa
raꞌ xtuhlda nuꞌh, zusiaꞌlda stoꞌ Ñiꞌh xtuhlda nuꞌh zusiaꞌpitii Ñiꞌh xtuhlda
nuꞌh, zusiaa Ñiꞌh laꞌhnuꞌh loh raꞌ dziꞌn dxaaba laasii xnehza ruhnn Ñiꞌh nee
guchii naa xchiꞌdxyi Ñiꞌh.
\v 10 Sidela gachiñiꞌ nuꞌh ayi xi xtuhlda nuꞌh,
pwihsi rachiñiꞌ nuꞌh naa Dxiohs ziga tuhbi bwiinn nin rñiꞌ dxixiꞌhw laasii
rñiꞌ Ñiꞌh nuu xtuhlda raꞌ nuꞌh, ya xchiꞌdxyi Ñiꞌh ayin laꞌn lastoꞌ raꞌ nuꞌh.
\c 2
\s Jesucristu cazuuchihpanee laꞌhnuꞌh nez loh Dxiohs
\p
\v 1 Yuꞌbitu lasaaꞌ raꞌn nin gwachii stoꞌ raꞌ ñiꞌh xchiꞌdxyi Dxiohs; cagacaꞌhn
dxyiꞌdxyi raꞌ riiꞌ loh tu tin ayi xi duhlda chiꞌhyi tu para laꞌhtu, per sidela
chyulla chiꞌhyi duhlda, nahpa nuꞌh tuhbi bwiinn nin suhchihpanee laꞌhnuꞌh nez loh
Daada Dxiohs, ya bwiinn chi naa Jesucristu laꞌh Ñiꞌh ayi xi xtuhlda Ñiꞌh
guyuuꞌ.
\v 2 Guhchi Jesucristu xcweenta nuꞌh loh cruhzi, gudxihlli Ñiꞌh
xcweenta xtuhlda raꞌ nuꞌh loh cruhzi, nee ayi xtuhlda zi dxiꞌh nuꞌh gudxihlli
Ñiꞌh sino que nezaa xtuhlda raꞌ garaa raꞌ bwiinn guidxyiyuh.
\p
\v 3 Ya pur cweenta riiꞌ rahcabwaꞌ nuꞌh laꞌhnuꞌh nuꞌnbwaꞌ nuꞌh laꞌh Ñiꞌh; sidela
gachiguꞌchaꞌyi nuꞌh xchiꞌdxyi Ñiꞌh stoꞌ nuꞌh.
\v 4 Ya chin rñiꞌ tuhbi bwiinn:
“Naꞌh nuꞌnbwaꞌhn laꞌh Ñiꞌh”, nee ayi rguꞌchaꞌyi ba xchiꞌdxyi Ñiꞌh stoꞌ ba,
bwiinn chi naa nin rñiꞌ dxyiꞌdxyi raꞌ nin ayi naa guchii, ya ayi dxyiꞌdxyi nin
naa guchii laꞌn lastoꞌ ba.
\v 5 Per laꞌh bwiinn nin ruzoꞌbadxiahga
xcweenta xchiꞌdxyi naannchiipaꞌh Dxiohs, naa ba tuhbi bwiinn nin
rucaꞌh stoꞌ ñiꞌh laꞌh Dxiohs; ya ziꞌchi rahcabwaꞌ nuꞌh nabahanee nuꞌh
Ñiꞌh.
\v 6 Nin rñiꞌ: “Nabahanee nu Jesucristu”, nahpa guibahan zaꞌca raꞌ ba
ziga gubahan Ñiꞌh loh guidxyiyuh.
\s Dxyiꞌdxyi cuubi raꞌ
\p
\v 7 Bwiitsi raꞌn; dxyiꞌdxyi raꞌ nin cagacaꞌhn ayi naa raꞌn nacuubi, laꞌh gahca
raꞌn nin naann tu desde galohyi chin gwachii stoꞌ tu xchiꞌdxyi Dxiohs; laꞌh
dxyiꞌdxyi raꞌ riiꞌ naa nin babihn tu desde galohyi,
\v 8 nee naazan dxyiꞌdxyi
cuubi raꞌ para laꞌhnuꞌh laasii chin gwachii stoꞌ nuꞌh xchiꞌdxyi Dxiohs, ayi
ru nabahan nuꞌh loh nacahyi, laasii baluuꞌyi Jesucristu dxyiꞌdxyi cuubi raꞌ ca
loh nuꞌh. Guchii naa Dxiohs biaꞌñih xteenn nuꞌh tin ayi guibahan nuꞌh
loh nacahyi.
\p
\v 9 Per chyu chiꞌh zi tuhbi nuꞌh nin rñiꞌ: “Nabahanahn loh xquelñaꞌñih
Dxiohs”, nee rdxyiꞌchinee ba lasaaꞌ ba, pwihsi bwiinn chi nuu gahca ba loh
nacahyi.
\v 10 Chyu chiꞌh zi tuhbi nuꞌh nin nadziiꞌhi lasaaꞌ ñiꞌh, nabahan
bwiinn chi loh biaꞌñih xteenn Dxiohs; ruhnn ba dziꞌn zaꞌca, ya ayi xi xtuhlda
ba,
\v 11 per bwiinn nin rdxyiꞌchinee lasaaꞌ nuꞌh nuu ba loh nacahyi nee
caꞌnzaa ba loh nacahyi, nee ayi gaann ba canehza guzee ba laasii loh nacahyi
chi ayi rusaaꞌn gwaꞌha ba para dxiinloh ba.
