\id 1CO
\h 1 Corintios
\toc1 1 Corintios
\mt1 1 Corintios
\mt2 Gyicy loga nu bzeed Baly lo de mbecy ni Crisht nu yuꞌ Corinto
\c 1
\s Baly bzeed yu gyicy lo de mbecy ni Crisht nu yuꞌ gyedz nu la Corinto
\p
\v 1 Ya̱ Baly, yu nu bzu Ñgyoozh nu gac aposht ni Jesucrisht
par nu cha̱ tush lasa̱ de riidz nim. Ni bicy num ya̱ gun
ndeꞌ coz nu bruu gal nañ lardoom. De̱ ya̱ nu biicy na
Sosht tublaazh la
\v 2 zeed de̱ gyicy ii lo der bicy na nu ricy cup consuel
lo Crisht, de ru mbecy nu yuꞌ gyedz Corinto. De ru nac
der mbecy ni Ñgyoozh nu nac nu rded nu der Jesucrisht,
nunu Ñgyoozh bzum der nu gac ru nim tublaazh la nu de
mbecy nu rcyiiñ dela lugaar, de yu nu rnishbaa lo Shuaan
den Jesucrisht. Jesucrisht, mi zeꞌ Shuaan de ub na, nunu
laabaꞌ mi zeꞌ Shuaan de yu zeꞌ.
\v 3 Ñgyoozh, Uz den, nu Shuaan den Jesucrisht gyicy mi
faboor num der nunu gyicy mi nu cheti ri añ ni der.
\s Ñgyoozh nap ricy num der nu nac Crisht
\p
\v 4 Dub laa tiem drica̱ gras ni Ñgyoozh par nu nac de
ru, gun bicy mi faboor num der nu nac Jesucrisht.
\v 5 Par nu nac nu nac nu der Crisht, Ñgyoozh tonaꞌ la
nap bicy num der. Ndeꞌ nu nap za de riidz nu rnii der,
nunu nap yet lag der cuen de coz rishli.
\v 6 Dela coz nu mne̱e̱ lo der nu gyicy Crisht, dela ndeꞌ
bi bicy mi ñii num der.
\v 7 Gun orzeꞌ rila wayicy falt ni tub la coz nu gac
gyicy Ñgyoozh num der lat nu cuez der ornu gruu zac
Shuaan den Jesucrisht tuubaꞌ tir.
\v 8 Nunu mi zeꞌ locyuub mi nu gagye der gashtal shuub
la dzi zeꞌ, gun orzeꞌ ni tub la mbecy wac riib dey cyi
too der ornu cyid mi.
\v 9 Segur la ni gyicy Ñgyoozh, gun dub laa tiem ricy
yac mi dela coz nu rniim. Nunu ub mi bzum der nu gac
nur Iꞌñ mi Jesucrisht, biñ nu nac Shuaan den.
\s Bdulew de mbecy ni Crisht
\p
\v 10 Ya̱ rnishba̱a̱ lo der, bicy na, nu nac Shuaan den Jesucrisht,
nu gnii der tub ziꞌl riidz gun orzeꞌ cueꞌ gyac zañ nac
der nu losaꞌr, sinu guc tub nac ziꞌl mbecy. Bicy der
tub ziꞌl shcab, nunu bicy der tub ziꞌl riidz.
\v 11 Ni rne̱e̱, der bicy na, gun yuꞌ la be mbecy lat de
famil ni Cloé, mniiy lo̱ nu yuꞌ mbecy nu rnii deet dey
nu losaꞌy.
\v 12 Coz nu rne̱e̱, ndeꞌ nu reñ ga la riidz rnii tub ga
der. Yuꞌ mbecy lat der nu rniiy: “Ya̱ nac du̱ Baly”,
rniiy. Yuꞌ gaꞌy rniiy: “Ya̱ nac du̱ Apolos”, rniiy. Zeꞌ
tub nacaꞌy rniiy: “Ya̱ nac du̱ Bed”, rniiy. Zeꞌ tub nacaꞌy
rniiy: “Ya̱ nac du̱ Crisht”, rniiy.
\v 13 ¿Walab gaal yuꞌ zañ laꞌ Crisht? ¿Walab gaal ya̱,
Baly, guta̱ lo cruuz par nu nac der? ¿Walab gaal bzu nis
der par nu gabe der nu nac ru mbecy ne̱ ya̱?
\v 14 ¡Drica̱ gras ni Ñgyoozh nu wanriib nisa̱ ni tub
la der! Nomaas Crispo nu Gayo, de yu zeꞌ ziꞌl briib nisa̱,
\v 15 gun nis gruu su tub mbecy lat der nu gniiy nu
bzu nis yu par nu gabe nu nac nuy ya̱.
\v 16 Niꞌ de famil ni Estéfanas briib nisa̱ꞌ dey, tees
wagyezaꞌ lagya̱ ti briib nisa̱ deꞌ zir mbecy.
\v 17 Gun Crisht wansuu nez mi ya̱ par nu riib nisa̱ mbecy,
sinu bzuu nez mi ya̱ par nu shaala̱ de riidz nu sac nim.
Nunu ornu rne̱e̱ de riidz zeꞌ, walab nu nac shcab lily
ni mbecy rne̱e̱ ñii, gun benu ya̱ ni ne̱e̱, orzeꞌ dzi ga wayicy
cuen mbecy coz nu ricy zir ñi presis. Coz zeꞌ, ndeꞌ nu
gut Crisht lo cruuz.
\s Rila wac chuꞌ lo mbecy Ñgyoozh nu nac shcab ni ub ziꞌl yu
\p
\v 18 Gun de mbecy nu gduneꞌ, de yu zeꞌ rzii dey nu de
riidz nu rnii nu gut Crisht lo cruuz, ndeꞌ riidz ton.
Tees par de ub na, como gruu mbañ den, orzeꞌ nu nac riidz
zeꞌ, Ñgyoozh tonaꞌ la coz ily ricy mi.
\v 19 Gun lat de riidz ni Ñgyoozh, lat zeꞌ rniim:
\q Ya̱ nit lo̱ shcab lily ni de mbecy lily,
\q nunu zu chu̱ shcab ni de yu nu yet lag cuen, nam.
\p
\v 20 Orzeꞌ de mbecy nu yuꞌ shcab ni, wayet lag dey cuen
coz ni Ñgyoozh nu nac shcab niy. Nunu yu nu dzi yuꞌ
lo leey wagad lagy dey coz ni Ñgyoozh nu nac nu dzi
yuꞌ lo dey. Nunu mbecy nu dzi riidz ruꞌ nu nac coz ni
gyishlombecy ii, mas nap rnii dey tees wagad lagy dey
de coz ni Ñgyoozh nu nac nu dzi rnii dey.
\v 21 Gun Ñgyoozh, nu nac nu yuꞌ shcab nim, bicy mi nu
rila wac chuꞌ lo de mbecy mi nu nac shcab lily ni de
ub ziꞌl dey. Sinu ricy mi nu gruu mbañ mbecy nu ricy
cup consuel lom par nu nac de riidz nu rshaal na nim,
mas mbecy rzii dey nu riidz zeꞌ, ndeꞌ riidz ton.
\p
\v 22 Riidz nim, ndeꞌ riidz ton par de mbecy Israeel,
gun rlagy dey tub nusuriidz par nu gabe nu ndeꞌ riidz
ni Ñgyoozh. Nunu ndeꞌ riidz ton par de mbecy griego,
gun rlagy dey tub shcab lily.
\v 23 Zeꞌ de ub na rshaal na de coz nu bzac Crisht lo
cruuz. De riidz nu rshaal den zeꞌ, ndeꞌ ricy ñi nu walagy
de mbecy Israeel gyicy cup dey consuel lo Crisht, nunu
de mbecy griego rnii dey nu ndeꞌ riidz ton ziꞌl.
\v 24 Tees par de ub na mas nac naa mbecy Israeel, o
a̱ꞌ nac naa mbecy Israeel, tees par de ub na, mbecy nu
bzu Ñgyoozh nu gac nim, de riidz zeꞌ rzat ñi Crisht.
Nunu par nu nac mi, ndeꞌ nu dzi coz ily ricy nu Ñgyoozh
den. Nunu nu nac mi rabee nu tonaꞌ la lily na shcab
ni Ñgyoozh.
\v 25 Gun mod nu bicy Ñgyoozh, par de mbecy rzii dey
nu ndeꞌ tub mod ton, tees mod nu bicy mi nap zir bicy
mi par dela de mbecy nu ricy cup shcab lily. Nunu mas
mbecy rzii dey nu a̱ꞌ fert mi nu nac coz nu bicy mi, tees
fert zir mi par dela mbecy.
\v 26 Na, der bicy na, bicy der nu gyezaꞌ lagy ru mod
nu na der nu lo ga ornu bzu Ñgyoozh der nu gac der nim.
Par de mbecy nu yuꞌ gyishlombecy ii, sac zigy mbecy nu
yuꞌ shcab lily ni lat der. Sac zigy mbecy nu gac gyicy
coz ily lat der. Nunu sac zigy mbecy nu bruu lat de
famil zub lo zir lat der.
\v 27 Gun mbecy ricy dey de ru par mbecy ton, tees Ñgyoozh
bicy mi nu gyicy der nu gat lo de mbecy nu ricy cup
shcab lily. Nunu mbecy ricy dey de ru par mbecy gyidz.
Tees Ñgyoozh bicy mi nu de ru gyicy der nu gat lo de
mbecy lily.
\v 28 De ru nac ru mbecy shni. Rzii mbecy nu se la la
sac der. Tees Ñgyoozh pcuim der par nu gyicy ru nu gabe
nu de coz nu rzii de mbecy lily nu dzi sac, ndeꞌ se la
la sac ñi.
\v 29 Ndeꞌ nu par Ñgyoozh ni tub la mbecy wac gyicy
leꞌ dey lom.
\v 30 Tees laab Ñgyoozh bicy mi nu nac nu der Jesucrisht,
nunu nu nac Jesucrisht yuꞌ shcab ni den. Par nu nac
mi, byanap den par lo Ñgyoozh. Nunu nu nac mi yuꞌ den
nu gyel cacy, nunu bruu chu den lo coz cyi.
\v 31 Ndeꞌ nu rniiñ lat de riidz nu bzeeñ Ñgyoozh: “Benu
mbecy rlagy dey gyabic yu gyel mbecy, orzeꞌ rlagy ñi
nu gyabic dey gyel mbecy ni Ñgyoozh”, rniiñ.
\c 2
\s De riidz nu rnii nu gut Crisht lo cruuz
\p
\v 1 Der bicy na, ornu byap shaala̱ de riidz nu rishli
ni Ñgyoozh lat der, walab nu riidz biigy mne̱e̱ ñii. Nunu
ni walab nu bicya̱ ñii nu nac schab lily ni uba̱.
\v 2 Gun lat nu gusa̱ lat der, bicya̱ nu wangad lagya̱ deꞌ
zir de coz, nomaas nu gut Jesucrisht lo cruuz nu nac
de ub na, ndeꞌ ziꞌl gud lagya̱.
\v 3 Nunu ornu bri̱ lat der, ya̱ guze̱e̱ nu wacyiiña̱ guze̱e̱.
Gush la bisa̱, nunu tonaꞌ la gudziba̱.
\v 4 Ornu ya̱ pshaala̱ riidz ni Ñgyoozh lo der, nunu ornu
blyu̱u̱ ni der, walab nu riidz ni mbecy lily pcuugya̱ lardoo
der, sinu bguugy lardoo der nu nac coz nu bicy Espiriit
Yon ni Ñgyoozh, nunu nu nac de coz ily nu bicy Ñgyoozh
lat der.
\v 5 Gun orzeꞌ consuel nu ricy cup der lo Ñgyoozh ndeꞌ
par nu nac nu dzi coz ily ricy mi, ndeꞌ nu ricy cup der
consuel lom, walab par nu nac shcab ni mbecy lily.
\s Ñgyoozh rlocyuub mi de ub na nu gyet lag na cuen nu nac Espiriit Yon nim
\p
\v 6 Tees ya̱ niꞌ ziꞌl rne̱e̱ riidz lily par de mbecy nu
bi rad lagy nap de coz ni Crisht. Tees riidz zeꞌ, ndeꞌ
walab riidz lily ni de mbecy nu yuꞌ gyishlombecy na.
Ni walab riidz lily ni de mbecy nu riib ic gyishlombecy
ii, de yu nu bi ca lo cuen nu nit lo.
\v 7 De coz nu rzata̱ lo der, ndeꞌ coz lily nu bruu lo
Ñgyoozh. Coz zeꞌ wancuic Ñgyoozh nu ñgyad lagy de mbecy
gulas tees gal na briic mi nu gad lagy den. Nunu ndeꞌ
psaꞌ lagy Ñgyoozh nil nese anzir nu gzub gyiꞌ gyishlombecy
gun orzeꞌ zac den lo gyel lily nu ca lo cuen nu gad
nin.
\v 8 Ni tub la de mbecy nu riib ic gyishlombecy ii wangyet
lag dey cuen de coz zeꞌ, gun benu ñgyet lag dey cuen,
orzeꞌ wacaa dey Shuaan den lo cruuz, biñ nu tonaꞌ la
zily nac.
\v 9 Tees lat de riidz nu bzeeñ Ñgyoozh rniiñ:
\q Ñgyoozh bi bzu lily mi tub coz par de yu nu rcam.
\q Coz zeꞌ, ndeꞌ tub coz nu rila nigul zac ur lo la mbecy,
\q nunu rila nigul gyeñ gyidag la dey,
\q nunu ni wagnii too dey nu nac ñii,
\m rniiñ.
\v 10 De coz zeꞌ Ñgyoozh bicy mi nu rad lagy de ub na
nu nac Espiriit Yon nim. Espiriit Yon nim gyet lag mi
cuen dela coz, mas de coz biigy ni Ñgyoozh.
\p
\v 11 Zeꞌ par de mbecy, nomaas espiriit nu ri nañ lardoo
ub ziꞌl dey rad lagy ñi de coz nu yuꞌ nañ lardooy. Niꞌ
ziꞌl Ñgyoozh. Espiriit Yon ni ub ziꞌl mi rad lagy mi
de coz nu yuꞌ nañ lardoom.
\v 12 Zeꞌ de ub na a̱ꞌ ricy cup na espiriit nu rzu bich
nu nac gyishlombecy ii, sinu de ub na ricy cup na Espiriit
Yon nu bruu lo Ñgyoozh. Gun orzeꞌ gad lagy den de coz
nu cuic leew lam nin.
\v 13 De coz zeꞌ rne̱e̱ lo der nu riidz nu blyuu Espiriit
Yon ni Ñgyoozh ne̱. Ni mod rshaal de̱ de coz rishli ni
Ñgyoozh lo de mbecy nu ricy cup Espiriit Yon nim. Walab
nu rshaal de̱ ñii nu riidz nu bloo ic de̱.
\p
\v 14 De mbecy nu a̱ꞌ riib ic Espiriit Yon ni Ñgyoozh,
wagnii dey “O” ornu rbic mi de coz nim ni dey, gun
par de yu zeꞌ, ndeꞌ coz ton ziꞌl. Nunu ni wac gyet lag
dey cuen de coz zeꞌ, gun de coz zeꞌ rlagy ñi nu Espiriit
Yon ni Ñgyoozh locyuub mi den, par nu gad lagy na ben
a ndeꞌ coz nap nim.
\v 15 Tees mbecy nu riib ic Espiriit Yon ni Ñgyoozh,
yu zeꞌ nap yet lag yu cuen dela coz. Zeꞌ deꞌ zir mbecy
wagyet lag dey cuen de coz nu ricy yu.
\v 16 Riidz nu bzeeñ Ñgyoozh rniiñ:
\q Ni tub la mbecy wagad lagy dey la coz rnii too Ñgyoozh,
Shuaan den.
\q Nunu ni tub la mbecy wac glyuuy nim,
\m rniiñ. Tees de ub na ricy cup den shcab ni Crisht.
\c 3
\s Baly nu de losaꞌy nu ricy yu riiñ ni Ñgyoozh
\p
\v 1 Der bicy na, ya̱ wangac ne̱e̱ lo der gal nu rne̱e̱ lo
de mbecy nu riib ic Espiriit Yon ni Ñgyoozh, sinu mne̱e̱
lo der gal nu rdunii lo de mbecy nu rzu bich nu nac
coz nu rlagy ub ziꞌl. Gun par de coz ni Crisht, na der
gal nu na tub mdoo, gun wagad lagy nap der.
\v 2 Ya̱ blyu̱u̱ de coz a̱ꞌ biigy ni der gal nu ricy biñ
mñaa ornu rgaagy mi mdoo nim. Gal nu na mdoo miiñ nu
wacyiiñ yu gow yu gyit, ni na de ru nu wacyiiñ der nu
gyeñ ru de coz biigy ni Crisht. Mas na wagac ne̱e̱ de
coz biigy zeꞌ lo der.
