\id PHP
\h Filipenses
\toc1 Filipenses
\mt1 Filipenses
\mt2 Gyicy nu bzeed Baly lo de mbecy ni Crisht nu yuꞌ Filipos
\c 1
\s Gyicy nu bzeed Baly lo de mbecy nu yuꞌ gyedz nu la Filipos
\p
\v 1 Ya̱ Baly nu Timoteo ricy de̱ coz nu rnii Jesucrisht.
Na zeed de̱ ñgyoozh ni dela mbecy ni Jesucrisht nu yuꞌ
gyedz Filipos. Nunu zeed de̱ ñgyoozh ni de yu bel nu
riib ic lat de mbecy nim, nunu zeed de̱ ñgyoozh ni de
ayudant ni dey.
\v 2 Ñgyoozh Uz den, nu Shuaan den Jesucrisht gyicy mi
faboor nu nap gyicy num de ru. Gyicy mi nu cheti ri
añ ni der.
\s Baly bdiiñ yu lo Ñgyoozh ni de mbecy ni Crisht
\p
\v 3 De tir la ornu yezaꞌ lagya̱ de ru, orzeꞌ drica̱ gras
ni Ñgyoozh.
\v 4 Nunu la ziꞌl tiem nu rdiña̱ lo Ñgyoozh ni der, dub
gal ri lagya̱ rdiña̱ lom,
\v 5 gun de ru bicy nu der ya̱ riiñ tublaazh la par nu
ptush las den de riidz nu sac ni Jesucrisht lat de mbecy.
Ni bicy nur ya̱ nese dzi nu bri̱ lo der nu loga la nunu
niꞌ ziꞌl ricy der mas gashtal dzi na.
\v 6 Nunu ya̱ bi neña̱ nu Ñgyoozh, biñ nu bzuub gyiꞌ riiñ
nañ lardoo der, mi zeꞌ zaꞌ lom ñii ornu shuub dzi nu
cyid Jesucrisht tuubaꞌ tir.
\v 7 Nunu ricy cupa̱ raso̱o̱ nu ni rnii to̱o̱, gun ya̱ tonaꞌ
la razañ lagya̱ der. Gun Ñgyoozh bicy num den faboor
lat nu ri̱ yuꞌ gyiib, o ornu rza̱ lo de mbecy nu riib ic.
Gun faboor zeꞌ, ndeꞌ nu gzu ferta̱ nu nac de riidz nu
sac ni Jesuuz, nunu drica̱ nu gad lagy de mbecy nu ndeꞌ
coz rishli.
\v 8 Ñgyoozh rad lagy mi nu ya̱ ric la añ ne̱ nu rlagya̱
zaca̱ der, gun ya̱ razañ lagya̱ der gal nu razañ lagy Jesucrisht
de ru.
\v 9 Ya̱ rdiña̱ lo Ñgyoozh nu tub dzi ga ca zir der losaꞌr.
Lat nu ricy der ndeꞌ, ya̱ diña̱ lom nu shaal zir mi shcab
ni der nu gad lagy der ca na coz nu seꞌñ nu gyicy der.
\v 10 Gun orzeꞌ dub laa tiem gac cui der ca na coz nu
nap zir, gun orzeꞌ gac der mbecy nu caacy lardoo, nunu
gac der mbecy nu sac falt ni ornu shuub dzi nu cyid
Crisht.
\v 11 Gun ornu shuub dzi zeꞌ, Jesucrisht bi byaꞌ lo nu
bicy mi nu byac der mbecy nu bicy coz nu seꞌñ, gun orzeꞌ
ca lagy mbecy lo Ñgyoozh nunu gyabic dey gyel mbecy
nim.
\s Par Baly benu cui mbañ yu, orzeꞌ gyicy yu coz nu rlagy Crisht ziꞌl
\p
\v 12 Ya̱ rlagya̱ nu gad lagy der bicy na, nu de coz nu
bzaca̱ ndeꞌ rishli gaal blocyuub ñi nu bzu de riidz nu
sac ni Jesuuz.
\v 13 Zeꞌ na dela de soldad nu yuꞌ roꞌ riiñ nu dela
deꞌ zir mbecy rad lagy dey nu ya̱ ri̱ yuꞌ gyiib nu nac
Crisht.