\p
\v 12 Cagacaꞌhn dxyiꞌdxyi raꞌ riiꞌ loh yuꞌbitu, lasaaꞌ raꞌn,
laasii ya basiaꞌpitii Dxiohs xtuhlda nuꞌh, laasii loh
cruhzi gudxihlli Jesucristu xcweenta xtuhlda raꞌ nuꞌh.
\v 13 Cagacaꞌhn dxyiꞌdxyi raꞌ riiꞌ loh yuꞌbitu daada bwiinnguuhla
raꞌ, laasii ya gwachii stoꞌ tu laꞌh Jesucristu, naann tu
laꞌh Ñiꞌh naa nin nabahan desde galohyi nee naa za Ñiꞌh nin
banabahan para tuꞌpazi. Cagacaꞌhn dxyiꞌdxyi raꞌ riiꞌ loh tu
biiꞌhin raꞌ laasii ayi ru ruzoꞌbadxiahga tu xchiꞌdxyi
bwiinndxaaba. Cagacaꞌh zahn dxyiꞌdxyi riiꞌ loh tu lliiꞌn
raꞌn, laasii nuꞌnbwaꞌ tu laꞌh Dxiohs.
\p
\v 14 Laꞌn bacaꞌh dxyiꞌdxyi raꞌ riiꞌ loh tu daada bwiinnguuhla raꞌ,
laasii nuꞌnbwaꞌ tu laꞌh Jesucristu, laasii desde galohyi nabahan Ñiꞌh nee
banabahan za Ñiꞌh para tuꞌpazi. Laꞌn bacaꞌh za dxyiꞌdxyi raꞌ riiꞌ loh tu
biiꞌhin raꞌ, nee laasii naa tu nin nahpa xjwersi Dxiohs, nee gucaꞌha tu
xchiꞌdxyi Dxiohs laꞌn lastoꞌ tu, nee laasii ayiru ruzoꞌbadxiahga tu xchiꞌdxyi
bwiinndxaaba.
\p
\v 15 Ayi saꞌbi stoꞌ tu guunn tu nin ruhnn raꞌ bwiinn raꞌ nin
ayi riachii stoꞌ raꞌ ñiꞌh xchiꞌdxyi Jesucristu, nee ayi za
chuu tu ziahan lligaaba pur nin nahpa tu loh guidxyiyuh.
Sidela chyulla tuhbi nin gucaꞌha stoꞌ ñiꞌh xcweenta cohsa
guidxyiyuh, bwiinn chi ayi rucaꞌh stoꞌ ba laꞌh Dxiohs,
\v 16 laasii bwiinn raꞌ nin ayi riachii stoꞌ ñiꞌh xchiꞌdxyi
Dxiohs rzaꞌbi stoꞌ raꞌ ba ruhnn raꞌ ba xica cohsa dxaaba,
cohsa duhlda raꞌ; ruhnn raꞌ ba cohsa nin rnaaba tihxi raꞌ
ba, cohsa nin rwaꞌha bizloh raꞌ ba ya rzaꞌbi stoꞌ ba ba
rbahan raꞌ ba loh guelnayachi xteenn raꞌ cohsa raꞌ nin
rbahannee raꞌ ba; garaa raꞌ dee naa cohsa xteenn guidxyiyuh
raꞌ, ayi naa raꞌn cohsa nin xclaaꞌdzi Dxiohs gaca.
\v 17 Ya
guidxyiyuh zeezah cagaduhbin, cun garaaloh raꞌ cohsa dxaaba
raꞌ nin xclaaꞌdzi bwiinn nin ayi riachii stoꞌ ñiꞌh xchiꞌdxyi
Dxiohs; per laꞌh raꞌ bwiinn raꞌ nin ruzoꞌbadxiahga
xchiꞌdxyi Xtaada Dxiohs nuꞌh zibahan ba loh guelnabahan nin
ayi ñichilohtiiꞌ.
\s Dxyiꞌdxyi nin guchii nee cun dxyiꞌdxyi nin ayi naa guchii
\p
\v 18 Yuꞌbitu lasaaꞌ raꞌn; laꞌh hohra nin naa luulchima hohra zeegadzihn gahxu,
nee laꞌhtu bihn tu ziꞌ tuhbi nin rdxyiꞌchinee laꞌh Jesucristu. Pwihsi ziga
nnah cayiinloh ziahan raꞌ nin rdxyiꞌchinee laꞌh Jesucristu, pwihsi niꞌchin
rahcabwaꞌ nuꞌh zeegadzihn gahxu dxyih raꞌ nin gaduhbi guidxyiyuh.
\v 19 Laꞌh
raꞌ ba biriaꞌh loh raꞌ nuꞌh, per ayi naa raꞌ ba lasaaꞌ raꞌ nuꞌh, laasii
sidela ñahca raꞌ ba lasaaꞌ raꞌ nuꞌh ñiaꞌhan raꞌ ba cun laꞌh raꞌ nuꞌh. Per
ziꞌchi guhca tin baluuꞌyi nayaa-nayaa ayi garaa raꞌ dxiꞌh ba naa raꞌ ba lasaaꞌ
raꞌ nuꞌh.
\p
\v 20 Per ziga laꞌhtu, Jesucristu baniꞌhi Spíritu Saantu laꞌhtu tin gacabwaꞌ
nuꞌh xi niꞌca naa dxyiꞌdxyi nin guchii.
\v 21 Pwihsi rucaꞌhn dxyiꞌdxyi raꞌ
riiꞌ loh tu, laasii nuꞌnbwaꞌ tu dxyiꞌdxyi nin naa guchii; ayi laꞌh dxiꞌhtu naa
ziga nin ayi nuꞌnbwaꞌan, ya laꞌhtu banaann tu ayi nuu chuu tuhbi dxyiꞌdxyi nin
ayi naa guchii loh dxyiꞌdxyi nin naa guchii.