\v 3 Gun gabee rzu bich der nu nac de coz nu rlagy ub
ziꞌl der. Ornu ricy der gyel saap lagy, ro zi der riidz
nu losaꞌr. Wagyap riidz ni der. Orzeꞌ rabee nu rzu bich
der nu nac coz nu rlagy ub ziꞌl der. Ricy der gal nu
ricy cualcyer la mbecy.
\v 4 Gun ornu tub der rniir: “Ya̱ nac du̱ Baly”, rnii
der. Zeꞌ tuubaꞌ der rniir: “Ya̱ nac du̱ Apolos”, rnii
der. Orzeꞌ rabee nu ricy der gal nu ricy cualcyer la
mbecy, walab gal nu rlagy Ñgyoozh.
\p
\v 5 Tees ¿cyu nac ya̱, Baly? Nunu ¿cyu nac Apolos? De̱
ya̱ nac de̱ yu nu ricy de coz nu rlagy Ñgyoozh. Nunu par
nu nac de̱ ya̱, ndeꞌ nu ricy cup der consuel lo Shuaan
den. Tub ga la de̱ ya̱ nu riiñ nu ricy de̱, riiñ nu bzeeñ
mi ya̱a̱ de̱.
\v 6 Ornu ya̱ mne̱e̱ cyu nac Crisht lo der, orzeꞌ ndeꞌ nañ
gal na nu mnuuza̱ tub mbigy nañ lardoo der. Zeꞌ Apolos
bdiily yu ya mni zeꞌ ornu blyuuy ni der zañ zir coz
ni Crisht. Tees Ñgyoozh, mi zeꞌ biñ nu ricy nu raly ñi
ornu ricy nap mi nañ lardoo der.
\v 7 Walab dzi coz ily nac yu nu rnuuz ñi, nunu niꞌ walab
dzi coz ily nac yu nu rgyiily ñi. Tees Ñgyoozh zily
zir nac mi, gun mi zeꞌ ricy mi nu raly ñi.
\v 8 Yu nu rnuuz ñi, gal nu yu nu rgyiily ñi, tub ziꞌl
nac dey, nunu Ñgyoozh gyabic mi i dey dub gal lac na
riiñ nu ricy tub ga la dey.
\v 9 Gun de̱ ya̱ tublaazh la ricy de̱ riiñ nim nu losa̱ꞌ.
Zeꞌ de ru na der gal na yu nim, zeꞌ nu ricy de̱ riiñ.
O na der gal na tub yuꞌ nu rzaam.
\v 10 Nu nac faboor nu bicy nu Ñgyoozh ya̱, bicya̱ gal
nu ricy tub biryu. Ñgyoozh bicy mi nu bzu̱ simient ni
yuꞌ zeꞌ, gun ya̱ bzata̱ Crisht lo der loga la. Zeꞌ tuubaꞌ
mbecy rshup yu yuꞌ lo simient nu bi zu zeꞌ. Tees tub
ga la den rlagy ñi nu nu cuidad shup den yuꞌ zeꞌ.
\v 11 Gun ni tub la mbecy wac gzuy reñaꞌ simient ni
yuꞌ nu bi zu zeꞌ, gun simient zeꞌ bi bzu Ñgyoozh ñi, nunu
simient zeꞌ, ndeꞌ ub la Jesucrisht.
\v 12 De ub na gac shup na yuꞌ zeꞌ nu zañ lo coz. Mbecy
nu tonaꞌ la nap na riiñ ricy, yu zeꞌ nay gal nu na tub
mbecy nu shup yuꞌ nu or. Yuꞌ gaꞌy nay gal nu na tub
mbecy nu rshup yuꞌ nu plat. Yuꞌ gaꞌy nay gal nu na tub
mbecy nu rshup yuꞌ nu gyitaꞌ nu dzi sac. Zeꞌ yuꞌ gaꞌ
mbecy beñ nap na riiñ nu ricy yu. Yu zeꞌ nay gal nu
na mbecy nu rshup yuꞌ nu yag. Yuꞌ gaꞌy nay gal nu na
tub mbecy nu rzaa yuꞌ nu gyizh. Yuꞌ gaꞌy nay gal nu
na tub mbecy nu rguꞌ loꞌ yuꞌ nu yagyi.
\v 13 Ornu shuub dzi nu gri bee Jesucrisht ni dela mbecy,
orzeꞌ gyuꞌ bee la na riiñ nu ricy tub ga la mbecy. Gun
Jesucrisht gyicy mi preb dela riiñ nu bicy de mbecy,
gal nu ricy gyi nu rzaay ñi tub la coz. Orzeꞌ gabe la
na riiñ nu bicy tub ga la mbecy, ben a gagyeñ nu wayic
ñi lo gyi.
\v 14 Benu de coz nu pshup mbecy lo simient zeꞌ wayic
ñi lo gyi zeꞌ, orzeꞌ gyad iy.
\v 15 Tees benu de coz nu pshup mbecy lo simient zeꞌ
chic ñi lo gyi zeꞌ, orzeꞌ leew la bicy yu riiñ. Nit lo
dela riiñ nu bicy yu, mas ub yu gruu mbañ yu. Tees nay
gal na tub mbecy nu ruu chu lo gyi.
\p
\v 16 ¿Walab gaal wagad lagy der nu nac der yuꞌ wedz
ni Ñgyoozh, nunu Espiriit Yon nim rcyiiñ mi lat der?
\v 17 Benu tub mbecy gnuy yuꞌ wedz zeꞌ, orzeꞌ Ñgyoozh
gnum yu, gun yuꞌ wedz nim ndeꞌ tub coz yon, nunu yuꞌ wedz
zeꞌ nim, ndeꞌ de ru.
\p
\v 18 Rlagy ñi nu cueꞌ gaꞌ guu der ub ru. Benu ca na
tub mbecy tonaꞌ la yuꞌ shcab niy nu nac de coz nu yuꞌ
gyishlombecy ii, orzeꞌ rlagy ñi nu cueꞌ gyicy leꞌy, sinu
gyicy yu ub yu par tub mbecy nu wagad lagy la, gun orzeꞌ
gac yu tub mbecy nu rishli yuꞌ shcab ni.
\v 19 Gun shcab nu rzii mbecy nu tonaꞌ la shcab lily,
ndeꞌ shcab ton par Ñgyoozh. Gun bi cañ lat de riidz
nu bzeeñ mi zeꞌ. Orzeꞌ rniiñ: “De mbecy nu yuꞌ shcab
ni dunu dey par nu nac de coz nu rboo ic dey”, rniiñ.
\v 20 Tub seꞌ gaꞌ lat de riidz zeꞌ nim rniiñ: “Shuaan
den rad lagy mi nu se la la cyiiñ de coz nu rnii too
de mbecy nu dzi yuꞌ shcab ni”, rniiñ.
\v 21 Ndeꞌ nu ni tub la mbecy walagy ñi nu gyicy dey
gyel leꞌ niy nu nac ca na mbecy, gun dela coz ndeꞌ par
de ru.
\v 22 Ñgyoozh bzeed mi ya̱, Baly, nu Apolos, nu Bed par
nu locyuub de̱ der. Nunu bicy mi nu dela coz nu yuꞌ gyishlombecy
ii ndeꞌ par de ru. Briic mi gyel mbañ ni der, nunu niꞌ
ziꞌl bicy mi nu nap par de ru mas gat der. Bicy mi nu
de coz nu yuꞌ na ndeꞌ nap par de ru, nunu tub tantaꞌ
de coz nu chuꞌ par lo. Dela coz zeꞌ bicy mi ñii nu nap
par de ru.
\v 23 Nunu de ru nac der ni Crisht. Zeꞌ Crisht nac mi
ni Ñgyoozh.
\c 4
\s Riiñ ni de aposht
\p
\v 1 De ru rlagy ñi nu gyicy der de̱ ya̱ par mbecy nu
ricy de coz nu rlagy Crisht. Rlagy ñi nu gyicy der de̱
ya̱ par mbecy nu bdugyi riiñ nu shaal de̱ de riidz nu
gal na rbic Ñgyoozh nu gad lagy de mbecy.
\v 2 Tub coz rlagy ñi nu gyicy yu zu riiñ. Rlagy ñi
nu gyicy paay nu patro̱o̱ niy.
\v 3 Zeꞌ ya̱ wagyicy cuena̱ mas rsaꞌ lagy der lo̱ ti nap
ricya̱. Niꞌ ziꞌl wagyicy cuena̱ la ziꞌl coz nu rsaꞌ lagy
mbecy lo̱. Mas ya̱, wagyicy cupa̱ consuel lo shcab ni uba̱.
\v 4 Ya̱ rze̱e̱ nu se la la coz bicya̱ rze̱e̱, tees walab nu
nac ndeꞌ gruu caacya̱, gun Shuaan den, mi zeꞌ gniim ti
yuꞌ falt ne̱.
\v 5 Orzeꞌ ndeꞌ nu walagy ñi nu gnii der ti yuꞌ falt
ni losaꞌr, lat nu lez den gashtal shuub la dzi nu cyid
Shuaan den tuubaꞌ tir. Orzeꞌ mi zeꞌ gyicy caacy mi de
coz nu ricy mbecy dze ga. Nunu shaal mi de coz nu rnii
too mbecy nañ lardooy. Orzeꞌ Ñgyoozh gyabic mi gyel
mbecy ni tub ga la dey gal nu yad ñi.
\p
\v 6 Der bicy na, ya̱ rne̱e̱ dela coz ii lo der par nu locyuuba̱
der. Ya̱ bzata̱ Apolos nu uba̱ par nu gad lagy der lac
mod gyicy nur losaꞌr. Tub ziꞌl mod nu gyicy nu der dey.
Gal mod nu rnii de riidz ni Ñgyoozh, ni mod rlagy ñi.
Ni tub la der walagy ñi nu cui der mbecy nu ricy riiñ
ni Ñgyoozh. Cueꞌ gyicy zily der tub yu. Zeꞌ tuubaꞌy
gyicy gyidz der yu.
\v 7 ¿Cyu bicy nu byalily zir der par lo deꞌ zir mbecy?
Wagad lagy der ni tub la coz. Nomaas rad lagy der de
coz nu briic Ñgyoozh nu gad lagy der. Orzeꞌ benu rad
lagy der coz nu briic Ñgyoozh ziꞌl, orzeꞌ ¿lagu dzi ricy
der gyel leꞌ nir gal nu ricy mbecy nu ricy cup coz nu
walab coz nu guud leew la?
\p
\v 8 Che rzii der nu bi ricy cup gyel la der dela coz
ni Crisht nu rlagy ñi ni der, rziir. De ru na der gal
nu na mbecy guaniꞌñ, rziir. Nunu byac der gal nu na rey,
rzii der, mas de̱ ya̱ se laꞌ la sac de̱. Dzi ga nap benu
gyac der rey, gun orzeꞌ de̱ ya̱ gyacaꞌ de̱ rey tublaazh
la nu de ru.
\v 9 Ya̱ rze̱e̱ nu Ñgyoozh bicy mi nu rlyu nu de̱ ya̱ nu
deꞌ zir de aposht nu blaazh la gal ich la zab de̱. Rabee
de̱ gal nu rabee tub pres nu bi zuu la nu gat lo rgüii
la dela mbecy nu yuꞌ gyishlombecy: tant de anc nunu
tant de mbecy.
\v 10 De mbecy rzii dey nu de̱ ya̱ nac de̱ mbecy ton par
nu nac Crisht. Zeꞌ de ru rzii dey nu dzi lily na shcab
ni der par de coz ni Crisht. De̱ ya̱ wacyiiñ de̱, tees de
ru dzi cyiiñ der rzii dey. De mbecy rca lagy dey lo
de ru, tees lo de̱ ya̱ waca lagy dey.
\v 11 Mas gashtal dzi na yuꞌ tiem nu ran de̱, nunu yuꞌ
tiem nu rbigy de̱ nis, nunu yuꞌ tiem ni shab de̱ wagad.
Yuꞌ tiem nu shiñ ricy nu mbecy de̱ ya̱. Nunu yuꞌ tiem
nu wagad yuꞌ cyiiñ de̱.
\v 12 Nunu tonaꞌ la fert ricy de̱ riiñ nu ya̱a̱ de̱ par
nu gad nu da̱w de̱. Ornu mbecy rzaa lagy dey ne̱ de̱, orzeꞌ
rdiñ de̱ lo Ñgyoozh nu nap gyicy num dey. Ornu mbecy
rsheed ziy de̱, orzeꞌ ragye̱e̱ la̱ de̱ lo dey.
\v 13 Ornu mbecy rnii ziy ne̱ de̱, orzeꞌ nap la rne̱e̱ du̱
de̱ yu. Par lo de mbecy na de̱ gal nu na toop. Nunu gashtal
dzi na, na de̱ gal nu na toop. Na de̱ gal nu na de nu guꞌ
bid nu yuꞌ gyishlombecy.
\p
\v 14 Ya̱ zeeda̱ gyicy ii lo der walab nu gyicya̱ nu gat
lo der, sinu par nu do̱o̱ rishlo der, como de ru na der
gal nu na tub iꞌñ ya̱ nu dzi rca̱.
\v 15 Gun mas tii miily mbecy yuꞌy nu rlyuuy de coz
ni Crisht ni der, tees tub zi uz der zu, gun ya̱ byaca̱
uz der nu nac Jesucrisht, gun laab ya̱ byapa̱ mne̱e̱ lo der
de riidz nu sac nim.
\v 16 Ndeꞌ nu rnishba̱a̱ lo der nu gyicy der gal nu ricy
ya̱.
\p
\v 17 Nunu ndeꞌ nu zuu neza̱ Timoteo cyid yu lo der.
Yu zeꞌ nay gal na tub iꞌñ ya̱, gun bicya̱ nu fert zir ricy
cup yu consuel lo Shuaan den. Nunu tonaꞌ la rca̱ yu.
Nunu tonaꞌ la la ricy paay. Yu zeꞌ gyicy yu nu gyezaꞌ
lagy der lac mod rlagy ñi nu chuꞌ de mbecy nu ricy cup
consuel lo Crisht. Niiy de coz nu rlyu̱u̱ lat de mbecy
ni Crisht dela lugaar zeꞌ nu rdeda̱.
\v 18 Gun yuꞌ mbecy lat der nu tonaꞌ la byaleꞌy. Rsaꞌ
lagy dey nu rila wayap güi̱i̱ der.
\v 19 Tees benu Shuaan den rlagy mi, orzeꞌ ya̱ yap gyiily
la̱ nu yap güi̱i̱ ga̱ꞌ der. Gazeꞌ nu gad lagya̱ la ñuu coz
rac ricy de mbecy leꞌ zeꞌ. Walab tub lo ziꞌl de coz
nu rnii dey.
\v 20 Gun lat de mbecy nu riib ic Ñgyoozh, walab nu riidz
ziꞌl rnii dey, sinu coz ily ricy dey nu nac mi.
\v 21 Ornu yap güi̱i̱ der, ¿ca na coz rlagy der? ¿A rlagy
der nu rica̱ cashtig ni der, uti rlagy der nu ca̱ der, nunu
nap gyicy du̱ der?
\c 5
\s Mod nu gyicy mbecy ni Crisht benu shiñ ricy tub yu
\p
\v 1 Ya̱ güeña̱ nu lat de ru, zu tub mbecy nu gush yu ñaa
naan yu. Yu zeꞌ tonaꞌ la cyi ily bicy yu. Mas de mbecy
nu a̱ꞌ yuꞌ lo Ñgyoozh wagyicy yu cyi zeꞌ.
\v 2 Orzeꞌ ¿lagu gaal nu dzi ricy der gyel leꞌ nir?
Lugaar nu gyicy leꞌ der, nap zir nu gyicy shni der, nunu
rlagy ñi co der mbecy nu bicy cyi zeꞌ lat der.
\v 3 Mas ya̱ saca̱ lat der tees ya̱ ca ica̱ der. Nunu nu
nac rishbeey nu briic Shuaan den Jesuuz ne̱, ndeꞌ nu ya̱
mnii to̱o̱ nu lac mod rlagy ñi gyicy nu der mbecy nu bicy
cyi zeꞌ. Mas ya̱ saca̱ lat der tees ya̱ ne̱e̱ lo der. Orzeꞌ
ndeꞌ nañ gal na nu zu̱ lat der.
\v 4 Lat nu yuꞌ tublaazh der, ya̱ ca ica̱ der, nunu Shuaan
den Jesucrisht locyuub mi der.
\v 5 Orzeꞌ mbecy nu bicy cyi zeꞌ, bguꞌ der yu yaa nuras,
gun orzeꞌ chay lo cashtig, tees gruu mbañ yu ornu cyid
Shuaan den Jesuuz tuubaꞌ tir.
\p
\v 6 Walagy ñi nu gyicy leꞌ der. Mbish tub riidz nu
rnii mbecy: coz cyi nañ gal nu na lebadur. Orzeꞌ nu
nac ñuu miiñ lebadur gyicy ñi nu gyafert dela cub gyishtily.