\v 14 Nunu Shuaan den Jesuuz briic mi baloor ni zigy
de bicy na ornu bzaac dey coz nu guc lat nu ri̱ nañ yuꞌ
gyiib. Ndeꞌ nu wacchib la dey rshaal yu riidz nu bruu
lo Ñgyoozh.
\p
\v 15 Rishli yuꞌ la be mbecy nu rshaal yu riidz ni Crisht,
gun rasaap lagy dey ni riiñ nu ricya̱. Nunu rlagy dey
ded loy lo̱. Zeꞌ yuꞌ gaꞌ mbecy rniiy riidz ni Crisht,
gun rlagy yu gyicy yu coz nu seꞌñ.
\v 16,17 Mbecy nu bzata̱ loga la zeꞌ, yu zeꞌ rnii dey riidz
ni Ñgyoozh par nu ricy dey ub yu nu nac yu mbecy nu
ricy ñi presis. Walab nu dub gal ri lagy dey rniiy.
Rzii dey nu gyicy yu nu deet gac nañ lardo̱o̱ lat nu ri̱
yuꞌ gyiib. Zeꞌ yuꞌ gaꞌ mbecy rnii dey riidz ni Crisht
nu nac nu rca dey mbecy. Rad lagy dey nu Ñgyoozh pcaam
ya̱ nu gzu ferta̱ nu gyicya̱ riiñ nu nac riidz nu sac ni
Jesucrisht.
\v 18 Lac ziꞌl mod nu rnii too dey nu ricy yu, tees par
ya̱ se la la ndeꞌ. Mas nu dub gal ri lagy dey o nu walab
dub gal ri lagy dey ricy yu, tees rnii dey riidz ni Crisht.
Ndeꞌ ricy ñi nu tonaꞌ la yet lagya̱.
\p Nunu yetaꞌ lagya̱
\v 19 Gun ya̱ rad lagya̱ nu gruu napa̱. Ni gac gun de ru
rgyiiñ der lo Ñgyoozh ne̱ nunu gun Espiriit Yon ni Jesucrisht
rlocyuub mi ya̱.
\v 20 Coz nu drish lo̱, ndeꞌ nu cueꞌ zaan Ñgyoozh nu gyicya̱
coz nu gyicy ñi nu gat lo̱. Tees wacchib la̱ rne̱e̱ riidz
nu sac ni Crisht. Ni mod na par dub laa tiem ricya̱ coz
nu gyicy ñi nu ca lagy mbecy lom. Ca lagy mbecy lom
mas nu gruu mbaña̱ o nu cut dey ya̱. Lac ziꞌl.
\v 21 Gun par ya̱, benu cui mbaña̱, orzeꞌ gyicya̱ coz nu
rlagy Crisht ziꞌl. Zeꞌ benu gata̱, orzeꞌ napaꞌ zir.
\v 22 Benu gzu zira̱ gyishlombecy ii, orzeꞌ gac gyicy
zira̱ coz nap par Crisht. Ndeꞌ nu wagad lagya̱ ca nañ
rlagya̱.
\v 23 Pcan laa shcab ne̱. Wagad lagya̱ ca na nu nap zir.
Ya̱ rlagya̱ gata̱, gun orzeꞌ gya̱ cyiiñ du̱ Crisht. Ni mod
nap zir par ya̱.
\v 24 Tees ricy zir ñi presis nu cyiiña̱ gyishlombecy
ii par nu locyuuba̱ de ru.
\v 25 Na bi bguugy lardo̱o̱ ni de coz zeꞌ, ndeꞌ nu ya̱ rsaꞌ
lagya̱ nu gzu̱ se ñuu la be tiem gyishlombecy ii, gun orzeꞌ
cyiiña̱ lat dela der, gun orzeꞌ gac locyuuba̱ de ru nu
nap zir gyicy cup der consuel lo Crisht, nunu gyet lagy
zir der nu nac de coz nu ricy cup der consuel lo.
\v 26 Gun ornu yapa̱ lo der tuubaꞌ tir, orzeꞌ gyabic zir
der gyel mbecy ni Jesucrisht nu nac ya̱.
\p
\v 27 Bzu der cuidad. Nu seꞌñ guꞌ der gal nu rlagy ñi
nu chuꞌ mbecy nu rzeña lagy ni de riidz nu sac ni Crisht.
Gun orzeꞌ mas yap güi̱i̱ der o mas saca̱ lat der, tees rlagya̱
gyeña̱ nu ricy der tub ziꞌl shcab. Nunu rlagya̱ gyeña̱
nu gal gaa la rzu fert zir der ni de coz nu rzeña lagy
den, de coz nu rnii de riidz nu sac ni Jesuuz.
