\id REV
\h Apocalipsis
\toc1 Apocalipsis
\mt1 Dxyiꞌdxyi raꞌ nin bacaꞌh Jwahn xcweenta raꞌ cohsa raꞌ ru nin gueꞌdu gaca raꞌ
\c 1
\s Baluuꞌyiloh Jesucristu loh Jwahn
\p
\v 1 Deeꞌ raꞌ naa dxyiꞌdxyi nin badiꞌhi Dxiohs laꞌh
Jesucristu tin baluuꞌyi Ñiꞌhn laꞌh raꞌ xmooza Ñiꞌh xcweenta
raꞌ cohsa raꞌ nin zeꞌyahlda gaca. Jesucristu baxeꞌhla
laꞌh tuhbi xaanjla Ñiꞌh loh Jwahn tin basagwaꞌ aanjla chi
laꞌh Jwahn garaa raꞌ bihsi nin rñiꞌ loh dxihtsi riiꞌ,
\v 2 niꞌchin nin bacaꞌh Jwahn loh dxihtsi riiꞌ garaa xchiꞌdxyi
Dxiohs nin baluuꞌyi Jesucristu laꞌh ba, nin basagwaꞌ Ñiꞌh
laꞌh ba ziga bihsi raꞌ nin bwaꞌha loh ba.
\p
\v 3 Dichohsa raꞌ bwiinn raꞌ nin rusiꞌdxi xchiꞌdxyi Dxiohs
nin caa loh dxihtsi riiꞌ nee ruzoꞌbadxiahga raꞌ ban, laasii
zeꞌgadzihn gahxu dxyih nin chaꞌloh ziga rñiꞌ loh dxihtsi
riiꞌ.
\s Jwahn rucaꞌh dxihtsi loh gagaadzi guidoꞌ hasta rii raꞌ xpwiinn Jesucristu
\p
\v 4 Naꞌh Jwahn, cagacaꞌhn dxihtsi riiꞌ loh raꞌ xpwiinn
Jesucristu nin rii gagaadzi guihdxyi raꞌ xteenn Asia.
Gulguicaꞌha guelrbwidxyii stoꞌ xteenn laꞌh gahca Dxiohs nin
naa nnadxyih, cun desde laꞌn dxyih raꞌ nin zeꞌdiiꞌdxi, nee
cun nin nahpa dxiꞌ, nee cun nin banaaza par tuꞌpazi, nee
xquelruhnntaaꞌyi cun xquelrbahchidxyii stoꞌ xteenn gagaadzi
raꞌ spíritu nin zuu nez hasta rnabwaꞌ Dxiohs,
\v 5 nee cun
neezaa xquelruhnntaaꞌyi xquelrbahchidxyii stoꞌ Jesucristu
nin ruluuꞌyi dxyiꞌdxyi nanchii laꞌh nuꞌh, laꞌh Ñiꞌh nin
mwer babahn za loh bwiinn guuchi; laꞌh za Ñiꞌh rnabwaꞌ
Ñiꞌh loh garaa raꞌ rrehyi raꞌ nin rii raꞌ loh guidxyiyuh.
Jesucristu rcaꞌhstoꞌ Ñiꞌh laꞌh raꞌ nuꞌh, nee basiaa Ñiꞌh
laꞌh raꞌ nuꞌh loh duhlda cun llarihn Ñiꞌh.
\v 6 Laꞌh za
Ñiꞌh bwiꞌhnn Ñiꞌh gaca nuꞌh tuhbi bwiinn rooꞌ tuhbi
guihdxyi rooꞌ, nee gahca za nuꞌh bixohza loh Dxiohs Xtaada
Ñiꞌh. ¡Garaatiiꞌ raꞌ bwiinn nahpa guunn lasahca lah Ñiꞌh
nee guinabwaꞌ Ñiꞌh par tuꞌpazi! Ziꞌchi gaca, pwihsi.
\p
\v 7 ¡Gulgacabwaꞌ! Ziꞌ Jesucristu loh xcahyi, ya garaa raꞌ
bwiinn zwaꞌhaloh raꞌ ba laꞌh Ñiꞌh, hasta bwiinn raꞌ nin
baxaala baldiꞌh tihxi Ñiꞌh cun lahnsa zwaꞌha za raꞌ ba
laꞌh Ñiꞌh; ya garaa raꞌ bwiinn guidxyiyuh zuꞌn raꞌ ba chin
gwaꞌha raꞌ ba loh Ñiꞌh. Ziꞌchi gaca.
\p
\v 8 ―Naꞌh naan des galoh nee cun hasta luulchima za ziga naa
raꞌ lehtra A cun Z, ―rñiꞌ Daada Dxiohs―. Naꞌh ziga naan
Dxiohs; nabahanahn nnadxyih, cun desde laꞌn dxyih raꞌ nin
zeꞌdiiꞌdxila, nee cun nin nahpa dxiꞌ; nee naꞌhza nin naꞌpahn
guelrnabwaꞌrooru loh garaatiiꞌ.
\p
\v 9 Naꞌh Jwahn, naan bwihtsi tu pur nin riachiiza stoꞌn laꞌh
Jesucristu, nee pur nin naaza nuꞌh tuhsi loh guelrzahcazii,
cun ziga chuuza nuꞌh tuhsi nez loh Dxiohs nee cun ziga
gacaza nuꞌh tuhsi loh guelpaseensi xteenn Jesucristu.
Pwihsi chin nuuꞌhuhn loh yuh nin nuu galaayi loh ñihsadoꞌ
nin laa Patmos, pur nin zegaluuꞌyiꞌhn xchiꞌdxyi Dxiohs,
laasii naꞌh naan nin bwaꞌhaloh dziꞌnroo raꞌ nin bwiꞌhnn
Jesucristu,
\v 10 pwihsi tuhbi dxyih Dumingu biaꞌhanahn loh
xquelrnabwaꞌ Spíritu Saantu xteenn Dxiohs ya bihnaꞌhn nez
diꞌtsihn tuhbi rsiaaꞌha ziga xteenn tuhbi trompeta,
\v 11 Nin
guñiꞌ loon squiiꞌ:
\p ―Naꞌh naan des galohtiiꞌyi nee cun para hasta fihnyi, ziga
zi lehtra A cun lehtra Z. Bacaꞌh loh tuhbi chihbru garaa
raꞌ nin gwaꞌha loh luꞌh, ya guixeꞌhla luꞌhn para xpwiiꞌnn
raꞌn nin rii loh gahdzi guihdxyi xteenn Asia, o sea par
loh guihdxyi Efesu, loh guihdxyi Esmirna, loh guihdxyi
Pérgamo, loh guihdxyi Tiatira, loh guihdxyi Sardis, loh
guihdxyi Filadelfia, nee cun loh guihdxyi Laodicea.
\p
\v 12 Chiꞌchi basiaꞌgarii loon tin bwaꞌhahn nez diꞌtsihn
chyuñin cañiꞌ loon, ya loh bwiꞌhnnaꞌhn ziꞌchi bwaꞌhahn
gagaadzi gandayehru ohro,
\v 13 ya galaayi gagaadzi
gandayehru chi bwaꞌhahn zuu tuhbi nin naa Lliiꞌn Dxiohs nin
naa ndxiꞌhw, nahcu Ñiꞌh tuhbi lahdxi nin radzihn hasta yihca
ñaaꞌ Ñiꞌh, nee cun tuhbi cinturohn nin naa ganaalla ohro
lliꞌhiduꞌh laꞌntihxi Ñiꞌh.
\v 14 Yihca Ñiꞌh cun dxyichyihca
Ñiꞌh xñah labweh nachiitsin ziga zi dxyihchi lliꞌhyi, o ziga
zi labweh guiiꞌga; ya bizloh Ñiꞌh ziga zi bwehla;
\v 15 ya
ñaaꞌ Ñiꞌh rcaꞌbachaꞌhan ziga zi dxiꞌba nin laa bronce chin
nuuꞌhun loh dxih; ya rsiaaꞌha xteenn xchiꞌdxyi Ñiꞌh naan
ziga zi chin riuuꞌbwih ziꞌhyirooꞌ ñihsa;
\v 16 ya xlahdu
derehchu naa Ñiꞌh niinloh gahdzi dxih llaaꞌndxibaaꞌ; ya
rwaaꞌ Ñiꞌh niinloh tuhbi spahda nin caa duxa garoopa dihtsi
ñiꞌh; ya gaduhbi loh Ñiꞌh xñahan ziga loh gubihdxyi chin
rziaꞌñih gubihdxyi gaduhbi lagaꞌtiiꞌ.
\v 17 Chin guyaꞌloh
bwaꞌhahn loh Ñiꞌh, biaabaꞌhn loh yuh nez hasta zuu ñaaꞌ Ñiꞌh
ziga zi bwiinn guuchi, chiꞌchi badziiꞌba naa Ñiꞌh nin naa
lahdu derehchu yiꞌcahn, chiꞌchi guñiꞌ Ñiꞌh loon, nah Ñiꞌh:
\p ―Ayi guidxyihbi luꞌh; naꞌh nin nabahanahn des galohtiiꞌyi,
nee naꞌh za nin ba nabahan par tuꞌpazi.
\v 18 Naꞌh nin naan
nin nabahanahn nnah, guhchiꞌhn per gubiaꞌgarii ba nabahnahn
yannah ba nabahnahn par tuꞌpazi; naꞌh naꞌpahn guelrnabwaꞌ
loh guelguhchi nee cun loh gabihldxyi za.
\v 19 Niꞌchin nin
bacaꞌh xcweenta garaa raꞌ nin bwaꞌha luꞌh, nin cayahca nnah,
neezaa cun nin gueꞌdu zeꞌyahlda gaca.
\v 20 Deeꞌ naa
dxyiꞌdxyi nagaꞌtsi xteenn gagaadzi dxih llaaꞌndxibaaꞌ nin
bwaꞌha luꞌh lahdu derehchu naaꞌhahn, nee cun xcweenta za
gagaadzi gandayehru ohro raꞌ: gagaadzi dxih llaaꞌndxibaaꞌ
chi naa raꞌ xaanjla Dxiohs nin rahpa raꞌ xpwiiꞌnnraꞌn nin
rii loh gagaadzi guihdxyi raꞌ, ya gagaadzi gandayehru raꞌ
nin naa ohro raꞌ nin bwaꞌha luꞌh chi naa xpwiiꞌnnraꞌn nin
rii loh gagaadzi za guihdxyi raꞌ chi.
\c 2
\s Dxyiꞌdxyi nin guzee loh raꞌ xpwiinn Jesucristu nin rii loh guihdxyi Efesu
\p
\v 1 Chiꞌchi nah Ñiꞌh loon:
\p ―Bacaꞌh dxyiꞌdxyi raꞌ riiꞌ loh xaanjla Dxiohs nin rahpa
xpwiiꞌnnraꞌn nin rii loh guihdxyi Efesu: “Squiiꞌ rñiꞌ nin
caa gahdzi dxih llaaꞌndxibaaꞌ naa derehchu Ñiꞌh, nin
caꞌnzaa galaayi gagaadzi raꞌ gandayehru ohro raꞌ.
\v 2 Naꞌh
nuꞌnbwaꞌn xtsiꞌn tu cun guelrzaꞌcazii nin rutiꞌdxiloh tu loh
xtsiꞌn tu nee xa riazahdziꞌtsi tu loh xchiꞌdxyiꞌhn, nee
naꞌnnzahn ayi rchaꞌga tu laꞌh raꞌ bwiinn nadxaaba raꞌ, nee
ziga laꞌh tu biuuꞌnbwaꞌza tu xcweenta bwiinn raꞌ nin rñiꞌ
naa raꞌ xpooxtla Dxiohs per ayi naa raꞌ ba xpwiinn Dxiohs.
Sola naann tu naa raꞌ ba bwiinn rusaguiꞌhi raꞌ.
\v 3 Pwihsi
gwazahdziꞌtsi tu loh xchiꞌdxyiꞌhn, bwiꞌhnn tu waanta
batiꞌdxiloh tu guelrzaꞌcazii pur naa tu xpwiiꞌnnraꞌn, nee
ayi bietagueeta tu.
\v 4 Per naꞌpahn tuhbi guelchiah nin
rbaꞌchihn xcweenta tu, laasii ayi ru rucaꞌh stoꞌ tu naꞌh
ziga bacaꞌstoꞌ tu naꞌh des galoh.
\v 5 Pwihsi niꞌchin
gulgazaꞌstoꞌ tu caa loh guzaꞌbi tu, gulgachaꞌh ziga nabahan
tu tin gulgabiaꞌgarii gulguiꞌhnn ziga gubahan tu des
galohtiiꞌyi; sinolan lwehgu gahca gadxiꞌhyihn laꞌh tu nee
gusiaꞌpitiin xgandayehru tu xnehzan sidela ayi guchaꞌh
tu lligaaba guelruhnn chiohpa stoꞌ nin nuu stoꞌ tu.
\v 6 Per
nuu nin ruhnn xnehza tu: ayi riuuꞌstoꞌ tu nin ruhnn raꞌ
bwiinn nicolaita raꞌ, ziꞌchi za naꞌh ayi riuuꞌstoꞌn dziꞌn
nin ruhnn raꞌ ba.
\v 7 Bwiinn nin zohballaala dxiahga ñiꞌh
chuu ba chaꞌzi ba dxyiꞌdxyi raꞌ nin rñiꞌ Spíritu Saantu
xteenn Dxiohs loh raꞌ xpwiiꞌnnraꞌn, ya bwiinn raꞌ nin guunn
gahn loh duhlda, zudiꞌhihn ñinahxi nin caa loh yahga nin naa
guelnabahan gahw raꞌ ba, yahga ñinahxi nin nuu llaaꞌndxibaaꞌ
hasta nuu Dxiohs.”
\s Dxyiꞌdxyi raꞌ nin rñiꞌ loh dxihtsi riiꞌ par laꞌh raꞌ xpwiinn Jesucristu nin rii loh guihdxyi Esmirna
\p
\v 8 Chiꞌchi nah Ñiꞌh loon:
\p ―Bacaꞌh dxyiꞌdxyi raꞌ riiꞌ loh xaanjla Dxiohs nin rahpa
xpwiiꞌnnraꞌn nin rii loh guihdxyi nin laa Esmirna: “Naꞌh
nin naan des galohtiiꞌyi nee naꞌh za nin naan par loh dxyih
luulchima raꞌ, naꞌh nin guhchiꞌhn per gubiaꞌgarii ba
nabahan.
\v 9 Naꞌh naꞌnnahn xa rutiꞌdxiloh tu guelrzaꞌcazii
nee naꞌnnzahn gulliaaꞌhatiiꞌ nin nahpa tu nee nicala naa tu
nin nuu ziahan xixteenn ñiꞌh loh Dxiohs, nee naꞌnnzahn nuu
nin rñiꞌyah raꞌ laꞌh tu nee rahbi raꞌ ba naa raꞌ ba bwiinn
Israel per ayi naa raꞌ ba ziꞌchi; nin naa raꞌ ba laꞌh raꞌ ba
naa raꞌ ba xpwiinn xquidoꞌ bwiinndxaaba.
\v 10 Ayi
guidxyihbi tu loh xcweenta guelrzaꞌcazii nin laꞌh guhlda
gutiꞌdxiloh tu, laasii laꞌh bwiinndxaaba gusieꞌw paaldaa tu
laꞌn lahtsidxiꞌba, tin gacabwaꞌ ba guiduꞌhun ta guchii tu
gwachiistoꞌ tu xchiꞌdxyiꞌhn, ya zutiꞌdxiloh tu guelrzaꞌcazii
tsiꞌh gubihdxyi; gulgasuhchihpa lastoꞌ tu tin chezah dziꞌtsi
tu loh xchiꞌdxyiꞌhn nicala gachi tu, per naꞌh guniꞌhihn
guelnabahan nin ba naa par tuꞌpazi laꞌh tu ziga tuhbi
corohna.
\v 11 Nin luꞌh xclaaꞌdzi guzoꞌbadxiahga dxyiꞌdxyi,
gucaꞌhdxiahga ba dxyiꞌdxyi nin rñiꞌ Spíritu Saantu xteenn
Dxiohs loh raꞌ bwiinn guidoꞌ xteenn Dxiohs: nin guunn raꞌ
gahn loh duhlda, ayi xi guunnee guelguhchi nin raroopa laꞌh
raꞌ ba.”
\s Dxyiꞌdxyi raꞌ nin rñiꞌ loh raꞌ xpwiinn Jesucristu nin rii loh guihdxyi Pérgamo
\p
\v 12 Chiꞌchi nah Ñiꞌh loon:
\p ―Bacaꞌh dxyiꞌdxyi raꞌ riiꞌ loh xaanjla Dxiohs nin rahpa
xpwiiꞌnnraꞌn nin rii loh guihdxyi Pérgamo: “Naꞌh nin
naꞌpahn spahda nin caa duxa garoopa dihtsi ñiꞌh rñiꞌn
dxyiꞌdxyi riiꞌ.
\v 13 Naꞌh naꞌnnahn nuu tu loh guihdxyi nin
rnabwaꞌ bwiinndxaaba, per zeezahnee dziꞌtsi tu xchiꞌdxyiꞌhn,
ayi cabweꞌhestoꞌ tu xchiꞌdxyiꞌhn nicala laꞌn dxyih nin
gudxiinn raꞌ ba laꞌh Antipas, nin guñiꞌ xcweenta
xchiꞌdxyiꞌhn, nin gwazahnee zaꞌcapaꞌh xchiꞌdxyiꞌhn nin
gudxiinn raꞌ ba hasta rnabwaꞌ bwiinndxaaba,
\v 14 per guyuuꞌ
chiohpa-choon xtuhlda tu: loh tu dxaꞌga raꞌ bwiinn raꞌ nin
ruhnn ziga bwiꞌhnn guehtu Balaam ba guhca cadxyih rooꞌ; laꞌh
ba basiꞌdxi ba laꞌh guehtu Balac xa guunn ba tin dxiaaba raꞌ
bwiinn Israel loh duhlda, baluuꞌyi ba laꞌh raꞌ bwiinn Israel
tin gahw raꞌ ba cohsa raꞌ nin badiꞌhi guhn raꞌ ba nez loh
dxaan, nee basiꞌdxi za ba laꞌh raꞌ bwiinn Israel guidxaꞌga
raꞌ ba chyu chiꞌh zi gunnaꞌh.
\v 15 Ziꞌchi gahca za nahpa tu
bwiinn raꞌ nin zeezahnee raꞌ dxyiꞌdxyi raꞌ nin ruluuꞌyi raꞌ
nin laa nicolaita raꞌ nin rdxyiꞌchihn xcweenta raꞌ ñiꞌh,
\v 16 niꞌchin gulgachaꞌh stoꞌ tu; sino laꞌn seguihdu gahca
dxieꞌldahn tin childxineꞌhn niꞌchi raꞌ cun spahda nin nuu
rwaaꞌhahn.
\v 17 Nin luꞌh xclaaꞌdzi guzoꞌbadxiahga
dxyiꞌdxyi; gucaꞌdxiahga ba dxyiꞌdxyi raꞌ nin rñiꞌ Spíritu
Saantu Dxiohs loh raꞌ xpwiiꞌnnraꞌn: nin guunn gahn loh
duhlda, niꞌchi raꞌ gudiꞌhihn tuhbi lasaaꞌ pahn nin laa manah
gahw raꞌ ba laꞌn nuuchaꞌyi, nee gudiꞌhi zahn tuhbi dxiah
labweh laꞌh bwiinn chi ya loh dxiah labweh chi caa tuhbi lah
nacuubi nin ayi chyu nuꞌnbwaꞌtiiꞌ sola nuꞌnbwaꞌ nin guicaꞌha
dxiah yiꞌhn chi lah nin caa loh dxiahyiꞌhn chi.”
\s Dxyiꞌdxyi raꞌ nin rñiꞌ loh raꞌ xpwiinn Jesucristu nin rii loh guihdxyi Tiatira
\p
\v 18 Chiꞌchi nah Ñiꞌh loon:
\p ―Bacaꞌh dxyiꞌdxyi raꞌ riiꞌ loh xaanjla Dxiohs nin rahpa
xpwiiꞌnnraꞌn nin rii loh guihdxyi Tiatira: “Squiiꞌ guñiꞌ
Lliiꞌn Dxiohs, nin naa bizloh ñiꞌh ziga zi bwehla ya ñaaꞌ
Ñiꞌh ziga zi dxiꞌba nin laa bronce nin rcaꞌbachaꞌh.
\v 19 Naꞌh laꞌn naann la garaa raꞌ nin ruhnn tu; naꞌnnahn xa
rantsiiꞌhi lasaaꞌ tu, nee xa riachiistoꞌ tu xchiꞌdxyiꞌhn,
nee xa naa xtsiꞌn tu nee xa riazah dziꞌtsi tu, nee naꞌnnahn
cayuhnn tu dziꞌn rooꞌ ru nnah loh galoh nin guzoꞌbaloh tu,
\v 20 per nuu tuhbi guelchiah nin rdxiꞌchihn pur laꞌh tu;
laasii rcahbi tu riuuꞌ tu loh tuhbi gunnaꞌh nin laa Jezabel.
Laꞌh ba rñiꞌ si ba naa ba tuhbi profehta, gunnaꞌh nin rñiꞌ
xchiꞌdxyi Dxiohs, ya pur nin ruluuꞌyi ba rusaguiꞌhi zi ba
laꞌh raꞌ xpwiiꞌnnraꞌn tin rzaꞌbi raꞌ ba loh raꞌ dziꞌn
gubwihlli nee tin rahw za raꞌ ba cohsa raꞌ nin rbwih loh
dxaan.
\v 21 Naꞌh laꞌn guleꞌza xchih tin gusaguuꞌdzi stoꞌ ba
pur xtuhlda ba, per ayi guclaaꞌdzitiiꞌ ba ñuhnn ban; ayi
rbweꞌhestoꞌ ba dziꞌn gubwihlli nin ruhnn ba.
\v 22 Pwihsi
naꞌh guꞌnnahn dxiaaba ba loh luꞌhn cun tuhbi gueldxyihdxyi
duxa, nee cun garaa raꞌ nin ruhnnee laꞌh ba dziꞌn gubwihlli
gutiꞌdxi raꞌn ba loh guelrzaꞌcazii duxa sidela ayi
gusaguuꞌdzi stoꞌ raꞌ ba xcweenta xtsiꞌn Jezabel.
\v 23 Zidxiꞌnnahn lliiꞌn ba, ya ziꞌchi zahcabwaꞌ garaa raꞌ
xpwiꞌnnraꞌn naꞌh nuꞌnbwaꞌn garaatiiꞌ nin nuu xigaaba
tu cun ziga naa stoꞌ tu; ya tuhbigah tu guniꞌhihn nin rgaꞌha
guicaꞌha tu ziga naa xtsiꞌn tuhbigah tu.
\v 24 Per laꞌh tu
garaa raꞌ ru nin nuu loh guihdxyi Tiatira, nin raꞌ ayi
zeezah loh dxyiꞌdxyi nin ruluuꞌyi Jezabel nee nin ayi za
nuꞌnbwaꞌ tu nin rñiꞌ raꞌ ba naa dxyiꞌdxyi ralaꞌn xteenn
bwiinndxaaba, naꞌh nin stuhbi dziꞌn ayi rudziꞌbaꞌhn yihca
nin naa tuhbi dxiꞌh xtsiꞌn tu.
\v 25 Mas gulgahpa dziꞌtsi
xchiꞌdxyiꞌhn nin nahpa tu hastayi chin dxieꞌldahn stuhbi,
\v 26 ya bwiinn raꞌ nin guunn gahn loh duhlda nee chezah tu
ziga xclaaꞌdzihn hasta laꞌn dxih nin chaꞌloh guidxyiyuh,
zudiꞌhihn guelrnabwaꞌ laꞌh raꞌ ba tin guinabwaꞌ raꞌ ba loh
raꞌ naciohn raꞌ.