\v 7 Rlagy ñi nu co der lebadur zeꞌ lat ru. Gun orzeꞌ
sac la coz cyi lat der. Gun orzeꞌ na der gal nu na cub
gyishtily nu du ub la nu sac la lebadur zeꞌ lat der.
Nunu rad lagya̱ nu caacy der, gun Jesucrisht bi gut mi
par nu nac de ub na. Par de ub na, mi zeꞌ nam gal nu
na shily nu rshu reñ lat saꞌ ni Pas.
\v 8 Nunu de ub na nan gal na mbecy nu yuꞌ saꞌ zeꞌ.
Ndeꞌ nu rlagy ñi chuꞌ den nu gyel cacy, nunu gyicy den
coz nu seꞌñ. Gun ndeꞌ nañ gal nu na gyishtily nu sac
lebadur zeꞌ. Walagy ñi nu shiñ gyicy den nunu walagy
ñi nu gyicy den coz cyi gal nu bicy den gulas. Gun ndeꞌ
nañ gal nu na gyishtily nu yuꞌ lebadur. Nunu wac gow
mbecy gyishtily nu yuꞌ lebadur zeꞌ lat nu yuꞌ dey saꞌ
ni Pas.
\p
\v 9 Lo tuubaꞌ gyicy nu bzeeda̱ lo der zeꞌ, pca̱a̱ nu cueꞌ
gac nu der de mbecy nu ral losaꞌ nu wanchelaa.
\v 10 De mbecy nu walab mbecy ni Ñgyoozh, mas ral dey
losaꞌy nu wanchelaay, mas nac dey mbecy saap lagy, nunu
mas nac dey gubaan, mas nac dey mbecy nu driib zily nab,
tees wane̱e̱ nu rlagy ñi nu gruu der lat dey, gun benu
ni gyicy der, orzeꞌ rlagy ñi nu ruu der gyishlombecy
ii.
\v 11 Tees coz nu rlagya̱ ne̱e̱ lo der, ndeꞌ nu cueꞌ gac
nu der ni tub la de mbecy nu rnii nu nac yu bicy der,
zeꞌ ii ricy dey de cyi zeꞌ. Ral dey losaꞌy nu wanchelaay.
Rasaap lagy dey coz ni losaꞌy. Driib zily dey nab. Rzat
zi dey losaꞌy. Nac dey mbecy rzugy. Ricy dey gubaan.
Cueꞌ gac nu der ni tub la de mbecy zeꞌ. De mbecy zeꞌ
ni cueꞌ gow nu der yu gyit.
\v 12,13 Gun ndeꞌ walab cuen ne̱ ya̱ nu gri be̱e̱ ni de yu
nu walab mbecy ni Crisht. Sinu Ñgyoozh gri beem ni de
mbecy zeꞌ. Tees de mbecy nu nac ni Crisht, rlagy ñi nu
gri bee der ni dey. Orzeꞌ rlagy ñi nu co der mbecy nu
bicy cyi zeꞌ lat der.
\c 6
\s Mod nu gri bee dey ni bicy yu benu shiñ ricy yu
\p
\v 1 Ornu ca na mbecy nu yuꞌ lat der rziiy nu shiñ bicy
bicy yu nuy yu, orzeꞌ rila walagy ñi chay lo mbecy nu
walab mbecy ni Ñgyoozh par nu gri beey ni dey, sinu rlagy
ñi chay lo deꞌ zir mbecy ni Ñgyoozh.
\v 2 ¿Walab gaal wagad lagy der nu de mbecy ni Ñgyoozh
gri bee dey ni dela mbecy gyishlombecy? Benu gri bee
der ni dela mbecy, orzeꞌ segur la cyiiñ der nu gri beer
de coz deet miꞌ nu yuꞌ lat der.
\v 3 ¿Walab gaal wagad lagy der nu gri bee den ni de
anc? ¡Zeꞌ yegar ñuu de coz deet nu rac lat nu rcyiiñ
den gyishlombecy ii na!
\v 4 Orzeꞌ benu cyid coz deet lat der, ¿lagu cha nu der
gyel chaꞌ ic zeꞌ lo de mbecy nu wacha lat de mbecy ni
Crisht?
\v 5 Ya̱ ni rne̱e̱ gun par nu gat lo der. ¿Walab gaal warusuu
la mas ñuu tub mbecy nu yuꞌ shcab ni lat der nu cyiiñ
yu zaꞌ loy de coz deet nu rac lat de bicy na?
\v 6 Nap zir duri bee ni dey lat de mbecy ni Crisht,
gazeꞌ nu cha dey lo de fushtiz nu walab mbecy ni Ñgyoozh
nu gri beey ni dey.
\p
\v 7 Benu ca na der char lo de fushtiz nu nac tub gyel
chaꞌ ic ni bicy ru, orzeꞌ wayicy ru gan gal nu rlagy
ñi nu gyicy tub mbecy ni Crisht. Nap zir zaan la der
nu shiñ gyicy nu mbecy der. Nap zir nu gyicy gubaan
dey coz ni der gazeꞌ nu gyicy der tub mod nu walagy
ñi gyicy mbecy ni Crisht.
\v 8 Lugaar nu nap gyicy der, ca nu shiñ ricy nu der
losaꞌr. ¡Nunu ricy gubaan der coz ni laab losaꞌr mas
nac yu bicy ru nu nac Crisht!
\p
\v 9 ¿Walab gaal wagad lagy der nu de mbecy a̱ꞌ nap rila
wazac dey lo gyel gubier ni Ñgyoozh? Cueꞌ guu der ub
ru. Neñ der nu de mbecy nu ral biñ mñaa nu walab mñaa,
de mbecy nu driib zily nab, de mbecy nu ral losaꞌ nu
wanchelaa, de yu gyeey nu ricy losaꞌ gyeey par mod ni
biñ mñaa o niꞌ ziꞌl tub biñ mñaa nu losaꞌm,
\v 10 de mbecy nu ricy gubaan, de mbecy nu rasaap lagy
de coz ni losaꞌ, de mbecy rzugy, de mbecy nu rzat zi losaꞌ,
de mbecy nu rboo coz ni losaꞌ, dela de mbecy zeꞌ wazac
dey lo gyel gubier ni Ñgyoozh.
\v 11 Guꞌ mbecy lat der nu ni nay guc yu. Tees na bi
byecy dela cyi nu bicy der. Bi byac der mbecy cacy, nunu
byanap der par lo Ñgyoozh. Dela ndeꞌ ni bzac der nu
nac Jesucrisht, nunu nu nac de coz nu bicy Espiriit Yon
ni Ñgyoozh.
\s Cueꞌ gyicy ras nu mbecy cuerp niy
\p
\v 12 Yuꞌ mbecy rniiy: “Gac gyicya̱ la ziꞌl coz nu rlagya̱”,
rnii dey. Nunu ndeꞌ rishli, tees walab delañ nap nu gyicy
nañ. Mas gac gyicya̱ la ziꞌl coz tees ya̱ rila wazaana̱
nu gyub ic ni tub la coz ya̱.
\v 13 Yuꞌ mbecy nu rnii dey nu gac gow dey gun: “Coz
nu rdow den, ndeꞌ par nu chuꞌñ nañ den, nunu nañ den ndeꞌ
par nu chuꞌ de coz nu rdon”, rnii dey. Nunu ndeꞌ rishli,
tees shuub tiem nu zaꞌ lo Ñgyoozh rup laañ. Tees walab
rishli nu cuerp ni mbecy, ndeꞌ cyiiñ ni par nu gal ziꞌl
dey losaꞌy nu wanchelaay. Sinu cuerp ni mbecy, ndeꞌ cyiiñ
ñi par nu gyicy ñi de coz nu rlagy Shuaan den. Zeꞌ Shuaan
den, mi zeꞌ rlagy ñi nu gyub ic mi cuerp ni den, gun orzeꞌ
gac gyicy den de coz nu rlagy mi.
\v 14 Nunu gal nu Ñgyoozh bicy mi nu byabañ Shuaan den
ornu gut mi, niꞌ ziꞌl gyicy mi nu gyabañ de ub na ornu
gat den nu nac coz ily nu ricy mi.
\p
\v 15 ¿Walab gaal wagad lagy der nu tub ga la der na
der gal nu na tub laꞌ cuerp ni Crisht? ¿Orzeꞌ lac gyicya̱?
¿Walab gaal lo̱o̱ tub laꞌ cuerp ni Crisht; orzeꞌ cheela̱ñ
nu cuerp ni biñ mñaa che̱ꞌ? Rila wac.
\v 16 ¿Walab gaal wagad lagy der nu benu tub mbecy gal
yu tub biñ mñaa che̱ꞌ, orzeꞌ yac dey se tub ziꞌl cuerp?
Gun lat de riidz nu bzeeñ Ñgyoozh rniiñ: “Lo cyup mbecy
yac dey se tub ziꞌl cuerp”, rniiñ.
\v 17 Tees benu tub mbecy nac nuy Shuaan den, orzeꞌ tub
ziꞌl nac yu nuy mi par lo Ñgyoozh.
\p
\v 18 Bruu chu der lo cyi nu ral mbecy losaꞌy nu wanchelaay.
Dela cyi nu ricy mbecy a̱ꞌ shiñ gyicy nuy cuerp niy.
Tees mbecy nu ral losaꞌ nu wanchelaa, yu zeꞌ shiñ ricy
nuy cuerp niy.
\v 19 ¿Walab gaal wagad lagy der nu cuerp ni der, ndeꞌ
yuꞌ wedz ni Espiriit Yon nu briic Ñgyoozh ni der, nunu
Espiriit Yon nim rcyiiñ mi nañ cuerp ni der? Gun cuerp
ni der, ndeꞌ walab coz par ub ziꞌl der, sinu cuerp zeꞌ,
ndeꞌ coz ni Ñgyoozh.
\v 20 Gun Ñgyoozh tonaꞌ la ñgyup briib mi der. Orzeꞌ
rlagy ñi nu griib zily der mi nu cuerp nir.
\c 7
\s Consef ni nu chelaa mbecy
\p
\v 1 Na rlagya̱ tush cya̱ de riidz nu bdugyiꞌ der lo̱ lo
gyicy nu bzeed der. Benu tub yu gyeey wachelaay, orzeꞌ
nap.
\v 2 Tees como tonaꞌ la yuꞌ mbecy nu ricy yu cyi nu
losaꞌy nu wanchalaay, orzeꞌ nap zir benu gad mñaa dey.
Nunu nap zir benu de biñ mñaa gad ñgyee dem.
\v 3 De yu gyeey rlagy ñi nu gyicy paay nu nac nesedaa
ni mñaay, nunu de biñ mñaa rlagy ñi nu gyicy paam nu
nac nesedaa ni ñgyeem.
\v 4 Cuerp ni biñ mñaa, ndeꞌ walab cuerp ni ub ziꞌl mi
sinu niꞌ ndeꞌ cuerp ni ñgyeem. Cuerp ni yu gyeey, ndeꞌ
walab cuerp ni ub ziꞌl yu, sinu niꞌ ziꞌl ndeꞌ cuerp ni
mñaay.
\v 5 Rlagy ñi nu cueꞌ dily lo dey nu nac nesedaa nu
ricy cup dey lo losaꞌy. Nomaas benu rup laa dey shet
ic yu, orzeꞌ gac zeeñ nat dey niñ par nu cuic ñi tiem
nu nii nu dey Ñgyoozh. Ornu ded nu nii nu dey Ñgyoozh,
orzeꞌ gyatublaazhaꞌ dey nu losaꞌy. Orzeꞌ cueꞌ cuic dey
lugaar nu gyicy nuras gan dey par nu nac nu wagagyee
dey.
\p
\v 6 Ya̱ mne̱e̱ nu nap zir benu tub mbecy zu mñaay, nunu
nap zir benu tub biñ mñaa zu ñgyeem, tees walab nu ricya̱
mandaar nu ni gyicy der, sinu rne̱e̱ nu ndeꞌ nap benu ni
gyicy der.
\v 7 Par ya̱, nap zir benu de mbecy gyicy dey gal nu bicy
ya̱ nu sac mña̱a̱. Tees yuꞌ mbecy nu wagyeey benu sac mñaay.
Orzeꞌ tub ga la mbecy nu tub ga la coz nu rbic Ñgyoozh
niy. Tub mbecy rbic mi tub lo coz niy. Zeꞌ tuubaꞌy rbic
mi reñaꞌ loñ niy.
\p
\v 8 Na rne̱e̱ lo de mbecy solter nu nigul chelaa, nunu
rne̱e̱ lo de byud nu nap zir nu chesa dey ub ziy gal nu
ya̱ rdeda̱.
\v 9 Tees benu wagyee dey, orzeꞌ nap zir nu chelaa dey.
Nap zir nu chelaa dey, gazeꞌ nu nu shiñ nii too dey lo
losaꞌy.
\p
\v 10 Na ne̱e̱ lo de mbecy nu bi pchelaa. Nii walab ya̱
rca̱a̱ der nu gyicy ru, sinu nii coz nu rnii Shuaan den
nu gyicy der. De biñ mñaa walagy ñi nu zaan dem ñgyeem.
\v 11 Tees benu bzaan dem ñgyeem, orzeꞌ rlagy ñi chesa
la dem ub zim, o nu gyashaꞌ dem ñgyeem. Nunu de yu gyeey
walagy ñi nu zaan dey mñaay.
\p
\v 12 Lo dela deꞌ zir de mbecy rne̱e̱ de riidz ni ub ziꞌla̱,
walab riidz ni Shuaan den. Benu tub bicy na nu nac mbecy
ni Crisht zu mñaay nu walab mbecy ni Crisht, zeꞌ rshet
ic mi rcyiiñ num yu, orzeꞌ walagy ñi nu zaan yum.
\v 13 Nunu benu tub biñ mñaa nu nac ni Crisht pchelaam
tub yu gyeey nu walab mbecy ni Crisht, zeꞌ rshet ic yu
nu rcyiiñ nuy mi, orzeꞌ walagy ñi nu zaan mi yu.
\v 14 Gun Ñgyoozh gyicy mi yu gyeey zeꞌ, par mbecy nim
nu nac nu rcyiiñ nuy mñaay, biñ nu ricy cup consuel lo
Crisht, mas ub yu wagyicy cup yu consuel lom. Zeꞌ biñ
mñaa nu wagyicy cup consuel lo Crisht, Ñgyoozh gyicy
mim par mbecy nim nu nac nu rcyiiñ num ñgyeem, yu nu
ricy cup consuel lo Crisht. Benu walab ni orzeꞌ de yu
ngush ni dey na dey gal na yu nguzh ni de mbecy nu a̱ꞌ
ricy cup consuel lo Crisht. Tees na Ñgyoozh ricy mi
de yu nguzh ni dey par mbecy nim.
\v 15 Tees benu tub mbecy nu wagyicy cup consuel lo
Crisht rlagy yu gzaan yu losaꞌy nu nac mbecy nu ricy
cup consuel lo Crisht, orzeꞌ gzaan la der nu ni gyicy
yu. Orzeꞌ de yu nu ricy cup consuel lo Crisht zeꞌ, yu
zeꞌ bdulaay nu losaꞌy. Gun Ñgyoozh bzum der par nu nap
chuꞌr nu de losaꞌr.
\v 16 Gun de ru biñ mñaa nu ricy cup consuel lo Crisht
wagad lagy der ti gyicy der nu gruu mbañ ñgyeer. Nunu
de ru yu gyeey nu ricy cup consuel lo Crisht wagad lagy
der ti gyicy ru nu gruu mbañ mñaar.
\p
\v 17 Tub ga la der chuꞌr nu mod nu psaꞌ lagy Ñgyoozh
der ornu mniim nañ lardoo der nu gac ru mbecy ni Crisht.
Nunu ya̱ rlyu̱u̱ de ndeꞌ lat dela de mbecy ni Crisht.
\v 18 Benu tub mbecy nu ca beey nu la sircunsision cuerp
niy, zeꞌ Ñgyoozh niim loy nu gac yu mbecy ni Crisht, orzeꞌ
gyiyeeñ la beey zeꞌ cuerp niy. Benu tub mbecy sac beey
sircunsision zeꞌ, zeꞌ benu Ñgyoozh niim loy nu gac yu
mbecy ni Crisht, orzeꞌ walagy ñi nu ca beey zeꞌ cuerp
niy.
\v 19 Mas ca beey sircunsision cuerp ni dey o wacaañ
tees ndeꞌ se la la cyiiñ ñi. Coz nu cyiiñ, ndeꞌ nu gyicy
yac mbecy de coz nu rnii Ñgyoozh.
\v 20 Dela mbecy chuꞌ dey gal mod nu zuy ornu mnii Ñgyoozh
nu gac yu mbecy ni Crisht.
\v 21 Benu guc der moz ni mbecy por fers la ornu mnii
Ñgyoozh nu gac der mbecy ni Crisht, orzeꞌ cueꞌ dzi csug
ic der. Tees benu gad mod nu gruu der lo patro̱o̱ nir,
orzeꞌ gla der.
