\id 2TH
\h 2 Tesalonicenses
\toc1 2 Tesalonicenses
\mt1 2 Tesalonicenses
\mt2 Gyicy cyup nu bzeed Baly lo de mbecy ni Crisht nu yuꞌ Tesalónica
\c 1
\s Baly zeed yu ñgyoozh ni de mbecy Tesalónica
\p
\v 1 Ya̱ Baly, nu Silvano, gal nu Timoteo tublaazh la zeed
de̱ gyicy ii lo de ru bicy na nu nac Crisht nu yuꞌ gyedz
Tesalónica. De ru mbecy ni Ñgyoozh, Uz den, gal nu Shuaan
den Jesucrisht.
\p
\v 2 Ñgyoozh Uz den nunu Shuaan den Jesucrisht gyicy
mi faboor nu nap gyicy num de ru, nunu gyicy mi nu cheti
ri añ ni der.
\s Ñgyoozh gri beem ni de mbecy cyi ornu cyid Crisht tuubaꞌ tir
\p
\v 3 Der bicy na, rlagy ñi nu dub laa tiem gric de̱ gras
ni Ñgyoozh nu nac de ru gal nu yad ñi, gun tub dzi ga
zaab gyicy cup zir der consuel lo Crisht, nunu zaab ca
zir der de losaꞌr.
\v 4 Ndeꞌ nu de̱ ya̱ ryabica̱ gyel mbecy ni der ornu rdo̱
riidz nu de mbecy ni Crisht nu yuꞌ gal reñaꞌ lugaar.
Ryabic de̱ gyel mbecy ni der nu nac nu rzu fert der, nunu
nu nac nu ricy cup der consuel lo Crisht lat nu rshet
zi mbecy de ru nunu lat nu rzac deet der.
\v 5 Nu nac de nu ndeꞌ, rabee nu Ñgyoozh dzi seꞌñ ricy
mi ornu ri beem ni dela mbecy, gun orzeꞌ niim nu yad
ñi ni der nu chuꞌr lat de mbecy nu riib ic mi, gun de
ru rzac zi der nu nac nu riib ic mi der naa la.
\p
\v 6 Gun Ñgyoozh dzi seꞌñ ricy mi. Ndeꞌ nu gyicy mi
nu gzac zi de mbecy nu rshet zi de ru,
\v 7 nunu gyicy mi nu nap chesu nap lagy de ru, de mbecy
nu rzac deet. Niꞌ ziꞌl gyicy num de̱ ya̱. Ndeꞌ gyicy mi
ornu shuub dzi nu gruu zac Shuaan den Jesuuz. Gruum
gal gyibaa lat lyush gyi nu cyid mi. Nunu cyid mi lat
de anc nu dzi rcyiiñ nim.
\v 8 Orzeꞌ cyid mi par nu cuic mi cashtig ni de mbecy
nu a̱ꞌ yuꞌ lo Ñgyoozh, gal nu ni de yu nu wacsuub gyidag
de riidz nu sac ni Shuaan den Jesuuz.
\v 9 Zeꞌ cashtig nu cuic mi zeꞌ, ndeꞌ nu shiñ gzac dey
tub la. Orzeꞌ chuꞌ dey reñaꞌ lugaar. Wayuꞌ dey zeꞌ nu
rcyiiñ Shuaan den Jesuuz. Ni wayuꞌ dey zeꞌ nu yuꞌ gyel
lily nim. Ni wayuꞌ dey zeꞌ nu ricy mi coz ily.
\v 10 Cuic mi cashtig ni dey ornu cyid mi gal dzi nu
blosu Ñgyoozh. Gun orzeꞌ dela mbecy ni Crisht gyabic
dey gyel mbecy nim, nunu cha nu ic dey nu dzi zily nac
mi. Niꞌ ziꞌl gyicy gazaꞌ de ru, de mbecy nu guña lagy
de riidz nu mne̱e̱ de̱.
\p
\v 11 Ndeꞌ nu zaab rdiñ la̱ de̱ lo biñ nu nac Ñgyoozh
ni den nu gyicy mi nu gyap der nu gac ru mbecy nu blosum
nu gruu mbañ. Mi zeꞌ gyicy mi nu gac zaꞌ lo der dela
coz nap nu rlagy ru gyicy ru, gal nu de coz nu gyicy
der nu nac nu ricy cup ru consuel lo Crisht. Ni gyicy
mi nu nac nu dzi fert mi.
\v 12 Ni mod rne̱e̱ du̱ de̱ Ñgyoozh, gun orzeꞌ gyabic mbecy
gyel mbecy nim nu nac de ru, nunu gyabicaꞌ dey gyel mbecy
ni der nu nac mi zeꞌ. Ni gyicy dey dub gal nu na faboor
nu ricy Ñgyoozh gal nu Shuaan den Jesucrisht num de
ru.
\c 2
\s Ornu cyid Crisht tuubaꞌ tir
\p
\v 1 Na ne̱e̱ lo der bicy na ni de riidz nu cyid Shuaan
den Jesuuz tuubaꞌ tir, gal nu de riidz ni nu gyatublaazh
den dun mi. Rnishba̱a̱ de̱ lo der nu
\v 2 cueꞌ gzaan der nu can mbecy shcab ni der. Ni cueꞌ
zaan der nu chiib dey de ru nu nac nu rnii dey nu bi
biid Shuaan den Jesucrisht. Dzi ga ni nii tub mbecy
nu rnii por cuen ni Ñgyoozh. O dzi ga ni mod za riidz
ni tub mbecy nu rshaal riidz nim. O dzi ga nii mbecy
lo der nu gyicy nu bzeed de̱ nu ni rniiñ.