\p
\v 22 ¿Chyu niꞌca naa nin rñiꞌ dxyiꞌdxyi nin ayi naa guchii? Pwihsi laꞌh nin
rñiꞌ ayi naa Jesuhs Crixtu; niꞌchi naa nin rdxyiꞌchinee laꞌh Jesucristu,
pwihsi rbweꞌhe stoꞌ bwiinn chi laꞌh Daada Dxiohs cun neezaa laꞌh Lliiꞌn Ñiꞌh.
\v 23 Garaa raꞌ nin rbweꞌhe stoꞌ laꞌh Lliiꞌn Dxiohs, neezaa laꞌh Daada Dxiohs
rbweꞌhe stoꞌ ba; per laꞌh bwiinn nin rñiꞌ Jesuhs naa Lliiꞌn Dxiohs, neezaa
Daada Dxiohs nuꞌnbwaꞌ ba.
\p
\v 24 Pwihsi niꞌchin laꞌhtu gulcuꞌchaꞌyi laꞌn lastoꞌ tu
xchiꞌdxyi Dxiohs nin bihn dxiahga tu desde galohtiiꞌyi, ya
sidela guzoꞌbadxiahga tu dxyiꞌdxyi raꞌ nin bihn tu desde
galohyi, neezaa laꞌhtu chuu tu hasta nuu Jesucristu tuhsi
cun Xtaada Dxiohs Ñiꞌh.
\v 25 Nee laꞌh Jesucristu
biaꞌhandxyiꞌdxyi guniꞌhi Ñiꞌh guelnabahan nin ayi
ñichilohtiiꞌ laꞌhnuꞌh.
\p
\v 26 Bacaꞌhn cweenta riiꞌ loh tu xcweenta bwiinn raꞌ nin
rusaguiꞌhi raꞌ,
\v 27 per laꞌhtu nuu Spíritu Saantu nin
baniꞌhi Jesucristu stoꞌ tu, pwihsi niꞌchin nin ayi rchiꞌhnn
tu chyu bwiinn guluuꞌyiru laꞌhtu, laasii Spíritu Saantu
gahca ruluuꞌyi laꞌhtu garaatiiꞌ raꞌ cohsa, nee ziga
xchiꞌdxyi Spíritu Saantu guchii naa raꞌn, ayi naa raꞌn ziga
dxyiꞌdxyi raꞌ nin ayi naa guchii. Pwihsi gulchehzah
gulguibahannee laꞌh Jesucristu, ziga ruluuꞌyi Spíritu Saantu
laꞌhtu.
\p
\v 28 Yannah yuꞌbitu lasaaꞌ raꞌn; gulchehzah zaꞌca loh
xneziuh Jesucristu tin ziꞌchi ayi dxiaꞌdxi xcweenta nuꞌh
chin dxiꞌ Ñiꞌh stuhbi loh guidxyiyuh, ayi gatuhyi loh nuꞌh
nez delaanta loh Ñiꞌh chin dxiꞌ Ñiꞌh,
\v 29 yaque laꞌhtu
naann tu nazaꞌca naa Dxiohs, pwihsi ziꞌchi za gulgahcabwaꞌ
garaa raꞌ nin guunn ganaalla dziꞌn zaꞌca naa raꞌ bwiinn raꞌ
chi lliiꞌn Dxiohs.
\c 3
\s Nin naa raꞌ Lliiꞌn Dxiohs
\p
\v 1 Gulguiaꞌha balaaca chiꞌh nin rucaꞌh stoꞌ Dxiohs Xtaada
nuꞌh laꞌhnuꞌh, tin guiriaꞌhlah nuꞌh lliiꞌn Dxiohs, ya pur
niꞌchin ayi nuꞌnbwaꞌ raꞌ bwiinn guidxyiyuh laꞌhnuꞌh laasii
ayi biuꞌnbwaꞌ raꞌ ba laꞌh Dxiohs nin naa Xtaada nuꞌh nin
nuu dxibaaꞌ.
\v 2 Pwihsi bwiitsi lasaaꞌ raꞌn, ya naa nuꞌh
lliiꞌn Dxiohs, nee nicala ayi chyu gaann cuun nin gaca nuꞌh
chiꞌchi, per naann nuꞌh chin guibiaꞌgarii Jesucristu stuhbi
guidiaꞌhaloh nuꞌh laꞌh Ñiꞌh talpaꞌh ziga naa Ñiꞌh laasii
zuchaꞌh Ñiꞌh laꞌhnuꞌh tin gaca nuꞌh ziga naa Ñiꞌh.
\v 3 Ya
garaa raꞌ bwiinn nin nahpa siguhra xcweenta Ñiꞌh nahpa
chiꞌhyi raꞌ ba xa guibahan nayaa raꞌ ba ziga gubahan nayaa
Jesucristu loh guidxyiyuh riiꞌ.
\p
\v 4 Ya garaa raꞌ bwiinn raꞌ nin nabahannee duhlda, ruñihchi
raꞌ ba loh lehyi xteenn Dxiohs, ya ziga chuu luꞌh loh
duhlda niꞌchin naa ruñihchi chiꞌh luꞌh loh xlehyi Dxiohs.
\v 5 Niꞌchin laꞌhtu banaann tu biꞌ Jesucristu loh guidxyiyuh
tin basiaꞌpitii Ñiꞌh xtuhlda raꞌ nuꞌh, nee laꞌh Ñiꞌh ayi xi
xtuhlda Ñiꞌh guyuuꞌ.