\v 22 Benu Ñgyoozh niim lo tub mbecy nu nac moz por
fers la nu gac yu mbecy ni Crisht, orzeꞌ par lo Ñgyoozh
yu zeꞌ nac yu mbecy bdulaa. Niꞌ ziꞌl benu Ñgyoozh niim
lo tub mbecy nu sac patro̱o̱ ni nu gac yu mbecy ni Crisht,
orzeꞌ yu zeꞌ nac yu moz por fers la ni Crisht.
\v 23 Gun Ñgyoozh ñgyup briib mi der. Orzeꞌ cueꞌ zu
bich der nu nac coz nu rlagy mbecy. Lugaar ni ndeꞌ, nap
zir bzu bich der nu nac de coz ni Ñgyoozh.
\v 24 Ndeꞌ nu der bicy na, bzu der lo Ñgyoozh gal mod
nu zu der ornu mniim nu gyac der mbecy ni Crisht.
\p
\v 25 Na par de mbecy nu nigul chelaa, walab nu pcaa
Shuaan den ya̱ nu ni ne̱e̱, tees ya̱ ne̱e̱ lo der coz nu rnii
to̱o̱. Nunu ya̱ tub mbecy nu ricy cup Shuaan den consuel
lo par nu nac nu rashni lagy mi ya̱.
\v 26 Como tonaꞌ la yuꞌ gyel deet tiem na, ndeꞌ nu rsaꞌ
lagya̱ nu nap zir nu cueꞌ chelaa dey.
\v 27 Benu zu mñaa der, cueꞌ zaan losaꞌ der. Nunu benu
sac mñaa der, orzeꞌ cueꞌ zu bich der nu gad mñaar.
\v 28 Tees benu chelaa der, ndeꞌ walab nu cyi na. Nunu
benu fiñ feñ chelaañ, ndeꞌ niꞌ ziꞌl walab nu cyi na.
Tees de mbecy nu rchelaa rzuꞌ gyel deet ni dey gyishlombecy
ii. Ndeꞌ nu rlagya̱ lo̱o̱ chu̱ der lo de gyel deet zeꞌ.
\p
\v 29 Der bicy na, coz nu rlagya̱ ne̱e̱ lo der, ndeꞌ nii:
na sñuu ga shuub dzi nu cyid Shuaan den. Orzeꞌ de mbecy
nu zu mñaa rlagy ñi nu nap gyicy dey nu de coz ni Ñgyoozh
gal nu ricy de yu nu sac mñaa.
\v 30 De mbecy nu ricy sentiir, rlagy ñi nu cueꞌ checa
riiñ ni Ñgyoozh nu nac nu ricy dey sentiir. Niꞌ ziꞌl
de mbecy nu dzi yet lagy rlagy ñi nu cueꞌ checa riiñ
nim nu nac nu yet lagy dey. Nunu de mbecy nu rzii la
coz rlagy ñi nu gyicy dey ñi par coz nu walab coz ni
de ub yu.
\v 31 De mbecy nu ricy dalje̱z nu de coz ni gyishlombecy
ii, rlagy ñi nu cueꞌ zu bich dey nu nac ñii, gun orzeꞌ
cueꞌ nu checa riiñ ni Ñgyoozh, gun mod nu na gyishlombecy
nu yuꞌn ii walabaꞌ nu zu tuuñ ñi.
\p
\v 32 Rlagya̱ nu rila wasug ic der. De mbecy nu sac mñaa
rzu bich dey nu nac de coz nu rlagy Shuaan den, gun rlagy
dey gyicy yu coz nu gyet lagy mi.
\v 33 Tees mbecy yu nu zu mñaa rzu bich dey nu nac de
coz ni gyishlombecy, gun rlagy dey gyicy yu coz nu gyet
lagy mñaay.
\v 34 Orzeꞌ cyup coz rlagy dey gyicy yu. Nunu niꞌ ziꞌl
de biñ mñaa nu zu ñgyee reñaꞌ nam par de biñ nu sac
ñgyee. Biñ nu sac ñgyee rzu bich mi nu nac de coz nu
rlagy Shuaan den. Gun rlagy mi gyicy mi de coz nu rlagy
Shuaan den, nunu zum shcab ni coz nu rlagy Shuaan den.
Tees de biñ nu zu ñgyee rzu bich mi nu nac de coz ni
gyishlombecy, gun rlagy mi gyicy mi coz nu gyet lagy
ñgyeem.
\p
\v 35 De riidz ii rne̱e̱ lo der gun rlagya̱ nu locyuuba̱
der. Walab nu rlagya̱ ca̱ ni der nu cueꞌ gyicy der ca
na tub mod nu mne̱e̱, sinu rlagya̱ nu gyicy der mod nu ricy
mbecy raso̱o̱. Gyicy der coz nu rlagy Shuaan den nu dutuub
la lardoo der.
\p
\v 36 Tees benu tub mbecy rziiy nu rlagy ñi cuic yu
iꞌñ yu chelaañ gun bi nu ñaꞌn ñi, nunu benu ndeꞌ coz
nu rlagy ñi rlyu, orzeꞌ rlagy ñi nu gyicy yu mod nu rlagy
ñi. Gac chelaañ, nunu ndeꞌ walab nu cyi na.
\v 37 Zeꞌ benu tuubaꞌ mbecy rzu fert yu nu walagy yu
chelaa iꞌñ yu, nunu benu dub gusht la niñ ricy yu, walab
por fers la, orzeꞌ napaꞌ ricy yu.
\v 38 Yu nu rbic iꞌñ chelaa, yu zeꞌ nap ricy yu. Tees
yu nu wacuic iꞌñ chelaa, yu zeꞌ napaꞌ zir ricy yu.
\p
\v 39 Tub biñ mñaa bi byid mi nu ñgyeem par lo leey
lat nu mbañ yu, tees benu gat yu, orzeꞌ zu nat laam. Gac
chelaam nu cyu ziꞌl nu rlagy mi. Cyer nu mbecy ni Crisht
ziꞌl.
\v 40 Tees gusht zir gzum benu gyiyeeñ lam ub zim rze̱e̱.
Ndeꞌ coz nu rnii to̱o̱, nunu rsaꞌ lagya̱ nu Espiriit Yon
ni Ñgyoozh riib ic mi ya̱ ornu rne̱e̱ de riidz ii.
\c 8
\s Beel nu gua lo nab
\p
\v 1 Na rlagya̱ ne̱e̱ lo der ni de beel nu rza nu dey lo
nab. Dela den neñ na nu rishli rad lagy na la na coz
nu rlagy ñi. Orzeꞌ nu nac nu rad lagy den ndeꞌ, orzeꞌ
yaleꞌn. Tees benu caan losaꞌn, orzeꞌ ndeꞌ coz nu cyiiñ
nin.
\v 2 Benu ca na mbecy rziiy nu rad lagy yu ca na tub
coz, zeꞌ gabee wagad lagy nap yu gal nu rlagy ñi nu gad
lagy yu.
\v 3 Tees benu tub mbecy rcay Ñgyoozh, orzeꞌ Ñgyoozh
yuꞌ lom yu.
\p
\v 4 Orzeꞌ ni nu dow den beel nu rza nu dey lo nab zeꞌ:
neñ den nu ndeꞌ tub coz nu rila a̱ꞌ sac, gun rishli nab
se la la sac ñi gyishlombecy ii, nunu rad lagy den nu
sacaꞌ zir Ñgyoozh, sinu tub zim zum.
\v 5 Gun mas gyibaa nunu mas lo yu ii yuꞌ tonaꞌ la coz
nu rnii mbecy ñgyoozh. Orzeꞌ par shcab ni de mbecy, yuꞌ
tonaꞌ la ñgyoozh, nunu yuꞌ tonaꞌ la shuaan dey.
\v 6 Tees par de ub na, sacaꞌ zir Ñgyoozh, sinu tub zi
Ñgyoozh uz den zum. Mi zeꞌ psaꞌ lagy mi dela coz. Nunu
de ub na yuꞌn par nu gyicy na coz nu rlagy mi zeꞌ. Nunu
niꞌ ziꞌl zu tub zi Shuaan den, Jesucrisht. Par nu nac
mi zeꞌ, ndeꞌ nu yuꞌ dela coz gyishlombecy, nunu gashtal
de ub na yuꞌn par nu nac mi zeꞌ.
\p
\v 7 Tees walab dela mbecy ni Crisht neñ dey nu se la
la gyicy nab. Gun yuꞌ mbecy nu bi gubee nu rcay nab.
Orzeꞌ ornu row dey beel, rnii too dey nu nac nu guañ
lo nab, ndeꞌ nu dzi sug ic dey nu nac ñii, gun rnii too
dey nu shiñ bicy dey, par nu wagad lagy nap dey.
\v 8 Tees rishli de coz nu dow den walab ndeꞌ gyicy
ñi nu ganap lagy Ñgyoozh lo den. Walab nu nac den mbecy
nap par nu nac coz nu dow na. Nunu ni walab nu nac den
mbecy a̱ꞌ nap par nu nac de coz nu wadow na.
\v 9 Nomaas rlagy ñi nu gyicy cuidad der nis gyicy der
nu gnu de mbecy nu a̱ꞌ fert ricy cup consuel lo Jesuuz
nu nac nu rad lagy der nu gac gow der beel zeꞌ.
\v 10 Benu ru, tub mbecy nu rad lagy de coz zeꞌ, zeꞌ zub
ru row ru ñii lugaar nu rgyiiñ de mbecy lo nab, orzeꞌ
gzac tuubaꞌ bicy na nu a̱ꞌ fert ricy cup consuel nu ni
ricy ru. Orzeꞌ niꞌ ziꞌl nii tooy nu ni gyicy yu mas
walab coz nap, rnii tooy.
\v 11 Orzeꞌ par nu nac nu ricy ru nu dzi rad lagy ru,
orzeꞌ gyicy ru nu duneꞌ tub bicy ru nu a̱ꞌ fert ricy
cup consuel. Nunu niꞌ ziꞌl nu nac yu zeꞌ gut Crisht.
\v 12 Benu ru shiñ ricy nur tub bicy ru nu a̱ꞌ fert ricy
cup consuel lo Crisht, ornu rlyuur niy nu gyicy yu coz
nu rnii tooy nu ndeꞌ coz nu walab seꞌñ, orzeꞌ niꞌ ziꞌl
shiñ ricy nur Crisht.
\v 13 Gun zeꞌ benu nu nac nu da̱w beel gyicy ñi nu gnu
bicya̱, orzeꞌ nap zir nu wada̱w la ñii, gun cueꞌ nu gyicya̱
nu gnu bicya̱.
\c 9
\s De coz nu yad ñi nu gyicy de aposht
\p
\v 1 Walab mbecy ricy dey mandaar ya̱. Ya̱ naca̱ tub aposht,
tub yu nu bzuu nez Ñgyoozh. Nunu ya̱ bzaac urlo̱ la̱ Shuaan
den Jesuuz. Nunu ¿a walab de ru nac der mbecy nim nu
nac riiñ nu ricya̱ nim?
\v 2 Mas yuꞌ mbecy nu wagyicy yu ya̱ par aposht, tees
par de ru segur la naca̱ aposht, gun par nu nac ya̱, byac
der mbecy ni Shuaan den. Ndeꞌ nu rabee nu ya̱ naca̱ aposht.
\p
\v 3 Ornu de mbecy rnii zi dey ne̱, orzeꞌ ni mod rca̱ uba̱:
\v 4 ¿Walab gaal walab seꞌñ nu cuic der coz nu da̱w gal
nu de coz nu do̱ꞌ?
\v 5 ¿Walab gaal walab seꞌñ nu gyicya̱ gal nu ricy deꞌ
zir de aposht, gal nu Bed, nu de bicy Shuaan den? Gun
de yu zeꞌ zu mñaa dey, nunu rded nu dey mñaay lat nu
ricy dey riiñ ni Ñgyoozh.
\v 6 ¿Uti rsaꞌ lagy der nu ya̱ nu Bernabee a̱ꞌ yad ñi
nu checa̱ de̱ nu gyicy de̱ riiñ ne̱ par nu gad nu da̱w de̱
lat nu shaal de̱ de riidz ni Ñgyoozh?
\v 7 Gun de soldad yad ñi ni dey nu gyash gyiꞌ de gasht
nu ricy yu. Nunu de yu nu rnuuz lyucy urbyay yad ñi
ni dey nu gow yu urbyay niñ. Nunu de yu nu rña shily
yadaꞌñ ni dey nu shi̱i̱y ma goꞌy lech ni ma.
\v 8 Cueꞌ nii too der nu ndeꞌ coz nu ya̱ ziꞌl rne̱e̱, gun
niꞌ ziꞌl rniiñ lo leey nu pcaa Ñgyoozh nu bzeeñ Moisees.
\v 9 Gun lo leey nu bzeeñ Moisees rniiñ: “Cueꞌ zuur
gyish ruꞌ toor ornu rza ma lo trig nu cyich ma ñii”,
rniiñ. Rabee nu Ñgyoozh wacsu bich mi nu nac de tor
ziꞌl,
\v 10 sinu nii tub riidz nu rlyuuñ ni den nu lac mod
gyicy na nu losaꞌn. Gun leey ii pcañ par nu gyicy ñi
nu cyiiñ gusht den. Gun de mbecy nu rlaꞌ yu, nu de mbecy
nu rgyich trig, rup laa dey rgyish lo dey nu gad ñuu
cosech niy.
\v 11 Orzeꞌ de̱ ya̱ mnuuz de̱ ñuu coz ni Ñgyoozh lat der.
¿A waruu nap ñi rzii der benu cyish der mas ñuu i̱ de̱?
\v 12 Benu reñaꞌ mbecy rgyish loy nu cyish der iy, zeꞌ
yegar de̱ ya̱ ricy zir ñi presis nu cyish der i̱ de̱.
\p De̱ ya̱ mas ndeꞌ coz seꞌñ nu cyish der i̱ de̱, tees wanne̱e̱
de̱ lo der nu ñgyish der i̱. Sinu gugye̱e̱ de̱ zañ lo coz
par nu cueꞌ ñgyicy zeed de̱ der lat nu pshaal de̱ riidz
ni Crisht.
\v 13 De ru rad lagy der nu de mbecy nu ricy riiñ nañ
yuꞌ nu rca de mbecy Israeel Ñgyoozh, nañ yuꞌ zeꞌ druu
de coz nu row dey. De mbecy nu ricy riiñ lo mez yon
ni Ñgyoozh lo liꞌ ni yuꞌ zeꞌ nu rshu dey reñ bañcyug,
de mbecy zeꞌ yad ñi ni dey nu gow yu de beel bañcyug
nu rbic dey gun lugaar zeꞌ.
\v 14 Niꞌ ziꞌl mod, bicy pee Ñgyoozh par de mbecy nu
rshaal de riidz nu sac nim. Nu nac de riiñ zeꞌ nim, cuic
mbecy nu gow dey.
\v 15 Mas ndeꞌ coz nu seꞌñ, tees ya̱ rila wanne̱e̱ lo der
nu ni gyicy nu der ya̱. Nunu mas na walab nu zeeda̱ gyicy
ii lo der par nu ca̱a̱ der nu ni gyicy nur ya̱. ¡Nap zir
nu gata̱ gyel ran, gazeꞌ nu grusu tub mbecy nu coy gusht
nu ricy cupa̱!
\p
\v 16 Gun par ya̱, ornu rshaala̱ riidz nu sac ni Crisht,
ndeꞌ walab coz nu gyicy le̱ꞌ, gun ndeꞌ coz nu rlagy ñi
par nu gyicy pa̱a̱ nu Ñgyoozh. Gun ¡dzi ga cua̱a̱ benu washaala̱
riidz nu sac nim gal nu rlagy ñi!
\v 17 Benu dub gal rii la lagya̱ nu gyicya̱ ñii, orzeꞌ
gyad i̱. Tees como ndeꞌ walab coz nu rnii to̱o̱ ya̱ ziꞌl,
sinu Ñgyoozh bzeeñ mi riiñ zeꞌ ya̱a̱, orzeꞌ ndeꞌ nu ya̱
wagrish lo̱ nu gyad i̱.
\v 18 Orzeꞌ ¿la ñuu coz gad ne̱ nu nac de riiñ zeꞌ? Coz
nu gad ne̱, ndeꞌ nu shaala̱ riidz nu sac ni Crisht leew
la. Mas yad ñi nu cuic mbecy nu da̱w nu nac nu rshaala̱
de riidz nu sac nim, tees ya̱ wadiña̱ coz nu yad ñi nu
gad ne̱.
\p
\v 19 Gun ni tub la mbecy wac gyicy dey mandaar ya̱, tees
ricya̱ nu naca̱ tub mbecy nu ricy de riiñ nu rlagy dela
mbecy, gun dzi ga cuugya̱ lardoo zigy zir mbecy nu gyicy
cup yu consuel lo Crisht.