\v 27 Pwihsi ziga baniꞌhi Xtaaꞌdahn
guelrnabwaꞌ naꞌh, zudiꞌhihn guelrnabwaꞌ laꞌh raꞌ ba tin
guinabwaꞌ raꞌ ba loh raꞌ garaa raꞌ bwiinn guidxyiyuh, nee
guunn raꞌ za ba guelguxchisi xcweenta raꞌ ba ziga zi cun
tuhbi bahra dxiꞌba ziga ruhn nin ruhnnchaꞌyi guihsu bwehn,
rutaaꞌha raꞌ ba garaa raꞌ guihsu nin ayi galluꞌyi.
\v 28 Zudiꞌhi zahn dxih nin riꞌ rsiiyidoꞌ laꞌh raꞌ ba.
\v 29 Nin
ayi ñieꞌw dxiahga ñiꞌh, guzoꞌbadxiahga raꞌ ba nin rñiꞌ
Spíritu Saantu Dxiohs loh raꞌ xpwiiꞌnnraꞌn.”
\c 3
\s Dxyiꞌdxyi nin rñiꞌ loh raꞌ xpwiinn Jesucristu nin rii loh guihdxyi Sardis
\p
\v 1 Chiꞌchi nah Ñiꞌh loon:
\p ―Bacaꞌh dxyiꞌdxyi raꞌ riiꞌ loh xaanjla Dxiohs nin rahpa
xpwiiꞌnnraꞌn nin rii loh guihdxyi Sardis: “Ziꞌchi nah nin
rahpa gagaadzi Spíritu xteenn Dxiohs nee cun gagaadzi dxih
llaaꞌndxibaaꞌ loon: Naꞌh naannloon garaa raꞌ dziꞌn nin ruhnn
tu, nee naann zahn naa tu ziga tuhbi bwiinn guuchi, ayi ru
guunn tu xtsiꞌnaꞌhn nicala zaꞌbi dxyiꞌdxyi nabahan tu.
\v 2 Gulgatiꞌchi bacaꞌlda loh tu nee gulguiñah loh raꞌ xcweenta
xchiꞌdxyiꞌhn nin amwerla ñichiloh laꞌn lastoꞌ tu, pwihsi
naꞌh caywaꞌhaloon garaa nin ruhnn tu nin ayi naa bwen nez
delanta loh Daada Dxiohs xteꞌnnahn.
\v 3 Gulgazaꞌstoꞌ tu
dxyiꞌdxyi raꞌ nin basiꞌdxi tu cun bacaꞌdxiahga tu, niꞌchin
gulgazoꞌbadxiahga dxyiꞌdxyi gulgachaꞌh ziga nabahan tu loh
duhlda, per sidela ayi guchaꞌh tu xmohda tu, zadzihnaꞌhn nez
loh tu ziga tuhbi gubaꞌn nin ayi gaann tu xohra gadzihnaꞌhn
nez loh tu.
\v 4 Per nahpa tu loh guihdxyi Sardis paaldaa
raꞌ bwiinn nin nayaa nin nagahdxi saꞌbi raꞌ loh duhlda, ya
laꞌh raꞌ bwiinn raꞌ chi zahcu raꞌ ba lahdxi labweh tin
sahnee raꞌ ba naꞌh nez llaaꞌndxibaaꞌ laasii ziꞌchi ruhnn
tucahri laꞌh raꞌ ba.
\v 5 Nin guunn raꞌ gahn loh duhlda,
niꞌchi raꞌ gacu lahdxi labweh, nee ayi guraꞌhn lah bwiinn
raꞌ chi loh chihbru nin caa lah raꞌ bwiinn nin guibahannee
laꞌh Dxiohs par tuꞌpazi nee ziñiꞌn nez delanta loh Xtaaꞌdahn
cun nez loh za raꞌ xaanjla Ñiꞌh bwiinn raꞌ riiꞌ naa raꞌ
xpwiiꞌnnraꞌn.
\v 6 Bwiinn raꞌ nin zohballaala dxiahga raꞌ
ñiꞌh guzoꞌbadxiahga raꞌ ba dxyiꞌdxyi raꞌ nin rñiꞌ Spíritu
Saantu xteenn Dxiohs loh raꞌ xpwiiꞌnnraꞌn.”
\s Dxyiꞌdxyi raꞌ nin rñiꞌ loh raꞌ xpwiinn Jesucristu nin rii loh guihdxyi Filadelfia
\p
\v 7 Chiꞌchi nah Ñiꞌh loon:
\p ―Bacaꞌh dxyiꞌdxyi riiꞌ loh xaanjla Dxiohs nin rahpa
xpwiiꞌnnraꞌn nin rii loh guihdxyi Filadelfia: “Squiiꞌ rñiꞌ
nin banayaa par tuꞌpazi, nin guchii naa xchiꞌdxyi Ñiꞌh, nin
nahpa xchiahyi guehtu Davihd; laꞌh Ñiꞌh chin ruxaala Ñiꞌh
ayi nin tuhbi nin guunn gahn gusieꞌw hasta ruxaala Ñiꞌh,
nee chin rusieꞌw Ñiꞌhn ayi za nin guunn gahn guxaala hasta
rusieꞌw Ñiꞌh.
\v 8 Naꞌh naꞌnnahn garaa raꞌ nin ruhnn tu.
Baxaaꞌlahn tuhbi rwaaꞌ leeꞌ nez delanta loh tu nin ayi guunn
chyu chiꞌh zi gahn dxieꞌw; pwihsi nicala gulliaꞌyiꞌhn naa
xjweersi tu per bazoꞌbadxiahga tu xchiꞌdxyiꞌhn nee ayi
rbweꞌhestoꞌ tun,
\v 9 pwihsi zwaꞌha tu cuun nin gusahcaꞌhn
laꞌh raꞌ bwiinn raꞌ nin zeenaꞌhla laꞌh bwiinndxaaba; laꞌh
raꞌ nin rñiꞌzi raꞌ naa raꞌ bwiinn Israel, per ayi naa raꞌ
ban; rusaguiꞌhi raꞌ ba laꞌh raꞌ bwiinn. Naꞌh zuꞌnnpaꞌcaan
dxieꞌbiiga raꞌ ba nez loh tu tin guzuꞌnllihbi raꞌ ba nez loh
tu tin gacabwaꞌ raꞌ ba naꞌh rucaꞌhstoꞌn laꞌh tu,
\v 10 laasii
ayi rriaꞌgahn tu loh xchiꞌdxyiꞌhn, niꞌchin naꞌh zahcaneꞌhn
laꞌh tu chin gutiꞌdxiloh tu guelrzaꞌcazii, nee zutiꞌdxiloh
za garaa raꞌ bwiinn guidxyiyuh guelrzaꞌcazii tin guiduꞌhun
cuun paꞌca nin naa raꞌ bwiinn zaꞌca loh raꞌ bwiinn
guidxyiyuh raꞌ.
\v 11 Naꞌh ayi gacataꞌh ru dxieꞌldahn; bwaꞌha
dziꞌtsi cun xchiꞌdxyiꞌhn nin nahpa tu tin ayi chyulla
cweꞌhelluꞌhu nin baniꞌhihn gucaꞌha tu.
\v 12 Bwiinn raꞌ nin
guunn gahn loh duhlda, naꞌh guꞌnnahn gaca raꞌ ba ziga tuhbi
piyahri nin nuu hasta naa xquidoꞌ Xtaaꞌdahn, nee ayi chuu
dxyih nin gariaꞌh raꞌ ba riꞌchi; locah raꞌ ba gucaꞌhn nin
naa lah Dxiohs Xtaaꞌdahn neezaa lah guihdxyi nin laa
Jerusalehn nacuubi nin dxiehta llaaꞌndxibaaꞌ hasta nuu
Dxiohs, nee zucaꞌh zahn laan locah raꞌ ba laan nin naa
nacuubi laasii naa raꞌ ba xpwiiꞌnnraꞌn.
\v 13 Bwiinn nin
zohba dxiahga ñiꞌh guzoꞌbadxiahga ba nin rñiꞌ Spíritu
Saantu Dxiohs loh raꞌ xpwiiꞌnnraꞌn.”
\s Dxyiꞌdxyi raꞌ nin rñiꞌ loh raꞌ xpwiinn Jesucristu raꞌ nin rii loh guihdxyi Laodicea
\p
\v 14 Chiꞌchi nah Ñiꞌh loon:
\p ―Bacaꞌh dxyiꞌdxyi raꞌ riiꞌ loh xaanjla Dxiohs nin rahpa
xpwiiꞌnnraꞌn nin rii loh guihdxyi Laodicea: “Squiiꞌ rñiꞌ
nin ayi rusaguiꞌhi, nin rñiꞌ ganaalla dxyiꞌdxyi guchii, nin
gulahchixchih garaa nin bwiꞌhnn Dxiohs lligaaba gacachaꞌyi.
\v 15 Naꞌh naꞌnnahn garaa nin naa xtsiꞌn tu; ayi zeezah zaꞌca
tu loh xchiꞌdxyiꞌhn, ayi za rbweꞌhestoꞌ tun, ¡mas chaꞌyi
ñahzanee zaꞌca tun o ñibweꞌhestoꞌ tun!
\v 16 Per nnah naa tu
ziga zi ñihsa nadxaꞌha; ayi za naa tu nin ziga ñihsa nahlda,
nin ayi za naa tu ziga ñihsa ldaꞌh, niꞌchin zabweꞌhe
rwaaꞌhahn laꞌh tu.
\v 17 Pwihsi laꞌh tu rñiꞌ tu: Ricuꞌhn,
nee bwen gahca riuuꞌhuhn; ayi xi riaꞌdxiꞌhn, per laꞌh tu ayi
rahcabwaꞌ tu naa tu ziga tuhbi bwiinn nin ayi xi nahpatiiꞌ;
naa tu ziga tuhbi bwiinn gubiin, tuhbi bwiinn prohbi duxa,
tuhbi bwiinn nin ayi riin loh ñiꞌh, nee naa tu ziga tuhbi
bwiinn nin zuu llaꞌteh par laꞌh Dxiohs.
\v 18 Niꞌchin nin
rñiꞌn loh tu gulsiꞌ ohro loon, ohro nin ba gudiiꞌdxi loh
dxih buꞌhu tin ziꞌchi gaca tu ziga tuhbi ricu paꞌcaa, nee
loo zahn siꞌ tu lahdxi labweh nachitsi nin gacu tu tin
xtuhyi zuu llaꞌteh tu; nee guniꞌhi zahn rramwehdxi nin chuu
baloh tu tin gwaꞌha zaꞌca tu.
\v 19 Naꞌh rñiꞌneꞌhn cun rzuh
zaꞌcaꞌhn laꞌh garaa raꞌ bwiinn raꞌ nin rucaꞌhstoꞌn niꞌchin
nin rñiꞌn loh tu nahpa chuꞌguiꞌw stoꞌ tu guunn tu
xtsiꞌnaꞌhn, nee gulgachaꞌh lligaaba dxaaba nin nuu stoꞌ tu.
\v 20 Gulguiaꞌha, naꞌh laꞌn zuu rwaaꞌ leeꞌ xteenn stoꞌ tu,
cabwiidxihn, per sidela chyulla tuhbi tu dxihn cañiꞌn,
guxaala bwiinn chi rwaaꞌ leeꞌ xteenn lastoꞌ ba, tin guunn
yiidzihn lastoꞌ bwiinn chi tin gacaneꞌhn bwiinn chi guibahan
zaꞌca ba nez loon,
\v 21 ya bwiinn nin ruhnn gahn loh duhlda,
laꞌh bwiinn chi gudiꞌhihn guinabwaꞌnee ba naꞌh llaaꞌndxibaaꞌ,
ziga bwiꞌhnnaꞌhn gahn loh duhlda niꞌchin nin guzoꞌbaꞌhn hasta
rnabwaꞌ Xtaaꞌdahn llaaꞌndxibaaꞌ.
\v 22 Bwiinn nin zohba
llaala dxiahga ñiꞌh guzoꞌbadxiahga raꞌ ba dxyiꞌdxyi raꞌ nin
rñiꞌ Spíritu Saantu Dxiohs loh raꞌ xpwiiꞌnnraꞌn.”
\c 4
\s Bwaꞌha Jwahn billaala rwaaꞌ leeꞌ xteenn dxibaaꞌ
\p
\v 1 Chin guyaꞌloh bacaꞌhn dxyiꞌdxyi raꞌ nin gunabwaꞌ Ñiꞌh
bacaꞌhn, chiꞌchi guteesa loon nez dxibaaꞌ, bwaꞌhahn
zohballaala rwaaꞌ ziga tuhbi yuuꞌ nez dxibaaꞌ, chiꞌchi guñiꞌ tuhbi
rsiaaꞌha loon, rsiaaꞌha chi naan ziga rsiaaꞌha xteenn tuhbi
trompeta nin bihn dxiaagahn galoh, nah rsiaaꞌha chi loon:
\p ―Gucah riiꞌ, tin guluꞌyiꞌhn yiꞌh garaaꞌ raꞌ nin chuu ru
gaca chin tuulla gaca cohsa raꞌ riiꞌ.
\p
\v 2 Ya chiꞌchi biaꞌhanahn loh guelrnabwaꞌ xteenn Spíritu
Saantu, ya bwaꞌhahn tuhbi yahgaxiiyi rooꞌ llaaꞌndxibaaꞌ
hasta rbwih raꞌ nin rnabwaꞌ llaaꞌndxibaaꞌ, ya loh yahgaxiiyi
chi zohba nin rnabwaꞌ llaaꞌndxibaaꞌ.
\v 3 Ya nin zohba loh
yahgaxiiyi chi rñah niꞌchi ziga tuhbi dxiah nin rbwiibwehla
nin laa jaspe o nin laa za cornalina, ya gadiidxi yahgaxiiyi
chi nuu tuhbi guundzihin nin rcaꞌbachaꞌh duxa ziga zi tuhbi
dxiah nin laa esmeralda,
\v 4 ya gadiidxi yahgaxiiyi riiꞌ
bwaꞌhahn za galda bitapa yahgaxiiyi raꞌ nin zohba galda
bitapa bwiinnguuhla raꞌ, nahcu raꞌ ba ganaalla lahdxi labweh
ya nuu tuhbigah raꞌ corona ohro yihca raꞌ ba,
\v 5 ya nez loh
yahgaxiiyi rooꞌ chi riꞌchi rreꞌh duꞌhdxih raꞌ nin naa
duꞌhdxih nin rreꞌh chin rdxiꞌñaaꞌ, ya nez loh za yahgaxiiyi
rooꞌ chi cacadxih gahdzi bwehla nin naa gahdzi spíritu
xteenn Dxiohs,
\v 6 cun nez lohgahcaza yahgaxiiyi rooꞌ chi
nuu ñihsadoꞌ nin rñah ziga zi dxiawahan. Nee cun galaayiza
yahgaxiiyi rooꞌ chi cun gadiidxin rii raꞌ tahpa maan raꞌ nin
nuu bizloh raꞌ ñiꞌh gadiidxitiiꞌ raꞌ ma tantu nez delanta
ziga nez dihtsi raꞌ za ma.
\v 7 Nin naa mwer tuhbi maan raꞌ
chi naa tuhbi bweꞌdzi; ya nin raroopa maan chi naa ziga
tuhbi guun; ya nin riohnna chi naa ziga loh tuhbi ndxiꞌhw;
ya nin radaapa maan chi naa ziga tuhbi bisiah nin rzuh.
\v 8 Ya gadaapa raꞌ maan raꞌ chi tuhbigah raꞌ ma zohba xoꞌpagah
xiiyi raꞌ ma, ya gaduhbitiiꞌ tihxi raꞌ ma nuu bizloh raꞌ ma;
nee dxyih-nagueꞌla ayi rbweeza cañiꞌ raꞌ ma:
\q Saantu, saantu, saantu naa Daada Dxiohs nin nahpa
guelrnabwaꞌ rooꞌ, nin nuu des galohtiiꞌyi, nin nuu nnah, cun
nin chuu par tuꞌpazi.
\p
\v 9 Ya chin ruhnn lasahca raꞌ gadapa maan raꞌ chi cun
ruzuꞌnllihbi raꞌ ma cun rudiꞌhi raꞌ ma guelzuxchilli loh nin
zohba loh yahgaxiiyi nin ba rnabwaꞌ par tuꞌpazi,
\v 10 ya
gagalda bitapa raꞌ bwiinn guuhla raꞌ ruzuꞌnllihbi raꞌ ba nez
loh nin ba rnabwaꞌ par tuꞌpazi cun raann raꞌ ba laꞌh Ñiꞌh,
ya ruzuhcaa raꞌ ba xcurohn raꞌ ba hasta zuu xahgaxiiyi
Ñiꞌh, cun rahbiza raꞌ ba:
\q
\v 11 Daada Dxiohs Xtaada nu, Yuꞌbi paꞌca luꞌh rgaꞌha
guunnlasahca bwiinn lah luꞌh cun guzuꞌnllihbi raꞌ ba loh
luꞌh cun guicaꞌha za luꞌh garaa guelrnabwaꞌ
\q laasii Yuꞌbiluꞌh bwiꞌhnnchaꞌyi luꞌh garaatiiꞌ raꞌ nin nuu
nnah pur xigaaba luꞌh guhca raꞌn niꞌchin nin gurihxchih
raꞌn.
\c 5
\s Tuhbi chihbru cun nin naa Xiꞌhyi Dxiohs
\p
\v 1 Chiꞌchi naꞌh Jwahn bwaꞌhahn loh naa derehchu nin zohba
loh yahgaxiiyi rooꞌ nin naa trono, nuu tuhbi dxihtsi nin
biduꞌbi, caa lehtra loon cun nez dihtsin ya ñieꞌwun cun
gahdzi sehyu,
\v 2 chiꞌchi bwaꞌhahn loh tuhbi xaanjla Dxiohs
nin nahpa zirooꞌ jweersi, chiꞌchi guñiꞌ jweersi aanjla chi
rahbi ba:
\p ―¿Chyu niꞌca ruhnn tucahri guxaala loh dxihtsi riiꞌ nee
chiꞌllu za niꞌchi sehyu nin caa loh dxihtsi riiꞌ?
\p
\v 3 Per nin llaaꞌndxibaaꞌ nin loh guidxyiyuh ayi bidxeela
nin ñuxaala loh dxihtsi chi o mas ñwaꞌha si ba loh
dxihtsi chi,
\v 4 chiꞌchi guzoꞌbaloh ruꞌn duuxaꞌhn laasii ayi
bidxeela nin tuhbi nin ruhnn tucahri ñixaala loh dxihtsi chi
tin ñuꞌlda ba loh dxihtsi chi, o mas ñwaꞌha za ba loh
dxihtsi chi,
\v 5 chiꞌchi guñiꞌ tuhbi bwiinn guuhla loon, nah
ba:
\p ―Ayi ru guꞌn luꞌh; laꞌh bweꞌdzi nin naa xahgadoꞌ guehtu
Judah cun xahgadoꞌ guehtu Davihd, laꞌh Ñiꞌh bwiꞌhnn gahn loh
guelguhchi niꞌchin nnah laꞌh Ñiꞌh ruhnn tucahri guxaala loh
dxihtsi ca cun chiꞌllu Ñiꞌh gagaadzi sehyu nin caa
dihtsi ca.
\p
\v 6 Ya chiꞌchi galaayi yahgaxiiyi rooꞌ nin naa tronu cun nez
loh raꞌ gadaapa raꞌ maan raꞌ nin rii gadiidxi tronu chi cun
galaayi bwiinn guuhla raꞌ, bwaꞌhahn zuu tuhbi nin naa Xiꞌhyi
Dxiohs, nicala rluuꞌyi sehn raꞌ nin guhchi Ñiꞌh ziga
lliꞌhyi nin rbahchi guhn raꞌ bwiinn loh Dxiohs; zohba
gahdzi xcahchu Ñiꞌh neezaa nuu gahdzi baꞌloh Ñiꞌh nin naa
gahdzi Spíritu xteenn Dxiohs nin ruxeꞌhla Ñiꞌh nez
gaduhbitiiꞌ loh guidxyiyuh,
\v 7 ya chiꞌchi gwabiiga Ñiꞌh tin
gucaꞌha Ñiꞌh dxihtsi chi lahdu derehchu naa nin zohba loh
yahgaxiiyi rooꞌ nin naa tronu nez dxibaaꞌ.
\v 8 Ya chin
guyaꞌloh gunaꞌzu Ñiꞌh chihbru chi, chiꞌchi gadaapa maan nin
rii hasta zohba yahgaxiiyi rooꞌ dxibaaꞌ cun gagaldabi tapa
raꞌ bwiinn guuhla bazuꞌnllihbi raꞌ ba nez delanta loh Xiꞌhyi
Dxiohs, tin tuhbigah raꞌ bwiinn guuhla chi nuu tuhbigah
harpa naa raꞌ ba nee cun dxiꞌba ohro raꞌ nin naa ziga bisihn
guxaꞌhla, ya guxaꞌhla riiꞌ naa guelrbwihdxyi-guelrnaaba
xteenn raꞌ garaa raꞌ xpwiinn Dxiohs laꞌh Ñiꞌh,
\v 9 ya
cayuꞌlda za raꞌ ba tuhbi dxyiꞌdxyi cuubi nin rahbi raꞌ ba
squiiꞌ:
\q Lasahca duxa Yuꞌbiluꞌh pur nin gunaꞌzu luꞌhn, nee laasii
Yuꞌbi za luꞌh naa luꞌh nin guhchi loh cruhzi,
\q ya cun llarihn luꞌh gudxihlli luꞌh xcweenta bwiinn raꞌ nin
naa xpwiinn Dxiohs.
\q Bwiinn garaa lahta raꞌ nin rñiꞌ guriin-guriin dxyiꞌzah,
bwiinn nin naa raꞌ guriin-guriin guihdxyi cun nin rii raꞌ
guriin-guriin lahdxyi bwiinn,
\q
\v 10 nee badiꞌhi luꞌh gaca raꞌ ba rrehyi cun bixohza nez loh
Dxiohs,
\q ya guinabwaꞌ raꞌ ba nez loh raꞌ bwiinn guidxyiyuh.
\p
\v 11 Ya chiꞌchi bwaꞌhahn, nee bihnaꞌhn rsiaaꞌha ziga cañiꞌ
ziahan rooꞌ raꞌ aanjla gadiidxi hasta zohba yahgaxiiyi rooꞌ
dxibaaꞌ hasta bwih nin rnabwaꞌ nez dxibaaꞌ, neezaa rsiaaꞌha
gadaapa raꞌ maan raꞌ nin rii hasta zohba yahgaxiiyi rooꞌ
llaaꞌndxibaaꞌ chi, neezaa rsiaaꞌha raꞌ bwiinn guuhla, per
nin ayi za nuu guilaaba raꞌ xaanjla Dxiohs nin riiꞌ riꞌchi
laasii ziahan duxa naa raꞌ ba, pur miyohn naa raꞌ ba,
\v 12 ya jweersi rooꞌ cañiꞌ raꞌ ba squiiꞌ:
\q Lasahca duxa Xiꞌhyi Dxiohs nin guhchi loh cruhzi, niꞌchi
caꞌha Ñiꞌh guelrnabwaꞌ duxa cun guelrahpa duxa,
\q cun guelnaann duxa, guel milahgru;
\q neezaa gachidiꞌhnn lasahca nuꞌh lah Ñiꞌh, gazuꞌnllihbi nuꞌh
nez loh Ñiꞌh gaann nuꞌh Ñiꞌh,
\q gadiꞌhi za nuꞌh guelzuxchiilli
loh Ñiꞌh.