\v 6 Pwihsi garaa raꞌ bwiinn raꞌ nin
nabahan dziꞌtsi tuhsi cun Jesucristu, ayi nuu cheezah
guibahan raꞌ ba loh duhlda; per bwiinn raꞌ nin nabahan raꞌ
loh duhlda ruluuꞌyi raꞌ ba nagahdxi dxiuꞌnbwaꞌ raꞌ ba laꞌh
Jesucristu cun nagahdxi za gacabwaꞌ raꞌ ba xa naa xpiaꞌñih
Ñiꞌh.
\v 7 Pwihsi lasaaꞌ raꞌn, ayi gusaaꞌn tu gusaguiꞌhi
chyulla laꞌhtu; bwiinn nin ruhnn dziꞌn zaꞌca, bwiinn chi
bwiinn zaꞌca naa ba, ziga za laꞌh Ñiꞌh bwen duxa za naa Ñiꞌh.
\v 8 Per bwiinn nin nuu loh duhlda, xpwiinn bwiinndxaaba
laꞌhba, laasii bwiinndxaaba desde galohyi naa ba bwiinn
duhlda. Niꞌchin nin biꞌ Jesucristu Lliiꞌn Dxiohs loh
guidxyiyuh, tin guñihchiloh Ñiꞌh garaa xtsiꞌn bwiinndxaaba.
\p
\v 9 Nin tuhbi bwiinn nin naa lliiꞌn Dxiohs, ayi cheezah loh
duhlda, laasii nahpa raꞌ ba guelnabahan nin badiꞌhi Dxiohs
laꞌh raꞌ ba, pwihsi ayi nuu guunn raꞌ ba duhlda laasii naa
raꞌ ba lliiꞌn Dxiohs.
\v 10 Ya nancabwaꞌ cuun nin naa raꞌ
lliiꞌn Dxiohs, nee rluuꞌyi za cuun nin naa raꞌ lliiꞌn
bwiinndxaaba, laasii cuun chiꞌh zi nin ayi ruhnn dziꞌn zaꞌca
raꞌ, o ayi guinadziiꞌhi ba lasaaꞌ ba; bwiinn chi ayi naa ba
xpwiinn Dxiohs.
\s Gaantsiiꞌhi lasaaꞌ raꞌ nuꞌh ziga tuhbi ziga stuhbi raꞌ nuꞌh
\p
\v 11 Dee naa laꞌh gahca xchiꞌdxyi Dxiohs nin babihn tu laꞌhtu desde galohyi:
Ziga gaantsiiꞌhi lasaaꞌ raꞌ nuꞌh ziga tuhbi ziga stuhbi raꞌ nuꞌh.
\v 12 Ayi
gaca nuꞌh ziga guhca guehtu Caín, laasii laꞌh ba naa ba xpwiinn bwiinndxaaba
niꞌchin gudxiinn ba bwihtsi ba. ¿Xixnaa gudxiinn ba laꞌh bwihtsi ba? Laasii
nin guhca bariaꞌcaa xtsiꞌn ba pur dziꞌn dxaaba, ya nin bwiꞌhnn bwihtsi ba
bwen guhcan.
\v 13 Bwiitsi lasaaꞌ raꞌn, ayi gadxyigaaꞌloh tu chin
guidxyiꞌchinee bwiinn guidxyiyuh laꞌhtu.
\v 14 Laꞌhnuꞌh ya bachidiiꞌdxi nuꞌh
loh xneziuh guelguhchi tin badzihn nahpa nuꞌh guelnabahan, nee naannloh nuꞌhn
laasii nadziiꞌhi lasaaꞌ raꞌ nuꞌh cun bwihtsi raꞌ nuꞌh. Bwiinn nin ayi
guinadziiꞌhi laꞌh bwihtsi ñiꞌh nuu gahca ba loh xneziuh guelguhchi,
\v 15 ya
garaa raꞌ nin rdxyiꞌchinee laꞌh raꞌ bwihtsi ñiꞌh naa ba tuhbi bwiinn nin
rdxiinn bwiinn, nee laꞌhtu naannloh tu nin tuhbi bwiinn nin rdxiinn bwiinn ayi
nuu gaapa ba guelnabahan nin ayi ñichilohtiiꞌ stoꞌ ba.
\v 16 Naann nuꞌh cuun
nin naa guelnadziiꞌhi lasaaꞌ; laꞌhan naa nin ziga badiꞌhi Jesucristu
xquelnabahan Ñiꞌh chin guhchi Ñiꞌh loh cruhzi pur laꞌhnuꞌh; ya ziꞌchi za
laꞌhnuꞌh nahpa gadiꞌhi nuꞌh xquelnabahan nuꞌh pur laꞌh raꞌ bwihtsi raꞌ nuꞌh.
\v 17 Pwihsi sidela tuhbi nuꞌh nahpa ziahan xica cohsa para xcaaxtu nuꞌh, nee
guidiaꞌha nuꞌh laꞌh bwihtsi nuꞌh ayi nahpa ba para xcaaxtu ba, nee ayi galahsa
stoꞌ nuꞌh laꞌh ba, ¿xaalla gapa chiꞌh nuꞌh guelnadziiꞌhi laꞌh Dxiohs stoꞌ nuꞌh
sidela guidiꞌhnn nuꞌh ziꞌchi?
\v 18 Pwihsi lasaaꞌ raꞌn, ziga xcweenta
guelnadziiꞌhi xteenn nuꞌh ayi gacan cun dxyiꞌdxyi si sino que gacan nin guluuꞌyi
xa naa xtsiꞌn nuꞌh.