\v 20 Lat nu rdeda̱ lat de mbecy Israeel, orzeꞌ ricya̱
mod nu ricy de mbecy Israeel, gun orzeꞌ gad mod nu guugy
lardoo dey. Lat nu rdeda̱ lat de mbecy nu riib ic leey
nu bzeeñ Moisees, niꞌ ziꞌl ricya̱ uba̱ par mbecy nu riib
ic leey zeꞌ, mas walab leey zeꞌ riib ic ñi ya̱, gun dzi
ga gyicya̱ gan guugy lardoo dey.
\v 21 De mbecy nu a̱ꞌ riib ic leey nu bzeeñ Moisees, niꞌ
ziꞌl na yaca̱ gal nu na de mbecy zeꞌ, gun dzi ga guugy
lardoo dey nu gyac yu mbecy ni Crisht. Ni ricya̱ mas
segur la ricy yaca̱ nu de coz nu rlagy Ñgyoozh, gun leey
ni Crisht bi riib ic ñi ya̱.
\v 22 Lat nu rdeda̱ lat de mbecy nu ta ricy, orzeꞌ niꞌ
ziꞌl yaca̱ꞌ gal nu na mbecy nu ta ricy, gun dzi ga gyicya̱
gan nu cuugya̱ lardoo dey. Gal nu na dela de mbecy zeꞌ,
niꞌ ziꞌl na yaca̱, ben a wad mod nu cuugya̱ lardoo la be
dey, gun orzeꞌ gruu mbañ dey.
\v 23 Ricya̱ dela coz zeꞌ par nu nac riidz nu sac ni
Crisht, gun orzeꞌ gyicy Ñgyoozh coz nap num ya̱ nu nac
de riidz zeꞌ.
\p
\v 24 De ru bi neñ der ornu tub nac mbecy rash dey carer,
dela dey rboo loy. Tees tub zi lay drusuy nu ricy yu
gan. Niꞌ ziꞌl mod bicy der nu de coz ni Crisht, gun orzeꞌ
gyicy der gan.
\v 25 Dela de mbecy nu rgyit, rzu lily dey par nu cyit
yu. Ricy paa dey nu dela mod nu rlagy ñi ben a wayicy
dey gan iy. I dey zeꞌ, ndeꞌ tub rued nu ryaa nu lyag
ni tub lo gyee lagyis. Ndeꞌ tub coz nu wagyee les. Tees
de ub na gyicy na coz ni Crisht par nu gyicy na gan
tub in nu rila waded ni.
\v 26 Walab nu wagad lagya̱ ca par rusha̱ ornu drusha̱
carer, sinu drusha̱ carer par zeꞌ nu gyad i̱. Ya̱ na gal
na tub mbecy nu rgyit nu zig. Gun ornu zeeda̱ zig walab
lo bi la zeeda̱ ñii, sinu zeeda̱ñ chañ tub mod par nu gyicya̱
gan gyad i̱.
\v 27 Rcuugya̱ cuerp ne̱, nunu rca̱a̱ ñii por fers la nu
gyicy ñi coz nu rlagya̱. Gun nis nit lo̱ i̱ despuees ornu
bi blyu̱u̱ ni reñaꞌ mbecy.
\c 10
\s Cueꞌ griib zily mbecy nab
\p
\v 1 Der bicy na, rlagya̱ nu gyezaꞌ lagy der de coz nu
bzac de gyitoo bel ne̱ de̱. Ñgyoozh gusa num dey lat tub
nac za, nunu dela dey bded nap yu lo nisyudoo ña.
\v 2 Orzeꞌ nu nac nu gusa dey lat za zeꞌ, nunu bded dey
lo nisyudoo zeꞌ, orzeꞌ byac dey mbecy nu bzuub gyidag
ni Moisees, gal nu byacaꞌ de ub na mbecy nu zuub gyidag
ni Jesuuz ornu bzu nis den.
\v 3 Dela dey bdow yu coz nu bruu lo Ñgyoozh.
\v 4 Nunu goꞌ dey nis nu briic Ñgyoozh ornu Moisees
pshet yu yangay ich gyitaꞌ. Tees walab Moisees bicy
yu nu bruu nis zeꞌ lo gyitaꞌ, sinu Crisht bicy mi nu
bruuñ, gun mi zeꞌ gusa num dey.
\v 5 Mas ni, tees zigy dey wangyet lagy Ñgyoozh mod nu
bicy dey. Orzeꞌ ndeꞌ nu gut dey lugaar ub zi zeꞌ nu
gusa dey zeꞌ.
\p
\v 6 De coz nu guc zeꞌ, ndeꞌ cyiiñ ñi par nu lyuuñ ni
de ub na nu cueꞌ galagy na gyicy na coz cyi gal nu bicy
de gyitoo bel ne̱ de̱.
\v 7 Nunu cueꞌ griib zily den nab gal nu bicy la be
de mbecy lat de yu zeꞌ. Gun lat riidz nu bzeeñ Ñgyoozh
rniiñ: “De mbecy gucua dey row yu gyit. Gazeꞌ nu wes
su dey nu rulgyiꞌy lo nab”, rniiñ.
\v 8 Nunu cueꞌ gyicy den cyi nu losaꞌn nu wanchelaan
gal nu bicy la be mbecy lat de yu zeꞌ. Orzeꞌ nañ tub
dzi ziꞌl gut gal zu chon miily de yu nu bicy de cyi
zeꞌ.
\v 9 Nunu cueꞌ gyicy den preb Ñgyoozh, Shuaan na, gal
nu bicy la be de gyitoo bel ne̱ de̱. Orzeꞌ gut dey nu
nac nu bducuaꞌ bily yu.
\v 10 Ni cueꞌ nii zi den ni Ñgyoozh gal nu bicy la be
de gyitoo bel ne̱ de̱. Orzeꞌ tub anc nu la Anc nu Rbic
Cashtig ni Ñgyoozh biit yu dey.
\p
\v 11 Dela coz nu bzac de gyitoo bel ne̱ de̱ gulas, ndeꞌ
par nu gad lagy mbecy nu gyicy cuidad dey ub yu. Nunu
dela ndeꞌ pcañ lat de riidz nu bzeeñ Ñgyoozh par nu
gad lagy den lac mod chuꞌn tiem na. Nunu na sñuu ga
shuub dzi nu gyaꞌ lo dela coz.
\v 12 Orzeꞌ ndeꞌ nu de mbecy nu rzii nu dzi fert ricy
cup consuel lo Crisht, rlagy ñi nu gyicy cuidad dey ub
yu nis gyicy cyi gan dey.
\v 13 Dela de coz deet nu rzac den, ndeꞌ coz nu rzac
deꞌ zir de mbecy. Tees Ñgyoozh ricy paam nu de ub na.
Orzeꞌ mi zeꞌ wazaan mi nu gzac zi den ni de coz gashtal
wagagyee gaꞌ la den de coz ily nu yad, sinu tiem nu gzac
deet den, orzeꞌ Ñgyoozh locyuub mi de ub na nu gad tub
mod nu gyicy den gan.
\p
\v 14 Orzeꞌ der bicya̱ nu dzi rca̱, rila cueꞌ griib zily
der nab.
\v 15 Ya̱ rne̱e̱ lo der gal nu rne̱e̱ lo de mbecy nu yet
lag cuen. Orzeꞌ gush der shcab ni de coz nu rne̱e̱ ben
a rishli.
\v 16 Despuees ornu dric den gras ni Ñgyoozh, orzeꞌ rdoꞌn
ñup ni urbyay mod nu bzeeñ Jesucrisht. Orzeꞌ ral den
gyel nap ni nu pshu reñ mi lo cruuz. Nunu ornu rdow
den gyishtily mod nu bzeeñ mi, orzeꞌ ral den gyel nap
ni cuerp nim.
\v 17 Mas zigy den nac naa, tees dela den rdow na laab
tub ziꞌl gyishtily zeꞌ. Orzeꞌ lo dela den tub zin nac
naa.
\p
\v 18 Güii der la ricy de mbecy Israeel. Row dey de
gun nu rbic mbecy lo Ñgyoozh. Nunu ornu ni ricy dey,
orzeꞌ ral dey gyel nap nu druu lo gun zeꞌ.
\v 19 Walab nu rne̱e̱ nu nab, ndeꞌ coz nu cyiiñ. Nunu walab
nu rne̱e̱ nu beel nu gua lo nab, ndeꞌ cyiiñ ñi.
\v 20 Sinu rlagya̱ ne̱e̱ nu de gun nu rbic mbecy lo nab,
ndeꞌ walab lo Ñgyoozh rbic dey ñi sinu lo nuras. Nunu
ya̱ walagya̱ gal der coz nu druu lo nuras.
\v 21 Wac gal der gyel nap nu druu lo Shuaan den ornu
row der gyishtily mod nu bzeeñ mi, benu laab tiem zeꞌ
galaꞌ der coz nu druu lo nuras. Nunu wac gal der gyel
nap ornu roꞌ der ñup ni urbyay mod nu bzeeñ mi, benu
laab tiem zeꞌ galaꞌ der coz nu druu lo nuras.
\p
\v 22 ¿Uti rlagy der gyicy den nu gasaap lagy Shuaan
den? ¿Uti rzii der nu fert zir de ub na gazeꞌ ub mi?
\s Rlagy ñi chuꞌ de mbecy ni Crisht mod nu gabe nu nap
\p
\v 23 Yuꞌ mbecy rniiy: “Gac gyicya̱ la ziꞌl coz nu yad
ica̱”, rniiy. Rishli rniiy tees walab dela coz cyiiñ
ñi ni den. Gac gyicy den la ziꞌl coz tees walab dela
coz locyuub ñi nu gyanap den.
\v 24 Rlagy ñi yub den mod nu nap zir par deꞌ zir mbecy.
Cueꞌ mod nu nap par ub ziꞌl den.
\p
\v 25 Gac gow der la ziꞌl coz nu rut mbecy zeꞌ nu rsaꞌy
de beel. Nunu walagy ñi nu cugyiꞌ der lo de mbecy nu
rut beel zeꞌ par nu rdzib der nu gad beel nu gua lo
nab.
\v 26 Gun gyishlombecy, gal nu dela coz nu yuꞌ lo yu
ii, dela ndeꞌ coz ni Ñgyoozh.
\p
\v 27 Benu tub mbecy nu walab mbecy ni Crisht cuedz
yu der nu gow nu der yu gyit, zeꞌ benu shet ic der gow
nur yu, orzeꞌ gow laa der la ziꞌl coz nu gzuy lo der.
Walagy ñi nu cugyiꞌ der loy nu nac nu rdzib der nu gow
ru coz nu gua lo nab.
\v 28 Tees benu tub mbecy niiy lo der: “Nii beel nu
gua lo nab”, niiy, orzeꞌ cueꞌ gow der ñii, gun cueꞌ nu
gyicy ras nu der yu, nunu cueꞌ nu gyicy der nu gnu shcab
niy.
\v 29 Walab de ru gnu shcab nir, gun de ru rad lagy ru
nu beel nu gua lo nab se la la gyicy ñi. Sinu gnu shcab
ni mbecy zeꞌ, gun yu zeꞌ wagad lagy yu.
\p Tees yuꞌ mbecy rniiy: “¿Lagu nu nac nu dzi ta ricy
reñaꞌ mbecy wac gyicya̱ la ziꞌl coz nu yad ica̱?
\v 30 ¿Lagu rnii zi mbecy ne̱ ornu rda̱w la coz, zeꞌ benu
drica̱ gras ni Ñgyoozh nu nac ñii?” rnii dey.
\v 31 La ziꞌl coz nu gyicy der, nu gow der o nu goꞌ der
o la ziꞌl coz nu gyicy der, bicy der mod nu gyabic mbecy
gyel mbecy ni Ñgyoozh.
\v 32 Cueꞌ cuic der mod nu chuꞌ gyel deet lat ni tub
la mbecy: ni lat de mbecy Israeel, ni lat de mbecy nu
walab mbecy Israeel, ni lat de mbecy ni Crisht.
\v 33 Niꞌ ziꞌl ya̱ ricya̱ tub mod nu gyedzuꞌ lagy dela
mbecy. A̱ꞌ yuba̱ mod nu gyedzuꞌ lagy ub ziꞌla̱, sinu ryuba̱
mod nu nap par nu gyedzuꞌ lagy deꞌ zir mbecy, ben a wayicy
cup dey consuel lo Crisht. Orzeꞌ gruu mbañ dey.
\c 11
\p
\v 1 Bicy der mod nu ya̱ ricya̱, gal nu ya̱ ricya̱ mod nu
ricy Crisht.
\s Mod nu zu biñ mñaa lat de mbecy zigy
\p
\v 2 Der bicy na, ya̱ rne̱e̱ lo der nu tonaꞌ la nap ricy
der, gun dub laa tiem ca ic der ya̱, nunu ricy paa der
nu de leey nu yuꞌ lat dela mbecy ni Crisht nu blyu̱u̱
ni der.
\v 3 Tees rlagya̱ gad lagy der nu Crisht riib ic mi dela
yu gyeey, nunu de yu gyeey riib ic dey mñaay, gal nu Ñgyoozh
riib ic mi Crisht.
\v 4 Orzeꞌ benu tub yu gyeey washet yu shimbely yu ornu
rnii nuy Ñgyoozh lat de mbecy zigy o ornu rshaal yu
riidz nim lat de mbecy zigy, orzeꞌ shiñ ricy nuy Crisht
nu waca lagy yu lom.
\v 5 Zeꞌ de biñ mñaa, ornu rnii num Ñgyoozh lat de mbecy
zigy o ornu rshaal dem riidz nim, benu a̱ꞌ noow toom, orzeꞌ
shiñ ricy num ñgyeem. Gun gal gaa la biñ mñaa nu a̱ꞌ
noow too nu biñ mñaa nu rshiꞌñ yagy too.
\v 6 Benu biñ mñaa walagy mi nu soow mi toom, orzeꞌ shiꞌñ
mi gyich ic mi. Como ndeꞌ coz toꞌ lo nu shiꞌñ mi gyich
ic mi o nu shiꞌñ yagy mi toom, orzeꞌ nap zir nu soow
mi toom.
\v 7 De yu gyeey walagy ñi nu soow dey tooy, gun gal
nu na Ñgyoozh, ni na dey, nunu yu gyeey, yu zeꞌ rlyu nu
gyel lily ni Ñgyoozh. Zeꞌ biñ mñaa, mi zeꞌ rlyu nu gyel
lily ni yu gyeey.
\v 8 Gun Ñgyoozh, ornu psaꞌ lagy mi yu gyeey, walab nu
biñ mñaa psaꞌ lagy mi yu. Sinu ornu psaꞌ lagy mi biñ
mñaa, nu yu gyeey psaꞌ lagy mi biñ mñaa zeꞌ.
\v 9 Nunu Ñgyoozh wansaꞌ lagy mi yu gyeey par nu nac
biñ mñaa, sinu psaꞌ lagy mi biñ mñaa par nu nac yu gyeey.
\v 10 Ndeꞌ nu de biñ mñaa rlagy ñi nu soow dem toom:
par nu gabe nu ñgyeem riib ic yum. Nunu rlagy ñi nu
soow dem toom par ornu zac de anc.
\v 11 Tees par mod nu psaꞌ lagy Ñgyoozh, yu gyeey sac
yu gyishlombecy ii benu walab nu nac biñ mñaa. Nunu
niꞌ ziꞌl biñ mñaa sac mi gyishlombecy ii benu walab
nu nac yu gyeey.
\v 12 Gun rishli Ñgyoozh psaꞌ lagy mi biñ mñaa nu nac
yu gyeey, tees rishli yu gyeey ral yu nu nac biñ mñaa.
Tees delañ nac ñii coz nu bruu lo Ñgyoozh.
\p
\v 13 Gush der shcab ben a seꞌñ nu a̱ꞌ noow too de biñ
mñaa ornu rnii num Ñgyoozh lat de mbecy zigy.
\v 14 ¿A walab nil bi rad lagy la den nu shiñ na benu
tuñ gyich too de yu gyeey?
\v 15 Tees par de biñ mñaa, ndeꞌ tub coz nu cyit na nu
tuñ gyich too dem, gun taꞌñ par nu soow ñi toom.
\v 16 Tees benu ca na mbecy rlagy yu tub suy riidz nu
nac de coz nu mne̱e̱, orzeꞌ rlagy ñi nu gad lagy yu nu
de̱ ya̱ gal nu deꞌ zir de mbecy ni Crisht a̱ꞌ ricy cup
den reñaꞌ cushtom.
\s Nu gow dey gyishtily mod nu bzeeñ Jesuuz
\p
\v 17 Tees de coz nu ne̱e̱ lo der na, nii walab nu ne̱e̱
nu nap ricy der. Gun ornu ryatublaazh der, lugaar nu
nap gyicy der ca nu shiñ ricy der.
\v 18 Nu loga la, mnii dey lo̱ nu ornu yatublaazh der,
reñ ga la shcab ricy cup tub nac ga der. Nunu rzeña
lagya̱ ñuu ga nu coz rishli de ndeꞌ.