\p
\v 13 Chiꞌchi bihn dxiaagahn rsiaaꞌha garaa raꞌ nin
gulahchixchih Dxiohs nez dxibaaꞌ cun loh guidxyiyuh nee cun
laꞌn gueeta loh guidxyiyuh nee cun loh ñihsadoꞌ, bihn
dxiaagahn cañiꞌ raꞌ niꞌchi squiiꞌ:
\q Nin zohba loh yahgaxiiyi nin naa trohnu dxibaaꞌ,
\q neezaa loh nin naa Xiꞌhyi Dxiohs, laꞌh chiꞌh zi Ñiꞌh lasahca duxa
Ñiꞌh,
\q gachidiꞌhnn lasahca nuꞌh laꞌh Ñiꞌh, gazuꞌnllihbi nuꞌh nez
loh Ñiꞌh laꞌh za Ñiꞌh gaann nuꞌh,
\q nee gahbi za nuꞌh barnabwaꞌ Ñiꞌh par tuꞌpazi.
\p
\v 14 Ya gadaapa raꞌ maan raꞌ nin rii hasta zohba yahgaxiiyi
xteenn Dxiohs nez dxibaaꞌ rahbi raꞌ squiiꞌ:
\q Ziꞌchi gaca, pwihsi.
\p Ya gagalda bitapa raꞌ bwiinn guuhla bazuꞌnllihbi raꞌ nez loh
nin ba nabahan par tuꞌpazi, tin gaann raꞌ ba laꞌh Ñiꞌh.
\c 6
\s Gagaadzi raꞌ sehyu
\p
\v 1 Ya seguihdu bwaꞌhahn loh nin naa Xiꞌhyi Dxiohs baxaala
Ñiꞌh loh tuhbi raꞌ sehyu, ya bihn dxiaagahn guñiꞌ tuhbi raꞌ
gadaapa raꞌ maan nin nuu hasta zohba yahgaxiiyi rooꞌ
dxibaaꞌ, per chin guñiꞌ ma naa rsiaaꞌha ma ziga chin rñiꞌ
guziꞌw, nah ma:
\p ―Gudaaꞌ tin bwaꞌha.
\p
\v 2 Ya chiꞌchi bwaꞌhahn tuhbi maan gway labweh; ya nin zohba
dihtsi ma nuu tuhbi arcu nin rucaꞌh bahza naa niꞌchi, ya
gucaꞌha za ba tuhbi corohna tin biriaꞌh ba cayuhnn ba gahn
nee tin guunn za ba gahn chyu chiꞌh zi.
\p
\v 3 Chin gudxiꞌllu Xiꞌhyi Dxiohs nin raroopa sehyu, bihn
dxiaagazahn guñiꞌ nin raroopa maan nin nuu hasta zohba
yahgaxiiyi rooꞌ dxibaaꞌ, nah ma loon:
\p ―Gudaaꞌ tin bwaꞌha.
\p
\v 4 Chiꞌchi bwaꞌhahn tuhbi maan gwayi xñaa, ya nin zohba
dihtsi ma gucaꞌha guelrnabwaꞌ tin guziaaꞌtii ba guelrbwihdxyii
stoꞌ loh guidxyiyuh tin gudxiinn lasaaꞌ raꞌ bwiinn ziga
tuhbi ziga stuhbi raꞌ ba, ya gucaꞌha ba tuhbi spahda rooꞌ.
\p
\v 5 Chin gudxiꞌllu Xiꞌhyi Dxiohs nin riohnna sehyu,
bihn dxiaagahn guñiꞌ nin riohnna maan nin nuu hasta zohba
yahgaxiiyi rooꞌ dxibaaꞌ, nah ma loon:
\p ―Gudaaꞌ tin gwaꞌha luꞌh.
\p Chiꞌchi bwaꞌhahn tuhbi maan gway nagaasa, ya nin zohba
dihtsi ma nuu tuhbi balansa naa niꞌchi,
\v 6 ya bihn
dxiaagahn tuhbi rsiaaꞌha galaayi raꞌ gadaapa raꞌ maan raꞌ
nin rii hasta zuu xagaxiiyi Dxiohs dxibaaꞌ, nah rsiaaꞌha
chi:
\p ―Sola tuhbi dxiꞌh kihlu llooba guicaꞌha luꞌh dela guunn
luꞌh dziꞌn tuhbi dxyih, nee cun chohnna kihlu cebada
guicaꞌha luꞌh guunn luꞌh dziꞌn tuhbi dxyih, per ayi guxiꞌn
luꞌh vihnnu cun nsehchi.
\p
\v 7 Ya chin gudxiꞌllu Xiꞌhyi Dxiohs nin radaapa sehyu,
chiꞌchi bihn dxiaagahn guñiꞌ radaapa maan nin nuu hasta
zohba yahgaxiiyi rooꞌ dxibaaꞌ, nah ma loon:
\p ―Gudaaꞌ tin gwaꞌha luꞌh.
\p
\v 8 Chiꞌchi bwaꞌhahn tuhbi maan gwayi guhtsi, ya nin zohba
dihtsi ma laa guelguhchi, ya dihtsi guelguhchi riiꞌnaꞌhla
nin rnabwaꞌ gabihldxyi, ya gucaꞌha niꞌchi guelrnabwaꞌ loh
lacwarta parte guidxyiyuh tin chiinn niꞌchi laꞌh raꞌ bwiinn
cun spahda, cun guelgubihn, cun gueldxyihdxyi, cun gahw maan
duxa raꞌ nin nuu loh dahan laꞌh raꞌ bwiinn.
\p
\v 9 Ya chin gudxiꞌllu Xiꞌhyi Dxiohs loh sehyu nin rahca
gaꞌyu, ya bwaꞌhahn hasta nuu bacuꞌga dxiah xteenn Dxiohs
nez dxibaaꞌ rii raꞌ xaalma raꞌ bwiinn raꞌ nin guhchi nin
gwachiistoꞌ raꞌ ñiꞌh xchiꞌdxyi Dxiohs, neezaa pur nin
baluuꞌyi raꞌ ba xchiꞌdxyi Dxiohs.
\v 10 Bwiinn raꞌ riiꞌ
cañiꞌ raꞌ ba jweersi rooꞌ rahbi raꞌ ba:
\p ―Daada Dxiohs nin naa saantu cun nin naa guchii paꞌh,
¿cuucayi chaꞌloh guunn Yuꞌbiluꞌh guelguxchisi tin chiilli
raꞌ bwiinn guidxyiyuh xcweenta nin gudxiinn raꞌ ba laꞌh nu?
\p
\v 11 Chiꞌchi badiꞌhi Ñiꞌh lahdxi labweh guhta raꞌ ba, ya
rahbi Ñiꞌh loh raꞌ ba guziꞌlaaꞌdzi raꞌ ba za balaquiꞌhn laꞌh
chi nin gasaaꞌ ru lasaaꞌ raꞌ ba nin ruluuꞌyi xchiꞌdxyi
Dxiohs, nin chuu ru gadxiinn raꞌ bwiinn guidxyiyuh ziga
badxiinn raꞌ ba guehtu bwiinn raꞌ nin guhchi pur xchiꞌdxyi
Dxiohs des ca chiempa rooꞌ.
\p
\v 12 Bwaꞌha zahn chin gudxiꞌllu Xiꞌhyi Dxiohs loh sehyu nin
rahca xoꞌpa, chiꞌchi guhca tuhbi lluh rooꞌ duuxa, ya gubihdxyi
biahcan ziga tuhbi lahdxi nagaasa buꞌhu, ya bweꞌhw biahcan
ziga culohr xteenn rihn,
\v 13 ya dxih llaaꞌndxibaaꞌ biaaba
raꞌn loh guidxyiyuh ziga zi chin ruzaꞌh yahga ñiigu laꞌh raꞌ
ñiigu chin rusiaabatiiꞌ bwih laꞌh raꞌn,
\v 14 ya dxibaaꞌ
guñihchilohon ziga zi tuhbi dxihtsi nin radiaaꞌha, ya garaa
raꞌ dahan raꞌ cun yuh raꞌ nin rii loh ñihsadoꞌ biñiꞌbi raꞌn,
cun bidxaꞌh xlahta raꞌn,
\v 15 ya garaa raꞌ bwiinn guidxyiyuh;
bwiinn raꞌ nin rnabwaꞌ raꞌ, neezaa raꞌ bwiinn dziꞌbaloh raꞌ
ziga capitahn, bwiinn rricu raꞌ, bwiinn nadxiipalaaꞌdzi raꞌ
neezaa mooza raꞌ nin gudooꞌtiiꞌ cun bwiinn raꞌ nin gulaꞌh
loh guelmooza, gwacuulaꞌn raꞌ ba laꞌn cwehva raꞌ cun laꞌn
dxiah rooꞌ raꞌ xteenn dahan raꞌ,
\v 16 ya rahbi raꞌ ba loh
raꞌ dahan raꞌ cun loh raꞌ dxiah ltah raꞌ:
\p ―Guldxiaaba yihca nu nee gulchuulaꞌn laꞌh nu loh nin zohba
loh yahgaxiiyi rooꞌ llaaꞌndxibaaꞌ, nee cun loh guelguxchisi
duxa nin guniꞌhi Xiꞌhyi Dxiohs,
\v 17 laasii laꞌh dxyih
xteenn xquelguxchisi Ñiꞌh badzihn; ¿chyu niꞌca zahca suh nez
loh Ñiꞌh?
\c 7
\s Tuhbi gaywaꞌh chywaꞌh bitapa mihyi raꞌ bwiinn Israel
\p
\v 1 Ya chiꞌchiyi bwaꞌhahn loh tahpa xaanjla Dxiohs nin zuu
gadaapa xchihn guidxyiyuh, cagacweꞌza raꞌ aanjla raꞌ chi loh
gadaapa xnehza bwih xteenn guidxyiyuh tin ayi xi bwih suu
loh guidxyiyuh cun loh ñihsadoꞌ, nee nin tuhbi za loh raꞌ
yahga,
\v 2 ya bwaꞌhahn stuhbi xaanjla Dxiohs nin biinloh
nez lahdu rtahn gubihdxyi, ya caꞌha aanjla chi sehyu xteenn
Yuꞌbi Dxiohs nin ba nabahan par tuꞌpazi, ya guñiꞌ aanjla
riiꞌ jweersi rooꞌ duxa loh gadaapa raꞌ aanjla nin gucaꞌha
guelrnabwaꞌ tin guunn raꞌ ba guelnah loh guidxyiyuh cun loh
ñihsadoꞌ;
\v 3 Squiiꞌ rahbi aanjla chi:
\p ―Gulcwehza ziꞌca gacaꞌhbwaꞌ xgah nuꞌh garaa raꞌ bwiinn raꞌ
nin naa xpwiinn Dxiohs; yaque guyaꞌloh gucaꞌh raꞌ ba bwaꞌ
chiꞌchiyi zahca guunn tu guelnah loh yuh cun loh ñihsadoꞌ,
cun loh yahga raꞌ.
\p
\v 4 Ya chiꞌchi bihn dxiaagahn paaldaa naa raꞌ bwiinn raꞌ nin
guyuuꞌ sehn lohcah raꞌ ñiꞌh, bazaaꞌ raꞌ bwiinn chi ziga
tuhbi gaywaꞌh chywaꞌh bitapa mihyi bwiinn raꞌ nin bibwiꞌhi
loh raꞌ bwiinn Israel.
\v 5 Loh raꞌ xpwiinn guehtu Judah
bibwiꞌhi tsiꞌh bichiohpa mihyi raꞌ ba; loh raꞌ xpwiinn
guehtu Rubehn bibwiꞌhi tsiꞌh bichiohpa mihyi raꞌ ba; loh raꞌ
xpwiinn guehtu Gad bibwiꞌhi tsiꞌh bichiohpa mihyi raꞌ ba;
\v 6 loh raꞌ xpwiinn guehtu Aser bibwiꞌhi tsiꞌh bichiohpa
mihyi raꞌ ba; loh raꞌ xpwiinn guehtu Neftalih bibwiꞌhi tsiꞌh
bichiohpa mihyi raꞌ ba;
\v 7 loh raꞌ xpwiinn guehtu Simeohn
bibwiꞌhi tsiꞌh bichiohpa mihyi raꞌ ba; loh raꞌ xpwiinn guehtu
Manasehs bibwiꞌhi tsiꞌh bichiohpa mihyi raꞌ ba; loh raꞌ
xpwiinn guehtu Levih bibwiꞌhi tsiꞌh bichiohpa mihyi raꞌ ba;
loh raꞌ xpwiinn guehtu Isacar bibwiꞌhi tsiꞌh bichiohpa mihyi
raꞌ ba;
\v 8 loh raꞌ xpwiinn guehtu Zabulohn bibwiꞌhi tsiꞌh
bichiohpa mihyi raꞌ ba; cun neezaa loh raꞌ xpwiinn guehtu
Joseh bibwiꞌhi tsiꞌh bichiohpa mihyi raꞌ ba; cun neezaa loh
raꞌ xpwiinn guehtu Benjamihn bibwiꞌhi tsiꞌh bichiohpa mihyi
raꞌ ba.
\s Bwiinn ziahan duxa raꞌ nin nahcu lahdxi labweh nachiitsi
\p
\v 9 Ya chin guyaꞌloh deeꞌ raꞌ chiꞌchi bwaꞌhahn loh ziahan
duxa raꞌ bwiinn nin ayi chyu guunn gahn gulaaba laꞌh raꞌ
ba, naa raꞌ ba bwiinn garaatiiꞌ lahdxyi raꞌ bwiinn, nin
naa raꞌ bwiinn guriin-guriin lahta raꞌ xteenn loh
guidxyiyuh, bwiinn guriin-guriin dxiꞌzah raꞌ; zuu raꞌ ba nez
delanta hasta zohba yahgaxiiyi rooꞌ nez dxibaaꞌ nee cun nez
loh za Xiꞌhyi Dxiohs, nahcu raꞌ ba lahdxi labweh nee nuu
lliiꞌdzi zihn naa raꞌ ba,
\v 10 ya jweersi rooꞌ cañiꞌ raꞌ ba
squiiꞌ:
\q Dxiohs nin zohba loh yahgaxiiyi rooꞌ nez llaaꞌndxibaaꞌ cun
nin naa Xiꞌhyi Ñiꞌh,
\q caꞌha guelrnabwaꞌ tin bataꞌh Ñiꞌh laꞌh raꞌ nu loh xtuhlda
nu.
\p
\v 11 Ya garaa raꞌ aanjla nin nuu dxibaaꞌ rii gadiidxitiiꞌ
xagaxiiyi Dxiohs cun gadiidxi za raꞌ gadaapa raꞌ maan nin
rii hasta zuu xagaxiiyi Dxiohs dxibaaꞌ, chiꞌchi
bazuꞌnllihbi raꞌ ba cun basiaaba loh raꞌ ba nez loh Dxiohs
\v 12 Ya rahbi raꞌ ba:
\q Ziꞌchi gaca pwihsi; loh Dxiohs si nuꞌh gulgahbi lasahca
duxa Ñiꞌh,
\q nee gulguiꞌhnn lasahca lah Ñiꞌh; laꞌh si Ñiꞌh nahpa
guelnaann;
\q loh si Ñiꞌh gulgadiꞌhi guelzuxchiilli Dxiohs; laꞌh si Ñiꞌh
gulgaann, gulgazuꞌnllihbi loh Ñiꞌh;
\q laꞌh si Ñiꞌh nahpa Ñiꞌh guelrnabwaꞌ neezaa guelnadaꞌn.
\q Ziꞌchi gaca, pwihsi, par tuꞌpazi.
\p
\v 13 Chiꞌchi guñiꞌ tuhbi raꞌ bwiinn guuhla chi loon nah ba:
\p ―¿Chyu naa raꞌ nin nahcu lahdxi labweh raꞌ riiꞌ, nee
canehza zeꞌ raꞌ ba?
\p
\v 14 Ya chiꞌchi raꞌpihn loh ba:
\p ―Daada, banaann yuꞌbiluꞌh.
\p Chiꞌchi nah ba loon:
\p ―Bwiinn raꞌ riiꞌ nin batiꞌdxiloh trabahjw duxa, ya gudxiꞌbi
xahba raꞌ ba tin biaaraꞌn cun llarihn Jesucristu nin naa
Xiꞌhyi Dxiohs.
\v 15 Niꞌchin nin zuu raꞌ ba hasta zuu
xahgaxiiyi Dxiohs, ya riiyuhnn raꞌ ba xtsiꞌn Ñiꞌh
dxyih-nagueꞌla; niꞌchin Daada nin nahpa guelrnabwaꞌ nin
zohba loh yahgaxiiyi rooꞌ zahcanee Ñiꞌh laꞌh garaa raꞌ
bwiinn nin rii nez loh Ñiꞌh.
\v 16 Ayi ru sacazii raꞌ ba
loh guelrchiaꞌhan, cun ayi ru za cwidxahga raꞌ ba ñihsa, nee
nin ayi za gudxuꞌyi ru guelnaldaꞌh xteenn gubihdxyi laꞌh raꞌ
ba,
\v 17 laasii laꞌh Xiꞌhyi Dxiohs nin zohba galaayillee loh
yahgaxiiyi rooꞌ nin naa tronu nez dxibaaꞌ gaapa laꞌh raꞌ ba
ziga zi lliꞌhyi raꞌ, ya chenee Ñiꞌh laꞌh raꞌ ba hasta nuu
ñihsa nin naa guelnabahan; ya Dxiohs gucwiꞌdzi rwaꞌhaloh raꞌ
ba cun ñihsabwii raꞌ nin ruꞌn raꞌ ba.
\c 8
\s Nin rahca gahdzi sehyu
\p
\v 1 Chin guxaala Ñiꞌh nin rahca gaadzi sehyu, dxyiisii
biahca nez llaaꞌndxibaaꞌ ziga chiꞌh garoolda hohra,
\v 2 chiꞌchi bwaꞌhahn loh gahdzi xaanjla Dxiohs zuu raꞌ aanjla
raꞌ chi nez delanta loh Dxiohs nin nuu dxibaaꞌ, ya gucaꞌha
za raꞌ ba gahdzi trompeta ya tuhbigahan cada tuhbigah aanjla
raꞌ chi,
\v 3 chiꞌchi biꞌ stuhbi aanjla ya guzuh aanjla chi
hasta zuu bacuꞌgadxiah xteenn Dxiohs cun tuhbi dxiꞌba nin
rahca guxaꞌhla laꞌn ñiꞌh ganaalla ohro naa dxiꞌba chi, ya
gucaꞌha aanjla chi ziahan yaꞌhla tin caguꞌ guxaꞌhlaza ba loh
nin cabwihdxyi-canaaba raꞌ xpwiinn Dxiohs nezloh Ñiꞌh, ya
zuu ba nezloh bacuꞌgadxiah nin naa ganaalla ohro nezloh
yagaxiiyi rooꞌ xteenn Dxiohs,
\v 4 ya nez yihca naa aanjla
chi guyahsa guxaꞌhla chi nezloh Dxiohs tuhsi cun ziga
guelrbwihdxyi-rnaaba xteenn raꞌ xpwiinn Dxiohs,
\v 5 chiꞌchi
laꞌh gahca aanjla chi gucaꞌha bwehla xteenn bacuꞌgadxiah
guyuuꞌhun laꞌn dxiꞌba nin rahca guxaꞌhla, ya chiꞌchi balaꞌha
aanjla chin loh guidxyiyuh, ya loh biaaban loh guidxyiyuh ya
bidxiꞌñaaꞌ duxa, cun guhca tuhbi lluh rooꞌ.
\s Xcweenta trompeta raꞌ
\p
\v 6 Chiꞌchi gagaadzi raꞌ xaanjla Dxiohs nin nuꞌa raꞌ
tuhbigah trompeta nin naa za gahdzi, guzuh xnehza raꞌ ba tin
gucwidxaaꞌ raꞌ ba trompeta raꞌ chi,
\v 7 ya mwer tuhbi raꞌ
trompeta nin bacwidxaaꞌ mwer tuhbi raꞌ aanjla raꞌ chi,
biaaba dxidxiah cun bwehla nin nuꞌchi rihn loh guidxyiyuh,
ya gucaꞌdxih nin riohnna taaꞌyi xteenn loh guihdxyiyuh cun
nin riohnna taaꞌyi xteenn yahga raꞌ cun nin riohnna za
taaꞌyi xteenn cwaꞌniꞌhn raꞌ.
\v 8 Ya chin bacwidxaaꞌ nin
raroopa aanjla chi trompeta, chiꞌchi biaaba tuhbi nin
rluuꞌyi ziga dahan nin cacaꞌdxih loh ñihsadoꞌ, ya biahca nin
riohnna taaꞌyi xteenn loh ñihsadoꞌ ziga rihn,
\v 9 ya chiꞌchi
guhchi nin riohnna taaꞌyi xteenn ziga garaalohtiiꞌ raꞌ maan
ñihsa nin nuu loh ñihsadoꞌ, ya cun nin riohnna taaꞌyi xteenn
paaldaa raꞌ barcu nin rzah loh ñihsadoꞌ gubihyi raꞌn.
\v 10 Ya chin bacwidxaaꞌ nin riohnna xaanjla Dxiohs trompeta,
chiꞌchi biaaba tuhbi dxih rooꞌ xteenn llaaꞌndxibaaꞌ nin
zohba bwehla ziga zi tuhbi bwehla guiiꞌdxi loh nin riohnna
taaꞌyi xteenn loh raꞌ guiꞌw cun hasta rtahnn ñihsa.
\v 11 Lah dxih chi naa Ajenjo, nin naa lah tuhbi cohsa nin naltaa
duxa, ya biahca naltaa nin riohnna taaꞌyi xteenn ñihsa chi,
ya chiꞌchi gudxiinn ñihsa naltaa chi laꞌh ziahan duxa raꞌ
bwiinn.
\v 12 Chin bacwidxaaꞌ nin radaapa raꞌ xaanjla
Dxiohs trompeta, chiꞌchi bacahyi nin riohnna taaꞌyi loh
gubihdxyi cun nin riohnna taaꞌyi xteenn loh bweꞌhw cun nin
riohnna za taaꞌyi hasta nuu dxih raꞌ nin nuu llaaꞌndxibaaꞌ,
ya biaꞌhan nacahyi nin riohnna taaꞌyi xteenn radxyii cun nin
riohnna taaꞌyi xteenn gueꞌla ya ayi ru guyuuꞌ raꞌ biaꞌñih
taaꞌyi raꞌ chi,
\v 13 chiꞌchi bwaꞌhahn nez llaaꞌndxibaaꞌ ya
bihn dxiaagahn rsiaaꞌha ziga tuhbi bisiah nin zaꞌbi ñiꞌh nez
galaayi llaaꞌndxibaaꞌ squiiꞌ:
\p ―¡Ayy, ayy, ayy! ¡Prohbi za laꞌh raꞌ bwiinn guidxyiyuh
chin gucwidxaaꞌ za schohnna aanjla trompeta! Zizahcazii
duxa raꞌ ba.
\c 9
\p
\v 1 Chin bacwidxaaꞌ nin rahca gaꞌyu xaanjla Dxiohs
trompeta, chiꞌchi bwaꞌhahn tuhbi dxih llaaꞌndxibaaꞌ biaaban
loh guidxyiyuh; dxih llaaꞌndxibaaꞌ chi gucaꞌha chiahyi
xteenn rwaaꞌ guiiꞌdxiu xteenn gabihldxi,
\v 2 ya baxaalan
hasta naa gabihldxi, ya chin billaala riꞌchi biriaꞌh guhxa
riꞌchi ziga zi guhxa nin rreꞌh rwaaꞌ tuhbi horna rooꞌ, ya
basieꞌw guhxa chi loh gubihdxyi laasii tantu guhxa rooꞌ
guhxa chi,
\v 3 ya loh guhxa chi biinloh raꞌ maan nin rñah
ziga bwiꞌtsisuu ya bidiꞌchi raꞌ ma gaduhbitiiꞌ loh
guidxyiyuh, nee gucaꞌha raꞌza ma guelrnabwaꞌ gaca ñalaaꞌdzi raꞌ
ma ziga ñaꞌlaaꞌdzi raꞌ llohbigwaꞌ,
\v 4 nee guhdzi raꞌ ba loh
raꞌ ma ayi xi guunnee raꞌ ma laꞌh cwaaꞌn raꞌ nin rii loh
guidxyiyuh, nee nin tuhbi za cohsa nin nagaaꞌ nee nin tuhbi
za yahga raꞌ sino que sola gusaꞌcazii raꞌ ma laꞌh raꞌ bwiinn
nin ayi xi bwaꞌ xteenn Dxiohs caa lohcah raꞌ ñiꞌh,
\v 5 nee
guhdzi za raꞌ ba loh raꞌ ma ayi guunn raꞌ ma tin gachi raꞌ
bwiinn sino que sola gusaꞌcazii guelnayaan nin gahw maan chi
laꞌh raꞌ bwiinn loh gaꞌyu bweꞌw, per xquelnayaan raꞌ ma gaca
ziga xquelnayaan xteenn llohbigwaꞌ.