\v 28 Nunu rlagya̱ gyeña̱ nu wacchib der lo de mbecy nu
rzi lagy lo der, gun ndeꞌ gyicy ñi nu gabe nu de mbecy
nu rzi lagy zeꞌ nit lo dey. Nunu laab ndeꞌ ricy ñi nu
gabe nu de ru gruu mbañ der. Nunu ndeꞌ coz nu gyicy
Ñgyoozh.
\v 29 Ñgyoozh bicy mi faboor num de ru walab tub lo
ziꞌl nu gyicy cup der consuel lo Crisht, sinu niꞌ ziꞌl
nu gzac zi gaꞌ der nu nac mi.
\v 30 De ru nu ya̱ tublaazh la rza den contr de mbecy
nu rzi lagy lon. Bi bzaac der lac mod bicya̱. Nunu mas
na reñ der lac mod na de coz nu ricya̱ lat nu rza̱ contr
ni dey.
\c 2
\s Crisht bicy mi gyel gyidz nim; orzeꞌ byac mi biñ nu gya zir zu
\p
\v 1 Como Crisht rbic mi baloor ni der, como ricy cup
der consuel lom nu nac nu rcam der, como Espiriit Yon
ni Ñgyoozh nac num der, como razañ lagy der losaꞌr, nunu
como rashni lagy der mbecy,
\v 2 orzeꞌ ndeꞌ nu bicy der nu bet lagy gyel la̱. Gun
ya̱ yet lagya̱ benu nap yuꞌ nu der losaꞌr. Nunu yet lagya̱
benu rca der losaꞌr. Nunu yet lagya̱ benu gyicy der tub
ziꞌl shcab. Nunu yet lagya̱ benu cueꞌ nu reñ ga la mod
rlagy tub ga la der nañ lardoor, sinu tub ziꞌl mod rlagy
dela der.
\v 3 Orzeꞌ cueꞌ gyicy der coz par ub ziꞌl ru. Ni cueꞌ
gyicy der coz par nu gyicy der gyel leꞌ nir, sinu gyicy
der gyel gyidz nir. Mnii too der nu lily zir na losaꞌr
gazeꞌ ub ru.
\v 4 Cueꞌ zu bich der nu nac ub ziꞌl ru, sinu bzu bichaꞌ
der nu nac losaꞌr.
\v 5 Laab shcab nu bicy cup Jesucrisht, laabaꞌ shcab
zeꞌ bicy cup de ru.
\v 6 Gun Jesucrisht, mas gal naꞌ ziꞌl Ñgyoozh Uz mi nam,
tees pshet ic mi bzu chum mod nu nam gyibaa. Mod nu
nam nu gal gaa la nac mi nu Ñgyoozh.
\v 7 Tees bzeeñ mi mod nu nam. Ornu gul mi, gush mi mod
nu na tub mbecy nu ricy yac de mandaar nu ricy Ñgyoozh.
Ni bicy mi ornu byac mi mbecy.
\v 8 Ornu byac mi mbecy, bicy mi gyel gyidz nim. Pshet
ic mi nu biit mbecy mi, gun bicy yac mi ni Ñgyoozh. Mod
toꞌ lo gut mi. Gal lo cruuz gut mi, gal nu rat mbecy
a̱ꞌ nap.
\v 9 Par nu bicy mi gyel gyidz nim, ndeꞌ nu bicy Ñgyoozh
nu byac mi biñ nu gya zir zu, nunu Ñgyoozh bicy mi nu
sac zir mi par dela mbecy.
\v 10 Ni bicy Ñgyoozh, gun orzeꞌ dela mbecy gzu tib dey
nu ca lagy yu lo Jesuuz. Dela anc nu yuꞌ gyibaa, dela
mbecy nu yuꞌ gyishlombecy, dela mbecy nu bi gut, dela
nuras, dela de yu zeꞌ gzu tib dey lom.
\v 11 Ni bicy Ñgyoozh, gun orzeꞌ dela mbecy nii dey nu
Jesucrisht nac mi Shuaan den. Ornu gyicy dey de nu ndeꞌ,
orzeꞌ ca lagy mbecy lo Ñgyoozh Uz na.