\v 19 ¡Segur la yuꞌ mbecy lat der nu rtub su dey losaꞌy,
gun orzeꞌ gabe nu ca na der rishli ricy paar!
\v 20 Nu nac nu reñ ga la na shcab zu tub nac ga der,
ornu ryatublaazh der, orzeꞌ ndeꞌ walab mod nu bzeeñ Shuaan
den nu gow der gyishtily.
\v 21 Gun ornu ryap or nu row der gyit, tub ga la der
row ru nir. Yuꞌ mbecy ran yu, como wagad sheñ nu gow
yu. Zeꞌ yuꞌ gaꞌ dey gashtal rzugy lay ricy ñi.
\v 22 ¿Walab gaal sac yuꞌ der, zeꞌ nu row der gyit nunu
zeꞌ nu roꞌ der nis? ¿Uti rlagy der gyicy ras nur de
bicy ru nu nac Ñgyoozh, nunu rlagy der gyicy ru nu gat
lo de mbecy zi nu sac ni? ¿La coz ne̱e̱ ni der na? ¿A
ne̱e̱ nu dzi nap ricy der? ¡Ndeꞌ gaal rila wane̱e̱ ga̱ꞌ ni
der nu nac nu ni ricy der!
\s Lac mod gow dey gyishtily mod nu bzeeñ Jesuuz
\p
\v 23 Gun Shuaan den mniim lo̱ de coz nu blyu̱u̱ ni der.
Coz zeꞌ, ndeꞌ Shuaan den Jesuuz, laab rel nu bish cya
Judas ich mi, pshet yaam tub gyishtily.
\v 24 Orzeꞌ briic mi gras ni Ñgyoozh. Gazeꞌ nu blew
mi ñii. Orzeꞌ nam: “Nii cuerp ne̱ nu rica̱ nu gat par
nu gruu mbañ der. I mod gyicy der par nu gyezaꞌ lagy
der ya̱”, nam.
\v 25 Na ornu blazh bicy num dey che zeꞌ, orzeꞌ niꞌ ziꞌl
mod, pshet yaam tub bas ñup urbyay. Orzeꞌ nam: “Nii
tub trat cub nu gyicy Ñgyoozh nu de mbecy nu nac nu
shu reña̱. De tir la ornu goꞌ der ñup ii, orzeꞌ ni gyicy
der par nu gyezaꞌ lagy der ya̱”, nam.
\v 26 Ni bicy der gashtal shuub la dzi nu cyid Shuaan
den tuubaꞌ tir. Ornu gow der gyishtily zeꞌ, nunu ornu
goꞌ der ñup zeꞌ, orzeꞌ gyezaꞌ lagy der nu gut mi lo cruuz
par nu nac de ru.
\p
\v 27 Ndeꞌ nu, benu ca na mbecy gow yu gyishtily mod
nu walab seꞌñ, ornu gow yu mod nu bzeeñ Shuaan den, o
nu goꞌy ñup urbyay nu niꞌ walab mod nu seꞌñ, ornu goꞌy
mod nu bzeeñ mi, orzeꞌ ndeꞌ cyi na; gun wanca lagy yu
lo cuerp nim, ni wanca lagy yu lo reñ mi.
\v 28 Orzeꞌ tub ga la mbecy rlagy ñi nu gash dey shcab
ben lac mod na dey. Gazeꞌ nu gow dey gyishtily zeꞌ, nunu
goꞌ dey ñup zeꞌ.
\v 29 Gun benu wayicy cuen dey lac gyicy nuy cuerp ni
Shuaan den ornu gow dey gyishtily, nunu ornu goꞌ dey
ñup mod nu bzeeñ mi, orzeꞌ Ñgyoozh cuic mi cashtig ni
dey.
\v 30 Ndeꞌ nu yuꞌ mbecy rat lat der, nunu ndeꞌ nu yuꞌ
mbecy a̱ꞌ fert lat der, nunu yuꞌ dey bi gut yu.
\v 31 Tees benu rush den shcab ben lac mbecy nan, orzeꞌ
wabic Ñgyoozh cashtig ni den.
\v 32 Tees ornu dri bee Shuaan den nin, orzeꞌ rbic mi
cashtig ni den par nu gyanap na, gun orzeꞌ waniim nu
yuꞌ cyi den ornu laab ndeꞌ la gri beem ni de mbecy ni
gyishlombecy.
\p
\v 33 Orzeꞌ der bicy na, ornu gyatublaazh der nu gow
ru mod nu bzeeñ Shuaan den, orzeꞌ cuez losaꞌ der par
nu gow der tublaazh la.
\v 34 Benu yuꞌ mbecy ran yu, rlagy ñi gow laay gyit yuꞌy
anzir nu gyatublaazh der, gun orzeꞌ wabic Ñgyoozh cashtig
niy par nu nac mod nu yatublaazh der. Zeꞌ deꞌ zir asunt,
ya̱ ne̱e̱ lac mod gyicy der ornu yapa̱.
\c 12
\s Mod nu ricy Espiriit Yon ni Ñgyoozh nu tub ga mbecy ni Crisht
\p
\v 1 Der bicy na, ya̱ do̱o̱ rishlo der nu lac na coz nu
rbic Espiriit Yon ni tub ga la der. Walagya̱ nu gac der
mbecy nu wagad lagy.
\p
\v 2 De ru rad lagy der nu anzir nu gyicy cup der consuel
lo Crisht, mas lac ruu tees dzi radza der nu nac de nab
gop nu wagac nii.
\v 3 Tees na wagadza gaꞌ der, benu rad lagy der nu ni
tub la mbecy wac nii dey riidz nu rbic Espiriit Yon
benu zaa lagy dey ni Jesuuz, nunu ni tub la mbecy wac
niiy: “Jesuuz nac mi Shuaan na”, niiy, benu walab lo
Espiriit Yon druu de riidz zeꞌ.
\p
\v 4 Reñ ga la mod cyiiñ tub ga la mbecy nu gyicy yu,
tees laab tub ziꞌl Espiriit Yon ricy mi ñii.
\v 5 Reñ ga la mod ricy tub ga mbecy ornu ricy yu coz
nu rlagy Ñgyoozh, tees laab tub ziꞌl Shuaan den Jesucrisht
riib ic mi delañ.
\v 6 Zañ lo mod ricy Ñgyoozh num tub ga la mbecy, tees
laab tub ziꞌl mi ricy mi delañ.
\v 7 Ñgyoozh bicy mi nu locyuub Espiriit Yon nim tub
ga la mbecy, gun orzeꞌ locyuub yu dela losaꞌy.
\v 8 Espiriit Yon rbic mi shcab ni tub mbecy par nu
cuic yu consef ni losaꞌy. Zeꞌ tuubaꞌ mbecy, laab mi zeꞌ
rbic mi shcab niy par nu shaal yu de riidz ni Ñgyoozh
nu dzi nap rad lagy yu.
\v 9 Tuubaꞌ mbecy, laab mi zeꞌ ricy mi nu tonaꞌ la nap
ricy cup yu consuel lo Crisht. Zeꞌ tuubaꞌ mbecy, laab
ub lam ricy mi nu cyiiñ yu gyicy yac yu mbecy rat.
\v 10 Zeꞌ tuubaꞌy ricy mi nu cyiiñ yu gyicy yu nusuriidz.
Zeꞌ tuubaꞌy ricy mi nu cyiiñ yu nu shaal yu riidz nu
druu lo Ñgyoozh lo de mbecy. Zeꞌ tuubaꞌy ricy mi nu
cyiiñ yu nu gad lagy yu ti coz ni nuras, ti coz ni Espiriit
Yon. Tuubaꞌy ricy mi nu gac niiy nu riidz nu rnii reñaꞌ
mbecy. Zeꞌ tuubaꞌy ricy mi nu cyiiñ yu shaal yu riidz
zeꞌ.
\v 11 Tees laab tub ziꞌl Espiriit Yon ricy mi dela ndeꞌ.
Ricy mi nu cyiiñ tub ga lo mbecy nu gyicy yu reñ ga
la mod gal nu ub mi rlagy mi.
\s Tub zily la nac dela lugaar ni cuerp
\p
\v 12 Gun de mbecy ni Crisht na dey gal nu na tub zi
cuerp nu ricy cup zañ lugaar. Mas ricy cup ñi zañ lugaar
niñ tees nac ñii tub zi cuerp.
\v 13 Niꞌ ziꞌl mod na de ub na. Lat den yuꞌ mbecy Israeel.
Nunu yuꞌ mbecy nu walab mbecy Israeel. Yuꞌ gaꞌ mbecy
nu nac yu moz ni losaꞌy por fers la. Yuꞌ gaꞌ mbecy nu
nac yu patro̱o̱ ni dey. Tees Espiriit Yon bicy mi nu byac
dela den stub zi cuerp ornu wi nis den. Nunu Ñgyoozh
bzeed mi tub zi Espiriit Yon nu nac num den.
\p
\v 14 Gun tub cuerp walab tub ziꞌl lugaar ricy cup ñi
sinu zañ lugaar ricy cup ñi.
\v 15 Benu tub gyiꞌn niiñ: “Ya̱ a̱ꞌ naca̱ ni cuerp, gun
walab yaa naca̱”, niiñ. Mas ni niiñ tees nac ñii tub
lugaar ni cuerp.
\v 16 Nunu benu tub gyidag na niiñ: “Ya̱ a̱ꞌ naca̱ ni
cuerp, gun walab urlo naca̱”, niiñ. Mas ni niiñ tees nac
ñii tub lugaar ni cuerp.
\v 17 Benu tub cuerp nac ñii du ub urlo ziꞌl, orzeꞌ ¿lac
mod par nu gyeñ na? Nunu benu tub cuerp nin du ub gyidag
ziꞌl nac ñii, orzeꞌ ¿lac mod par nu chuꞌ gyidiꞌñ na?
\v 18 Tees na den gal nu na de lugaar ni cuerp. Nunu
gal nu bzu Ñgyoozh de zañ lugaar ni cuerp, ni ziꞌl bicy
mi nu gyicy tub ga la de ub na mod nu rlagy mi.
\v 19 Benu dela den tub ziꞌl lugaar ni cuerp nac naa,
orzeꞌ wacyiiñ cuerp nin.
\v 20 Tees cuerp ni den rishli, ricy cup ñi zañ lugaar
niñ, tees tub zi cuerp nac ñii.
\p
\v 21 Orzeꞌ tub urlon wac niiñ gab ñii yaan: “Ru se
la la cyiiñ ru ne̱”, niiñ. Nunu toon wac niiñ gab ñii
gyiꞌn: “Ru se la la cyiiñ ru ne̱”, niiñ.
\v 22 Tees de mod la, dela lugaar ni cuerp ni den nu
rlyu nu walab lugaar nu ricy ñi presis, de lugaar zeꞌ
dzi zir cyiiñ ñi ni den.
\v 23 De lugaar nu a̱ꞌ ricy ñi presis, ndeꞌ tonaꞌ la cuidad
ricy dun ñi, nunu de lugaar ngach ni cuerp nu cuidadaꞌ
zir ricy dun ñi.
\v 24 Zeꞌ de lugaar nu rabee, walagy ñi nu cuidad gyicy
nu den ñi. Ñgyoozh bicy mi nu dela lugaar nu a̱ꞌ ricy
ñi presis ni cuerp ni den, ndeꞌ dzi zir cuidad ricy den
nu lugaar zeꞌ.
\v 25 Gun orzeꞌ cueꞌ nu laꞌ losaꞌ de lugaar zeꞌ. Sinu
delañ gzuñ altant nu nac de losaꞌñ.
\v 26 Benu rzac zi tub lugaar ni cuerp ni den, orzeꞌ
gur zu lagy dutuub la cuerp ni den. Benu tub lugaar
ni cuerp ni den nap rzac ñi, orzeꞌ niꞌ ziꞌl nap zu lagy
dela lugaar ni cuerp ni den.
\p
\v 27 Na dela den na den gal nu na cuerp ni Crisht, nunu
tub ga la den nac naa tub ga lugaar ni cuerp nim.
\v 28 Lat de mbecy ni Crisht, Ñgyoozh bzum tub ga la
dey nu lugaar niy. Nu loga la yuꞌ mbecy nu zuy riiñ
nu nac yu aposht. Nu cyup yuꞌ mbecy zuy riiñ nu nac
yu yu nu rnii riidz nu druu lo Ñgyoozh. Nu chon yuꞌ
mbecy zuy riiñ nu rlyuuy de coz ni Crisht. Orzeꞌ despuees
yuꞌ mbecy zuy riiñ nu ricy yu nusuriidz. Nunu yuꞌ gaꞌ
mbecy nu ricy guñaa. Orzeꞌ yuꞌ gaꞌ mbecy nu rlocyuub
losaꞌ. Orzeꞌ yuꞌ gaꞌ mbecy nu riib ic de riiñ nu ricy
mbecy lat der. Orzeꞌ yuꞌ gaꞌ mbecy nu rnii nu riidz
reñaꞌ mbecy.
\v 29 Walab dela mbecy nac yu aposht. Walab dela dey
nac yu mbecy nu rnii de riidz nu druu lo Ñgyoozh. Walab
dela dey ricy yu nusuriidz.
\v 30 Walab dela dey ricy yu guñaa nu nac Espiriit Yon
ni Ñgyoozh. Walab dela dey rniiy nu riidz reñaꞌ mbecy.
Walab dela dey gac shaal yu de riidz zeꞌ.
\v 31 Bicy der nu gad tub riiñ nu ricy ñi presis nu
gac der. Tees mod nu nap zir par dela deꞌ zir ñi, ndeꞌ
riidz nu ne̱e̱ lo der na.
\c 13
\s Nu ca mbecy losaꞌy
\p
\v 1 Mas Espiriit Yon ni Ñgyoozh shaal mi shcab ne̱ nu
ne̱e̱ riidz reñ ga la de mbecy, nunu mas shaal mi shcab
ne̱ nu ne̱e̱ riidz de anc, tees de riidz nu ne̱e̱ zeꞌ se la
la sac ñi benu waca̱ losa̱ꞌ. De riidz nu ne̱e̱ nañ gal nu
na tub nu rzigy gyid o tub nu rzigy plati.
\v 2 Mas cyiiña̱ shaala̱ riidz nu druu lo Ñgyoozh, mas
rad lagya̱ dela coz, mas gyet laga̱ cuen dela coz biigy
ni Ñgyoozh, mas tonaꞌ la ricy cupa̱ consuel lo Ñgyoozh,
gashtal gac gyicya̱ nu cha̱a̱ seꞌ tub bicy, tees benu waca̱
losa̱ꞌ, orzeꞌ se la la saca̱.
\v 3 Mas rica̱ dela coz ne̱ ni de mbecy zi, nunu mas zaana̱
caa dey gyi cuerp ne̱ par nu nac Crisht, se la la cyiiña̱
benu waca̱ losa̱ꞌ.
\p
\v 4 Benu rca den losaꞌn, orzeꞌ gyicy cup den pase̱z dun
dey, nunu nap gyicy dun dey. Benu rca den losaꞌn, orzeꞌ
rila wayicy saap lagy den ich yu, ni wayabic den gyel
mbecy ni de ub na. Ni a̱ꞌ nac den mbecy leꞌ.
\v 5 Benu rca den losaꞌn, orzeꞌ wayicy ñgya den loy;
ni wazu fert den nu nac coz nu rlagy ub ziꞌl na; ni
wachaꞌ ic den. Benu rca den losaꞌn, orzeꞌ ni wayezaꞌ
lagy den loy ornu shiñ ricy nuy ub na.
\v 6 Benu rca den losaꞌn, orzeꞌ wagyet lagy den ornu
shiñ ricy nu mbecy dey, sinu gyet lagy den ornu gyicy
de mbecy mod nu seꞌñ.
\v 7 Benu rca den losaꞌn, orzeꞌ gagye la den la ziꞌl
mod nu nay. Segur la gyicy cup den consuel loy, nunu
rishlo den loy nu gyicy yu gan, nunu gyicy cup den pase̱z
niy.
\p
\v 8 Nu rca den losaꞌn, rila wayecañ. Shuub dzi nu walagyaꞌñ
nu shaal den riidz ni Ñgyoozh; ni walagyaꞌñ nu gyicy
mi nu nii den riidz reñaꞌ mbecy, ni walagyaꞌñ nu gyicy
mi nu gad lagy den lac yaruu de coz.
\v 9 Gun Ñgyoozh ricy mi nu ñuu ga ziꞌl yet lag den
cuen, nunu ricy mi nu ñuu ga zi rcyiiñ den nu shaal na
riidz nu druu lom.
\v 10 Tees ornu shuub dzi nu gyanap den, ornu cyid Crisht
tuubaꞌ tir, orzeꞌ nap zir gad lagy den dela coz.