\v 6 Nee laꞌn dxyih raꞌ
chi ziclaaꞌdzi raꞌ bwiinn gachi raꞌ ba per ayi chuu
guelguhchi para laꞌh raꞌ ba.
\p
\v 7 Bwiꞌtsisuu raꞌ chi rñah ziga zi maan gwahyi raꞌ nin
zuuchaꞌyi tin chee raꞌ ma loh guehrru; yihca raꞌ ma nuu ziga
tuhbi curohn dxiꞌba ohro, ya loh raꞌ ma naa ziga loh raꞌ
ndxiꞌhw.
\v 8 Nuu dxyichyihca raꞌ ma ziga dxyichyihca tuhbi
gunnaꞌh, ya lahyi raꞌ ma naa ziga lahyi tuhbi bweꞌdzi,
\v 9 ya gaduhbi tihxi ma naa ziga zi dxiꞌba, ya bwih nin zeꞌnee
xihyi raꞌ ma, naa bwih chi ziga chin riuuꞌ bwih rulluꞌn
ziahan rooꞌ raꞌ maan gwahyi cun carretohn loh tuhbi guehrru.
\v 10 Ya llibaaꞌn raꞌ ma naa ziga llibaaꞌn tuhbi llohbigwaꞌ,
ya loh llibaaꞌn ma chi gucaꞌha guelrnabwaꞌ tin gusaꞌcazii ma
laꞌh raꞌ bwiinn loh gaꞌyu bweꞌhw.
\v 11 Nahpa za raꞌ
bwiꞌtsisuu riiꞌ tuhbi nin rnabwaꞌ loh raꞌ ma, nin naa
xaanjla bwiinndxaaba nin biriaꞌh gabihldxyi; aanjla riiꞌ laa
cun dxyiꞌdxyi hebreu Abadohn, ya dxyiꞌdxyi griehgu laa ba
Apoliohn (nin saꞌloh guelruñihchiloh).
\p
\v 12 Gudiiꞌdxi mwer guelyaꞌdxi, per cayaꞌdxi schiohpan.
\p
\v 13 Chin bacwihdxaaꞌ nin rahca xoꞌpa aanjla trompeta,
bihndxiaagahn tuhbi rsiaaꞌha nin biriaꞌh galaayi raꞌ gadaapa
raꞌ cachu raꞌ nin caa loh bacuꞌgadxiah nin naa ganaalla
ohro, nin nuu nez loh Dxiohs,
\v 14 ya rsiaaꞌha chi guñiꞌ
loh nin rahca xoꞌpa aanjla nin naꞌzu trompeta, rahbi rsiaaꞌha
chi squiiꞌ:
\p ―Bagaxaachi gadaapa raꞌ aanjla nin caduꞌh rwaaꞌ guiꞌw nin
laa Eufrates.
\p
\v 15 Ya seguihdu gulaꞌh raꞌ aanjla raꞌ chi tin gadxiinn raꞌ
ba nin riohnna taaꞌyi lahta loh guidxyiyuh hasta rii raꞌ
bwiinn guidxyiyuh, pwihsi bibwiꞌhi raꞌ aanjla raꞌ chi par si
paꞌcaa hohra chi, dxyih chi, bweꞌhw chi, cun yihza chi,
\v 16 ya bihndxiaagahn paaldaa naa raꞌ suldahdu nin dziꞌba maan
gwahyi, naa raꞌ ba ziga chiohpa gaywaꞌh miyohn.
\p
\v 17 Squiiꞌ naa ziga bwaꞌhahn maan gwahyi raꞌ chi loh bihsi
nin bwaꞌhahn; ya nin zohba dihtsi raꞌ maan gwahyi raꞌ chi,
stoꞌ raꞌ ba caa tuhbi dxiꞌba nin naa culohr naxñiaa, culohr
asuhl, cun colohr guhtsi; ya yihca raꞌ maan gwahyi chi naa
ziga yihca bweꞌdzi, ya rwaaꞌ raꞌ ma cagareꞌh bwehla, guhxa,
cun asufre,
\v 18 ya guhchi nin riohnna taaꞌyi xteenn lahta
hasta rii raꞌ bwiinn pur gadxionna cohsa nin cagareꞌh rwaaꞌ
maan gwahyi chi: bwehla, guhxa, cun asufre,
\v 19 ya
guelrnabwaꞌ nin gucaꞌha raꞌ maan gwahyi chi ruhnn ma
guelnah rwaaꞌ ma nee loh llibaaꞌn ma, pwihsi loh llibaaꞌn
naa ziga zi bweꞌlda nin nuu yihca raꞌ ñiꞌh, ya cun laꞌhan
rudiꞌhi ma guelnayaan.
\p
\v 20 Ya garaa raꞌ bwiinn nin ayi guhchi raꞌ loh xquelnnah
gadxioonna guelyaꞌdxi raꞌ riiꞌ, ayi basaaꞌn raꞌ ba loh dziꞌn
dxaaba nin ruhnn raꞌ ba, nee nin ayi za guleꞌhestoꞌ raꞌ ba
raann raꞌ ba bwiinndxaaba raꞌ cun bwiinn gulaala raꞌ nin naa
dxiꞌba ohro, cun dxiꞌba plahta, dxiꞌba bronce, cun dxiah nee
yahga. Ayi nuu gwaꞌha bwiinn gulaala raꞌ chi nee nin ayi za
rihn raꞌ niꞌchi, nee nin ayi za nuu sah raꞌ niꞌchi.
\v 21 Nee ayi za bacweꞌza za raꞌ ba, gwazahtiiꞌ rdxiinn raꞌ ba
bwiinn, nee gwazahtiiꞌ za bwiinn raꞌ dziꞌn bidxaꞌha, cun
guzaꞌbitiiꞌza nabahan raꞌ ba loh guelgubwihlli nee loh
guelgubaꞌn.
\c 10
\s Aanjla nin nuu chihbruꞌhn naa ñiꞌh
\p
\v 1 Chiꞌchi bwaꞌhahn loh stuhbi xaanjla Dxiohs nin nahpa
guelrnabwaꞌ duxa zieꞌyehta aanjla chi nez llaaꞌndxibaaꞌ,
duꞌbi aanjla chi xcahyi nee neezaa tuhbi guundzihin biinloh
nez yihca aanjla chi, ya loh aanjla chi rcahbachaꞌhan ziga
zi loh gubihdxyi, ya ñaaꞌ aanjla chi rñah ziga zi piyahri
raꞌ nin naa bwehla.
\v 2 Ya nuu tuhbi chihbruꞌhn naa aanjla
chi zohballaala loh chihbru chi, ya bazuh ñaaꞌ aanjla chi
nin naa lahdu derehchu loh ñihsadoꞌ ya ñaaꞌ rrabwehsa aanjla
chi guzuh loh guidxyiyuh,
\v 3 ya chiꞌchi guyuuꞌ tuhbi
rsiaaꞌha gudihdxyidxiah aanjla chi ziga zi rsiaaꞌha xteenn
tuhbi bweꞌdzi chin rbwihdxyidxiah ma, nee chiꞌchiza guñiꞌ
gahdzi guziꞌw ziꞌchi cun gahnrooꞌ,
\v 4 ya chin guluhlla guñiꞌ
raꞌ guziꞌw raꞌ chi, chiꞌchi guclaaꞌdzihn ñucaꞌhn loh dxihtsi
garaa nin guñiꞌ raꞌ guziꞌw raꞌ chi, per lwehgu gahca bihn
dxiaagahn guñiꞌ tuhbi rsiaaꞌha nez llaaꞌndxibaaꞌ squiiꞌ
loon:
\p ―Guluꞌchaꞌyi ralaꞌn dxyiꞌdxyi raꞌ nin guñiꞌ gagaadzi raꞌ
guziꞌw raꞌ riiꞌ stoꞌ luꞌh, ayi gucaꞌh luꞌhn loh dxihtsi.
\p
\v 5 Ya lwehgu laꞌh aanjla nin zuu ñaaꞌ ñiꞌh loh ñihsadoꞌ cun
loh guidxyiyuh, guteesa naa derehchu aanjla chi nez
llaaꞌndxibaaꞌ,
\v 6 ya guñiꞌ chihpa aanjla chi nez loh Yuꞌbi
Dxiohs nin ba nabahan par tuꞌpazi, nin bwiꞌhnnchaꞌyi
guidxyiyuh dxibaaꞌ cun ñihsadoꞌ nee cun garaa raꞌ za nin
rii nabahan loh raꞌn, squiiꞌ:
\p ―Pwihsi ayi ru gacataꞌh raꞌ dxyih raꞌ riiꞌ.
\v 7 Pwihsi
chin gadzihn dxyih nin soꞌbaloh gusañiꞌ nin rahca gagaadzi
aanjla cun trompeta, chiꞌchi ba soobaa raꞌ xchiꞌdxyi
nagaꞌtsi Dxiohs nin baluuꞌyi Ñiꞌh laꞌh raꞌ guehtu daada raꞌ
nin guñiꞌ xchiꞌdxyi Ñiꞌh ba guhca cadxyih rooꞌ.
\p
\v 8 Ya chiꞌchi laꞌh rsiaaꞌha nin bihn dxiaagahn, nee guñiꞌn
loon nez dxibaaꞌ, chiꞌchi gubiaꞌgarii guñiꞌn loon squiiꞌ:
\p ―Gwah tin gucaꞌha chihbruꞌhn nin nuu naa aanjla riꞌchi nin
zuu ñaaꞌ ñiꞌh loh ñihsadoꞌ cun loh guidxyiyuh.
\p
\v 9 Chiꞌchi guyaaꞌhahn hasta zuu aanjla chi ya gunaꞌbaꞌhn
guniꞌhi aanjla chi chihbruꞌhn chi naꞌh, ya squiiꞌ guñiꞌ
aanjla chi loon:
\p ―Laꞌn deeꞌ, gudahwun. Laꞌn rwaaꞌ luꞌh zahca nahxin ziga zi
dzihn, per nez laꞌn lastoꞌ luꞌh ziahca naltaaꞌhan.
\p
\v 10 Chiꞌchi gucaꞌhahn chihbruꞌhn chi loh aanjla chi ya
gudaawuhn chihbru chi; ya laꞌn rwaaꞌhahn biinaꞌhn nahxin,
per ya loh nin gudaawuhn chihbru chi biahca naltaa chihbru
chi stoꞌn,
\v 11 ya chiꞌchi nah raꞌ ba loon squiiꞌ:
\p ―Nnah nahpa guibiaꞌgarii luꞌh chegaluuꞌyi luꞌh dxyiꞌdxyi
raꞌ nin rñiꞌ Dxiohs chuu ru gaca loh ziahan guihdxyi raꞌ
bwiinn, cun lahdxyi raꞌ bwiinn, bwiinn nin rñiꞌ cuunchiꞌzi
dxiꞌzah raꞌ, neezaa loh raꞌ rrehyi raꞌ.
\c 11
\s Xcweenta garoopa raꞌ ndxiꞌhw nin ruluuꞌyi xchiꞌdxyi Dxiohs
\p
\v 1 Chiꞌchi baniꞌhi raꞌ ba naꞌh tuhbi ñihta nin rñah ziga
tuhbi bahra nin rbihxi loh yuh, ya nah raꞌ ba loon:
\p ―Gwasuꞌnchii tin gwagadihxi xquidoꞌ Dxiohs nee cun badihxi
za xpacuꞌga Ñiꞌh, nee balaaba paaldaa naa raꞌ nin raann
laꞌh Ñiꞌh riꞌchi, o sea nin ruzuꞌnllihbi nez loh Ñiꞌh
riꞌchi.
\v 2 Per ayi gudihxi luꞌh loh laaꞌyitiaaꞌha xteenn
guidoꞌ, laasii niꞌchi gucaꞌha raꞌ bwiinn ziitu raꞌ nin chuu
ñaaꞌ guihdxyi saantu loh chywaꞌh bichiohpa bweꞌhw,
\v 3 ya
naꞌh zixeꞌhlaꞌhn chiohpa raꞌ daada raꞌ nin guiñiꞌ
xcweeꞌntahn loh tuhbi mihyi cun chiohpa gaywaꞌh sesenta
dxyih, nahcu raꞌ ba lahdxi de luto.
\p
\v 4 Ya garoopa raꞌ bwiinn raꞌ riiꞌ naa raꞌ ba garoopa raꞌ
olivu raꞌ cun garoopa za gandayehru nin nuu nez loh Dxiohs,
\v 5 per sidela chyuulla guiclaaꞌdzi gusaꞌcazii laꞌh raꞌ
daada raꞌ riiꞌ, ziriaꞌh bwehla nez rwaaꞌ raꞌ ba, ya
zucaꞌdxih raꞌ ba laꞌh raꞌ nin rdxyiꞌchinee laꞌh raꞌ ba, ya
ziꞌchi nahpa gachi chyuchiꞌhzi bwiinn nin xclaaꞌdzi
gusaꞌcazii laꞌh raꞌ ba,
\v 6 nee nahpa za raꞌ bwiinn raꞌ riiꞌ
guelrnabwaꞌ tin gusieꞌw raꞌ ba nez llaaꞌndxibaaꞌ, tin ayi
dxiaaba nin tuhbi laꞌh ba ñihsadixah loh raꞌ dxyih nin
guluuꞌyi raꞌ ba xchiꞌdxyi Dxiohs, neezaa nahpa raꞌ ba
guelrnabwaꞌ tin guunn raꞌ ba dxiahca ñihsa ziga zi rihn, nee
guunn raꞌ ba saꞌcazii raꞌ bwiinn loh guidxyiyuh cun ziahan
loh raꞌ guelyaꞌdxi ziga chiꞌh zi guiclaaꞌdzi raꞌ ba.
\v 7 Per
chin tuulla guunn raꞌ ba dziꞌn nin nahpa guunn raꞌ ba,
chiꞌchi laꞌh nin naa ziga tuhbi maan ñaꞌlaaꞌdzi nin guiriaꞌh
laꞌn gabihldxyi zidxiinn maan chi laꞌh raꞌ ba,
\v 8 chiꞌchi
ziaꞌhan bweꞌltihxi garoopa raꞌ bwiinn raꞌ riiꞌ loh cahyi
xteenn guihdxyi hasta bacaꞌh raꞌ ba laꞌh Daada Jesucristu
loh cruhzi. Guihdxyi rooꞌ ca nin rbweꞌhelah raꞌ ba Sodoma,
neezaa Egiptu.
\v 9 Ya chohnna dxyih garoolda, zwaꞌha bwiinn
garaa guihdxyi raꞌ cun bwiinn garaa dxiꞌzah raꞌ cun bwiinn
nin zeꞌ raꞌ guriin-guriin lahdxyi raꞌ bwiinn bweꞌltihxi
bwiinn guuchi raꞌ chi, ayi gusaaꞌn raꞌ ba guigaꞌtsi
bweꞌltihxi raꞌ ba chi laꞌn baꞌ,
\v 10 ya garaa raꞌ bwiinn raꞌ
nin nabahan raꞌ loh guidxyiyuh, ziahxi duxa raꞌ ba laasii
guhchi raꞌ garoopa raꞌ bwiinn riiꞌ, ya laasii tantu riahxi
duxa raꞌ bwiinn raꞌ hasta zugaaꞌda lasaaꞌ raꞌ ba xica
guelrgaaꞌda raꞌ, laasii laꞌh garoopa raꞌ daada raꞌ nin
baluuꞌyi xchiꞌdxyi Dxiohs guhchi, daada raꞌ nin baxeꞌhla
guelrzaꞌcazii duxa para laꞌh raꞌ ba.
\v 11 Ya chin gudiiꞌdxi
chohnna dxyih garoolda riiꞌ, chiꞌchi bacwaꞌhn Dxiohs laꞌh
raꞌ garoopa raꞌ bwiinn raꞌ chi stuhbi chiꞌchi gwastii raꞌ ba
ya garaa raꞌ bwiinn raꞌ nin bwaꞌha loh garoopa raꞌ daada raꞌ
riiꞌ bidxyihbi duxa raꞌ ba.
\v 12 Lwehgu garoopa raꞌ bwiinn
raꞌ chi bihn raꞌ ba tuhbi rsiaaꞌha nin guñiꞌ jweersi nez
llaaꞌndxibaaꞌ rahbi loh raꞌ ba squiiꞌ:
\p ―¡Gultaaꞌ nez guiyaꞌ riiꞌ!
\p Ya bacah raꞌ ba nez dxibaaꞌ loh tuhbi xcahyi, ya bwaꞌha loh
raꞌ bwiinn raꞌ nin rdxyiꞌchinee laꞌh raꞌ ba,
\v 13 ya hohra
chi gahca guhca tuhbi lluh rooꞌ duxa, ya guzaꞌbitiiꞌ loh nin
rahca tsiꞌh taaꞌyi xteenn loh guihdxyi chi, ya guhchi gahdzi
mihyi raꞌ bwiinn pur lluh chi, ya za balaaquiꞌhn bwiinn raꞌ
nin biaꞌhancaa loh guelnadxyiꞌbi duxa chi guzoꞌbaloh cayuhnn
lasahca raꞌ ba lah Dxiohs nin nuu dxibaaꞌ.
\p
\v 14 Squiiꞌ gudiiꞌdxi nin raroopa yaꞌdxi, per laꞌh nin
riohnnan zeꞌ.
\s Nin gagaadzi xaanjla Dxiohs nin bacwidxaaꞌ trompeta
\p
\v 15 Chin bacwidxaaꞌ nin rahca gahdzi xaanjla Dxiohs
trompeta chiꞌchi guyuuꞌ rsiaaꞌha nin cañiꞌ nez dxibaaꞌ rahbi
squiiꞌ:
\q Laꞌh hohra bigaꞌha guinabwaꞌ Dxiohs neezaa Daada Jesucristu
loh guidxyiyuh,
\q ya laꞌh Ñiꞌh zinabwaꞌ Ñiꞌh par tuꞌpazi.
\p
\v 16 Ya chiꞌchi laꞌh raꞌ galda bitapa raꞌ bwiinn guuhla raꞌ
nin rii raꞌ nez loh Dxiohs, biahchyu raꞌ ba bazuꞌnllihbi
raꞌ ba hasta loh yuh guhta gurloh raꞌ ba tin guunn raꞌ ba
laꞌh Daada Dxiohs.
\v 17 Squiiꞌ rahbi raꞌ ba:
\q Raniꞌhi nu guelzuxchiilli loh Yuꞌbiluꞌh Dxiohs, nin nahpa
guelrnabwaꞌ duxa;
\q yiꞌh nin naa luꞌh nin guhca luꞌh, nee nin chuu ru gaca,
laasii gucaꞌha luꞌh guelrnabwaꞌ duxa tin guzaꞌloh
canabwaꞌ luꞌh.
\q
\v 18 Bidxyiꞌchi raꞌ bwiinn guihdxyiyuh loh luꞌh, per laꞌh
dxyih badzihn chuu llahn stoꞌ luꞌh cun laꞌh raꞌ ba,
guunn luꞌh guelguxchisi loh raꞌ bwiinn guuchi,
\q ya gudiꞌhi luꞌh cohsa zaꞌca laꞌh raꞌ xpwiinn raꞌ luꞌh nin
guñiꞌ xcweenta luꞌh, loh raꞌ nin gwachiistoꞌ raꞌ ñiꞌh
xchiꞌdxyi luꞌh, loh za raꞌ nin ruzuꞌnllihbi nez loh luꞌh,
nicala bwiinn prohbi o bwiinn rooꞌ raꞌ.
\q Laꞌh dxyih badzihn cweꞌhecaa luꞌh laꞌh raꞌ nin ruñihchi nezloh
Luꞌh loh guidxyiyuh tin ñichiloh raꞌ ba.
\p
\v 19 Ya chiꞌchi billaala xquidoꞌ Dxiohs nin nuu dxibaaꞌ,
nee laꞌn guidoꞌ chi biinloh dxihn nin nuu dxiah hasta caa
raꞌ dxyiꞌdxyi nin biaꞌhannee dxyiꞌdxyi Dxiohs laꞌh raꞌ
bwiinn Israel, ya balaaca chiꞌh bidxiꞌñaaꞌ raꞌ, balaaca
chiꞌh guñiꞌ za guziꞌw roo raꞌ; nee guhca za tuhbi lluh duxa
cun biaaba tuhbi dxidxiah duxa za.
\c 12
\s Tuhbi gunnaꞌh cun tuhbi maan duxa nin laa dragohn
\p
\v 1 Chiꞌchi biinloh tuhbi sehn rooꞌ llaaꞌndxibaaꞌ: Xteenn
tuhbi gunnaꞌh nin duꞌbi gubihdxyi ziga zi xahba ba, ya
bweꞌhw zaꞌbi nez ñaaꞌ gunnaꞌh chi, ya yihca ba nuu tuhbi
curohn nin naa cun tsiꞌh bichiohpa dxih llaaꞌndxibaaꞌ.
\v 2 Gunnaꞌh riiꞌ nuꞌa lliiꞌn ba, ya rbwihdxyidxiah ba nuu ba
guelnazihdzi nin gaalaa lliiꞌn ba, pwihsi cagatiꞌdxiloh ba
guerzaꞌcazii duxa.
\v 3 Chiꞌchi biinloh stuhbi sehn nez
llaaꞌndxibaaꞌ xteenn tuhbi maan naxñaa nin ruluuꞌyi ziga zi
tuhbi dragohn; maan duxan; nuu gahdzi yihca ma, zohba tsiꞌh
xcahchu ma, ya tuhbigah yihca ma nuu tuhbigah za curohn.
\v 4 Ya cun llibaaꞌn ma basiaabatiiꞌ ma tuhbi cwaꞌh loh chohnna
cwaꞌh raꞌ dxih nin nuu llaaꞌndxibaaꞌ para loh guidxyiyuh.
Maan duxa riiꞌ guzuh ma nez loh gunnaꞌh nin ñaalaa Lliiꞌn
ñiꞌh, tin gahw ma lliiꞌn gunnaꞌh riiꞌ chin gaalaa lliiꞌn ba.
\v 5 Chiꞌchi guulaa lliiꞌn gunnaꞌh chi, naa lliiꞌn ba tuhbi
ndxiꞌhw, ya laꞌh bi guinabwaꞌ bi loh raꞌ bwiinn guidxyiyuh
ziga zi tuhbi bahra dxiꞌba. Lwehgu guyahpitii lliiꞌn
gunnaꞌh chi loh guidxyiyuh tin ziaa bi para nez dxibaaꞌ
hasta rnabwaꞌ Dxiohs,
\v 6 chiꞌchi balluꞌn gunnaꞌh chi nez
loh dahan desiertu nez nuu tuhbi lahta nin bazuhchaꞌyi
Dxiohs guleeza gunnaꞌh chi, tin nez chi guyuuꞌ nin badiꞌhi
guehta gudahw ba loh tuhbi mihyi chiohpa gaywaꞌh sesenta
dxyih.