\s De mbecy ni Crisht na dey gal na tub yaa lat de mbecy nu wagyicy yac ni Ñgyoozh
\p
\v 12 Der bicya̱ nu dzi rca̱, gal nu bicy yac der ni de
riidz nu mne̱e̱ lat nu pcyiiña̱ lat der, na nu zet ri̱, fert
zir bicy yac der ni riidz nu rne̱e̱ lo der. Bicy der de
coz nu yad ñi nu gyicy ru par nu nac der mbecy nu bloo
mbañ Ñgyoozh. Nunu gudzib der nis wayicy ru gan.
\v 13 De ru gac gyicy ru ndeꞌ, gun laab Ñgyoozh gyicy
mi nu galagy der nu gyicy ru coz nu yet lagy mi, nunu
gyicy mi nu gac gyicy der ñii.
\p
\v 14 Dela coz nu gyicy der, cueꞌ nii deet der nu nac
ñii, nunu bicy der ñii nu dutuub la lardoor.
\v 15 Ni gyicy der, gun orzeꞌ de ru, mbecy nu nac iꞌñ
Ñgyoozh, gac der mbecy caacy lardoo. Gac der mbecy nu
sac falt ni lat de mbecy mnu nu de mbecy gubag. Gabe
der lat de mbecy zeꞌ gal nu rabee yaa ni de bel baa
rel. Ni gabe der
\v 16 lat nu cha nu der de riidz nu cuic gyel mbañ, gun
ornu cyid Crisht tuubaꞌ tir, orzeꞌ ya̱ tonaꞌ la gyet lagya̱
nu nac coz nu bicy der, gun orzeꞌ gabe nu wansu leewa̱
gyishlombecy ii, nunu wangyicy leewa̱ riiñ nim.
\v 17 De ru na der gal nu na tub gun nu rbic der ni
Crisht nu nac nu ricy cup der consuel lom. Ndeꞌ nu benu
cut dey ya̱ nu nac nu ricy ya̱ riiñ ni Ñgyoozh nu rlocyuuba̱
der, ndeꞌ nañ gal na nu rica̱ tub gun ni Ñgyoozh tublaazh
la nu gun ni de ru. Ndeꞌ nu yet lagya̱, nunu gyet lagy
du̱ de ru nu nac de coz nu yet lagy der.
\v 18 Niꞌ de ru gyet lagy der nu ya̱. Gyet lagy den tublaazh
la.
\s Dela deꞌ zir mbecy nu nac ub ziꞌl dey zuy shcab
\p
\v 19 Benu Shuaan den Jesucrisht cuic mi lugaar, ya̱ rlagya̱
nu zuu nez gyiilya̱ Timoteo cyid yu lo der, gun ornu cush
cyay, orzeꞌ gad baloor ne̱ ornu gyeña̱ la ricy der.
\v 20 Sac cyuꞌ zir mbecy nu rcyiiñ du̱ ii nu zuy shcab
gal nu ya̱ zu̱ shcab nu nac de ru. Nomaas Timoteo ni mod
zuy shcab nu nac de ru. Nunu tub zi la yu zeꞌ rishli
ca ic yu der.
\v 21 Gun dela deꞌ zir mbecy nu nac ub ziꞌl dey zuy
shcab. Wacsu dey shcab nu nac de coz nu rlagy Jesucrisht.
\v 22 Tees de ru bi rad lagy der nu Timoteo nac yu mbecy
nu ricy paa. De ru rad lagy der nu bicy yu riiñ nu ya̱
gal nu ricy tub yu nguzh nu uz yu ornu pshaal de̱ de
riidz nu sac ni Jesucrisht.
\v 23 Ndeꞌ nu ya̱ rlagya̱ zeeda̱ yu nu cyid yu lo der ornu
bi byuꞌ bee la na coz nu gyicy nu dey ya̱.
\v 24 Nunu drish lo̱ nu Shuaan den Jesuuz gyicy mi nu
niꞌ ya̱ yap gyiilya̱ lo der.
\p
\v 25 Ya̱ rnii to̱o̱ nu rlagy ñi nu zeeda̱ biicy na Epafrodito
nu cyid yu lo der na. Yu ii bicy nuy ya̱ riiñ ni Ñgyoozh,
nunu bzu fert yu nuy ya̱ lo de mbecy nu rzi lagy lom.
Nunu blocyuub yu ya̱ gal nu mnii too der ornu bzeed der
yu nu biid yu lo̱.