\p
\v 11 Ornu gumiiña̱, mne̱e̱ mod nu rnii yu nguzh miꞌ, nunu
guze̱e̱ gal nu rzii yu nguzh miꞌ, nunu brusha̱ shcab gal
nu rash yu nguzh miꞌ shcab. Tees na bi guusha̱. Orzeꞌ
walagyaꞌñ nu gyicya̱ mod nu ricy yu nguzh miꞌ.
\v 12 Na wagyet lag nap den cuen de coz ni Ñgyoozh.
Rad lagy den gal nu rabee lo tub guan nu dzeeñ dzeeñ
ziꞌl rabee loñ. Tees par lo se mbi la gabe dela coz,
gun lo nu loo la zac den mi. Orzeꞌ gad lagy den gal
nu rad lagy Ñgyoozh de coz nu yuꞌ nañ lardoon.
\p
\v 13 Tiem zeꞌ chon coz nu ni ziꞌl gyicy den: nu gyicy
cup den consuel lo Ñgyoozh, nunu rishlo den lom, nunu
ca den losaꞌn. Tees coz nu ricy zir ñi presis lo chon
coz zeꞌ, ndeꞌ nu ca den losaꞌn.
\c 14
\s De yu nu rnii riidz reñaꞌ mbecy
\p
\v 1 Bicy der nu car losaꞌr. Bdiiñ der lo Ñgyoozh nu
gyicy mi nu cyiiñ der nu gyicy ru riiñ nim nunu ricy
zir ñi presis nu cyiñ der riiñ nu gac gnii der de riidz
nu druu lom.
\v 2 Gun de mbecy nu rnii riidz reñaꞌ mbecy, walab lo
mbecy rniiy ñi, sinu lo Ñgyoozh, gun de mbecy rila wagyet
lag dey cuen de riidz nu rniiy. De riidz nu rnii de
mbecy zeꞌ, ndeꞌ rniiy ñi por nu nac Espiriit Yon ni Ñgyoozh,
tees dela riidz nu rniiy zeꞌ, ndeꞌ riidz nu wagyeñ dey.
\v 3 Tees de mbecy nu rshaal riidz nu druu lo Ñgyoozh
laab nu riidz yu, de yu zeꞌ, rniiy ñi lo dela mbecy par
nu locyuub yu dey, nunu rbic yu baloor ni dey, nunu rbic
yu consuel ni dey.
\v 4 Zeꞌ de mbecy nu rnii riidz reñaꞌ mbecy, de mbecy
zeꞌ laab ub ziꞌl yu rlocyuub yu. Tees de mbecy nu rshaal
riidz nu druu lo Ñgyoozh, de yu zeꞌ rlocyuub yu dela
de mbecy ni Crisht.
\p
\v 5 Yet lagya̱ benu dela der niir nu riidz reñaꞌ mbecy,
tees gyet zir lagya̱ benu dela der cyiiñ ru nu shaal
ru riidz nu druu lo Ñgyoozh. Gun dzi zir sac de mbecy
nu rnii riidz nu druu lo Ñgyoozh gazeꞌ de mbecy nu rnii
riidz reñaꞌ mbecy. Nomaas benu grusu tub mbecy nu shaal
de riidz reñaꞌ mbecy zeꞌ, gazeꞌ nu sac ñi, gun orzeꞌ locyuub
yu dela mbecy ni Crisht.
\v 6 Ndeꞌ nu der bicy na, ¿la cyiiña̱ yapa̱ lo der benu
ne̱e̱ nu riidz reñaꞌ mbecy? Orzeꞌ se la la cyiiña̱. Tees
benu shaala̱ lo der tub riidz nu briic Ñgyoozh nu ne̱e̱,
o benu ne̱e̱ lo der tub coz nu rlagy ñi nu gad lagy der,
o benu shaala̱ lo der tub riidz nu druu lo Ñgyoozh, o
benu lyu̱u̱ ni der tub coz ni Ñgyoozh, benu ni gyicya̱, orzeꞌ
cyiiña̱ ni der.
\p
\v 7 ¿A wacuꞌ cuen der de gyiib ni musiic? Tub bdzi
o tub arpa, mas walab nu mbañ ñii, tees benu a̱ꞌ nap rsiigy
dey ñi, orzeꞌ wad lagy den la di rbooñ, gun a̱ꞌ nap rsiigy
dey ñi.
\v 8 Niꞌ ziꞌl ornu rzuꞌ gyel yuu. Benu mbecy nu rlaa
trompet a̱ꞌ nap rlaay ñi, orzeꞌ wazu lily de soldad par
nu chucooy.
\v 9 Niꞌ ziꞌl mod wagyet lag mbecy cuen de coz nu gnii
de ru, benu nii der nu riidz reñaꞌ mbecy. Orzeꞌ ndeꞌ
nañ gal nu na nu lo bi la gnii der ñii.
\v 10 Zañ lo riidz yuꞌñ gyishlombecy, nunu segur la yuꞌ
mbecy nu gyet lag yu cuen tub lo ga de riidz zeꞌ.
\v 11 Benu ya̱ wagyet laga̱ cuen de riidz nu rnii tub
mbecy, orzeꞌ mbecy zeꞌ nay gal nu na tub mbecy nu walab
losa̱ꞌ, nunu ya̱ na gal nu na tub mbecy nu walab losaꞌ
yu zeꞌ.
\v 12 Como rlagy der cyiiñ ru nu gyicy ru riiñ nu rbic
Espiriit Yon ni Ñgyoozh, ndeꞌ nu ricy zir ñi presis nu
gyicy der fers nu gyicy ru riiñ par nu locyuub ru de
mbecy ni Crisht.
\p
\v 13 Orzeꞌ de yu nu rnii riidz reñaꞌ mbecy, rlagy ñi
nu cyiñ dey lo Ñgyoozh nu gyicy mi nu cyiiñ dey shaal
yu de riidz zeꞌ.
\v 14 Gun benu ya̱ ne̱e̱ du̱ Ñgyoozh nu riidz reñaꞌ mbecy,
orzeꞌ ne̱e̱ du̱m nañ lardo̱o̱ ziꞌla̱. Tees shcab ne̱ wagad
lagy ñi la coz rne̱e̱.
\v 15 Orzeꞌ ¿la coz gyicya̱? Ornu rne̱e̱ du̱ Ñgyoozh, rne̱e̱
coz nu druu nañ lardo̱o̱, tees niꞌ ziꞌl rne̱e̱ de coz nu
yet laga̱ cuen. Ornu rdula̱, rdula̱ nu dutuub la lardo̱o̱,
tees niꞌ ziꞌl rdula̱ de coz nu yet laga̱ cuen.
\v 16 Ornu rbic der gras ni Ñgyoozh nu riidz reñaꞌ mbecy,
orzeꞌ ¿lac mod nii deꞌ zir de mbecy: “Laab ni”, nii
dey? Zeꞌ ii wangyet lag dey cuen coz nu rnii der.
\v 17 Mas tonaꞌ la cyit za de riidz nu rnii der, tees
rila walocyuub ñi deꞌ zir losaꞌ der.
\v 18 Ya̱ drica̱ gras ni Ñgyoozh, gun ya̱ dzi zir rne̱e̱ nu
riidz reñaꞌ mbecy gazeꞌ deꞌ zir de ru.
\v 19 Tees lat de mbecy ni Crisht, yet zir lagya̱ nu lyu̱u̱
gaay zi riidz nu gyet lag dey cuen gazeꞌ nu ne̱e̱ tii
miily riidz reñaꞌ mbecy nu wagyet lag dey cuen.
\p
\v 20 Der bicy na, cueꞌ gash der shcab mod nu rash de
yu nguzh miꞌ. Bicy der mod nu ricy de yu nguzh miꞌ nu
wagyicy yu coz a̱ꞌ nap. Tees ornu gash der shcab, bicy
der mod nu ricy mbecy gush.
\v 21 Gun lat de riidz nu bzeeñ Ñgyoozh mniim lac gyicy
num de mbecy Israeel. Orzeꞌ nam: “Gne̱e̱ lo de mbecy
Israeel nu nac mbecy nu rnii reñaꞌ riidz, nunu nu nac
de mbecy nu walab mbecy guledz. Tees mas ni gyicya̱ par
wazuub gyidag dey ne̱”, nam.
\v 22 Gal nu bicy mi tiem zeꞌ, niꞌ ziꞌl ricy mi na, gun
ornu cuic mi reñaꞌ riidz nu nii tub ga mbecy, ndeꞌ cyiiñ
ñi par nu gad lagy de mbecy nu wagyicy cup consuel lom
cyu nac mi. Walab nu cuic mi ñii par de mbecy nu bi
ricy cup consuel. Zeꞌ benu Ñgyoozh gyicy mi nu cyiiñ
tub mbecy shaal yu riidz nu druu lom, orzeꞌ ndeꞌ cyiiñ
ñi par de mbecy nu bi ricy cup consuel lom. Walab par
mbecy nu wagyicy cup consuel.
\v 23 Orzeꞌ lat nu yatublaazh de ru, mbecy ni Crisht,
benu dela der checuar niir riidz reñaꞌ mbecy, nunu benu
lat la zeꞌ chuꞌ tub mbecy lat der, tub yu nu walab mbecy
ni Crisht o tub yu nu a̱ꞌ nac nu der, orzeꞌ niiy nu raton
der.
\v 24 Tees benu dela der niir riidz nu druu lo Ñgyoozh,
orzeꞌ ornu chuꞌ tub mbecy nu a̱ꞌ nac nu der o chuꞌ tub
mbecy nu walab mbecy ni Crisht lat der, orzeꞌ de riidz
nu rnii der zeꞌ, orzeꞌ ndeꞌ lyuuñ niy nu nac yu mbecy
cyi. Nunu de riidz zeꞌ lyuuñ loy nu nac yu mbecy nu
yuꞌ falt ni nu nac nu gyet lag yu cuen dela coz nu rnii
der.
\v 25 De riidz zeꞌ gyicy caacy ñi de coz ngach nu rnii
tooy. Orzeꞌ gzu tib yu, nunu griib zily yu Ñgyoozh. Orzeꞌ
niiy nu rishli gaal zu Ñgyoozh lat der.
\s Mod nu gyicy de mbecy ni Crisht ornu gyatublaazh yu
\p
\v 26 Der bicy na, orzeꞌ i mod bicy der: ornu gyatublaazh
der, tub ga la der ricy cup ru tub coz nu rlagy ru gul
ru. Zeꞌ tuubaꞌ der lyuur ni de losaꞌr. Zeꞌ tuubaꞌ mbecy
briic Ñgyoozh tub riidz nu niiy lo der. Zeꞌ tuubaꞌ mbecy
rlagy yu niiy nu reñaꞌ riidz. Zeꞌ tuubaꞌy rlagy yu nu
shaal yu lac yaruu de riidz zeꞌ. Tees dela coz zeꞌ bicy
der nu tub mod nu locyuub ñi dela de mbecy zigy.
\v 27 Benu la be mbecy rlagy yu nu niiy riidz reñaꞌ
mbecy, orzeꞌ cyup ziꞌl mbecy o chon dey gac niiy. Cueꞌ
nu zigyaꞌ zir dey. Nunu bee lo dey niiy. Zeꞌ tuubaꞌ
mbecy rlagy ñi nu shaal yu de riidz nu rnii dey zeꞌ.
\v 28 Benu sac cyu nu shaal riidz zeꞌ, orzeꞌ mbecy nu
rnii reñaꞌ riidz zeꞌ rlagy ñi nu checay nu niiy lat
de mbecy zigy. Orzeꞌ nañ lardoo ziꞌl yu gac niiy riidz
zeꞌ lo Ñgyoozh.
\v 29 Cyup mbecy o chon yu gac niiy riidz nu druu lo
Ñgyoozh. Orzeꞌ deꞌ zir mbecy ri ziꞌl gua dey gash yu
shcab ben a laab ni gal nu rniiy.
\v 30 Tees benu Ñgyoozh cuic mi riidz nu nii tuubaꞌ
mbecy, orzeꞌ mbecy nu rshaal riidz ni Ñgyoozh zeꞌ checay
nu rniiy.
\v 31 Dela der gac nii der riidz nu cuic Ñgyoozh nu
nii der, tees bee lo der niir, gun orzeꞌ gac dela mbecy
zigy, nunu gad baloor ni dey.
\v 32 De mbecy nu rnii riidz nu druu lo Ñgyoozh gac
gyub ic dey de riidz nu druu nañ lardooy.
\v 33 Gun Ñgyoozh wansaꞌ lagy mi nu pshees chuꞌ den,
sinu Ñgyoozh psaꞌ lagy mi nu gyicy den mod nu seꞌñ.
\p Bicy der gal nu ricy dela deꞌ zir de mbecy ni Crisht
lat nu yatublaazh dey.
\v 34 De biñ mñaa wac nii dem ornu yatublaazh de mbecy
ni Crisht, gun ndeꞌ coz nu rlagy ñi. Nunu wac gyub ic
dem lat de mbecy zigy gal nu rnii leey ni de mbecy Israeel.
\v 35 Benu rlagy mi gad lagy mi tub coz, orzeꞌ rlagy
ñi cugyiꞌm lo ñgyeem ornu grim yuꞌm, gun a̱ꞌ nap benu
tub biñ mñaa gniim lat de mbecy zigy, zeꞌ nu rzat dey
Crisht.
\p
\v 36 Rlagy ñi gad lagy der nu de riidz ni Ñgyoozh walab
lat de ru bzub gyiꞌñ; ni walab lo de ru ziꞌl briñ.
\v 37 Benu tub mbecy rnii tooy nu cyiiñ yu shaal yu
riidz ni Ñgyoozh o benu rnii tooy nu Espiriit Yon ni
Ñgyoozh locyuub mi yu nu niiy, orzeꞌ rlagy ñi gad lagy
yu nu Ñgyoozh bicy mi mandaar lo̱ nu ni ne̱e̱ de riidz
ii lo der.
\v 38 Benu ca na mbecy wacheña lagy yu de ndeꞌ, orzeꞌ
cueꞌ gyicy cuen der yu.
\p
\v 39 Der bicy na, orzeꞌ bicy der nu gniir de riidz nu
druu lo Ñgyoozh, tees cueꞌ ca der ni de mbecy nu niiy
nu reñaꞌ riidz.
\v 40 Dela coz nu gyicy der bicy der ñii mod nu seꞌñ,
nunu mod nu rlagy ñi.
\c 15
\s Ornu byabañ Crisht
\p
\v 1 Na der bicy na, gyicya̱ nu gyezaꞌ lagy der de riidz
nu sac ni Crisht nu pshaala̱ lo der. Riidz zeꞌ bi gush
der ñii, nunu ndeꞌ riib ic ñi der na.
\v 2 Niꞌ par nu nac de riidz nu pshaala̱ zeꞌ, gruu mbañ
der, benu gyicy yac der nur ñii, benu walab nu nu ruꞌ
ziꞌl der gyicy cup ru consuel loñ. Gun benu nu ruꞌ ziꞌl
der gyicy cup ru consuel loñ, orzeꞌ leew la gyicy cup
ru consuel loñ.
\p
\v 3 Ya̱ brica̱ nu gad lagy der de coz nu gud lagya̱, de
coz nu ricy zir ñi presis par deꞌ zir de coz. Ndeꞌ nu
gut Crisht par nu nac cyi den gal nu rnii de riidz ni
Ñgyoozh.
\v 4 Orzeꞌ pcach dey mi. Orzeꞌ dzi chon byabañ mi gal
nu rnii de riidz ni Ñgyoozh.
\v 5 Orzeꞌ bruu sac mi lo Bed. Orzeꞌ bruu sacaꞌm lo
de trocyupaꞌ de aposht.
\v 6 Orzeꞌ despuees bruu sacaꞌm lo zigy zir de bicy
na lat nu yuꞌ tublaazh dey. Bded gaay gaynal dey nac
yu yuꞌy. Nunu zigy dey gabee yuꞌ mbañ yu na, nomaas la
be ziꞌl dey bi gut yu.
\v 7 Despuees orzeꞌ bruu sac mi lo Santiag. Gazeꞌ nu
bruu sac mi lo dela deꞌ zir aposht.
\p
\v 8 Ornu laab ndeꞌ la nu blazh zeꞌ, orzeꞌ bruu sac mi
lo ya̱. Ya̱ bzaca̱ gal nu rzac tub mdoo nu gul anzir nu
shuub tiem ni ornu bzaaca̱m.
\v 9 Gun ya̱ gash zir zu̱ par lo deꞌ zir de aposht. Ni
wangyapa̱ nu nii dey ya̱ aposht, gun ya̱ psheed zi̱ de mbecy
ni Crisht.
\v 10 Tees nu nac nu Ñgyoozh nap bicy num ya̱, nac la̱a̱
ca na nu naca̱. Nunu walab nu leew la nap bicy num ya̱,
gun ya̱ ricy zira̱ riiñ nim gazeꞌ deꞌ zir de aposht. Tees
walab nu bicya̱ de riiñ zeꞌ ub zi̱, sinu Ñgyoozh bicy mi
faboor num ya̱ nu blocyuub mi ya̱ nu gyicya̱ ñii.