\p
\v 7 Chiꞌchi guyuuꞌ guehrru nez llaaꞌndxibaaꞌ gudxihndxinee
xaanjla Dxiohs nin laa Miguehl nee cun snuhn xaanjla
Dxiohs nin rnabwaꞌ ba cun maan duxa naxñiaa chi, ya neezaa
maan duxa chi cun xaanjla za ma gudxihndxi ma,
\v 8 per ayi
bwiꞌhnn ma gahn; ya ayi guyuuꞌ ru lahta para laꞌh maan duxa
chi cun xaanjla ma nez dxibaaꞌ.
\v 9 Ya chiꞌchi biriaꞌh
gunaꞌhla raꞌ xaanjla Dxiohs laꞌh maan duxa rooꞌ chi cun
garaa raꞌ xaanjla ma nez loh guidxyiyuh; laꞌh ma nin naa
bweꞌlda chiempa duxa nin naa za bwiinndxaaba, nin laa za
Satanahs, nin rusaguiꞌhi laꞌh gaduhbi guidxyiyuh bwiinn raꞌ.
\p
\v 10 Chiꞌchi biindxiaagahn rsiaaꞌha tuhbi nin cañiꞌ nez dxibaaꞌ squiiꞌ:
\p ―Laꞌh guelrutaꞌh loh duhlda badzihn nee cun guelmilahgru
cun guelrnabwaꞌ xteenn Xchiohs nuꞌh nin nuu dxibaaꞌ nee cun
neezaa xquelrnabwaꞌ Jesucristu, laasii laꞌh nin gulahchi
guelchiah xcweenta bwihtsi lasaaꞌ raꞌ nuꞌh nez loh Dxiohs
dxyih-nagueꞌla laꞌh ba babweꞌhedxiaꞌhla raꞌ ba loh
guidxyiyuh.
\v 11 Laꞌh raꞌ ba bwiꞌhnn raꞌ gahn loh
bwiinndxaaba xcweenta llarihn xteenn Xiꞌhyi Dxiohs, nee
neezaa laasii gwachii stoꞌ raꞌ ba xchiꞌdxyi Dxiohs, nee ayi
bidxyihbi za raꞌ ba nicala ñahchi raꞌ ba.
\v 12 Niꞌchin
garaa tu nin nuu llaaꞌndxibaaꞌ neezaa dxibaaꞌ, ¡guldxiahxi!;
per ¡prohbi za laꞌh raꞌ nin rii loh guidxyiyuh nee loh
ñihsadoꞌ!, laasii laꞌh bwiinndxaaba biehtanee tuhbi llahn
rooꞌ loh guidxyiyuh laasii naann ba gulliaꞌyiꞌhn raꞌ dxyih
nahpa ba.
\p
\v 13 Chin bwaꞌha maan duxa chi laꞌh ma bareꞌhedxiaꞌhla raꞌ
ba par loh guidxyiyuh, gucaꞌhn naꞌhla ma laꞌh gunnaꞌh nin
guulaa lliiꞌngaꞌn ñiꞌh,
\v 14 chiꞌchi badiꞌhi Dxiohs laꞌh
gunnaꞌh chi chiohpa xihyi ba ziga xihyi bisiah, tin gucah
guzuh ba loh bwih balluꞌn ba loh bweꞌlda chi loh dahan
desiertu, nez hasta badiꞌhi raꞌ ba guehta gahw ba loh
chohnna yihza garoolda,
\v 15 ya bweꞌlda chi guleꞌhe rwaaꞌ ma
ñihsarooꞌ duxa nez dihtsi gunnaꞌh chi,
\v 16 per guhcanee loh
yuh laꞌh gunnaꞌh chi laasii gwaaꞌ yuh ñihsa nin guleꞌhe
rwaaꞌ maan duxa chi ya guñihchilohon,
\v 17 ya chiꞌchi
bagaduhbi llahn duxa maan duxa chi pur laꞌh gunnaꞌh chi, ya
chiꞌchi gwagacaꞌnee maan duxa chi laꞌh za balaaquiꞌhn bwiinn
raꞌ nin naa raꞌ lliiꞌn gunnaꞌh chi, bwiinn raꞌ nin
ruzoꞌbadxiahga xchiꞌdxyi Dxiohs nee cun zeezah nayaa raꞌ ba
loh xchiꞌdxyi Jesucristu.
\c 13
\s Garoopa maan duxa
\p
\v 1 Guzuꞌhn loh yuhlli xteenn rwaaꞌ ñihsadoꞌ, ya bwaꞌhahn
bariaꞌcaa tuhbi maan rooꞌ nin nuu gahdzi yihca ñiꞌh cun
zohba tsiꞌh xcahchu ma; ya yihca tuhbigah raꞌ xcahchu ma
zohba tuhbi curohn, ya loh gagaadzii yihca ma caa tuhbigah
raꞌ dxyiꞌdxyi nin rñiꞌyah laꞌh Dxiohs.
\v 2 Ya maan rooꞌ
nin bwaꞌhahn chi rñah ma ziga tuhbi maan nin laa leopardu,
ya ñaaꞌ ma naa ziga ñaaꞌ tuhbi ohsu, ya rwaaꞌ ma naa ziga
rwaaꞌ tuhbi bweꞌdzi. Ya badiꞌhi maan duxa nin laa dragohn
chi guelrnabwaꞌ cun yahgaxiiyi hasta rnabwaꞌ ma cun neezaa
xquelmilahgru ma laꞌh maan rooꞌ chi.
\v 3 Chiꞌchi bwaꞌhahn
hasta bidxeeldxyihdxyi tuhbi yihca maan rooꞌ chi nin rluuꞌyi
bachyuuꞌga tuhbi machehta, ya mweer ñahchi ma; per guyuuꞌ
biaaca hasta bidxeeldxyihdxyi yihca ma. Ya badxyigaaꞌ duxa
loh raꞌ bwiinn guidxyiyuh pur nin biaaca yihca maan rooꞌ
chi, niꞌchin nin zee naꞌhla raꞌ ba laꞌh maan roo chi,
\v 4 ya
bazuꞌnllihbi raꞌ ba loh maan duxa nin laa dragohn laasii
badiꞌhi ma guelrnabwaꞌ rooꞌ laꞌh maan roo chi ya squiiꞌ rñiꞌ
raꞌ ba:
\p ―¿Chyu stuhbi ñahca ziga maan roo riiꞌ? ¿Chyu laa nin
gaca childxinee laꞌh maan ca?
\p
\v 5 Nee guyuuꞌ za nin basañiꞌ laꞌh maan roo ca dxyiꞌdxyi tin
guzaꞌloh cañiꞌ ma garaaloh dxyiꞌdxyi nayachi, dxyiꞌdxyi nin
rñiꞌyah laꞌh Dxiohs, nee guyuuꞌ za chyu badiꞌhi gaapa ma
guelrnabwaꞌ loh chywaꞌh bichiohpa bweꞌhw.
\v 6 Pwihsi
guñiꞌyah ma laꞌh Dxiohs guñiꞌyah duxa ma ziga naa lah
Dxiohs, cun xpwiinn guidoꞌ Ñiꞌh, nee cun neezaa nin rii raꞌ
nez llaaꞌndxibaaꞌ.
\v 7 Chiꞌchi guyuuꞌ nin bwiꞌhnn basaaꞌn
gucaꞌhnee maan roo chi laꞌh raꞌ xpwiinn Dxiohs; bwiꞌhnn
maan roo chi gahn laꞌh raꞌ ba, chiꞌchi gunabwaꞌ maan roo chi
garaa raꞌ guihdxyi biꞌtuꞌhn raꞌ cun hasta naa raꞌ bwiinn
guihdxyi rooꞌ, cun bwiinn nin rñiꞌ guriin-guriin dxyiꞌzah
raꞌ nee cun garaa za rrahsa raꞌ bwiinn raꞌ,
\v 8 ya nez loh
maan roo chi guzuꞌnllihbi garaa raꞌ bwiinn guidxyiyuh; garaa
raꞌ bwiinn raꞌ nin ayi caa lah ñiꞌh loh chihbru xteenn
guelnabahan xteenn Xiꞌhyi Dxiohs, nin guhchi xcweenta raꞌ
ba laasii chin nagahdxi cwixchih guidxyiyuh gucah loh
chihbru chi lah garaa raꞌ nin gaca xpwiinn Dxiohs.
\p
\v 9 Sidela chyulla zohballaala dxiahga ñiꞌh, chuu ba-chaꞌzi
ba dxyiꞌdxyi raꞌ riiꞌ.
\v 10 Bwiinn nin guzeenee prehsu laꞌh
bwiinn raꞌ, neezaa bwiinn raꞌ chi guzee prehsu; chyuu chiꞌh
zi nin chinn laꞌh bwiinn cun tuhbi macheta, neezaa laꞌh
bwiinn chi gachi ba cun macheta. Pwihsi niꞌchi bwiinn raꞌ
nin naa xpwiinn Dxiohs nahpa gaapa raꞌ ba paseensi nee chuu
guelriachii stoꞌ xteenn Dxiohs stoꞌ raꞌ ba.
\p
\v 11 Seguihdu bwaꞌhahn stuhbi maan rooꞌ nin cariaꞌh nez loh
yuh; zohba chiohpa xcahchu ma ziga tuhbi lliꞌhyi, rñiꞌ ma
ziga rñiꞌ maan duxa nin laa dragohn,
\v 12 per rnabwaꞌ za ma
ziga rnabwaꞌ mweer maan roo chi laꞌgahca nez loh maan roo
chi nee ruhnn za ma rzuꞌnllihbi raꞌ bwiinn guidxyiyuh loh
maan roo nin guruuꞌga yihca ñiꞌh per biaaca yihca ma.
\v 13 Neezaa guelmilahgru raꞌ ruhnn raroopa maan roo chi, neezaa
ruhnn ma riaaba bwehla nez llaaꞌndxibaaꞌ para loh yuh nez
delaantaloh raꞌ bwiinn.
\p
\v 14 Rusaguiꞌhi ma laꞌh raꞌ bwiinn guidxyiyuh raꞌ xcweenta
guelmilahgru raꞌ nin ruhnn ma nez loh mweer maan roo, ya
gunabwaꞌ ma guzuꞌnllihbi raꞌ bwiinn guidxyiyuh loh tuhbi
figuhra xteenn maan roo nin bidxeeldxyihdxyi yihca ñiꞌh cun
spahda nee biaaca yihca ma.
\v 15 Ya nin raroopa maan roo
chi gucaꞌha ma guelrnabwaꞌ tin gudiꞌhi ma guelnabahan laꞌh
figuhra xteenn mweer maan rooꞌ tin figuhra chi guunn guiñiꞌ
gachi garaa raꞌ bwiinn raꞌ nin ayi guzuꞌnllihbi nez loh ma,
\v 16 nee gunabwaꞌ za ma squiiꞌ; desde biñiꞌn cun bwiinn roo
raꞌ, rricu raꞌ, prohbi raꞌ, nin ayi gudooꞌ loh dziꞌn cun nin
gudooꞌ raꞌ; chuu raꞌ ba tuhbi bwaꞌ lahdu derehchu naa
raꞌ ba o locah raꞌ ba,
\v 17 ya ayi nuu chyu bwiinn siꞌ nin
gutooꞌ sidela ya ayi nuu raꞌ ba bwaꞌ chi, ya bwaꞌ chi naa
lah xteenn maan roo chi o númeru xteenn ziga lah maan chi.
\v 18 Dee rchiꞌhn guelnaann, ya bwiinn nin nahpa guelnaann,
gulaaba ba númeru xteenn maan roo chi, nin naa tuhbi númeru
xteenn lah tuhbi ndxiꞌhw, ya númeru chi naa seicientos
sesenta y seis.
\c 14
\s Cansiohn xteenn tuhbi gaywaꞌh chywaꞌh bitahpa mihyi bwiinn raꞌ
\p
\v 1 Ya seguihdu chin bwaꞌhahn stuhbi, chiꞌchi bwaꞌhaloon
laꞌh Lliꞌhyi xteenn Dxiohs zuu Ñiꞌh yihca dahan nin laa
Siohn, ya riꞌchi za rii raꞌ bwiinn nin naa raꞌ ziga tuhbi
gaywaꞌh chywaꞌh bitahpa mihyi raꞌ nin caabwaꞌ sehn xteenn
Lliꞌhyi nee cun sehn za xteenn Xtaada Ñiꞌh.
\v 2 Lwehgu
biindxiaagahn tuhbi rsiaaꞌha nin zeꞌ nez dxibaaꞌ, naa
rsiaaꞌha chi o bwih chi ziga chin riuuꞌ bwih ñihsa ziahan
guiꞌw; naa bwih chi ziga zi bwih nin riuuꞌ chin rñiꞌ guziꞌw
jweersi roo; naa za rsiaaꞌha chi ziga rsiaaꞌha xteenn chin
ruꞌlda ziahan raꞌ bwiinn aarpa raꞌ,
\v 3 ya cayuꞌlda raꞌ ba
tuhbi cansiohn nacuubi nez delaanta hasta zuu yagaxiiyi nin
zohba nin rnabwaꞌ, neezaa nez loh raꞌ gadaapa raꞌ maan raꞌ
nin nabahan raꞌpaꞌh, neezaa nez loh raꞌ bwiinn guuhla raꞌ.
Ayi chyu stuhbi bwiinn raꞌ nin ñahca ñuꞌlda cansiohn chi
sola laꞌh raꞌ bwiinn nin naa tuhbi gaywaꞌh chywaꞌh bi tahpa
mihyi bwiinn raꞌ nin gulaꞌh loh duhlda nez loh garaatiiꞌ raꞌ
bwiinn guidxyiyuh rahca cansiohn chi.
\v 4 Dee raꞌ nin ayi
baxiꞌn laꞌh raꞌ ñiꞌh loh raꞌ gunnaꞌh dxaaba, pwihsi naa raꞌ
ba bwiinn saantu raꞌ, nee zeenee Lliꞌhyi xteenn Dxiohs laꞌh
raꞌ ba nez chiꞌh zi zee Ñiꞌh. Laꞌh raꞌ ba nin gulaꞌh loh
duhlda loh raꞌ bwiinn guidxyiyuh ziga mwer jusehchi nez loh
Dxiohs cun nez loh Lliꞌhyi xteenn Ñiꞌh; naa raꞌ ba ziga
tuhbi guhn nez loh Ñiꞌh,
\v 5 laasii ayi bidxeela nin tuhbi
dxyiꞌdxyi dxixiꞌhw nez rwaaꞌ raꞌ ba, pwihsi niꞌchin nin ayi
naa raꞌ ba dxiimma nez loh yahgaxiiyi hasta zohba Dxiohs.
\s Dxyiꞌdxyi nin baluuꞌyi chohnna raꞌ xaanjla Dxiohs
\p
\v 6 Chiꞌchi bwaꞌhahn tuhbi xaanjla Dxiohs nin zaꞌbi nez galaayi
llaaꞌndxibaaꞌ, zeꞌnee ba dxyiꞌdxyi nin banaa para tuꞌpazi xteenn Dxiohs tin
guluuꞌyi aanjla chin nez loh raꞌ bwiinn guidxyiyuh; garaa raꞌ loh raꞌ guihdxyi
roo raꞌ cun guihdxyi biꞌtiꞌhn raꞌ, nez loh raꞌ bwiinn nin rñiꞌ guriin-guriin
dxyiꞌzah raꞌ, nee nez loh raꞌ bwiinn raꞌ nin naa guriin-guriin rrahsa raꞌ,
\v 7 ya guñiꞌ ba squiiꞌ jweersi rooꞌ:
\p ―¡Gulguidxyihbi Dxiohs!, ¡gulguiꞌhnn lasahca lah Ñiꞌh!, laasii laꞌh hohra
bigaꞌha guunn Ñiꞌh guelguxchisi loh garaa raꞌ bwiinn guidxyiyuh, niꞌchin
gulgasuꞌnllihbi nez loh nin bwiꞌhnnchaꞌyi guidxyiyuh cun dxibaaꞌ, neezaa
ñihsadoꞌ, nee cun hasta za rtahn ñihsa.
\p
\v 8 Chiꞌchi ziaa ganaꞌhla stuhbi aanjla nin cañiꞌ squiiꞌ:
\p ―¡Laꞌh guihdxyi rooꞌ nin laa Babilonia guñihchiloh!, ya laꞌn biaaba laasii
guluꞌguiꞌwun guzuhdzi raꞌ garaa raꞌ guidxyi raꞌ xteenn guidxyiyuh pur xcweenta
cohsa duhlda raꞌ.
\p
\v 9 Chiꞌchi naꞌhla gahca nin riohnna laꞌgaꞌh xaanjla Dxiohs, nin guñiꞌ
jweersi rooꞌ rahbi:
\p ―Sidela chyulla guzuꞌnllihbi loh maan roo nee cun ziga
figuhra xteenn ma, nee gusaaꞌn bwiinn chi chuu ba bwaꞌ
xteenn maan chi locah ba o naa ba,
\v 10 zutiꞌdxiloh duxa
bwiinn chi guelrzaꞌcazii nin guixeꞌhla Dxiohs zutiꞌdxiloh
ba cohsa raꞌ riiꞌ loh bwehla cun loh cohsa nin laa asufre
nez delanta loh raꞌ xaanjla Dxiohs nee cun nez delanta loh
za Lliꞌhyi xteenn Dxiohs.
\v 11 Per guhxa nin cayahca nin
zaꞌbi nez loh raꞌ ba, guillii-guillii par tuꞌpazi ziuuꞌhun,
nee ayi chuu guelrziꞌlaadzi riꞌchi dxyih-nagueꞌla para laꞌh
raꞌ nin bwiꞌhnn bazuꞌnllihbi loh maan chi nee cun figuhra
xteenn ma, o dela caa raꞌ ba bwaꞌ xteenn ma o ziga bwaꞌ
xteenn lah ma.
\v 12 Pwihsi niꞌchin laꞌh raꞌ bwiinn raꞌ nin
naa xpwiinn Dxiohs nin ruzoꞌbadxiahga xchiꞌdxyi Ñiꞌh nee
zeezah dziꞌtsi raꞌ ba loh xneziuh Jesucristu nahpa ayi
guiriaꞌh gahn raꞌ ba.
\p
\v 13 Ya chiꞌchi biindxiaagahn cañiꞌ tuhbi nin cañiꞌ loon nez llaaꞌndxibaaꞌ
squiiꞌ:
\p ―Bacaꞌh squiiꞌ: “Dichohsa raꞌ bwiinn raꞌ nin gachi nin riachii stoꞌ ñiꞌh
xchiꞌdxyi Jesucristu nnah nee par delanta.”
\p Chiꞌchi biindxiaagazahn cañiꞌ Spíritu Saantu xteenn Dxiohs:
\p ―Ziꞌchi, tin guziꞌlaadzi raꞌ ba, ya ayi ru guunn raꞌ ba dziꞌn, laasii
laꞌhnuꞌh naann la xi dziꞌn bwiꞌhnn raꞌ ba.
\s Jusehchi xteenn guidxyiyuh
\p
\v 14 Chiꞌchi bwaꞌhahn tuhbi xcahyi labweh, ya loh xcahyi chi zohba tuhbi nin
rñah ziga Lliiꞌn Dxiohs nin naa ndxiꞌhw ya zohba tuhbi curohn nin naa
ganaallatiiꞌ ohro yihca Ñiꞌh, ya nuu tuhbi hohsa naa Ñiꞌh nee caa duxa loh
hohsa chi,
\v 15 ya chiꞌchi biriaꞌh tuhbi xaanjla Dxiohs xquidoꞌ Ñiꞌh, cañiꞌ
aanjla chi jweersi rooꞌ loh nin zohba loh xcahyi squiiꞌ:
\p ―Guluꞌtii xohsa luꞌh tin batiaaꞌha xliꞌhn luꞌh, laasii laꞌh hohra bigaꞌha
gutiaaꞌha luꞌh xliꞌhn luꞌh loh gaduhbi guidxyiyuh laasii ya
laꞌguhla.
\p
\v 16 Ya chiꞌchi gucaꞌha nin zohba loh xcahyi xohsa Ñiꞌh gulluhbi Ñiꞌhn loh
guidxyiyuh tin batiaaꞌha Ñiꞌh nin naa xliꞌhn Ñiꞌh loh guidxyiyuh riiꞌ,
\v 17 ya
chiꞌchi biriaꞌh za stuhbi xaanjla Dxiohs laꞌn xquidoꞌ Ñiꞌh nin nuu dxibaaꞌ,
nuu za tuhbi hohsa nin caa duxa rwaaꞌ ñiꞌh naa aanjla chi,
\v 18 chiꞌchi
biriaꞌh stuhbi xaanjla Dxiohs nez hasta naa bacuꞌgadxiah xteenn Dxiohs nin
nuu dxibaaꞌ. Aanjla chi nahpa guelrnabwaꞌ loh bwehla duxa, ya guñiꞌ aanjla
chi jweersi roo duxa loh nin nuu hohsa naduxa naa ñiꞌh squiiꞌ:
\p ―Gucaꞌha xohsa luꞌh bachyuuꞌga garaa raꞌ rrasima uva nin nuu raꞌ loh
guidxyiyuh riiꞌ, laasii banaa guirwaꞌha raꞌn baguhla raꞌn.
\p
\v 19 Ya chiꞌchi gulluhbi aanjla chi xohsa ba loh guidxyiyuh, tin basiaꞌpitii
ba uva loh guidxyiyuh, tin bachah ban laꞌn hasta bitaaꞌha yihca raꞌn, laasii
bidxyiꞌchi Dxiohs pur xcweenta raꞌn,
\v 20 ya bitaaꞌha yihca raꞌ uva raꞌ chi
nez rwaaꞌ guihdxyi Jerusalehn, ya ziꞌhyi duxa rihn biriaꞌh yihca raꞌ uva raꞌ
chi, ya bigaꞌha rihn chi ziga zi chin riuuꞌ ñisyuh guiꞌw, ya bibiꞌhyi rihn chi
ziga chi chohnna gaywaꞌha mihyi metru gadiidxi hasta bitaaꞌha yihca raꞌ uva
raꞌ chi.
\c 15
\s Laꞌh raꞌ xaanjla Dxiohs nin nuꞌa gagaadzi luulchima raꞌ guelrzaꞌcazii raꞌ
\p
\v 1 Chiꞌchi bwaꞌahn stuhbi sehn rooꞌ llaaꞌndxibaaꞌ nin bachiꞌbi duxa naꞌh;
bwaꞌhahn gahdzi xaanjla Dxiohs cun gagaadzi guelninrusaꞌcazii raꞌ nin naa
luulchima ya niꞌchi naa luulchima xquelnadxyiꞌchi Dxiohs, nin gariaꞌllahn
Ñiꞌh laꞌh raꞌ bwiinn guidxyiyuh.
\v 2 Bwaꞌha zahn tuhbi ziga nin rñah ziga
ñihsadoꞌ nin naa ziga cristal nuuchin bwehla, ya garaa raꞌ bwiinn raꞌ nin ayi
guzuꞌnllihbi nez loh maan rooꞌ cun ziga xfiguhra ma nee nin ayi za basaaꞌn
ñicah tihxi raꞌ ba númeru, nin lah maan chi; zuu raꞌ ba galaayi ñihsadoꞌ chi,
nee caꞌha raꞌ ba arpa raꞌ nin badiꞌhi Dxiohs laꞌh raꞌ ba,
\v 3 ya cayuꞌlda raꞌ
ba tuhbi coru xteenn guehtu Moisehs nin guhca xpwiinn Dxiohs, nee cun
coru za xteenn Xiꞌhyi Dxiohs; ya squiiꞌ naa coru chi:
\q Cohsa rooꞌ duxa naa dziꞌn nin bwiꞌhnn luꞌh Yuꞌbiluꞌh, Daada
Dxiohs, nin nahpa garaatiiꞌ raꞌ guelrnabwaꞌ.
\q Ruhnn Yuꞌbiluꞌh ganaalla dziꞌn zaꞌca, rñiꞌ za Yuꞌbiluꞌh
ganaalla dxyiꞌdxyi raꞌ nin guchii,
\q nee Yuꞌbi za luꞌh naa luꞌh Rehyi loh garaa raꞌ bwiinn
guidxyiyuh.