\v 26 Ya̱ gzuu neza̱ yu, gun ric la añ niy nu rlagy yu
gzac yu dela der. Nunu deet guc añ niy, gun güeñ der
nu gurat yu.
\v 27 Ni gurat yu, nunu sñuu miiñ la bi gut yu. Tees
wangat yu, gun Ñgyoozh gushni lagy mi yu. Nunu walab
ub ziꞌl yu gushni lagy Ñgyoozh, sinu niꞌ ziꞌl gazaꞌ ya̱
gushni lagy mi, gun orzeꞌ cueꞌ nu shni gaꞌ zir gyicya̱.
\v 28 Ndeꞌ nu rlala̱ nu zuu neza̱ yu nu cyid yu lo der,
gun orzeꞌ gyet lagy der ornu gzac der yu tuubaꞌ tir.
Orzeꞌ gyabeñ ñuu gyicy shni̱.
\v 29 Gyet lagy der nunu nap gyicy nu der yu ornu griy,
gal nu yad ñi nu gyicy nu der de bicy ru nu ricy cup
consuel lo Shuaan den Jesucrisht. Pca lagy der lo cyu
ziꞌl mbecy nu na gal nu na yu ii,
\v 30 gun se nu ñgyat ziꞌl yu par nu dzi fert bicy yu
riiñ ni Crisht. Bzu lay ub yu lo rishdzidz, nu nac nu
blocyuub yu ya̱ por cuen ni de ru ni de coz nu wangac
gyicy der.
\c 3
\s Mbecy nu gyicy cup consuel lo Crisht, yu zeꞌ yu nu cyib Ñgyoozh cyi
\p
\v 1 Ndeꞌ nu de ru bicy na, bet lagy der nu nac nur Jesucrisht.
\p Ya̱ wagazeeda̱ ne̱e̱ lo der tuubaꞌ tir laabaꞌ de coz nu
bi mne̱e̱, nunu de coz nu mne̱e̱ locyuub ñi der nu cueꞌ gyicy
dza mbecy der.
\v 2 Cuidad der nu de mbecy nu na gal nu na che̱ꞌ, de
yu nu rlyuu de coz fals, de yu nu rnu cuerp ni ornu rcaay
beey sircunsision par nu gabe nu nac yu mbecy ni Ñgyoozh.
\v 3 Tees de ub na na den gal nu na mbecy nu rishli
ca beey sircunsision, gun de ub na rishli nac naa ni
Ñgyoozh. Nac naa nim, gun Espiriit Yon nim rlocyuub mi
uub na nu caan mi. Nac naa nim, gun Jesucrisht ricy mi
nu yet lagy na. Nac naa nim, gun wagyicy cup na consuel
lo ub ziꞌl na par nu gruu mbañ naa.
\v 4 Gun bi bicy na nu gac gyicy cup na consuel lo ub
ziꞌl na par nu gruu mbañ na, orzeꞌ niꞌ ya̱ gac gyicy cupa̱
consuel lo uba̱. Benu ca ziꞌl na mbecy rnii tooy nu gac
gyicy cup yu consuel lo ub ziꞌl yu, nunu ndeꞌ gyicy ñi
nu gruu mbañ yu, orzeꞌ ya̱ ricy cup zira̱ raso̱o̱ nu ni gyicy
cupa̱ consuel lo uba̱, benu gyicya̱.
\v 5 Gun pcaa dey beey sircunsision cuerp ne̱ ornu bzaꞌ
shuñ dzi nu gula̱. Naca̱ nez mbecy Israeel. Famil ne̱ bruuy
lat nez Benjamiing. Ya̱ naca̱ mbecy Israeel, nunu de mbel
ne̱ nac yu mbecy Israeel. Ya̱ guca̱ mbecy fariseo, gun tonaꞌ
la bicy pa̱a̱ nu dela leey ni de mbecy Israeel.
\v 6 Ya̱ tonaꞌ la bzu ferta̱ nu de mod nu rzeña lagy de
mbecy Israeel, gashtal psheed zi̱ de mbecy nu ricy cup
consuel lo Jesucrisht. Ya̱ tonaꞌ la seꞌñ bicya̱ nu leey
ni de mbecy Israeel, nunu warusu ni tub la mbecy nu riib
yu cyi ica̱. Ndeꞌ nu ricy cup zira̱ raso̱o̱ nu gyicy cupa̱
consuel lo uba̱, bi bicy na nu ni ñgyicya̱.