\s Zizuh dziꞌtsi nuꞌh nez loh Dxiohs
\p
\v 19 Ya squiiꞌ naa ziga rahcabwaꞌ nuꞌh naa nuꞌh lliiꞌn
Dxiohs, nee rbwihdxyii lastoꞌ nuꞌh nez loh Ñiꞌh;
\v 20 ya
sidela laꞌh stoꞌ nuꞌh xclaaꞌdzin gucaꞌhchiahan laꞌhnuꞌh
xilla, per laꞌh Dxiohs mahzi nahpa guelrnabwaꞌ rooꞌ loh
stoꞌ raꞌ nuꞌh, nee laꞌhza Ñiꞌh naann Ñiꞌh garaatiiꞌ.
\v 21 Pwihsi bwiitsi lasaaꞌ raꞌn, sidela laꞌh stoꞌ raꞌ nuꞌh ayi
rucaꞌhchiahan laꞌhnuꞌh, pwihsi riidxyii lastoꞌ nuꞌh nez
delanta loh Dxiohs.
\v 22 Ya ziga chin chyu guinaaba loh
Ñiꞌh xilla, zuniꞌhi Ñiꞌhn laꞌhnuꞌh, laasii razoꞌbadxiahga
nuꞌh xcweenta xchiꞌdxyi Ñiꞌh, nee rachidiꞌhnn nuꞌh ziga nin
rusiaꞌhan guelnasaa stoꞌ Ñiꞌh.
\v 23 Ya deeꞌ raꞌ naa
dxyiꞌdxyi nin gunabwaꞌ Dxiohs gazoꞌbadxiahga nuꞌh: Chechii
stoꞌ nuꞌh xchiꞌdxyi Ñiꞌh xcweenta Jesucristu, nee
gantsiiꞌhi lasaaꞌ raꞌ nuꞌh ziga tuhbi ziga stuhbi raꞌ nuꞌh
ziga gunabwaꞌ Dxiohs gaca.
\v 24 Ya nin guzoꞌbadxiahga
garaa xchiꞌdxyi Dxiohs nin gunabwaꞌ Ñiꞌh nabahannee nuꞌh,
nabahan raꞌ ba cun laꞌh Ñiꞌh ya laꞌh Ñiꞌh cun laꞌh raꞌ ba.
Naann nuꞌh nuu nabahanee Ñiꞌh laꞌhnuꞌh pur xcweenta
Spíritu Ñiꞌh nin baniꞌhi Ñiꞌh laꞌhnuꞌh.
\c 4
\s Spíritu xteenn Dxiohs, cun spíritu xteenn bwiinn nin rdxyiꞌchinee laꞌh Jesucristu
\p
\v 1 Yuꞌbitu, bwiitsi lasaaꞌ raꞌn; ayi chechii stoꞌ tu
xchiꞌdxyi cuun chiꞌh zi bwiinn nin guiñiꞌ loh tu: “Naꞌh
ruluꞌyiꞌhn xchiꞌdxyi Dxiohs.” Galoh gacabwaꞌ tu
xcweenta ba sidela laꞌh ba guchii ba rñiꞌ ba xcweenta
Dxiohs o aaca, laasii loh guidxyiyuh riiꞌ, rii ziahan raꞌ
bwiinn nin rñiꞌ raꞌ dxyiꞌdxyi raꞌ nin ayi naa guchii raꞌ.
\v 2 Ya ziga guunn tu squiiꞌ zahcabwaꞌ tu cuun nin nuu
Spíritu Saantu xteenn Dxiohs stoꞌ ñiꞌ: Garaa raꞌ ziga nin
riuꞌnbwaꞌ laꞌh Jesucristu naa Ñiꞌh Lliiꞌn Dxiohs nin nuu
dxibaaꞌ, bwiinn chi nuu Spíritu Saantu xteenn Dxiohs stoꞌ
ba,
\v 3 per bwiinn raꞌ nin ayi nuꞌnbwaꞌ laꞌh Jesucristu naa
Ñiꞌh Lliiꞌn Dxiohs, bwiinn chi ayi naa ba xpwiinn Dxiohs;
bwiinn chi nuu spíritu nin rdxyiꞌchinee laꞌh Jesucristu stoꞌ
ba. Laꞌhtu babihn nahpa ziꞌ spíritu chi; pwihsi nnah, laꞌh
raꞌ ba nuula loh guidxyiyuh.
\p
\v 4 Yuꞌbitu lasaaꞌ raꞌn; laꞌhtu bwiꞌhnn gahn loh raꞌ bwiinn
raꞌ nin ayi naa xchiꞌdxyi raꞌ ñiꞌh chi dxyiꞌdxyi nin guchii,
laasii naa tu xpwiinn Dxiohs laasii nin nuu nabahannee
laꞌhtu mahzi guelrnabwaꞌ rooꞌ nahpa Ñiꞌh loh nin nabahannee
raꞌ bwiinn guidyxiyuh raꞌ.
\v 5 Laꞌh raꞌ ba naa raꞌ ba
bwiinn guidxyiyuh, niꞌchin rñiꞌ raꞌ ba ganaalla dxyiꞌdxyi
cweenta guidxyiyuh, ya nin naa raꞌ bwiinn guidxyiyuh
rucaꞌdxiahga raꞌ ba xchiꞌdxyi raꞌ ba.
\v 6 Per laꞌhnuꞌh naa
nuꞌh xpwiinn Dxiohs, ya bwiinn raꞌ nin nuꞌnbwaꞌ laꞌh
Dxiohs rucaꞌdxiahga raꞌ ba xchiꞌdxyi nuꞌh; per bwiinn raꞌ
nin ayi naa xpwiinn Dxiohs, ayi rucaꞌdxiahga raꞌ ba
xchiꞌdxyi raꞌ nuꞌh. Pwihsi ya squiiꞌ rluuꞌyi cuun nin nuu
Spíritu Dxiohs stoꞌ raꞌ ñiꞌh nee cuun za nin nuu raꞌ
spíritu nin rusaguiꞌhi stoꞌ raꞌ ñiꞌh.