\q
\v 4 ¿Chyu ayi guidxyihbi yiꞌh Daada?
\q ¿Chyu ayi guunn lasahca lah Yuꞌbiluꞌh?
\q Pwihsi sola yiꞌh dxiꞌh naa luꞌh saantu,
\q ya zieꞌbiiga raꞌ garaa raꞌ bwiinn guidxyiyuh raꞌ tin guzuꞌnllihbi raꞌ ba
nez loh Yuꞌbiluꞌh,
\q laasii ba baluuꞌyiloh luꞌh garaa raꞌ xtsiꞌn zaꞌca Yuꞌbiluꞌh.
\p
\v 5 Ya seguihdu bwaꞌhahn nez llaaꞌndxibaaꞌ, billaala guidoꞌ
saantu rooꞌ nez dxibaaꞌ hasta riuuꞌchaꞌyi tahblu dxiah nin
caa lehyi.
\v 6 Rwaaꞌ guidoꞌ saantu rooꞌ chi biriaꞌh gahdzi
xaanjla Dxiohs nin caꞌha gahdzi guelrusaꞌcazii nin dxiaaba
loh guidxyiyuh. Nahcu raꞌ aanjla raꞌ chi ganaalla lahdxi
labweh raꞌ nin rcaꞌbachaꞌh raꞌ za lahdxi chi, neezaa nuu
tuhbigah raꞌ cinturohn nin naa cun ohro lastoꞌ raꞌ aanjla
raꞌ chi.
\v 7 Ya chiꞌchi loh gadaapa raꞌ nin naa ziga maan
nabahan raꞌ nin nuu loh Dxiohs dxibaaꞌ, ya tuhbi maan raꞌ
chi badiꞌhi tuhbigah cohpa laꞌh cada tuhbigah aanjla raꞌ nin
naa gahdzi chi, ya cohpa raꞌ chi naa raꞌ ganaalla ohru, ya
laꞌn cohpa raꞌ chi nuu guelguxchisi xteenn Dxiohs nin
banabahan par tuꞌpazi.
\v 8 Ya laꞌn guidoꞌ saantu rooꞌ chi
gwadxahan guhxa nin naa guelñaꞌñih cun xquelrnabwaꞌ rooꞌ
Dxiohs, ya ayi chyu guhcatiiꞌ ñiuꞌtiiꞌ laꞌn guidoꞌ saantu
rooꞌ chi hasta que noyi chaꞌloh gagaadzi raꞌ guelrusaꞌcazii
raꞌ nin caꞌha gagaadzi raꞌ xaanjla Dxiohs.
\c 16
\s Cohpa raꞌ nin gadxah raꞌ xquelguxchisi Dxiohs
\p
\v 1 Chiꞌchi biindxiaagahn rsiaaꞌha tuhbi nin cañiꞌ jweersi rooꞌ laꞌn guidoꞌ
saantu rooꞌ nin nuu dxibaaꞌ, cañiꞌ niꞌchi loh raꞌ gagaadzi xaanjla Dxiohs
squiiꞌ:
\p ―Gulchegalaꞌta guelguxchisi xteenn Dxiohs nin nuu laꞌn gagaadzi cohpa ca loh
guidxyiyuh.
\p
\v 2 Ya gwah mweer tuhbi raꞌ aanjla chi, ya balaꞌta ba nin
nuu laꞌn xcohpa ba loh guidxyiyuh, ya garaa raꞌ bwiinn raꞌ
nin caa bwaꞌ xteenn maan rooꞌ nee bwiinn raꞌ za nin
bazuꞌnllihbi raꞌ nez loh figuhra xteenn maan chi, biriaꞌ
tuhbi guiiꞌdxyu tihxi raꞌ ba nin badiꞌhi guelnayaan duxa
tihxi bwiinn raꞌ chi,
\v 3 ya bwiꞌhnn tucahri laꞌh nin
raroopa aanjla chi balaꞌta ba xcohpa ba loh ñihsadoꞌ, ya
ñihsa xteenn ñihsadoꞌ chi biahcan ziga rihn xteenn tuhbi
bwiinnguuchi nin rlliꞌh llarihn ñiꞌh, ya guhchi garaa raꞌ
maan raꞌ nin naa maan ñihsa raꞌ nin nuu loh ñihsadoꞌ chi.
\v 4 Lwehgu bwiꞌhnn tucahri laꞌh nin riohnna aanjla balaꞌta
ba xcohpa ba loh guiꞌw raꞌ cun hasta catahn raꞌ ñihsa, ya
biahca raꞌn ziga rihn.
\v 5 Lwehgu biindxiaagahn guñiꞌ
aanjla xteenn ñihsa raꞌ chi squiiꞌ:
\p ―Bwen duxa naa Yuꞌbiluꞌh Daada Dxiohs nin naa paꞌh saantu
rooꞌ; Yiꞌh naa luꞌh nnah nee ziꞌca gahca za naa luꞌh desde
galohtiiꞌyi laasii cayuhnn Yuꞌbiluꞌh guelguxchisi xcweenta
cohsa raꞌ riiꞌ,
\v 6 laasii laꞌh raꞌ deeꞌ raꞌ nin gudxiinn
laꞌh raꞌ xpwiinn Yuꞌbiluꞌh nin gulliꞌh llarihn raꞌ ñiꞌh,
neezaa raꞌ xpwiinn luꞌh nin baluuꞌyi xchiꞌdxyi Yuꞌbiluꞌh,
pwihsi yiꞌh cayuhnn luꞌh cayeeꞌ raꞌ ba rihn, laasii ruhnn
tucahrin laꞌh raꞌ ba.
\p
\v 7 Ya chiꞌchi biindxiaagahn cañiꞌ nin cañiꞌ nez loh bacuꞌgadxiah squiiꞌ:
\p ―Guchii paꞌh luꞌh, Daada Dxiohs nin nahpa garaatiiꞌ raꞌ
guelrnabwaꞌ; xquelguxchiisi Yuꞌbiluꞌh naan guchii paꞌh nee
naa xnehza za raꞌn.
\p
\v 8 Ya chiꞌchi laꞌh nin radaapa aanjla bachah ba nin nuu
laꞌn cohpa nin nuu naa ba loh gubihdxyi, tin ziꞌchi guhpa
gubihdxyi guelrnabwaꞌ bacaꞌdxih gubihdxyi laꞌh raꞌ bwiinn
cun dxih loh gubihdxyi.
\v 9 Ya garaa raꞌ bwiinn guidxyiyuh
gucaꞌdxih duxa raꞌ ba per nicala ziꞌchi guzahca raꞌ ba per
ayi bwiꞌhnn raꞌ ba lligaaba ñusaguuꞌdzi stoꞌ raꞌ ba nez loh
Dxiohs ñiñiꞌ zaꞌca raꞌ ba pur laꞌh Ñiꞌh, mahzi laꞌlaꞌgaꞌh
guñiꞌyah raꞌ ba laꞌh Dxiohs nin nahpa guelrnabwaꞌ loh raꞌ
cohsa raꞌ riiꞌ.
\v 10 Ya chiꞌchi gucaꞌha nin rahca gaꞌyu
aanjla cohpa nin nuu naa ba bachah ban loh yahgaxiiyi xteenn
maan rooꞌ, ya biaꞌhan nacahyi hasta rnabwaꞌ maan rooꞌ chi;
per laꞌh raꞌ bwiinn sola riigaxaꞌta lahyi raꞌ ba luhdxyi raꞌ
ba rwaaꞌ raꞌ ba tantu guelnayaan nin cagatiꞌdxiloh raꞌ ba,
\v 11 per nicala ziꞌchi guzahca raꞌ ba per ayi basaguuꞌdzi
stoꞌ raꞌ ba nee gwazahtiiꞌ guñiꞌyah ru raꞌ ba laꞌh Yuꞌbi
Dxiohs nin nuu dxibaaꞌ laasii cagatiꞌdxiloh raꞌ ba
guelnayaan duxa xcweenta raꞌ guiiꞌdxyu nayaan raꞌ nin
cagasaꞌcazii laꞌh raꞌ ba.
\v 12 Ya nin rahca xoꞌpa aanjla
balaꞌta ba nin nuu laꞌn cohpa nin nuu naa ba loh guiꞌw nin
laa Eufrates, ya gubihdzi ñihsa guiꞌw chi tin guyuuꞌ tuhbi
nehza para laꞌh raꞌ rrehyi raꞌ nin zeꞌ nez hasta rtahn
gubihdxyi,
\v 13 ya chiꞌchi bwaꞌhahn biriaꞌh chohnna spíritu
dxaaba rwaaꞌ maan duxa nin laa dragohn cun rwaaꞌ maan rooꞌ
cun rwaaꞌ profeta nin rusaguiꞌhi; naa raꞌ spíritu raꞌ chi
ziga naa raꞌ gurahn.
\v 14 Deeꞌ raꞌ nin naa raꞌ spíritu
xteenn bwiinndxaaba, ruhnn raꞌn milahgru raꞌ, sehn rooꞌ raꞌ;
ya riah raꞌn loh garaa raꞌ rrehyi raꞌ nin nuu loh guidxyiyuh
tin gadiaaꞌha raꞌ garaa raꞌ bwiinn guidxyiyuh tin gaca raꞌ
ba tuhsi para gucaꞌnee raꞌ ba laꞌh Yuꞌbi Dxiohs nin nahpa
garaa raꞌ guelrnabwaꞌ chin gadzihn Ñiꞌh loh guidxyiyuh.
\v 15 “¡Gulguiaꞌha! Naꞌh dxieꞌldahn ziga zi chin ayi nuu
dxyiꞌdxyi radzihn gubaꞌn ziꞌchi zi gadzihnaꞌhn. Dichohsa
raꞌ nin cabweeza laꞌn dxyih raꞌ chi, cabweꞌhe xcaꞌlda raꞌ ba
nee caywaꞌha raꞌ ba gu garaa raꞌ xahba ba tin ayi sah
llihgabweꞌhela raꞌ nee dxiaꞌhanxtuhyi ba loh raꞌ bwiinn.”
\v 16 Chiꞌchi gutiaaꞌha raꞌ ba garaa raꞌ bwiinn raꞌ riiꞌ
tuhbi lahta hasta laa cun dxyiꞌdxyi hebreu Armagedohn.
\p
\v 17 Ya chiꞌchi laꞌh nin rahca gahdzi aanjla gucaꞌha ba
cohpa nin nuu naa ba bachah ban loh bwih zi, ya desde nez
laꞌn guidoꞌ saantu rooꞌ nin nuu nez dxibaaꞌ biriaꞌh tuhbi
rsiaaꞌha rooꞌ hasta zuu yahgaxiiyi xteenn Dxiohs nin guñiꞌ
squiiꞌ:
\p ―Laꞌn naa, laꞌn guyaꞌloh.
\p
\v 18 Chiꞌchi bidxiꞌñaaꞌ duxa, cun rsiaaꞌha duxa xteenn raꞌ
duꞌh guziꞌw, ya loh guidxyiyuh guhca tuhbi lluh rooꞌ duxa
nin nagahdxi gacatiiꞌ loh garaa raꞌ lluh nin rahca desde nin
rii nabahan bwiinn raꞌ loh guidxyiyuh.
\v 19 Chin guhca lluh
rooꞌ duxa chi, birehza guidxyi rooꞌ duxa ca; guhcan chohnna
taaꞌha, ya guihdxyi rooꞌ raꞌ ziga ciudahd raꞌ nin nuu loh
guidxyiyuh gurih raꞌn, ya baganna stoꞌ Dxiohs guihdxyi rooꞌ
nin laa Babilonia, tin guyaꞌloh bareꞌllahn Dxiohs laꞌh
guihdxyi chi.
\v 20 Garaa raꞌ isla raꞌ cun dahan raꞌ
guñihchiloh raꞌn,
\v 21 neezaa biaaba raꞌ dxidxiah duxa raꞌ
nez dxibaaꞌ para loh guidxyiyuh; dxidxiah raꞌ chi naaꞌha
raꞌn ziga chwaꞌhgah kihlu, ya bwiinn raꞌ guñiꞌyah duxa raꞌ
ba laꞌh Dxiohs laasii basiaaba Ñiꞌh dxidxiah duxa raꞌ chi,
laasii guhcan tuhbi guelrzaꞌcazii rooꞌ duxa para laꞌh raꞌ
bwiinn guidxyiyuh.
\c 17
\s Guelguxchisi rooꞌ nin guunn Dxiohs laꞌh tuhbi gunnaꞌh dxaaba
\p
\v 1 Ya chiꞌchi bwaꞌhahn loh raꞌ gahdzi aanjla nin caꞌha gagaadzi cohpa biriaꞌh
tuhbi nin guñiꞌ loon squiiꞌ:
\p ―Riiꞌ gudaaꞌ, tin guluꞌyiꞌhn yiꞌh cuun nin naa guelrzaꞌcazii duxa xteenn
gunnaꞌh dxaaba riiꞌ nin zohba hasta nuu ziꞌhyi ñihsa raꞌ.
\v 2 Garaa raꞌ
rrehyi raꞌ nin nuu loh guidxyiyuh guhpa raꞌ ba duhlda pur gunnaꞌh riiꞌ ya
basiꞌnaaꞌha xquelrusaguiꞌhi gunnaꞌh riiꞌ laꞌh raꞌ ba pur nin bidxiꞌ duhlda raꞌ
ba laꞌh gunnaꞌh riiꞌ.
\p
\v 3 Lwehgu ziga loh tuhbi bacaꞌlda gwanee aanjla chi naꞌh
loh tuhbi dahan desiertu, ya riꞌchi bwaꞌhahn tuhbi gunnaꞌh
zohba ba dihtsi tuhbi maan rooꞌ naxñaa, ya gaduhbitiiꞌ tihxi
ma caa dxyiꞌdxyi raꞌ nin rñiꞌyah laꞌh Yuꞌbi Dxiohs nee
gahdzi naa yihca ma, zohba za tsiꞌh xcahchu ma.
\v 4 Gunnaꞌh
riiꞌ nahcu ba tuhbi lahdxi nin naa chiohpa culohri; tuhbin
naa murahdu cun naxñaaꞌ, ya zuuchaꞌyi ba cun ohro, cun dxiah
josca raꞌ nee cun perla raꞌ nin lasahca duxa, ya neezaa nuu
naa gunnaꞌh chi tuhbi cohpa nin naa ganaalla tiiꞌ ohro nin
gadxah cohsa gubwihlli nin bwiꞌhnn ba cun bwiinn guidxyiyuh
raꞌ,
\v 5 ya gunnaꞌh ca locah ba caa tuhbi dxyiꞌdxyi nin ayi
chyu rabweꞌhecaa xa naa dxyiꞌdxyi raꞌ chi, per squiiꞌ rñiꞌ
dxyiꞌdxyi chi: “Guihdxyi Babilonia gurooꞌ, nin naa xnaan
gunnaꞌh dxaaba raꞌ nee cun garaaloh raꞌ cohsa dxaaba raꞌ nin
ruhnn raꞌ bwiinn loh guidxyiyuh.”
\v 6 Chiꞌchi lwehgu
badiꞌhihn cweenta nuullaadxuu yihca gunnaꞌh chi cun llarihn
raꞌ xpwiinn Dxiohs nin badxiinn ba, nee cun neezaa llarihn
raꞌ bwiinn raꞌ nin baluuꞌyi xchiꞌdxyi Jesucristu. Ya chin
bwaꞌhahn cohsa raꞌ chi bidxyiibi duuxaꞌhn,
\v 7 ya chiꞌchi nnah
aanjla chi loon squiiꞌ:
\p ―¿Xixnaa rluuꞌyi cadxyihbi luꞌh? Naꞌh ziñaan loh luꞌh xa
naa xcweenta gunnaꞌh ca, nee cun xcweenta maan rooꞌ nin nuu
gahdzi yihca ñiꞌh ca nee gahdzi za xcahchu ma.
\v 8 Maan
rooꞌ nin bwaꞌha luꞌh naa ma tuhbi maan nin guyuuꞌ cadxyih
rooꞌ, ya ziga nnah ayi ma laꞌn dxyih raꞌ riiꞌ per laꞌh dxyih
bigaꞌha gariaꞌh ma gabihldxi, chiꞌchiyi chaꞌlohtiiꞌ ñichiloh
ma. Ya bwiinn raꞌ nin nabahan loh guidxyiyuh nin ayi gucah
lah raꞌ ñiꞌh loh dxihtsi xteenn guelnabahan xteenn Dxiohs,
dxihtsi nin guhcachaꞌyi desdeyi chin nagahdxi cwachixchih
Ñiꞌh guidxyiyuh, zidxyihbi duxa raꞌ ba chin gwaꞌha raꞌ ba
loh maan ca, maan nin gubahan desde cachieempa rooꞌ, per
ayiru ma laꞌn dxyih raꞌ riiꞌ per zibiaꞌgarii dxiꞌ ma stuhbi.
\p
\v 9 ’Riiꞌ nuu tuhbi dxyiꞌdxyi para laꞌh raꞌ nin gacabwaꞌ:
Nin naa gahdzi yihca maan chi naa gahdzi dahan raꞌ nin zohba
gunnaꞌh chi yihca ñiꞌh;
\v 10 nee naa za raꞌn gahdzi rrehyi:
gaꞌyu rrehyi raꞌ chi laꞌh raꞌ ba guñihchiloh raꞌ la, yannah
laꞌh tuhbi ba canabwaꞌ nnah, ya stuhbi ba nagahdxi dxiinlon
ba. Ya chin dxiꞌ stuhbi raꞌba nin naa luulchima, ayi
gacataꞌh ba ziahan dxyih.
\v 11 Ya chiꞌchi laꞌh maan rooꞌ
nin guyuuꞌ cadxih rooꞌ nee nicala ayiru ma nnah, naa nin
rahca xuhnna rrehyi raꞌ per ya luulchimatiiꞌ chaꞌlohtiiꞌ ba
para tuꞌpazi.
\p
\v 12 ’Gadziꞌh raꞌ xcahchu ma nin bwaꞌha luꞌh naa tsiꞌh raꞌ
rrehyi raꞌ nin nagahdxi guinabwaꞌ, per sola tuhbi hohra si
gapa raꞌ niꞌchi guelrnabwaꞌ, tuhsi cun maan rooꞌ.
\v 13 Gahdziꞌh raꞌ rrehyi raꞌ riiꞌ gaca xigaaba raꞌ ba tuhsi, ya
zudiꞌhi raꞌ ba xlajweersi raꞌ ba cun xquelrnabwaꞌ raꞌ ba
laꞌh maan rooꞌ chi.
\v 14 Laꞌh raꞌ dee raꞌ nin gucaꞌhnee
laꞌh Lliꞌhyi xteenn Dxiohs, per zuhnn Lliꞌhyi chi gahn loh
raꞌ cohsa raꞌ chi laasii laꞌh Ñiꞌh naa Ñiꞌh Daada loh garaa
raꞌ daada raꞌ nee naa za Ñiꞌh rrehyi loh garaa raꞌ rrehyi
raꞌ nin nuu loh guidxyiyuh, ya garaa raꞌ nin naꞌhla
laꞌh Ñiꞌh, naa bwiinn raꞌ nin gulii Dxiohs nee naa raꞌ ba
bwiinn nayaa nin zeezah dziꞌtsi loh xchiꞌdxyi Ñiꞌh.
\p
\v 15 Neezaa guñiꞌ aanjla chi loon squiiꞌ:
\p ―Ñihsa raꞌ riiꞌ nin bwaꞌha luꞌh hasta zohba gunnaꞌh dxaaba
ca, naan garaa raꞌ guihdxyi raꞌ, garaa raꞌ bwiinn raꞌ, garaa
raꞌ bwiinn raꞌ nin rñiꞌ guriin-guriin dxyiꞌzah raꞌ cun garaa
raꞌ lahdxyi raꞌ bwiinn nin nuu loh guidxyiyuh.
\v 16 Ya
gadziꞌh cahchu raꞌ nin bwaꞌha luꞌh yihca maan rooꞌ chi,
zidxyiꞌchinee raꞌn laꞌh gunnaꞌh dxaaba chi. Zuuzuh
lligabweꞌhla raꞌn laꞌh gunnaꞌh dxaaba ca zahw raꞌn xpweꞌhla
gunnaꞌh dxaaba chi, nee zucaꞌdxih za raꞌn laꞌh gunnaꞌh chi.
\v 17 Dxiohs ya badiꞌhi Ñiꞌh para guunn raꞌ ba lligaaba chi,
tin guicaꞌha maan rooꞌ chi guelrnabwaꞌ hasta que no chaꞌloh
dxyiꞌdxyi raꞌ nin guñiꞌ Dxiohs.
\v 18 Ya gunnaꞌh nin bwaꞌha
luꞌh naa guihdxyi rooꞌ nin nugasaguiꞌhi yihca raꞌ rrehyi raꞌ
nin nuu loh guidxyiyuh.
\c 18
\s Xcweenta ziga guñihchiloh guihdxyi Babilonia
\p
\v 1 Chiꞌchi bwaꞌhahn loh stuhbi xaanjla Dxiohs nin zeꞌyehta nez llaaꞌndxibaaꞌ
cun zirooꞌ duxa guelrnabwaꞌ, ya hasta loh yuh baziꞌñih llaꞌñih xteenn aanjla
chi,
\v 2 ya cun tuhbi rsiaaꞌha duxa guñiꞌ aanjla squiiꞌ:
\p ―Laꞌh guihdxyi Babilonia guñihchiloh ya laꞌn guñihchiloh, laꞌn biahca
chiꞌh lahdxyi raꞌ bwiinndxaaba raꞌ, hasta rcaꞌnzaa garaa
clahsa spíritu dxaaba raꞌ nee gudahla xpichiehza raꞌ maan
nin zohba xihyi raꞌ nin naa ñiꞌhin maan dxaaba, cun maan
duxa raꞌ
\v 3 laasii laꞌh yihca garaa raꞌ bwiinn guidxyiyuh
guyuuꞌ llaadxuu cun xcweenta duhlda nin bayihdxyi raꞌ ba
laꞌh gunnaꞌh dxaaba riiꞌ, garaa raꞌ za rrehyi raꞌ nin nuu
loh guihdxyiyuh guluꞌtii za raꞌ ba duhlda cun gunnaꞌh dxaaba
chi. Ya garaa raꞌ bwiinn nin ruhnn guriꞌxi guhca rricu raꞌ
ba pur xcweenta cohsa dxaaba raꞌ nin ruhnn gunnaꞌh dxaaba
chi.
\p
\v 4 Ya chiꞌchi bihnaꞌhn stuhbi rsiaaꞌha nin zeꞌ nez llaaꞌndxibaaꞌ nin guñiꞌ
squiiꞌ:
\p ―Gulguiriaꞌh loh guihdxyi ca laꞌhtu bwiinn raꞌ nin naa raꞌ
xpwiiꞌnnahn, tin ayi neezaa tu chiilli tu xtuhlda raꞌ bwiinn
raꞌ ca, nee tin ayi tiidxi tu loh guelrzaꞌcazii duxa raꞌ nin
gusaꞌcazii laꞌh raꞌ ba,
\v 5 laasii guyuuꞌ duxa xtuhlda raꞌ
ba, hasta badiaaꞌha muntohnan nez loh Dxiohs dxibaaꞌ,
niꞌchin nin bagannastoꞌ Dxiohs xtuhlda raꞌ ba.
\v 6 Gulgadiꞌhi laꞌh gunnaꞌh ca ziga gahca nin badiꞌhi ba laꞌh
raꞌ snuhn raꞌ bwiinn, nee gulgasadxihlli laꞌh gunnaꞌh ca
chiohpa tantu pur cweenta nin bwiꞌhnn ba. Gulgaguꞌchi
guelrzaꞌcazii duxa nin batiꞌdxi gunnaꞌh dxaaba ca laꞌh raꞌ
bwiinn chiohpa bweelta, gulguiꞌhnnan naaꞌha duxa ru para
laꞌh gunnaꞌh ca laꞌhgahca ziga bwiꞌhnnee ba laꞌh raꞌ snuhn
raꞌ bwiinn.