\v 7 Tees na rad lagya̱ nu dela coz nu guze̱e̱ nu dzi sac
zeꞌ, dela ndeꞌ wacyiiñ ñi, gun dzi zir sac Crisht par
de nu ndeꞌ.
\v 8 Nunu walab de ndeꞌ ziꞌl coz nu a̱ꞌ sac, sinu niꞌ
dela coz nu bicya̱ a̱ꞌ sac ñi, gun dzi zir sac ñi nu yuꞌ
lo̱ Shuaan den Jesucrisht. Par nu nac mi bduneꞌ dela
coz ne̱. Nunu ya̱ ricya̱ nu de coz zeꞌ nañ gal nu na toop,
gun orzeꞌ gyicya̱ gan gaca̱ ni Crisht.
\v 9 Nunu ya̱ nac du̱m. Gazeꞌ nu Ñgyoozh gyicy mi ya̱ par
mbecy nu sac cyi. Walab nu nac nu ricy pa̱a̱ nu leey nim,
ndeꞌ nu gyicy mi ya par mbecy nu sac cyi, sinu nu ricy
cupa̱ consuel lo Crisht. Gun Ñgyoozh bi mniim nu bi ricy
mi de mbecy par mbecy nu sac cyi nu nac nu gyicy cup
dey consuel lo Crisht.
\v 10 Coz nu rlagya̱, ndeꞌ nu nap chuꞌ lo̱ Crisht. Rlagya̱
nu gyicy nu Ñgyoozh ya̱ coz ily gal nu bicy num Jesuuz
ornu bicy mi nu byabañ mi. Rlagya̱ nu gzac zi̱ gal nu
bzac zi Crisht, nunu gaca̱ gal nu na tub mbecy nu gut
ornu gut mi.
\v 11 Gun ya̱ drish lo̱ nu gazaꞌ ya̱ gyabaña̱ ornu gyabañ
de mbecy gut.
\s Ricy Baly fers, gun orzeꞌ gyicy yu gan iy nu gyabic Ñgyoozh
\p
\v 12 Walab nu bi bicya̱ gan nu bi byaca̱ gal mod nu rlagya̱
nu gaca̱. Walab nu sac falt ne̱. Tees rloo lo̱ nu gyaca̱
gal mod nu rlagy Crisht nu gaca̱ ornu pcuim ya̱ nu gaca̱
nim.
\v 13 Der bicy na, ya̱ walab nu rne̱e̱ nu bi bicya̱ gan.
Ya̱ wagyicy cuena̱ꞌ de coz nu bded par ich, sinu rloo lo̱
nu gyicya̱ gan par lo.
\v 14 Ricya̱ tub fers nu shupa̱ laza̱, gun orzeꞌ gyicya̱
gan i̱ nu cuic Ñgyoozh ni den nu nac Jesucrisht. Gun
par ndeꞌ blosum de ub na.
\p
\v 15 Dela mbecy nu byafert nu de coz ni Ñgyoozh rlagy
ñi nii too dey nu nac de coz zeꞌ gal nu rnii to̱o̱ ya̱.
Benu tub mbecy reñaꞌ rnii tooy par ya̱, tees ca ni gaal
lyuu Ñgyoozh loy ca na coz nu rishli.
\v 16 Tees de ub na rlagy ñi nu seꞌñ gyicy na nu de
coz nu bi gud lagy na.
\p
\v 17 Der bicy na, bicy der gal nu ricy ya̱, nunu ca ic
der de yu nu ricy gal nu bicy de̱ nu de yu nu gusa nu
ya̱.
\v 18 Gun zañ tir bi mne̱e̱ lo der, nunu na nu nis urlo̱
rne̱e̱ lo der, nu tonaꞌ la yuꞌ mbecy nu zay contr ni de
coz nu bzac Crisht lo cruuz.
\v 19 De yu zeꞌ nit lo dey gabily. De mbecy zeꞌ de gyel
bizh nac ñii ñgyoozh ni dey, nunu ornu ricy dey coz toꞌ
lo, lugaar nu gat lo dey ca nu ricy dey gyel leꞌ niy.
De yu zeꞌ coz ni gyishlombecy ziꞌl ii zu dey shcab.
\v 20 Tees de ub na wagyicy na gal nu ricy de yu zeꞌ,
gun de ub na gyibaa, ndeꞌ ledz na. Nunu rlez den biñ
nu ruu gyibaa cyid mi nu co mbañ mi de ub na. Mi zeꞌ
Shuaan den Jesucrisht.