\s Rucaꞌ stoꞌ Dxiohs laꞌh raꞌ bwiinn
\p
\v 7 Pwihsi rñiꞌn loh tu, bwiitsi lasaaꞌ raꞌn; nahpa
gaantsiiꞌhi lasaaꞌ nuꞌh ziga tuhbi ziga stuhbi raꞌ nuꞌh,
laasii guelnadziiꞌhi lasaaꞌ naa pur xcweenta Dxiohs ya garaa
raꞌ nin nahpa guelnadziiꞌhi lasaaꞌ stoꞌ raꞌ ñiꞌh, naa raꞌ ba
lliiꞌn Dxiohs nee nuꞌnbwaꞌ raꞌ ba laꞌh Dxiohs nin nuu
dxibaaꞌ.
\v 8 Bwiinn nin ayi guinadziiꞌhi lasaaꞌ ñiꞌh bwiinn
chi ayi nuꞌnbwaꞌ ba laꞌh Dxiohs, laasii pur Dxiohs riinloh
guelnadziiꞌhi lasaaꞌ.
\v 9 Dxiohs baluuꞌyi Ñiꞌh xa nadziiꞌhi
Ñiꞌh laꞌhnuꞌh, ziga guxeꞌhla Ñiꞌh laꞌh Lliiꞌn tuhsi Ñiꞌh
loh guidxyiyuh tin ziꞌchi gapa raꞌ nuꞌh guelnabahan pur laꞌh
Ñiꞌh.
\v 10 Pwihsi squiiꞌ rahcabwaꞌ nuꞌh nadziiꞌhi
Dxiohs laꞌhnuꞌh: ayi pur nin ñucaꞌ stoꞌ nuꞌh laꞌh Dxiohs,
sino que laꞌh Ñiꞌh rucaꞌ stoꞌ Ñiꞌh laꞌhnuꞌh niꞌchin nin
guxeꞌhla Ñiꞌh Lliiꞌn Ñiꞌh tin guziaꞌtii Ñiꞌh xtuhlda raꞌ
nuꞌh.
\p
\v 11 Pwihsi bwiitsi lasaaꞌ raꞌn, sidela laꞌh Dxiohs rucaꞌh
stoꞌ Ñiꞌh laꞌhnuꞌh ziꞌchi, ziꞌchi za laꞌhnuꞌh nahpa gacaꞌh
stoꞌ lasaaꞌ raꞌ nuꞌh ziga tuhbi ziga stuhbi raꞌ nuꞌh.
\v 12 Pwihsi laꞌh Dxiohs nin tuhbi bwiinn nagahdxi gwaꞌhaloh laꞌh
Dxiohs, per sidela laꞌhnuꞌh gacaꞌ stoꞌ lasaaꞌ raꞌ nuꞌh ziga
tuhbi ziga stuhbi raꞌ nuꞌh, Dxiohs nabahan Ñiꞌh stoꞌ nuꞌh,
ya ziꞌchi raluuꞌyi nuꞌh guchii racaꞌ stoꞌ nuꞌh laꞌh
Ñiꞌh,
\v 13 ya Spíritu Saantu nin rbweeza laꞌn lastoꞌ nuꞌh
naa nin ruluuꞌyi nabahan nuꞌh loh Dxiohs,
\v 14 ya laꞌh gahca
nu bidiaꞌhaloh nu, niꞌchin nin rachiñiꞌ nu; laꞌh Daada
Dxiohs guxeꞌhla Ñiꞌh Lliiꞌn Ñiꞌh tin guziaꞌtii Ñiꞌh
xtuhlda raꞌ bwiinn guidxyiyuh,
\v 15 ya cuun chiꞌh zi bwiinn
nin riuꞌnbwaꞌ laꞌh Jesucristu naa lliiꞌn Dxiohs nin nuu
dxibaaꞌ; nee nabahannee bwiinn chi laꞌh Dxiohs ya Dxiohs
nabahan stoꞌ bwiinn chi.
\p
\v 16 Pwihsi pur cweenta raꞌ riiꞌ niꞌchin nin rahcabwaꞌ nuꞌh
nee riachii stoꞌ nuꞌh Dxiohs rucaꞌh stoꞌ Ñiꞌh laꞌhnuꞌh.
Dxiohs naa nin rucaꞌh stoꞌ, ya nin rucaꞌh stoꞌ laꞌh
Dxiohs, bwiinn chi nabahannee laꞌh Dxiohs ya Dxiohs
nabahan stoꞌ ba.
\v 17 Pwihsi ziꞌchi zadzihn gacaꞌh stoꞌ
nuꞌh laꞌh Dxiohs tal ziga xclaaꞌdzi Ñiꞌh, tin para
laꞌn dxyih nin gaca jwiisi ayi chyu guidxyihbi, laasii
gaduhbi nin nabahan nuꞌh loh guidxyiyuh guibahannee nuꞌh
Dxiohs ziga gahca nabahannee Jesucristu laꞌh Dxiohs.
\v 18 Hasta nuu Spíritu Dxiohs ayi guelnadxyiꞌbi; riꞌchi nuu
guelrucaꞌh stoꞌ nin naa ganaalla paꞌh ya laꞌh guelrucaꞌh
stoꞌ nanchii rbweꞌhecaan laꞌh guelnadxyiꞌbi tuhbi lahdu,
pwihsi bwiinn nin rdxyihbi, rahca ba guelnah laasii
nagahdxi gucaꞌh stoꞌ ba laꞌh Dxiohs.