\v 7 Gulgadiꞌhi tuhbi guelrzaꞌcazii duxa laꞌh
gunnaꞌh dxaaba ca laasii gubahan ba loh guidxyiyuh ziga
chiꞌh zi nin guclaaꞌdzi ba nee cun bwiꞌhnn lasahca ba
laꞌhgahca ba. Niꞌchin nnah gulgasaꞌcazii ba tin dxiagaadxuu
loh nin gubahan nasaa ba cun ziga bwiꞌhnn lasahca za ba laꞌh
ba, nee ziꞌchi gahca za gaca laꞌn lastoꞌ ba laasii laꞌn
lastoꞌ ba bwiꞌhnn ba lligaaba squiiꞌ: “Naꞌh zoꞌbaꞌhn ziga
zi tuhbi rrehyna; ayi naan biuhda, nee ayi chyu gusiahchyu
loh xigaaꞌbahn.”
\v 8 Pwihsi niꞌchin loh tuhsi dxyih dxiaaba
garaa guelguxchisi xteenn Dxiohs yihca gunnaꞌh dxaaba ca,
ziga guelguhchi, guelnalaasa duxa, guelrchiaꞌhan; nee
guicaꞌdxih ba laasii guelrnabwaꞌ rooꞌ duxa nahpa Daada
Dxiohs nin nuu dxibaaꞌ nin guunn guelguxchisi xcweenta
gunnaꞌh chi.
\p
\v 9 Ya garaa raꞌ rrehyi loh guidxyiyuh nin bidxaꞌga laꞌh
gunnaꞌh dxaaba riiꞌ zuꞌn raꞌ ba nee ziaa duxa lastoꞌ raꞌ ba
pur nin gwaꞌha raꞌ ba laꞌh gunnaꞌh riiꞌ chin chasa guhxa nin
cacaꞌdxih gunnaꞌh dxaaba riiꞌ.
\v 10 Ziaꞌhan raꞌ ba zihtu
laasii guidxyihbi raꞌ ba xcweenta guelrzaꞌcazii xteenn
gunnaꞌh chi, nee guiñiꞌ raꞌ ba squiiꞌ:
\p ―¡Ayy probhi za yiꞌh!, guihdxyi gurooꞌ Babilonia,
guihdxyi nin mahzi lasahca duxa; pwihsi pur minuhtu si
badzihn binaꞌzu luꞌh loh guelrzaꞌcazii.
\p
\v 11 Ya bwiinn guriꞌxi raꞌ nin nuu loh guidxyiyuh zuꞌn duxa
raꞌ ba pur xcweenta guihdxyi chi, laasii ayi ru chuu nin siꞌ
garaaloh nin rutooꞌ raꞌ ba.
\v 12 Nin rutooꞌ raꞌ ba naa raꞌ
ziga ohro, plahta, cun dxiah raꞌ nin nuu dxiah zaꞌca raꞌ,
perla raꞌ, lahdxi nin laa linu finu cun lahdxi nin naa sehda
cun nin naa culohr murahdu-naxñiaa, cun neezaa garaalohtiiꞌ
yahga zaꞌca raꞌ, nee cun cohsa raꞌ nin naa cun marfil,
bronce raꞌ, cun dxiꞌba raꞌ, cun marmol,
\v 13 cun canehla,
cun garaaloh lah guelwahw, cun yaꞌhla neezaa mirra cun
perfume raꞌ, cun vihnu, nsehchi, harina zaꞌca cun trihgu,
nee cun neezaa guidxaꞌh raꞌ nin rwaꞌ carga, lliꞌhyi,
maangwahyi raꞌ; carrwaje raꞌ, nee hasta neezaa bwiinn raꞌ
nin gudooꞌtiiꞌ;
\v 14 ya ziuuꞌ-saꞌbi dxyiꞌdxyi squiiꞌ:
\p ―¡Ayiru nahpa luꞌh ninahxi nin biuuꞌ duxa stoꞌ luꞌh, yannah laꞌh luꞌh
bañihchitiiꞌ para tuꞌpazi garaatiiꞌ cohsa zaꞌca cun cohsa zaꞌca duxa raꞌ nin
guhpa luꞌh, nee nin stuhbi ayi chuu ru raꞌn!
\p
\v 15 Ya nin bwiꞌhnn raꞌ guriꞌxi cun xcweenta raꞌ cohsa raꞌ riiꞌ nee guhca raꞌ
ba rricu pur guihdxyi riiꞌ, ziaꞌhan raꞌ ba zihtu laasii tahtu guidxyihbi raꞌ
ba pur guelrzaꞌcazii nin sacan, zahca nalaasa stoꞌ raꞌ ba nee zuꞌn raꞌ ba;
\v 16 nee zahbi raꞌ ba squiiꞌ:
\p ―¡Ayi, prohbi laꞌh guihdxyi rooꞌ ca! Naan ziga tuhbi gunnaꞌh nin nahcu tuhbi
lahdxi nin laa lihnu nee cun lahdxi culohr nin laa murahdu naxñaa raꞌ nee
zuchaꞌyiꞌhn cun ohru, cun garaaloh dxiah zaꞌca raꞌ cun perla raꞌ,
\v 17 ¡nee
pur minuhtu si guñihchiloh cohsa zaꞌca ziahan raꞌ chi!
\p Garaa raꞌ nin rnabwaꞌ barcu raꞌ cun garaa raꞌ nin rusazah barcu raꞌ nee cun
garaa ru raꞌ nin ruhnn raꞌ dziꞌn loh ñihsadoꞌ, nee cun garaa raꞌ bwiinn nin
rzah biahja laꞌn barcu; biaꞌhan raꞌ ba zihtu,
\v 18 ya, loh nin bwaꞌha raꞌ ba
guhxa nin cacaꞌdxih guihdxyi chi, guzaꞌbi rsiaaꞌha-gudidxyidxiah raꞌ ba
squiiꞌ:
\p ―¿Calla guidxeela stuhbi ziga guihdxyi rooꞌ riiꞌ?
\p
\v 19 Ya bachah raꞌ ba yuh yihca raꞌ ba, nee ruꞌnduxa raꞌ ba
cun riaa duxa raꞌ ba, ya rbwidxyidxiah raꞌ ba squiiꞌ:
\p ―¡Ayy! ¡Riaa duxa nu guihdxyi rooꞌ ca laasii pur guihdxyi
roo ca guhca rricu raꞌ nin nahpa raꞌ barcu loh ñihsadoꞌ,
yannah pur minuhtu si guñihchiloh guihdxyi rooꞌ ca!
\p
\v 20 Per biahxi xcweenta guihdxyi ca; yiꞌh dxibaaꞌ, laꞌhtu
nin naa raꞌ xpwiinn Dxiohs, laꞌhtu xpooxtla xteenn Ñiꞌh,
cun bwiinn raꞌ nin baluuꞌyi xchiꞌdxyi Ñiꞌh desde
galohtiiꞌyi; laasii laꞌh Dxiohs bwiꞌhnn guelguxchisi loh
guihdxyi ca tin gudxihllin garaa nin cagasaꞌcazii guihdxyica
laꞌhtu.
\v 21 Ya laꞌh tuhbi xaanjla Dxiohs nin nahpa
guelrnabwaꞌ guteesa ba tuhbi dxiah, nin naa ziga zi tuhbi dxiah
rooꞌ nin rucaꞌdzi maan dohba ya balaꞌh aanjla chin loh
ñihsadoꞌ, chiꞌchi rahbi ba squiiꞌ:
\p ―Squiiꞌ za dxiaabagueeta guihdxyi Babilonia, ya nin ayi
chuꞌtiiꞌ nin stuhbi dxyih gwaꞌha tu loh guihdxyi Babilonia.
\v 22 Nin stuhbitiiꞌ ayi chuu ru dxihn tu muusca xteenn arpa
raꞌ cun bidxee raꞌ, cun trompeta raꞌ; nee nin ayiru chyu
bwiinn nin guunn dziꞌn gaapa luꞌh; nee nin ayiru chuu
rsiaaꞌha xteenn dxiah rooꞌ raꞌ nin naa ziga dxiah nin
rucaꞌdzi maan dohba.
\v 23 Nee nin stuhbi biaꞌñih ayiru
gaapa luꞌh ya nin stuhbitiiꞌ za ayi xi lañih xteenn
guelruchinaa ayiru saꞌbi rsiaaꞌha loh luꞌh guihdxyi
Babilonia, cun neezaa xpwiinn guriꞌxi raꞌ luꞌh nin mahzi
lasahca raꞌ cadxyih loh guidxyiyuh, basaguiꞌhi luꞌh garaa
raꞌ guihdxyi raꞌ cun xquelbidxaꞌha luꞌh.
\p
\v 24 Pwihsi loh guihdxyi ca laꞌh llarihn bwiinn raꞌ nin
guñiꞌ xchiꞌdxyi Dxiohs nee cun nin naa raꞌ xpwiinn Ñiꞌh,
nee cun garaa raꞌ nin guhchi pur bwiinn loh guidxyiyuh; laꞌh
llarihn raꞌ ba bidxeela nuuchi luꞌh laasii yiꞌh gudxiinn
luꞌh laꞌh raꞌ ba.
\c 19
\p
\v 1 Chin guluhlla raꞌ cohsa raꞌ riiꞌ, chiꞌchi biindxiaagahn rsiaaꞌha ziga
ziahan rooꞌ raꞌ bwiinn nin cañiꞌ nez llaaꞌndxibaaꞌ squiiꞌ:
\q ¡Lasahca duxa naa lah Daada Dxiohs!
\q Cun ziga rutaꞌh Ñiꞌh
laꞌh raꞌ bwiinn loh duhlda, cun guelñaꞌñih,
cun guelrnabwaꞌ naa xteenn Xtaada Dxiohs nuꞌh,
\q
\v 2 laasii xquelguxchisi Ñiꞌh naa gaduhbi laꞌgaꞌhtiiꞌ ziga naa xnehza;
\q laasii laꞌh Ñiꞌh bwiꞌhnn guelguxchisi xcweenta gunnaꞌh
dxaaba nin cagaxiꞌn laꞌh raꞌ bwiinn guidxyiyuh cun xcweenta
xquelgubwihlli ba;
\q laꞌh Ñiꞌh basadxihlli laꞌh gunnaꞌh dxaaba chi llarihn raꞌ
xpwiinn Ñiꞌh.
\p
\v 3 Lwehgu guñiꞌ raꞌ ba stuhbi squiiꞌ:
\p ―¡Lasahca duxa naa lah Daada Dxiohs! Laasii guhxa xteenn
gunnaꞌh dxaaba cun ziga zohbadxih ba ayi chuu dxih cweezan.
\p
\v 4 Ya loh galda bitaapa raꞌ bwiinn guuhla cun gadaapa raꞌ
maan nabahanpaꞌhcaa raꞌ bazuꞌnllihbi raꞌ nez loh Dxiohs nin
zohba loh yahgaxiiyi rooꞌ ya rahbi raꞌ ba squiiꞌ:
\p ―¡Ziꞌchi gaca! ¡Lasahca naa lah luꞌh Daada Dxiohs!
\p
\v 5 Ya chiꞌchi desde nez loh yagaxiiyi rooꞌ chi biinloh tuhbi rsiaaꞌha nin
cañiꞌ squiiꞌ:
\q ¡Gulguiꞌhnn lasahca laꞌh Xchiohs nuꞌh, garaa tu nin ruhnn
dziꞌn nez loh Ñiꞌh; garaa tu nin ruzuꞌnllihbi nez loh
Dxiohs;
\q bwiinn raꞌ nin rnabwaꞌ nee cun bwiinn raꞌ nin ayi
xi guelrnabwaꞌ nahpa za!
\s Lañih xteenn saaꞌ Xiꞌhyi Dxiohs
\p
\v 6 Chiꞌchi biindxiaagahn ziga rsiaaꞌha ziahan rooꞌ raꞌ bwiinn, nee ziga bwih
xteenn ziahan guiꞌw chin radxaꞌgalasaaꞌ ñihsa nee ziga bwih xteenn chin
rdxiꞌñaaꞌ duxa duꞌguziꞌw; guñiꞌ squiiꞌ:
\q ¡Lasahca duxa naa lah Daada Dxiohs!, laasii laꞌh Yuꞌbi Dxiohs, nin naa Daada
xteenn nuꞌh, laꞌh Ñiꞌh guzohbaloh canabwaꞌ.
\q
\v 7 Dxiahxi duxa raꞌ nuꞌh, chuu nasaa duxa stoꞌ raꞌ nuꞌh nee gachidiꞌhnn
lasahca nuꞌh laꞌh Ñiꞌh,
\q laasii laꞌh dxyih nin gaca rsaaꞌ Xiꞌhyi Dxiohs
badzihn; laꞌh dxaꞌpa xteenn Ñiꞌh guzuhchaꞌyi.
\q
\v 8 Ya laꞌh dxaꞌpa chi guziꞌguehlda Dxiohs gacu bi lahdxi nin laa linu finu, nin
nayaa nin rcaꞌbachaꞌh,
\q pwihsi lahdxi linu finu naa sehn xteenn raꞌ dziꞌn zaꞌca
nin bwiꞌhnn raꞌ nin naa raꞌ xpwiinn Dxiohs.
\p
\v 9 Ya chiꞌchi nnah aanjla chi loon:
\p ―Bacaꞌh squiiꞌ: “Dichohsa raꞌ bwiinn raꞌ nin biduꞌhun dxiꞌ loh saaꞌ xteenn
Xiꞌhyi Dxiohs.”
\p Guñiꞌ za aanjla chi loon, nnah ba:
\p ―Dxyiꞌdxyi raꞌ riiꞌ naa dxyiꞌdxyi nin naa guchii xteenn Dxiohs.
\p
\v 10 Chiꞌchi ñuzuꞌnlliibihn loh aanjla chi, per squiiꞌ guñiꞌ
ba loon:
\p ―¡Ayi guunn luꞌh ziꞌca!, laasii naꞌh naan ziga gahca yiꞌh; naꞌh naan tuhbi
nin ruhnn xtsiꞌn Dxiohs, ziga naa luꞌh yiꞌh cun bwihtsi raꞌ luꞌh nin zezah
loh dxyiꞌdxyi guchii xteenn Jesucristu. Mas chaꞌyi guzuꞌnllihbi luꞌh loh
Dxiohs; laasii xchiꞌdxyi Jesuhs naa dxyiꞌdxyi nin ruluuꞌyi Dxiohs laꞌh raꞌ
bwiinn tin rahpaa raꞌ ba dxyiꞌdxyi guiñiꞌ raꞌ ba.
\s Nin dziꞌba tuhbi maangwahyi labweh
\p
\v 11 Chiꞌchi bwaꞌhahn billaala dxibaaꞌ, ya biinloh tuhbi
maangwahyi labweh, ya nin zohba dihtsi ma laa Nin ruzaꞌloh
xchiꞌdxyi Ñiꞌh, laasii rnabwaꞌ Ñiꞌh nee ruhnn Ñiꞌh guehrru
ziga naa xnehza ziga naa guelguxchisi zaꞌca.
\v 12 Bizloh
Ñiꞌh naa raꞌn ziga dxih bwehla, ya yihca Ñiꞌh zohba
ziahan rooꞌ raꞌ curohn, ya caa Ñiꞌh tuhbi lah nin sola
laꞌh Ñiꞌh naann Ñiꞌh ya ayi chyu ruhnn gahn dxiuꞌnbwaꞌ lah
Ñiꞌh.
\v 13 Nahcu Ñiꞌh tuhbi lahdxi nin nuuchi rihn, ya lah
Ñiꞌh naa Xchiꞌdxyi Dxiohs.
\v 14 Ya naꞌhla garaa raꞌ
suldahdu dxibaaꞌ xteenn Dxiohs laꞌh Ñiꞌh, nahcu raꞌ ba
lahdxi labweh guiiꞌw raꞌ, lahdxi nayaa nee dziꞌba za raꞌ ba
maangwahyi labweh raꞌ.
\v 15 Rwaaꞌ Ñiꞌh careꞌh tuhbi spahda
nin caa duxa garoopa dihtsi, tin cun laꞌh spahda chi
childxinee Ñiꞌh laꞌh raꞌ bwiinn garaa raꞌ guihdxyi raꞌ nin
nuu loh guidxyiyuh; naa Ñiꞌh nuꞌa ziga zi tuhbi bahra dxiꞌba
nguihdzi. Laꞌh Ñiꞌh zuhnn za Ñiꞌh guelguxchisi loh raꞌ bwiinn
raꞌ nin ruhnn malcriahdu nez loh Dxiohs ya zidxihchixquiiꞌ
Ñiꞌh yihca raꞌ ba ziga zi uhva raꞌ chin rahcan vihnu, nee
zuhnn Ñiꞌh para gutiꞌdxiloh raꞌ ba loh guelguxchisi xteenn
Dxiohs nin nuu nabahan dziꞌtsi llaaꞌndxibaaꞌ.
\v 16 Nee loh
xahba Ñiꞌh cun cweꞌ cuuꞌdxi Ñiꞌh caa squiiꞌ: “Rehyi xteenn
raꞌ rrehyi raꞌ, Daada xteenn raꞌ daada raꞌ.”
\p
\v 17 Ya bwaꞌhazahn loh tuhbi aanjla nin zuunchii nez loh gubihdxyi, nee guñiꞌ
aanjla chi cun tuhbi rsiaaꞌha rooꞌ squiiꞌ:
\p ―Loh raꞌ garaa raꞌ maan raꞌ nin zohba xihyi ñiꞌh nin zaꞌbi
nez llaaꞌndxibaaꞌ: Gultaaꞌ nee gulgadiaaꞌha riiꞌ, tin gahw tu
loh xchih rooꞌ xteenn Dxiohs,
\v 18 tin gahw tu bweꞌhla
xteenn rrehyi, neezaa bweꞌhla xteenn capitahn raꞌ, nee cun
bweꞌhla xteenn raꞌ za bwiinn raꞌ nin ruhnn naruhla, cun
bweꞌhla xteenn raꞌ maangwahyi nee cun nin rzohba za raꞌ
dihtsi ma, neezaa bweꞌhla xteenn raꞌ bwiinn; bwiinn nin naa
ziga bwiinn nin gudooꞌtiiꞌ raꞌ nee cun bwiinn raꞌ za nin ayi
gudooꞌ raꞌ, bwiinn nin nariin raꞌ cun ziga bwiinn nin
guyuꞌxa la raꞌ. Gacan rwaaꞌlohchiꞌzi.
\p
\v 19 Chiꞌchi bwaꞌahan loh maan rooꞌ cun loh raꞌ rrehyi loh
guidxyiyuh cun garaa raꞌ nin naa raꞌ ziga xsuldahdu raꞌ ba;
badiaaꞌha raꞌ ba tin childxinee raꞌ ba laꞌh nin dziꞌba
maangwahyi labweh cun neezaa garaa raꞌ nin naa xsuldahdu
Ñiꞌh,
\v 20 ya binaꞌzu maan rooꞌ chi cun nin guhca profehta
xteenn ma nin bwiꞌhnn sehn rooꞌ raꞌ cun milahgru raꞌ nez loh
maan rooꞌ chi tin binaꞌzunee ma tuhsi cun nin guhca
xprofehta ma. Ya cun milahgru raꞌ chi basaguiꞌhi profeta
dxaaba chi laꞌh raꞌ bwiinn raꞌ nin guziꞌguehlda raꞌ guyuuꞌ
raꞌ ba xpwaꞌ maan rooꞌ chi nee cun nin bazuꞌnllihbi za raꞌ
loh
xfiguhra maan rooꞌ chi; ya maan rooꞌ chi cun nin guhca
xprofehta ma tuhsi zee raꞌn loh bwehla duxa nin naa asufre,
\v 21 ya chiꞌchi laꞌh garaa raꞌ nin biaꞌhan, guhchi raꞌ ba
pur spahda nin biriaꞌh rwaaꞌ nin dziꞌba maangwahyi labweh,
ya garaa raꞌ maan nin zohba xihyi ñiꞌh gudahw xpweꞌhla
raꞌ ba.
\c 20
\s Tuhbi mihyi yihza
\p
\v 1 Chiꞌchi bwaꞌhahn loh tuhbi aanjla nin zeꞌyehta nez
dxibaaꞌ cun tuhbi chiahyi nin ruxaala guiiꞌdxyu nin laa
gabihldxyi naa ba. Nuu za tuhbi cadehn rooꞌ naa aanjla chi.
\v 2 Aanjla chi gunaꞌzu ba laꞌh maan duxa nin laa dragohn tin
biyiꞌbiduꞌh ma, laꞌhma nin guhca bweꞌlda rooꞌ chieempa duxa
nin laa bwiinndxaaba cun Satanahs, ya bachiꞌbiduꞌh aanjla
chi laꞌhma loh tuhbi mihyi yihza,
\v 3 ya chiꞌchi balaꞌh
aanjla chi laꞌhma gabihldxyi, tin riꞌchi bieꞌw ma. Ya
bacaꞌh aanjla chi tuhbi sehyu rwaaꞌ pwerta gabihldxyi, tin
ziꞌchi ayi ru nuu gusaguiꞌhi ma laꞌh raꞌ bwiinn guidxyiyuh
raꞌ loh tuhbi mihyi yihza, ya loh gazaaꞌ tuhbi mihyi yihza
riiꞌ, nahpa zilaꞌh ma zabalaaquiꞌhn.
\p
\v 4 Lwehgu gahca za bwaꞌhahn loh yahgaxiiyi raꞌ nin zohba raꞌ
bwiinn raꞌ nin gucaꞌha guelrnabwaꞌ tin guunn raꞌ niꞌchi
guelguxchisi, neezaa bwaꞌhahn xaalma raꞌ bwiinn raꞌ nin
birwaꞌh yihca raꞌ ñiꞌh, pur nin baluuꞌyi raꞌ ba
xchiꞌdxyi Dxiohs cun xchiꞌdxyi Jesucristu. Laꞌh raꞌ bwiinn
raꞌ riiꞌ ayi bazuꞌnllihbi raꞌ ba loh maan rooꞌ nee nin loh
za figuhra xteenn maan rooꞌ chi, nee nin ayi za basaaꞌn raꞌ
ba ñuuꞌ raꞌ ba bwaꞌ xteenn maan chi locah raꞌ ba o yahn naa
raꞌ ba. Bwaꞌhahn bwiinn raꞌ riiꞌ gubiaꞌgarii babahn raꞌ ba
ya gunabwaꞌ raꞌ ba tuhsi cun Jesucristu loh tuhbi mihyi
yihza.
\v 5 Per snuhn raꞌ bwiinn nin guhchi ayi babahn raꞌ
ba chin bacwaꞌhn Dxiohs laꞌh raꞌ bwiinn raꞌ riiꞌ, sino que
hasta chin gazaaꞌyi tuhbi mihyi yihza raꞌ riiꞌ.
\v 6 Dichohsa nee saantu naa raꞌ bwiinn raꞌ nin gabahan raꞌ loh
mwerloh nin gabahan raꞌ bwiinn laasii naa raꞌ ba bwiinn nin
ayi ru xtuhlda raꞌ ñiꞌh niꞌchin nin raroopa guelguhchi ayi
nahpa guelrnabwaꞌ xcweenta raꞌ ba, sino que mas gaca raꞌ ba
xpixohza Dxiohs nee cun xpixohza za Jesucristu, nee
zinabwaꞌnee raꞌ ba laꞌh Jesucristu loh tuhbi mihyi yihza.