\v 21 Mi zeꞌ chaam cuerp gyidz ii ni den. Gyicy mi nu
gyac ñi gal nu na cuerp lily ni ub mi. Nunu ni gyicy
mi nu nac nu gac gyicy mi coz ily, nunu laabaꞌ nu nac
nu dzi cyiiñ mi nu gyicy mi coz ily, ndeꞌ nu chetib ic
mi dela coz.
\c 4
\s Dub laa tiem bet lagy der nu nac nu der Shuaan den Jesuuz
\p
\v 1 Der bicy na, ya̱ rca̱ de ru. Nu gusht ne̱ guc nu gac
na na la zaca̱ der. De ru ricy der nu dzi nap zu lagya̱.
Nu nac de ru rabee nu nap bruu riiñ nu ricya̱. Ya̱ rlagya̱
nu zaab gzu fert la der como de ru bi nac nu der Shuaan
den Jesuuz.
\p
\v 2 Ya̱ rnishba̱a̱ lo de ru, Bod nu Síntique, nu gyicy der
se tub ziꞌl shcab. Chuꞌ der gal nu rzuꞌ mbecy nu bily
mi nu nac Shuaan den Jesuuz.
\p
\v 3 Zeꞌ ru losa̱ꞌ nu tonaꞌ la ricy paa, losaꞌn nu bicy
na riiñ ni Ñgyoozh tublaazh la, ya̱ rlagya̱ nu locyuub
ru de biñ mñaa zeꞌ nu gyicy nap dem riidz nu losaꞌm.
De biñ mñaa zeꞌ fert bicy dem riiñ nu ya̱ par nu shaal
de̱ de riidz nu sac ni Jesuuz. Bicy de̱ riiñ zeꞌ tublaazh
la nu Clement gal nu deꞌ zir mbecy nu bicy riiñ nu ya̱.
Dela de yu zeꞌ bi taꞌ nu la dey lo libr ni Ñgyoozh, libr
zeꞌ nu taꞌ nu la de mbecy nu ca lo cuen nu cui mbañ.
\p
\v 4 Dub laa tiem zaab bet la lagy der gyiꞌ nu nac nu
der Shuaan den Jesuuz. Nunu cush cya̱ꞌ ga̱ꞌ nu ne̱e̱ lo
der tuubaꞌ tir bet lagy der.
\v 5 Bicy der nu gad lagy dela mbecy nu nac der mbecy
nu nap ri lardoo. Pcaa ic der nu sñuu ga shuub dzi nu
cyid Shuaan den Jesuuz.
\p
\v 6 Cueꞌ sug ic der nu nac ni tub la coz, sinu ornu
deet rac nañ lardoo der, orzeꞌ mnii nu der Ñgyoozh. Orzeꞌ
bdiiñ der coz nu rlagy ru lom. Nunu briic der gras nim.
\v 7 Orzeꞌ Ñgyoozh gyicy mi nu cheti ri añ ni der. Nunu
de mbecy rila wagyet lag dey cuen lagu nu gac cheti
ri añ ni der. Ndeꞌ gyicy ñi nu wac deet nañ lardoo der
nunu wac deet nañ shcab ni der nu nac nu der Jesucrisht.
\s Bzu der shcab nu nac coz nap
\p
\v 8 De ru bicy na nu dzi rca̱, laab nii la riidz nu ne̱e̱
lo der. Mnii too der nu nac la ziꞌl coz nap, nunu nu
nac la ziꞌl coz nu gyicy ñi nu gyed gyel mbecy. Gush
der shcab nu nac la ziꞌl coz nu seꞌñ. Gush der shcab
nu nac la ziꞌl coz nu sac falt ni. Gush der shcab nu
nac la ziꞌl coz cyit na. Gush der shcab nu nac la ziꞌl
coz nu lily na. Orzeꞌ gush der shcab nu nac la ziꞌl
coz nap, gal nu de coz nu gyicy nu gyed gyel mbecy.
\p
\v 9 Bicy der dela coz nu ya̱ blyu̱u̱ ni der gal nu de
riiñ nu bdu̱ꞌ yaa der. Bicy der dub gal mod nu güeñ der
de riidz nu mne̱e̱, nunu dub gal na mod nu bzaac der ni
de coz nu bicya̱. Benu gyicy der dela ndeꞌ, orzeꞌ Ñgyoozh,
biñ nu ricy nu rzeti ri añ ni der, gac num de ru.