\v 19 Laꞌhnuꞌh racaꞌ
stoꞌ nuꞌh laꞌh Dxiohs laasii laꞌh Ñiꞌh bacaꞌ stoꞌ Ñiꞌh
laꞌhnuꞌh desde galohtiiꞌyi,
\v 20 per sidela chyulla nnaa:
“Naꞌh rucaꞌh stoꞌn laꞌh Dxiohs”, gaduhbi nin rdxyiꞌchinee
ba laꞌh bwihtsi ba, bwiinn chi naa ba bwiinn nin ayi naa
xchiꞌdxyi ñiꞌh guchii. Pwihsi sidela tuhbi chyulla ayi
nuu gantsiiꞌhi ba laꞌh bwihtsi ba nin rwaꞌhaloh ba, pwihsi
ayi za nuu gucaꞌh stoꞌ ba laꞌh Dxiohs nin ayi rwaꞌhaloh ba.
\v 21 LaꞌhÑiꞌh baniꞌhi Ñiꞌh dxyiꞌdxyi riiꞌ laꞌhnuꞌh: Bwiinn
nin rucaꞌh stoꞌ ñiꞌh laꞌh Dxiohs neezaa laꞌh bwihtsi ba
gucaꞌh stoꞌ.
\s Guelriachii stoꞌ riiꞌ nin ruteꞌtagueeta laꞌh raꞌ bwiinn guidxyiyuh

\c 5
\p
\v 1 Garaa raꞌ bwiinn raꞌ nin riachii stoꞌ raꞌ ñiꞌh laꞌh
Jesuhs naa Crixtu, bwiinn chi naa lliiꞌn Dxiohs; pwihsi ziga
gacaꞌh stoꞌ raꞌ nuꞌh laꞌh Xtaada Dxiohs nuꞌh, ziꞌchi gahca
za gacaꞌh stoꞌ nuꞌh laꞌh raꞌ bwiinn raꞌ nin naa raꞌ lliiꞌn
Dxiohs nin nuu dxibaaꞌ,
\v 2 pwihsi ya cun squiiꞌ ya radiꞌhi
nuꞌh cweenta racaꞌh stoꞌ nuꞌh laꞌh raꞌ bwiinn raꞌ nin naa
raꞌ lliiꞌn Dxiohs nin nuu dxibaaꞌ, chin racaꞌh stoꞌ nuꞌh
laꞌh Dxiohs nee razoꞌbadxiahga nuꞌh ziga naa xchiꞌdxyi
Ñiꞌh.
\v 3 Pwihsi deeꞌ naa nin ruluuꞌyi racaꞌh stoꞌ nuꞌh
laꞌh Dxiohs, chin razoꞌbadxiahga nuꞌh xchiꞌdxyi Ñiꞌh ziga
xclaaꞌdzi Ñiꞌh gaca, nee xcweenta xchiꞌdxyi Ñiꞌh ayi naan
tuhbi cohsa nin nagahn duxa.
\v 4 Ya chyu chiꞌh zi tuhbi raꞌ
nuꞌh nin naa lliiꞌn Dxiohs, riidiꞌhnn nuꞌh gahn loh raꞌ
duhlda xteenn guidxyiyuh laasii guyuuꞌ-guyaꞌzi xchiꞌdxyi
Jesucristu stoꞌ raꞌ nuꞌh.
\v 5 ¿Chyu niꞌca cayuhnn gahn loh
raꞌ duhlda loh guidxyiyuh riiꞌ? Sola laꞌh si raꞌ bwiinn raꞌ
nin riachii stoꞌ raꞌ ñiꞌh laꞌh Jesuhs naa Lliiꞌn Dxiohs nin
nuu dxibaaꞌ.
\s Dxyiꞌdxyi raꞌ nin baluuꞌyi Dxiohs
\p
\v 6 Chin biꞌ Jesucristu loh guidxyiyuh riiꞌ, gurohbañihsa
Ñiꞌh nee baxiꞌh za Ñiꞌh llarihn Ñiꞌh loh cruhzi; nee ayi
sola dxiꞌh biꞌ Ñiꞌh tin gurohbañihsa Ñiꞌh sino que nee tin
baxiꞌh Ñiꞌh llarihn Ñiꞌh, nee Spíritu Saantu Dxiohs naa
nin bwaꞌhaloh cweenta raꞌ riiꞌ, nee guchii naa xcweenta
Ñiꞌh,
\v 7 laasii chohnna naa nin baluuꞌyiloh nez
llaaꞌndxibaaꞌ nin rñiꞌ xcweenta Jesucristu tuhsi dxyiꞌdxyi:
Tuhbi Ñiꞌh naa Dxiohs, stuhbi Ñiꞌh naa nin naa Dxyiꞌdxyi,
stuhbi Ñiꞌh naa Spíritu Saantu xteenn Dxiohs; ya loh
gadxioonna Ñiꞌh rñiꞌ raꞌn xcweenta Jesucristu cun tuhsi
dxyiꞌdxyi.
\v 8 Ziꞌchi gahca za chohnna naa raꞌ nin
baluuꞌyiloh loh guidxyiyuh. Rñiꞌ raꞌn xcweenta Jesucristu
cun tuhsi dxyiꞌdxyi: Tuhbi Ñiꞌh naa Spíritu Saantu Dxiohs,
stuhbin naa chin gurohbañihsa Jesucristu, stuhbin naa chin
gulliꞌh llarihn Jesucristu loh cruhzi chin guhchi Ñiꞌh.
\v 9 Riachii stoꞌ nuꞌh xchiꞌdxyi bwiinn loh guidxyiyuh, per
mahzi ru lasahca xchiꞌdxyi Dxiohs, laasii naan dxyiꞌdxyi
gahca nin guñiꞌ Ñiꞌh xcweenta Lliiꞌn Ñiꞌh.