\p
\v 7 Ya chin gazaaꞌ tuhbi mihyi yihza chi, zilaꞌh bwiinndxaaba gabihldxyi,
\v 8 chiꞌchi zusaguiꞌhi ba laꞌh raꞌ bwiinn guihdxyi raꞌ nin rii raꞌ loh gadaapa
lahdu loh guidxyiyuh; zusaguiꞌhi ba laꞌh raꞌ bwiinn guihdxyi Gog cun bwiinn
Magog, ya zutiaaꞌha ba laꞌh raꞌ bwiinn raꞌ chi tin gaca bwiinn raꞌ chi
xsuldahdu ba para loh guehrru, ya naa raꞌ ba ziga zi yuhlli nin rii rwaaꞌ
ñihsadoꞌ gaca ziahan raꞌ ba.
\v 9 Tin ziꞌchi babiꞌhyi raꞌ ba
nez gaduhbi loh yuh raꞌ nez chi, tin
bataꞌw naa raꞌ ba hasta rii raꞌ xpwiinn Dxiohs nee cun hasta naa za guihdxyi
nin rucaꞌ stoꞌ Dxiohs, per Dxiohs guxeꞌhla Ñiꞌh dxih nin dxiinloh nez
llaaꞌndxibaaꞌ nin guñihchiloh laꞌh raꞌ deeꞌ raꞌ.
\v 10 Ya bwiinndxaaba
nin basaguiꞌhi laꞌh raꞌ bwiinn gunaꞌzu neezaa ba zee raꞌ ba loh dxih nin
cayahca cun nin laa asufre, hasta zee za maan rooꞌ cun profeta xihn xteenn ma;
riꞌchi gutiꞌdxiloh raꞌ deeꞌ raꞌ guelrzaꞌcazii duxa dxyih-nagueꞌla para
tuꞌpazi.
\s Jwisi nin gaca nez loh yagaxiiyi labweh
\p
\v 11 Chiꞌchi bwaꞌhahn tuhbi yagaxiiyi gurooꞌ rooꞌ nin naa
culohr labweh nee cun nin zohba za loh yagaxiiyi chi, ya nez
delaanta loh Ñiꞌh guñihchiloh guidxyiyuh cun dxibaaꞌ, ya
ayiru bidxeela nin tuhbi lahta para laꞌh raꞌn.
\v 12 Bwaꞌhazahn loh raꞌ bwiinn guuchi ziga nin lasahca cun nin
ayi lasahca; zuu raꞌ ba nez loh Dxiohs, chiꞌchi billaala loh
chihbru raꞌ nee cun neezaa loh stuhbi chihbru xteenn Dxiohs
nin laa chihbru guelnabahan nin naa para tuꞌpazi. Ya chiꞌchi
bwiꞌhnn Ñiꞌh guelguxchisi xcweenta raꞌ bwiinn guuchi raꞌ
chi pur dziꞌn nin bwiꞌhnn tuhbigah raꞌ ba, ziga naa xcweenta
tuhbigah raꞌ ba nin caa loh dxihtsi raꞌ chi.
\v 13 Ñihsadoꞌ
biuꞌnan ntriehgu bwiinn nin guhchi lohon, guelguhchi, nee
lahta xteenn guelguhchi batsiiga laꞌh raꞌ bwiinn guuchi nin
guyuuꞌ loh raꞌn loh Dxiohs. Ya chiꞌchi bwiꞌhnn Dxiohs
guelguxchisi xcweenta tuhbigah raꞌ ba pur ziga cada bwiꞌhnn
tuhbigah raꞌ ba.
\v 14 Ya seguihdu guelguhchi cun lahta
hasta naa xteenn guelguhchi, zee raꞌn loh bwehla duxa, ya
loh bwehla duxa riiꞌ naa guelguhchi nin raroopa,
\v 15 ya loh
bwehla za chi zee raꞌ bwiinn raꞌ nin ayi caa lah raꞌ ñiꞌh
loh chihbru nin laa guelnabahan.
\c 21
\s Llaaꞌndxibaaꞌ cuubi cun loh guidxyiyuh cuubi
\p
\v 1 Ya seguihdu bwaꞌhahn tuhbi llaaꞌndxibaaꞌ cuubi cun tuhbi
guidxyiyuh cuubi, laasii laꞌh dxibaaꞌ galoh cun guidxyiyuh
galoh laꞌh raꞌn guñihchiloh, ya ayi ru za ñihsadoꞌ.
\v 2 Naꞌh Jwahn bwaꞌhaloon guihdxyi Jerusalehn cuubi; bwaꞌhahn
guihdxyi saantu chi zeꞌyehtan nez dxibaaꞌ hasta rnabwaꞌ
Dxiohs. Zuchaꞌyin ziga zi rzuhchaꞌyi tuhbi dxaꞌpa nin
rahlda ruchinaa.
\v 3 Chiꞌchi bihnaꞌhn tuhbi rsiaaꞌha rooꞌ
nin guñiꞌ nez dxibaaꞌ hasta zuu yahgaxiiyi rooꞌ, squiiꞌ
cañiꞌn:
\p ―Gulguiaꞌha nnah laꞌh Dxiohs zuu galaayi raꞌ bwiinn, laꞌh
Dxiohs nabahanee laꞌh raꞌ bwiinn, ya laꞌh raꞌ ba gaca
xpwiinn Ñiꞌh, ya laꞌhgahca Yuꞌbi Dxiohs guibahanee laꞌh raꞌ
ba tin gaca Ñiꞌh Xchiohs raꞌ ba,
\v 4 laasii ziñihchiloh
guelguhchi, ayi ru chuu guelnalaasa stoꞌ nin guelnayaan,
laasii garaa raꞌ deeꞌ raꞌ nin guyuuꞌ galoh laꞌh raꞌn
guñihchiloh.
\p
\v 5 Ya chiꞌchi laꞌh nin zohba loh yahgaxiiyi rooꞌ nez dxibaaꞌ guñiꞌ loon
squiiꞌ:
\p ―Bwaꞌha, naꞌh guunn nacuuꞌbihn garaatiiꞌ.
\p Guñiꞌ za Ñiꞌh loon squiiꞌ:
\p ―Bacaꞌh dxyiꞌdxyi raꞌ riiꞌ laasii dxyiꞌdxyi raꞌ riiꞌ guchii paꞌ ca naa raꞌn;
zahca chechii stoꞌ raꞌ bwiinn dxyiꞌdxyi raꞌ riiꞌ.
\p
\v 6 Chiꞌchi nnah za Ñiꞌh loon squiiꞌ:
\p ―Laꞌn guyaꞌloh; naꞌh naan nin rbahchixchih nee naꞌh za naan
ziga nin ruzaꞌloh ziga zi lehtra A cun Z. Bwiinn nin
rdxahga ñihsa; naꞌh gudiꞌhihn ñihsa nin rudiꞌhi guelnabahan
guee ba, sin nin ayi chiilli ba nin tuhbi gaꞌyu.
\v 7 Bwiinn
raꞌ nin guunn gahn loh duhlda, bwiinn raꞌ chi guicaꞌha garaa
raꞌ dee raꞌ ziga zi tuhbi herensi; ya naꞌh gacaꞌhn Xchiohs
raꞌ ba ya laꞌh raꞌ ba gaca raꞌ lliiꞌnahn,
\v 8 per ya ziga
laꞌh raꞌ bwiinn raꞌ nin nadxyiꞌbi, nin ayi riachii stoꞌ raꞌ
ñiꞌh xchiꞌdxyiꞌhn, nin rdxyiꞌchinee xchiꞌdxyiꞌhn, nin
rdxiinn raꞌ bwiinn, nin nabahan raꞌ loh guelgubwihlli, nin
rusiꞌdxi raꞌ guelbidxaꞌha, nin ruzuꞌnllihbi raꞌ nezloh raꞌ
dxaan, nee garaa raꞌ nin ruuꞌyi dxixiꞌhw; garaa raꞌ dee raꞌ
guzee loh bwehla nin naa cun nin laa asufre, dee na
guelguhchi raroopa.
\s Guihdxyi Jerusalehn nacuubi
\p
\v 9 Ya chiꞌchi bwaꞌhahn loh raꞌ tuhbi aanjla nin naa gahdzi raꞌ aanjla nin
caꞌha gagaadzii raꞌ cohpa nin nuu raꞌ luulchima guelguxchisi xteenn Dxiohs,
ya squiiꞌ guñiꞌ ba loon:
\p ―Riiꞌ gudaaꞌ, tin guluꞌyiꞌhn yiꞌh dxaꞌpa nin guchinaa Lliꞌhyi xteenn Dxiohs.
\p
\v 10 Ya loh bihsi nin baniꞌhi Spíritu Saantu naꞌh bwaꞌhahn,
gwanee Ñiꞌh naꞌh yihca tuhbi dahan rooꞌ, ya yihca dahan chi
dxuu nu chin baluuꞌyi Ñiꞌh naꞌh guihdxyi saanto Jerusalehn
nin zeꞌyehta nez llaaꞌndxibaaꞌ, nez delaanta loh Dxiohs.
\v 11 Guihdxyi Jerusalehn riiꞌ rñah rcaꞌbachaꞌhan cun
xquelbachaꞌh rooꞌ xteenn Dxiohs, ya guelrcaꞌbachaꞌh xteenn
Jerusalehn cuubi riiꞌ rñahan ziga zi guelrbachaꞌh xteenn
tuhbi dxiah nin chuhla duxa, ziga dxiah nin laa jaspe nin
rñah ziga cristal.
\v 12 Ya gadiidxi guihdxyi Jerusalehn chi
nuu tuhbi barda nin naa altu rooꞌ, nee nuu za tsiꞌh
bichiohpaza ziga rwaaꞌ yuuꞌ nuu barda chi, ya zuu tuhbigah
raꞌ aanjla cada raꞌ rwaaꞌ yuuꞌ chi; ya laꞌh raꞌ gadziꞌh
bichiohpa cwaꞌh xpwiinn raꞌ guehtu Israel caa rwaaꞌ tuhbigah
raꞌ yuuꞌ chi.
\v 13 Chohnna rwaaꞌ leeꞌ chi zohba nez lahdu
rtahn gubihdxyi, schohnnan nez lahdu dahan dxiaaꞌ, schohnnan
nez lahdu dahan gueeta, nee schohnnan nez lahdu riaꞌzi
gubihdxyi.
\v 14 Ñaaꞌ baarda chi nuu tsiꞌh bichiohpa dxiah
nin naa simientu, ya tuhbigah raꞌ dxiah chi caa lah tuhbigah
raꞌ pooxtla xteenn Lliꞌhyi xteenn Dxiohs.
\p
\v 15 Aanjla nin cañiꞌnee naꞌh nuu tuhbi bahra ohro nin naa
ziga ñihta naa ba tin gudiꞌxi ba guihdxyi Jerusalehn chi
balaaca chiꞌh nuu xpwerta raꞌn cun barda nin nuu gadiidxin.
\v 16 Ya guihdxyi chi forma cwadrahdu naan; gadaapa xlahdun
tuhsi madxihdu naa raꞌn, ya badiꞌxi aanjla chi cun ñihta nin
nuu naa ba, ya chiohpa mihyi chiohpa gaywaꞌh kilómetru naa
guihdxyi chi; de largun cun de anchun cun de altuhran tuhsi
madxihdu naa raꞌn.
\v 17 Lwehgu badiꞌxi aanjla chi barda nin
nuu gadiidxi guihdxyi chi ya nuuꞌhun sesenta y cuatro metru
raꞌ ziga naa xmadxihdu raꞌ bwiinn, madxihdu chi naꞌzu aanjla
chi nuugadiꞌxi ba.
\v 18 Baarda chi naan cun dxiah raꞌ nin
laa jaspe, ya guihdxyi chi naa ganaalla ohru, naan ziga
bihdru nayaa.
\v 19 Dxiah raꞌ nin naa raꞌ simientu zuchaꞌyi
raꞌn cun garaaloh raꞌ dxiah joosca raꞌ; ziga mwer dxiah nin
laa jaspe, nin raroopa cun dxiah nin laa zafiru, nin riohnna
dxiah nin laa ágata, nin radahpa dxiah nin laa esmeralda.
\v 20 Nin rahca gaꞌyu dxiah nin laa ónice, nin rahca xoꞌpa
cun dxiah nin laa cornalina, nin rahca gahdzi cun dxiah nin
laa crisólito, nin rahca xuhnna cun dxiah nin laa berilo,
nin rahca gaꞌ cun dxiah nin laa topacio, nin rahca tsiꞌh cun
dxiah nin laa crisoprasa, ya nin rahca tsiꞌh bituhbi dxiah
nin laa jacinto, ya nin rahca tsiꞌh bichiohpa cun dxiah nin
laa amatista.
\v 21 Ya rwaaꞌ pwerta xteenn guihdxyi chi
naa tsiꞌh bichiohpa perla raꞌ tuhbigah raꞌ rwaaꞌ pwerta chi
naa cun tuhbigah raꞌ perla raꞌ, ya loh neziuh xteenn
guihdxyi chi naa ganaalla ohro; rñahan ziga bihdru.
\v 22 Ayi bwaꞌhahn nin tuhbi guidoꞌ loh guihdxyi chi, laasii laꞌh
Daada Dxiohs nin nahpa guelrnabwaꞌ naa xquidoꞌ guihdxyi chi
cun neezaa Lliꞌhyi xteenn Ñiꞌh.
\v 23 Guihdxyi chi ayi
rchiꞌhn gubihdxyi cun bweꞌhw laasii xpiaꞌñih gahca Dxiohs
ruziaꞌñih riꞌchi, ya Lliꞌhyi xteenn Ñiꞌh naa biaꞌñih loh
guihdxyi chi.
\v 24 Bwiinn guidxyiyuh raꞌ nin gwachii stoꞌ
raꞌ ñiꞌh xchiꞌdxyi Dxiohs ziah raꞌ ba loh xquelñaꞌñih
xteenn guihdxyi chi, ya rrehyi raꞌ nin zeꞌ nez loh
guidxyiyuh zadzihnnee raꞌ ba xquelrnabwaꞌ raꞌ ba cun nee
xquel lasahca raꞌ ba loh guihdxyi chi.
\v 25 Ya rwaaꞌ xteenn
guihdxyi chi ayi dxieꞌwtiiꞌ raꞌn radxyii nee ayi chuutiiꞌ
gueꞌla riꞌchi.
\v 26 Riꞌchi chenee za raꞌ ba guelnazaꞌca,
nee cun neezaa guel lasahca xteenn raꞌ guihdxyi rooꞌ raꞌ nin
guyuuꞌ loh guidxyiyuh.
\v 27 Ya ayi chuu nin tuhbi raꞌ
bwiinn nin ruhnn dziꞌn dxaaba raꞌ riꞌchi; sola chuu raꞌ
bwiinn raꞌ nin caa lah raꞌ ñiꞌh loh chihbru nin naa
guelnabahan nin nahpa Lliꞌhyi xteenn Dxiohs.
\c 22
\p
\v 1 Ya chiꞌchi baluuꞌyi aanjla chi naꞌh tuhbi guiꞌw nayaa,
hasta nuu ñihsa nin runiꞌhi guelnabahan. Ñaꞌñihin ziga zi
bihdru nin laa cristal, cariaꞌhan nez loh yahgaxiiyi hasta
rnabwaꞌ Dxiohs cun Lliꞌhyi xteenn Ñiꞌh.
\v 2 Galaayi
neziuh rooꞌ xteenn guihdxyi chi cun garoopa lahdu rwaaꞌ
guiꞌw chi gurooꞌ yahga raꞌ nin runiꞌhi guelnabahan, nin rcah
ñinahxi loh raꞌ ñiꞌh tsiꞌh bichiohpa cwaꞌh loh tuhbi yihza,
tuhbigah bweꞌhw niꞌchi rcah ñinahxi loon. Ya batahga xteenn
yahga raꞌ chi ralluꞌyi para gusiaacan laꞌh raꞌ bwiinn
guidxyiyuh.
\v 3 Ayi ru chuu cohsa duhlda raꞌ loh guihdxyi
chi. Yahgaxiiyi xteenn Dxiohs cun xteenn Xiꞌhyi Ñiꞌh chuu
loh guihdxyi chi, nee cun sola za laꞌh raꞌ xpwiinn Ñiꞌh
chuu loh guihdxyi chi, nee cun sola za laꞌh raꞌ xpwiinn
Ñiꞌh nin guzuꞌnllihbi nez loh Ñiꞌh nee gaann raꞌ ba
laꞌh Ñiꞌh.
\v 4 Zwaꞌha loh raꞌ ba loh Ñiꞌh gahxu gah ya
zicaꞌh za lah Ñiꞌh locah raꞌ ba.
\v 5 Riꞌchi ayi ru chuu
gueꞌla, ya bwiinn raꞌ nin chuu raꞌ riꞌchi ayiru guichiꞌhn
raꞌ ba biaꞌñih xteenn raꞌ lámpara, nin llaꞌñih xteenn
gubihdxyi, laasii laꞌh Yuꞌbi Dxiohs guziaꞌñih Ñiꞌh yihca
raꞌ ba ya zinabwaꞌnee raꞌ xpwiinn Ñiꞌh laꞌh Ñiꞌh para
tuꞌpazi.
\s Laꞌzeꞌgadzihn gahxu dxyih nin dxiꞌ Jesucristu
\p
\v 6 Chiꞌchi nnah aanjla chi loon squiiꞌ:
\p ―Dxyiꞌdxyi raꞌ riiꞌ guchii raꞌ paꞌh naa raꞌn, nee zahca chechii stoꞌ raꞌ
luꞌhn. Daada Dxiohs gahca gusañiꞌ lastoꞌ raꞌ bwiinn nin rñiꞌ xchiꞌdxyi Ñiꞌh;
laꞌgahca Ñiꞌh baxeꞌhla Ñiꞌh xaanjla Ñiꞌh tin baluuꞌyiloh
Ñiꞌh loh raꞌ xpwiinn
Ñiꞌh cuun cohsa raꞌ nin gueꞌdu zeꞌyaahldaa gaca.
\v 7 ¡Laꞌh guyohbagah
dxieꞌldahn! ¡Dichohsa raꞌ bwiinn raꞌ nin ruzoꞌbadxiahga xchiꞌdxyi Dxiohs
nin caa loh dxihtsi riiꞌ!
\p
\v 8 Naꞌh Jwahn biindxiaagahn nee bwaꞌhaloon cohsa raꞌ riiꞌ,
ya chin biindxiaagahn nee bwaꞌha raꞌn cohsa raꞌ riiꞌ,
chiꞌchi bazuꞌnlliibihn nez ñaaꞌ aanjla nin baluuꞌyi
garaa raꞌ cohsa raꞌ riiꞌ naꞌh tin ñaaꞌnnahn laꞌh aanjla chi,
\v 9 per chiꞌchi guñiꞌ aanjla chi loon squiiꞌ:
\p ―¡Ayi guunn luꞌh niꞌca!; pwihsi naꞌh naan tuhbi xmooza Dxiohs laꞌhgahca ziga
naa luꞌh cun garaa raꞌ bwihtsi raꞌ luꞌh nin rñiꞌ za xcweenta xchiꞌdxyi
Dxiohs, nee cun garaa raꞌ bwiinn raꞌ nin ruzoꞌbadixahga dxyiꞌdxyi nin caa loh
dxihtsi riiꞌ. Guunn laꞌh Dxiohs si.
\p
\v 10 Neezaa guñiꞌ aanjla chi loon squiiꞌ:
\p ―Ayi cuulaꞌn luꞌh xchiꞌdxyi Dxiohs nin caa loh chihbru
riiꞌ, laasii laꞌh dxyih badzihn gahxu chaꞌloh garaa raꞌ nin
rñiꞌ loh dxihtsi riiꞌ.
\v 11 Ya loh nin riaꞌdxi gadzihn
dxyih chi, basaaꞌn nin ruhnn dziꞌn dxaaba zuu zeezah ba loh
dziꞌn dxaaba, ziꞌchi za nin ruhnn dziꞌn dxiimma zuu zeezah
ba loh loh dziꞌn dxiimma, ya ziga nin zeezahnee dziꞌn zaꞌca
cheezah ba loh dziꞌn zaꞌca nin cayuhnn ba, nin naa za bwiinn
nayaa ziꞌchi za chezahru ba gaca nayaa ba nez loh
Dxiohs.
\p
\v 12 Nah za ba loon:
\p ―Ziꞌchi laꞌh guyohbagah dxieꞌldahn; nee dxieꞌldaneꞌhn cohsa
zaꞌca nin gudiꞌhihn laꞌh tuhbigah raꞌ bwiinn ziga chiꞌh
bigaꞌha bwiꞌhnn raꞌ ba.
\v 13 Naꞌh naan nin rbachixchih nee
cun nin rutuꞌllatiiꞌ ziga zi lehtra A cun Z.
\p
\v 14 ’Dichohsa raꞌ bwiinn raꞌ nin riidxiꞌbi raꞌ xahba raꞌ
Ñiꞌh, tin gapa raꞌ ba derehchu loh yahga nin rudiꞌhi
guelnabahan, nee ziꞌchi za zahca chuꞌtii raꞌ ba ba nez rwaaꞌ
yuuꞌ xteenn guihdxyi Jerusalehn nacuubi.
\v 15 Ya ziga bwiinn
raꞌ nin naa raꞌ ziga bwehcu, ziaꞌhan raꞌ ba nez dihtsi yuuꞌ
xteenn guihdxyi chi, cun ziga raꞌ nin naa bidxaꞌha, nin
nabahan gubwihlli raꞌ, nin rdxiinn raꞌ bwiinn, nin
ruzuꞌnllihbi raꞌ loh dxaan raꞌ, nee cun garaa raꞌ za nin
rusiꞌdxi xcweenta guelrusaguiꞌhi.
\p
\v 16 ’Naꞌh Jesuhs, baxeꞌhlaꞌhn tuhbi xaanjlaꞌhn loh tu tin
baluuꞌyi ba dxyiꞌdxyi raꞌ riiꞌ loh tu, ziga naa tu xpwiinn
guidoꞌn, Naꞌh naan llahga guehtu rrehyi Davihd, nee naa zahn
dxih nin ruziaꞌñih rsiiyi.
\p
\v 17 Spíritu Saantu Dxiohs cun dxaꞌpa xteenn Lliꞌhyi
xteenn Dxiohs rñiꞌ raꞌ squiiꞌ:
\p ―Gudaaꞌ.
\p Ya nin rihndxiahga za guiñiꞌ raꞌ ba:
\p ―Gudaaꞌ.
\p Ya nin rdxahga ñihsa, nee xclaaꞌdzi ba guee ban, dxiꞌ ba tin
guee ba ñihsa nin rudiꞌhi guelnabahan, nee sin nin tuhbi gaꞌyu
ayi guunn ba gaxtu.
\p
\v 18 Garaa raꞌ bwiinn raꞌ nin rihn xchiꞌdxyi Dxiohs nin caa
loh dxihtsi riiꞌ; rñiꞌn loh raꞌ ba squiiꞌ: Sidela chyulla
gudziiꞌba ru yihca dxyiꞌdxyi raꞌ nin caa loh dxihtsi riiꞌ,
Dxiohs gudziiꞌba ziahan ru guelrusaꞌcazii raꞌ nin rñiꞌ loh
dxihtsi riiꞌ yihca bwiinn chi;
\v 19 ya sidela chyulla
guziaꞌtii yihca xchiꞌdxyi Dxiohs nin caa loh dxihtsi riiꞌ,
Dxiohs zuraꞌh Ñiꞌh lah ba loh chihbru nin naa guelnabahan,
neezaa xcweenta ba loh guihdxyi saanto rooꞌ nin caa xcweenta
ñiꞌh loh dxihtsi riiꞌ.
\p
\v 20 Nin luꞌh cagaluuꞌyi dxyiꞌdxyi xcweenta garaa raꞌ deeꞌ guñiꞌ
Ñiꞌh nnah Ñiꞌh:
\p ―Ziꞌchi, laꞌn guyohbagah dxieꞌldahn.
\p Ziꞌchi gaca pwihsi. ¡Gudaaꞌ Daada Jesucristu!
\p
\v 21 Laꞌh Daada Jesucristu xteenn nuꞌh guunntaꞌyi yihca
garaa tu. Ziꞌchi gaca pwihsi.