\v 11 Tees a̱ꞌ ricy ñi presis nu cyu bicy zir riiñ: ti
ya̱ o deꞌ zir de yu zeꞌ, gun tub ziꞌl riidz rne̱e̱ de̱ lo
der, nunu lo de riidz zeꞌ ricy cup der consuel.
\s Ornu gyabañ de mbecy nu bi gut
\p
\v 12 Tees como de̱ ya̱ rshaal de̱ lo der nu Crisht byabañ
mi, orzeꞌ ¿lagu yuꞌ ruꞌ la be mbecy lat der nu rnii dey
nu wayabañ de mbecy nu bi gut?
\v 13 Tees benu wayabañ de mbecy nu bi gut, orzeꞌ niꞌ
Crisht wangyabañ mi.
\v 14 Nunu benu cueꞌ ñgyabañ Crisht, orzeꞌ de riidz nu
rshaal de̱ lo der se la la sac ñi, nunu se la la sac ñi
nu gyicy cup den consuel lom.
\v 15 Benu ni, orzeꞌ de̱ ya̱ nu bgu̱u̱ de̱, gun mne̱e̱ de̱ nu
Ñgyoozh bicy mi nu byabañ Crisht. Tees benu rishli nu
wayabañ de mbecy nu bi gut, orzeꞌ walab rishli bicy Ñgyoozh
nu byabañ Crisht.
\v 16 Gun benu wayabañ de mbecy nu bi gut, orzeꞌ niꞌ
Crisht wac ñgyabañ mi.
\v 17 Benu cueꞌ ñgyabañ Crisht, orzeꞌ se la la sac ñi
nu gyicy cup der consuel lom, nunu benu ni, orzeꞌ nigul
gyicy sulagy Ñgyoozh de cyi der.
\v 18 Benu ni, niꞌ de mbecy nu bi gut, de yu nu bicy cup
consuel lo Crisht, mnit lo dey.
\v 19 Benu lat nu yuꞌ ziꞌl den gyishlombecy ii na, drish
lo den lo Crisht, zeꞌ wayabañaꞌ den, orzeꞌ cuaa zir de
ub na gazeꞌ deꞌ zir de mbecy.
\p
\v 20 Tees rishli Crisht byabañ mi ornu gut mi. Mi zeꞌ
biñ nu byabañ loga la par lo deꞌ zir de mbecy nu gyabañ
par lo.
\v 21 Gun gal nu rat den nu nac tub zi mbecy, niꞌ ziꞌl
gyabañ den nu nac tuubaꞌ zi mbecy.
\v 22 Gun dela mbecy rat dey gyiꞌ nu nac dey nez Adaang.
Orzeꞌ niꞌ ziꞌl mod gyabañ dey gyiꞌ nu nac nu dey Crisht.
\v 23 Tub ga la mbecy gyabañ yu ornu shuup tiem niy.
Nu loga la byabañ Crisht. Orzeꞌ despuees gyabañ de mbecy
nu nac nim, ornu cyid mi tuubaꞌ tir.
\v 24 Orzeꞌ shuub dzi nu gyaꞌ lo dela coz. Orzeꞌ Crisht
gyicy mi gan dela losaꞌ yuum, nunu guꞌm gyel gubier nim
yaa Ñgyoozh, Uz mi.
\v 25 Gun Crisht rlagy ñi nu gyub ic mi gashtal gyicy
lam gan dela losaꞌ yuum.
\v 26 Orzeꞌ laab ndeꞌ la gyicy mi gan nu checa nu gat
mbecy.
\v 27 Gun Ñgyoozh bicy mi nu Crisht gyub ic mi dela
coz. Nomaas rabee nu walab nu gyub ic mi Ñgyoozh.
\v 28 Tees ornu Crisht gyub ic mi dela coz, orzeꞌ “O”
niim nu gyub ic Uz mim, biñ nu bicy nu gyub ic mi dela
mbecy. Orzeꞌ Ñgyoozh gyub ic mi dela coz.
\p
\v 29 Yuꞌ mbecy nu rzu nis dey nu nac de mbecy nu bi
gut. ¿Lagu ni ricy dey benu wayabañaꞌ de añ?
\v 30 Zeꞌ par de̱ ya̱, ¿lagu de or la yu̱ꞌ de̱ lo rishdzidz
nu gat de̱?
\v 31 Segur la rishli, der bicy na, de dzi la rdeda̱ lo
rishdzidz nu gata̱. Tees yet lagya̱ nu nac der como nac
der mbecy ni Shuaan den Jesucrisht.
\v 32 Orzeꞌ se la la pcyiiñ nu ptub su̱ de̱ de mbecy Éfeso,
de mbecy nu na gal nu na bañ dañ, benu wayabañ den ornu
gat na. Benu ni, orzeꞌ nap zir gyicy la den gusht gal
nu rnii de mbecy ornu rniiy: “¡Dow na, doꞌn gun dzi
ga gat na ina!”, rnii dey.
\p
\v 33 Cueꞌ zaan der nu guu mbecy ru. “Benu mbecy a̱ꞌ
nap chesa nuy mbecy nap, orzeꞌ gyicy yu nu gnu mbecy
nap”, rnii dey.
\v 34 Orzeꞌ pchaa der mod nu gyicy ru, nunu cueꞌ gaꞌ
gyicy der coz cyi. Gun yuꞌ mbecy lat der nu a̱ꞌ yuꞌ lo
dey Ñgyoozh. Ndeꞌ nu ni rne̱e̱ de riidz ii lo der par
nu gat lo der.
\s Lac mod gyabañ de mbecy gut
\p
\v 35 Che chii la ca na mbecy cugyiꞌy: “¿Nu lac mod
gyabañ de mbecy nu bi gut? ¿Nu lac na cuerp ni dey?”
nii dey.
\v 36 ¡Ndeꞌ tub coz ton nu nii dey! Benu nuuz der tub
mbigy tub ya mni, warib ñi benu wanit lo mbigy nu bdunuuz
zeꞌ.
\v 37 Coz nu nuuz der zeꞌ, ndeꞌ walab ub la ya mni, sinu
ndeꞌ mbigy ziꞌl ñi: tub mbigy trig o la ziꞌl reñaꞌ lo
mbigy.
\v 38 Tees Ñgyoozh gyicy mi nu galy ya mni zeꞌ, nunu
gyicy mi nu gyac mbigy zeꞌ gal nu na nu ub mi rlagy
mi. Tub lo ga de mbigy zeꞌ ricy mi nu reñ ga la nu nañ
gac ñii.
\v 39 Nunu walab tub ziꞌl nu na beel mbecy nu de beel
bañcyug. Reñ na beel mbecy, nunu reñ na beel bañcyug.
Reñ na beel chigyiñ nunu reñaꞌ na beel bel gyoow.
\v 40 Niꞌ de coz nu taꞌ baa, reñaꞌ nañ par de coz nu
yuꞌ lo yu ii. De coz cyit na nu taꞌ baa reñaꞌ rabeeñ
par de coz cyit na nu yuꞌ lo yu ii.
\v 41 Cyit rabee doo güidz. Beey cyitaꞌ rabee ma. Tees
reñaꞌ rabee ma par doo güidz. Bel baa reñaꞌ rabee ma.
Mas de bel baa, reñ ga la rabee tub ga ma lat de losaꞌ
ma.
\p
\v 42 Niꞌ ziꞌl mod gac ornu gyabañ de mbecy nu bi gut.
Ornu rdugach cuerp ni mbecy, orzeꞌ gyayuñ. Tees ornu
gyabañ ñi orzeꞌ wataꞌñ.
\v 43 Ornu rdugach dey, orzeꞌ shni na dey; tees ornu
gyabañ dey, orzeꞌ tonaꞌ la gyafert dey.
\v 44 Ornu rdugach dey, orzeꞌ cuerp ni dey nac ñii coz
ni gyishlombecy ii; tees ornu gyabañ dey, orzeꞌ cuerp
ni dey gyac ñi coz ni gyibaa. Yuꞌ cuerp nac ñii ni gyishlombecy
ii, nunu yuꞌ gaꞌ cuerp nu nac ñii ni gyibaa.
\p
\v 45 Gun lat de riidz nu bzeeñ Ñgyoozh rniiñ: “Adaang,
yu nu bzuub gyiꞌñ nu rach mbecy, yu zeꞌ byac yu tub mbecy
mbañ. Zeꞌ Crisht, biñ nu bzuub gyiꞌñ nu gyabañ mbecy,
mi zeꞌ nac mi tub mbecy nu wat nu rbic gyel mbañ”, rniiñ.
\v 46 Nu loga la Ñgyoozh briic mi cuerp ni gyishlombecy
ii ni den. Orzeꞌ despuees cuic mi cuerp ni mbecy gyibaa
ni den.
\v 47 Nu loga la, Adaang psaꞌ lagy Ñgyoozh yu nu yu.
Tees nu cyup Crisht bruum gyibaa.
\v 48 Dela mbecy ni gyishlombecy na dey gal nu na Adaang,
yu nu byaa nu yu, tees de mbecy nu nac nu Crisht na dey
gal nu na biñ nu bruu gyibaa.
\v 49 Orzeꞌ na, na den gal nu na mbecy nu byaa nu yu,
tees par lo gyac den gal nu na Crisht, biñ nu bruu gyibaa.
\p
\v 50 Der bicy na, ya̱ rne̱e̱ ni cuerp gyidz ii ni den, cuerp
ni beel nu ni rit, nii rila wac chuꞌñ lo gyel gubier
ni Ñgyoozh. Niꞌ cuerp gyidz ii ni den wacyiiñ ñi par
nu gagyeñ tub la.
\v 51 Rlagya̱ gad lagy der tub coz nu wagad lagy la de
mbecy. Walab dela den gat na.
\v 52 Tees nañ tub miiñ ziꞌl dela den dza nu nan. Tub
lat nu shet ziꞌl gyid iz na, ornu dulaa trompet, orzeꞌ
dela de añ gyabañ dey, nunu rila wataꞌ dey. Nunu dza
nu na dela den.
\v 53 Gun cuerp nu gat ni den ii rlagy ñi nu dzañ. Gyac
ñi tub cuerp nu rila wataꞌ.
\v 54 Orzeꞌ ornu cuerp ni den nu gat ii gyac ñi cuerp
nu rila wataꞌ, orzeꞌ gyuꞌ ni de riidz nu bzeeñ Ñgyoozh,
zeꞌ nu rniiñ: “Bi bicy mbecy gan. Rila wataꞌ dey”,
rniiñ.
\v 55 Orzeꞌ gyel gut rila wayicyaꞌñ gan dey. Rila wayicyaꞌñ
nu zac zi gaꞌ dey nu gat yu.
\v 56 Gat den nu nac de coz cyi nu bicy den. Nunu bicy
den cyi como wangyicy den gal nu rnii leey nu bzeeñ
Ñgyoozh.
\v 57 Tees gric den gras ni Ñgyoozh, gun bicy mi nu gyicy
den gan nu nac de coz nu bicy Shuaan den Jesucrisht.
\p
\v 58 Na der bicy na, bzu fert der nu nac de coz ni Crisht,
nunu bicy paa der nim. Bloo lo der nu de riiñ nu ricy
ru ni Ñgyoozh, gun bi neñ der nu la ziꞌl coz ni Ñgyoozh
nu ricy der walab nu leew la ricy der ñii.
\c 16
\s Mod nu rbic dey tiñ ni de mbecy ni Crisht
\p
\v 1 Na par ornu teꞌ der de tiñ nu glocyuub der de mbecy
ni Ñgyoozh nu yuꞌ lo de yu nu la Judea, rlagy ñi gyicy
der mod nu mne̱e̱ lo tub nac ga de mbecy ni Crisht nu
yuꞌ lo de yu ni Galacia.
\v 2 Tub noming ga rlagy ñi nu co reñ der ñuu tiñ. Dub
gal lac ricy der gan dub ni cuic der. Orzeꞌ cuꞌ choow
der ñii, gun orzeꞌ ornu yapa̱, walagy ñi dudeꞌ de tiñ zeꞌ.
\v 3 Ornu yapa̱, orzeꞌ zeeda̱ de mbecy nu bi pcui der zeꞌ,
nu cha nu dey de tiñ zeꞌ par Jerusaleeng, nunu cha nu
dey tub gyicy ni rishbeey nu zeeda̱ lo de bicy na nu
yuꞌ lugaar zeꞌ.
\v 4 Benu galagy ñi nu cha̱, orzeꞌ niꞌ ziꞌl ya̱ cha̱ du̱
dey.
\s Baly rlagy yu cha güiiy dey
\p
\v 5 Nez nu yapa̱, rlagy ñi nu deda̱ lo de mbecy nu yuꞌ
Macedonia. Orzeꞌ niga deda̱ par lo de ru.
\v 6 Rlagya̱ gyiyeeñ du̱ der tub tiem, ben a wac cyiiña̱
lat der dub laa lat lascyey. Orzeꞌ gac locyuub der ya̱
nu de coz nu galagy ñi ne̱ ornu cha̱ tuubaꞌ lugaar.
\v 7 Walab nu rlagy ziꞌl ya̱ nu zaca̱ der nez nu deda̱,
sinu rlagya̱ nu les cyiiña̱ lat der benu zaan Shuaan den.
\v 8 Tees gyiyeeña̱ Éfeso ii gashtal shuub la dzi nu
chuꞌ saꞌ ni Pentecostés.
\v 9 Gun mas yuꞌ zigy mbecy nu zay contr ni Shuaan den,
tees na tiem niñ par nu gyicya̱ gan de riiñ ily nim Éfeso
ii.
\p
\v 10 Benu gri Timoteo lo der, orzeꞌ gyicy der nu nap
zu lagy yu, gun yu zeꞌ ricy yu riiñ ni Shuaan den gal
nu ricy ya̱.
\v 11 Cueꞌ gyicy gyidz der yu, sinu rlagy ñi nu locyuub
der yu nu de coz nu galagy ñi niy par ornu chay tuubaꞌ
lugaar, gun orzeꞌ cush cyay cyidaꞌy lo̱. Gun ya̱ rishlo̱
yu nu cyid yu nu deꞌ zir de bicy na.
\p
\v 12 Zeꞌ Apolos, ya̱ mnishba̱a̱ loy nu cyid güiiy der gal
nu deꞌ zir de bicy na. Na la walagy yu cyid yu. Tees
ornu gad mod niy orzeꞌ cyid yu.
\p
\v 13 Bicy cuidad der ub ru ni de coz a̱ꞌ nap. Nunu ni
cueꞌ gyaꞌ ich der nu nac de coz ni Crisht. Cueꞌ dzib
der. Bzu fert der.
\v 14 Nunu dela coz nu gyicy der, bicy der ñii par nu
nac nu rca der losaꞌr.
\p
\v 15 Der bicy na, de ru rad lagy der nu par deꞌ zir
de mbecy nu yuꞌ lo yu ni Acaya, Estéfanas nu de famil
niy, de yu zeꞌ byac dey mbecy ni Crisht nu loga la, nunu
de yu zeꞌ byuꞌy lo de riiñ par nu locyuub dey de mbecy
ni Crisht.
\v 16 Der bicy na, rlagya̱ nu gyicy yac der nu de coz
nu rnii de yu zeꞌ, nunu de coz nu rnii de mbecy nu na
gal nu na de yu zeꞌ. Nunu bicy yac der nu cyu ziꞌl mbecy
nu ricy nu dey riiñ.
\v 17 Tonaꞌ la yet lagya̱ nu biid Estéfanas, nu Nat, nu
Acaico. De yu zeꞌ blocyuub dey ya̱ lugaar ni de ru, gun
sac der ii.
\v 18 Gal nu bicy dey nu bet lagy de ru, niꞌ ziꞌl bicy
dey nu bet lagya̱. Cyu ziꞌl mbecy nu ni na gal nu na
de yu zeꞌ rlagy ñi nu griib zily der yu.
\p
\v 19 Dela de mbecy ni Ñgyoozh nu yuꞌ lo yu ni Asia,
bzeed dey ñgyoozh ni der. Aquila nu Priscila gal nu
dela de mbecy ni Crisht nu ryatublaazh nañ yuꞌ dey bzeed
dey ñgyoozh ni der como niꞌ nac der mbecy ni Crisht.
\v 20 Dela de bicy na nu yuꞌ ii bzeed dey ñgyoozh ni
der. Dela der nap nii nu der losaꞌr par nu gabe nu nac
der losaꞌ bicy ru.
\p
\v 21 Ya̱ Baly, ca̱a̱ de riidz ii nu ya̱a̱ nu zeeda̱ ñgyoozh
ni der.
\p
\v 22 Benu tub mbecy wacay Shuaan den Jesucrisht, orzeꞌ
bi gul yu duu. ¡Shuaan de̱, da!
\p
\v 23 Shuaan den, Jesucrisht, nap gyicy num der.
\v 24 Nunu bi neñ der nu ya̱ rca̱ der nu nac Jesucrisht.