\v 10 Bwiinn raꞌ
nin riachii stoꞌ raꞌ ñiꞌh laꞌh Jesucristu Lliiꞌn Dxiohs,
rñiꞌ Dxiohs xcweenta Jesucristu nez laꞌn lastoꞌ nuꞌh; ya
bwiinn raꞌ nin ayi riachii stoꞌ raꞌ ñiꞌh, laꞌh Dxiohs
cayuhnn raꞌ ba ziga zi bwiinn dxixiꞌhw nin ayi naa xchiꞌdxyi
ñiꞌh guchii laasii ayi gwachii stoꞌ raꞌ ba xchiꞌdxyi
Dxiohs nin baniꞌhi Ñiꞌh laꞌhnuꞌh pur xcweenta Jesucristu
Lliiꞌn Ñiꞌh.
\v 11 Squiiꞌ naa dxyiꞌdxyi nin rñiꞌ Dxiohs: Ya
baniꞌhi Dxiohs guelnabahan nin ayi ñichilohtiiꞌ laꞌhnuꞌh, ya
guelnabahan riiꞌ naa nin bieꞌnee Jesucristu Lliiꞌn Dxiohs
nin nuu dxibaaꞌ.
\v 12 Bweelaa laꞌhnuꞌh nabahanee nuꞌh laꞌh
Jesucristu Lliiꞌn Dxiohs, zahpa nuꞌh guelnabahan nin ayi
ñichilohtiiꞌ za; ya nin ayi nabahannee laꞌh Jesucristu
Lliiꞌn Dxiohs, ayi guicaꞌha ba loh guelnabahan nin ayi
ñichilohtiiꞌ.
\s GuelrgahpaDxiohs cun guelrñiꞌnee nin naa luulchima
\p
\v 13 Pwihsi rucaꞌhn dxihtsi riiꞌ para laꞌhtu ziga riachii
stoꞌ tu laꞌh Jesucristu Lliiꞌn Dxiohs, tin para gacabwaꞌ tu
nahpa tu guelnabahan nin ayi ñichilohtiiꞌ.
\p
\v 14 Niꞌchin nin ayi guidxyihbi nuꞌh chin
gachibwihdxi-gachinaaba nuꞌh xilla loh Dxiohs laasii rihn
Ñiꞌh xchiꞌdxyi nuꞌh sidela tuhsi naa xigaaba nuꞌh cun laꞌh
Ñiꞌh chin rbwihdxi-rnaaba nuꞌh loh Ñiꞌh.
\v 15 Pwihsi ziga
naann nuꞌh sidela rihn Dxiohs xchiꞌdxyi nuꞌh chin rachinaaba
nuꞌh xilla loh Ñiꞌh, pwihsi ziꞌchi za naann nuꞌh zuniꞌhi
Ñiꞌh nez guidxeela nin rnaaba nuꞌh loh Ñiꞌh.
\p
\v 16 Ya sidela laꞌh tuhbi raꞌ nuꞌh gwaꞌha laꞌh tuhbi bwihtsi
raꞌ nuꞌh cadxiꞌhyi tuhbi duhlda nin ayi gadxiinn laꞌh ba,
nahpa chyu guinaaba loh Dxiohs xcweenta ba, ya zudiꞌhi
Dxiohs guelnabahan laꞌh bwihtsi lasaaꞌ nuꞌh chi sidela ayi
naan tuhbi duhlda nin gadxiinn laꞌh ba; laasii nuu duhlda
nin rianee laꞌh bwiinn para xlahdu guelguhchi nee ayi cañiꞌn
guinaaba tu loh Dxiohs xcweenta bwiinn nin nahpa duhlda
ziꞌchi.
\v 17 Laasii garaa raꞌ dziꞌn dxaaba raꞌ naa raꞌn
duhlda, per nuu raꞌ duhlda nin ayi rianee laꞌh bwiinn loh
guelguhchi.
\p
\v 18 Pwihsi rahcabwaꞌ nuꞌh garaa raꞌ bwiinn nin riuꞌnbwaꞌ
laꞌh Dxiohs naa Ñiꞌh Xtaada raꞌ ba, pwihsi bwiinn chi ayi
xclaaꞌdzi ba chezah ba loh duhlda laasii Jesucristu Lliiꞌn
Dxiohs rahcanee Ñiꞌh laꞌh ba, ya ayi rdxiꞌ bwiinndxaaba
laꞌh ba.
\p
\v 19 Pwihsi naann nuꞌh naa nuꞌh xpwiinn Dxiohs, ya garaa
raꞌ bwiinn nin riuuꞌ si lligaaba xteenn guidxyiyuh
cagazobadxiahga raꞌ ba xchiꞌdxyi bwiinndxaaba.
\p
\v 20 Naann za nuꞌh biꞌ Jesucristu Lliiꞌn Dxiohs loh
guidxyiyuh ya baluuꞌyi Ñiꞌh laꞌhnuꞌh xchiꞌdxyi Dxiohs;
Daada Dxiohs nin nuu dxibaaꞌ. Ya nabahan nuꞌh tuhsi
cun nin naa Dxyiꞌdxyi guchii nin naa laꞌh gahca Jesucristu,
pwihsi laꞌh Ñiꞌh naa Dxiohs guchii paꞌh, nee laꞌh za Ñiꞌh
naa Ñiꞌh guelnabahan nin ayi ñichilohtiiꞌ.
\v 21 Pwihsi
lasaaꞌ raꞌn, ayi guzuꞌnllihbi tu nez loh raꞌ dxaan raꞌ.
Ziꞌchi gaca pwihsi.