\s De mbecy Filipos bzeed yu gun par Baly
\p
\v 10 Ya̱ tonaꞌ la yet lagya̱ nu nac Shuaan den Jesuuz,
gun rabee nu bi byezaꞌ gaꞌ lagy der ya̱ tuubaꞌ tir. Walab
nu rne̱e̱ nu rishli mnit lagy der ya̱, sinu rne̱e̱ nu wangad
mod ni der nu locyuub ru ya̱.
\v 11 Walab nu ni rne̱e̱ par nu nac nu ricy falt la coz
ne̱, gun ya̱ bi gube̱e̱ lac mod gaca̱ mbecy nu nap zu lagy
mas lac ziꞌl mod nu rdeda̱.
\v 12 Bi neña̱ ornu wagad sheñ. Nunu bi neña̱ ornu rad
sheñ. Lac ziꞌl mod nu rcyiiña̱, bi gube̱e̱ lac gaca̱ mbecy
nu nap zu lagy. Ya̱ bi gube̱e̱ lac gaca̱ mbecy nu nap zu
lagy ornu dza naña̱, lac gaca̱ mbecy nu nap zu lagy ornu
rana̱, lac gaca̱ mbecy nu nap zu lagy ornu yuꞌ sheñ la
coz ne̱, lac gaca̱ mbecy nu nap zu lagy ornu sac ñi ne̱.
\v 13 Ya̱ gac gagye̱ la ziꞌl coz nu cyid nu nac Crisht
nu rbic mi fers ne̱.
\v 14 Tees de ru tonaꞌ la nap bicy nu der ya̱ ornu blocyuub
der ya̱ lat nu bzac zi̱.
\p
\v 15 De ru, mbecy Filipos, de ru bi neñ der nu lat nu
pshaala̱ riidz ni Ñgyoozh nu loga la ornu bru̱u̱ lo de
yu ni Macedonia, wancyuu su ni tub mbecy nu mbic yu tiñ
nu cyiiñ ne̱, sinu de ru ziꞌl briic ru. Ni bicy nu der
ya̱ nu nac nu niꞌ ya̱ blocyuuba̱ de ru nu nac de coz ni
Ñgyoozh.
\v 16 Mas lat nu pcyiiña̱ Tesalónica, gyedz nu ri lo yu
ni Macedonia, ti la be la tir bzeed der tiñ par nu blocyuub
der ya̱.
\v 17 Walab par nu rnii to̱o̱ nu gad gun ne̱, ndeꞌ nu ni
rne̱e̱, sinu nu rlagya̱ nu gyicy der gan sheñ zir coz nap
par lo Ñgyoozh.
\v 18 Ya̱ bi ricy cupa̱ dela coz nu rlagy ñi, nunu gashtal
drusubaꞌ lañ ne̱. Guud dela coz nu cyiiñ ne̱, gun Epafrodito
bri nuy de coz nu bzeed der. De coz nu bzeed der nañ
gal nu na coz zguul, tub gun nu “O” mnii Ñgyoozh nu
byash mi, nunu bet lagy mi.
\v 19 Ñgyoozh cuic zaꞌ lam dela coz nu ricy falt ni
der nu nac nu tonaꞌ la coz ily de coz cyit na nu ricy
cup mi. Ni gyicy mi num de ru nu nac Jesucrisht.
\v 20 ¡Orzeꞌ rlagy ñi gyabic den gyel mbecy ni Ñgyoozh,
Uz den, tub la! ¡Laab ni gac ñii!
\s Laab ndeꞌ la ñgyoozh nu zeed Baly
\p
\v 21 Gab der de mbecy ni Ñgyoozh shnuy por cuen ne̱,
de yu nu nac nu Jesucrisht. De bicy na nu rcyiiñ nu
ya̱ ii zeed dey ñgyoozh ni der.
\v 22 Nunu niꞌ ziꞌl de mbecy ni Ñgyoozh nu yuꞌ ii zeed
dey ñgyoozh ni der. Nunu nu loga la de yu nu zu riiñ
yuꞌ rey César, de yu zeꞌ zeed dey ñgyoozh ni der.
\p
\v 23 Shuaan den Jesucrisht gyicy mi faboor nu nap gyicy
num dela der.