\id 3JN
\h 3 Juan
\toc1 3 Juan
\mt1 Nin riohnna dxihtsi nin bacaꞌh San Jwahn
\c 1
\s Cagacaꞌh ba dxyiꞌdxyi zaꞌca loh Gahyu
\p
\v 1 Naꞌh riiꞌ naan tuhbi bwiinn guuhla, cagaxeꞌhlaꞌhn
dxihtsi riiꞌ loh luꞌh daada Gahyu nin nadziiꞌhihn ziga naa
dxyiꞌdxyi guchii.

\p
\v 2 Bwiitsi lasaaꞌhahn, rnaꞌbaꞌhn loh Dxiohs, sidela zeezah
zaꞌca luꞌh loh xchiꞌdxyi Dxiohs, gariaꞌcaa zaꞌca xcweenta
luꞌh loh garaatiiꞌ cohsa raꞌ nee gadzihn za gaapa luꞌh
guelnadaꞌn rooꞌ xteenn Dxiohs tihxi luꞌh.
\v 3 Pwihsi riahxi
duxaꞌhn pur xcweenta luꞌh, laasii baniꞌhi raꞌ bwihtsi lasaaꞌ
raꞌ nuꞌh nin biꞌ riꞌca cweenta naꞌh zeezah zaꞌca luꞌh loh
xcweenta xchiꞌdxyi Jesucristu.
\v 4 Lliꞌtiiꞌ stuhbi
dxyiꞌdxyi nin riuuꞌpaꞌh stoꞌn ziga riuuꞌ stoꞌn chin rihnaꞌhn
xcweenta ziga ruzoꞌbadxiahga raꞌ lasaaꞌ raꞌ nuꞌh dxyiꞌdxyi
nin naa guchii.
\p
\v 5 Gahyu, bwiitsihn; cayahpa luꞌh mohda zaꞌca cun laꞌh raꞌ
lasaaꞌ raꞌ nuꞌh chin rahcanee luꞌh laꞌh raꞌ ba nin naa raꞌ
bwiinn stuhbi guihdxyi raꞌ chin rieꞌgayihdxi raꞌ ba yiꞌh,
\v 6 ya des delanta loh raꞌ xpwiinn guidoꞌ Dxiohs guñiꞌ raꞌ
ba ziga nazaꞌca duxa naa luꞌh cun laꞌh raꞌ ba, niꞌchin nin
rnaꞌbaꞌhn tuhbi bweniꞌhn loh luꞌh; bwaꞌhalaaꞌ pur laꞌh raꞌ
ba cun nin guichiꞌhn raꞌ ba loh biahja nin guzeezah raꞌ ba,
ziga nin guluuꞌyi zaꞌca nez loh Dxiohs.
\v 7 Laasii laꞌh raꞌ
ba biriaꞌh raꞌ ba ruluuꞌyi raꞌ ba xchiꞌdxyi Jesucristu per
nin tuhbi gaꞌyu ayi rcaꞌha raꞌ ba loh raꞌ bwiinn nin ayi
riachii stoꞌ raꞌ ñiꞌh dxyiꞌdxyi guchii.
\v 8 Pwihsi niꞌchin
laꞌh raꞌ nuꞌh nahpa gachidxiaacaee nuꞌh laꞌh raꞌ bwiinn raꞌ
nin ruluuꞌyi xchiꞌdxyi Jesucristu nez guriin-guriin raꞌ
guihdxyi tin ziꞌchi gaca nuꞌh tuhsi cun dziꞌn nin cayuhnn
raꞌ ba.
\s Ayi cayuhnn Diótrefes dziꞌn zaꞌca
\p
\v 9 Laꞌn guxeꞌhla tuhbi dxihtsi loh raꞌ xpwiinn Jesucristu
riꞌca, per laꞌh Diótrefes ayi riuuꞌ ba ayi riaꞌzi ba
xchiꞌdxyiꞌhn laasii riuuꞌ stoꞌ ba guinabwaꞌ ba cun laꞌhgahca
xigaaba ba laꞌh raꞌ lasaaꞌ raꞌ nuꞌh nin rii riꞌca.
\v 10 Sidela naꞌh dxieꞌldahn riꞌca, zuuꞌyidxyiꞌdxyineꞌhn ba pur
nin cayuhnnee ba laꞌh raꞌ lasaaꞌ nuꞌh riꞌca chin
gadxaꞌgalasaaꞌ nuꞌh riꞌca. Laꞌh Diótrefes rñiꞌyah ba
laꞌhnuꞌh, nee ayi razahca ba cun duhlda raꞌ riiꞌ nee ayi
raannloh ba laꞌh raꞌ lasaaꞌ nuꞌh nin riaguiaꞌha cuun tu, ya
bwiinn raꞌ nin xclaaꞌdzi gaannloh laꞌh bwiinn raꞌ chi ayi
rusaaꞌn ba lwehgu rbweꞌhecaꞌha ba laꞌh raꞌ bwiinn chi loh
guidoꞌ.
\p
\v 11 Bwiitsi lasaaꞌ raꞌn nin nadziiꞌhihn, ayi guunn tu dziꞌn
dxaaba, laasii nin ruhnn dziꞌn dxaaba nagahdxi dxiuꞌnbwaꞌ ba
laꞌh Dxiohs; per nin ruhnn dziꞌn zaꞌca bwiinn chi naa ba
xpwiinn Ñiꞌh.
\s Xcweenta dziꞌn zaꞌca xteenn Demetriu
\p
\v 12 Garaa raꞌ bwiinn rñiꞌ raꞌ ba bwen duxa naa Demetriu,
nee xchiꞌdxyi guchii gahca Dxiohs rñiꞌ pur xcweenta ba,
neezaa laꞌhnu naa nu nin bwaꞌhaloh cweenta riiꞌ, nee laꞌhza
tu naannloh tu laꞌhnu rachiñiꞌ nu ganaalla dxyiꞌdxyi guchii
xteenn Dxiohs.
\s Luulchima dxyiꞌdxyi nin guñiꞌ San Jwahn
\p
\v 13 Naꞌh ziahan ru dxyiꞌdxyi nin ñucaꞌhn loh luꞌh, per ayi
xclaaꞌdzihn guꞌnnañin cun chiinda xteenn lahpi,
\v 14 laasii
xclaaꞌdzihn gwaꞌhahn loh luꞌh seguihdu gahca, ya chiꞌchi
gachidiꞌyidxyiꞌdxyi nuꞌh cun rwaaꞌ raꞌ nuꞌh.
\v 15 Gulachidxyii stoꞌ luꞌh; pwihsi xamihgu raꞌ luꞌh nin nuu raꞌ
riiꞌ ruxeꞌhla tuhbi guelrgahpaDxiohs para yiꞌh. Nee
rnaꞌbaꞌhn bwiꞌhnn tuhbi bweniꞌhn badiꞌhi tuhbi
guelrgahpaDxiohs para laꞌh raꞌ tuhbigah raꞌ xmihgu raꞌn nin
nuu riꞌca.