\v 3 Tees cueꞌ zaan der nu guu mbecy ru ni tub la mod.
Gun anzir nu shuub dzi zeꞌ, orzeꞌ nid ruꞌ mbecy lo Ñgyoozh,
nunu gruu zac tub mbecy nu cha contr nim. Mbecy zeꞌ
bi ca lo cuen nu nit loy.
\v 4 Yu zeꞌ chay contr ni dela coz nu gyicy mbecy par
ñgyoozh. Dela coz nu driib zily mbecy chay contr niñ.
Nunu gashtal nañ yuꞌ nu driib zily mbecy Ñgyoozh zeꞌ
chesub yu. Gyicy yu nu nac yu ñgyoozh.
\p
\v 5 ¿A wagyezaꞌ lagy der nu ya̱ bi bzata̱ mbecy zeꞌ lo
der lat nu pcyiiña̱ lat der?
\v 6 Na de ru bi rad lagy der nu cyu ricy nu gabee nigul
cyuu zac yu zeꞌ. Tees ornu shuub tiem niy, gazeꞌ nu gruu
zac yu.
\v 7 Orzeꞌ mas bi yuꞌ zañ mbecy nu bi ricy coz a̱ꞌ nap,
tees biñ nu ricy nu gabee nigul gruu zac mbecy a̱ꞌ nap
zeꞌ, mi zeꞌ zaab ricy lam riiñ nu cueꞌ gruu zac yu gashtal
co la Ñgyoozh mi gyishlombecy.
\v 8 Orzeꞌ dzi zeꞌ gruu zac yu. Na ornu cyid Shuaan
den Jesuuz tuubaꞌ tir, orzeꞌ cut mi yu nu nac bi nu griib
ruꞌm. Nit lom yu ornu cyid mi tuubaꞌ tir nu gyel lily
nim.
\v 9 Tees lat nu chesay gyishlombecy ii, orzeꞌ nuras
locyuub yu mbecy zeꞌ nu chay contr ni Ñgyoozh. Gyicy
nuras nu cyiiñ mbecy zeꞌ nu gyicy yu coz ily. Gyicy
yu de lo la nusuriidz fals, gal nu de coz nu cha nu ic
mbecy.
\v 10 Nunu de lo la mod guuy de mbecy nu bi ca lo cuen
nu nit lo, gun de yu zeꞌ wangalagy dey niiy “O” ni
de coz rishli. Ni wangalagy dey nu ca dey ñi. Gun benu
ñgyicy dey ndeꞌ, orzeꞌ gruu mbañ dey.
\v 11 Ndeꞌ nu Ñgyoozh zaan mi nu gadza dey, gun orzeꞌ
cheña lagy dey ni de coz rguu.
\v 12 Ndeꞌ nu Ñgyoozh niim nu yuꞌ falt ni de mbecy nu
wancheña lagy ni de coz rishli, de yu nu bet zir lagy
coz a̱ꞌ nap.
\s Ñgyoozh bi pcuim de mbecy nu gruu mbañ
\p
\v 13 Der bicy na, dub laa tiem rlagy ñi nu gric de̱ gras
ni Ñgyoozh nu nac de ru mbecy nu razañ lagy Shuaan den
Jesuuz. Gun Ñgyoozh pcuim de ru nese nu loga la nu gruu
mbañ der. Orzeꞌ Espiriit Yon nim bicy mi ñii, ornu bicy
mi nu byac der mbecy nu bi zu chu par Ñgyoozh. Ni mod
na der byac ru nu nac nu ricy cup der consuel lo de
riidz rishli nim.
\v 14 Gun Ñgyoozh blo sum de ru nu ni gzac der, nunu
ni bzac der nu nac de riidz nu sac nim nu pshaal de̱
lat der. Nunu blosum der par nu zac lor de gyel lily
ni Shuaan den Jesucrisht.
\p
\v 15 Ndeꞌ nu na, der bicy na, bzu fert der nu nac de
riidz rishli nu blyu̱u̱ ni der, nunu cueꞌ laa yaa der ñii.
De ndeꞌ mne̱e̱ de̱ lat nu rcyiiña̱ lat der, nunu gal nu mne̱e̱
lo gyicy nu bzeeda̱ lo der.
\v 16 Orzeꞌ ub la Shuaan den Jesucrisht gal nu Ñgyoozh
Uz den cuic mi consuel ni der. Gun mi zeꞌ nac mi biñ
nu rca de ub na. Nunu nu nac faboor nim, orzeꞌ cuic mi
tub consuel nu rila walazh ni den. Nunu mi zeꞌ gyicy
mi nu grish lon nu gruu nap na.
\v 17 Orzeꞌ de mi zeꞌ cuic zaꞌ lam consuel ni der. Nunu
gyicy dem nu gyafert der, gun orzeꞌ dela coz nu gyicy
der gal nu de coz nu gniir, nap gruuñ ni der.
\c 3
\s Cyiñ der lo Ñgyoozh nu nac de̱ ya̱
\p
\v 1 Zeꞌ laab nii la stub coz nu ne̱e̱ lo der bicy na,
ndeꞌ nu cyiñ der lo Ñgyoozh nu nac de̱ ya̱. Cyiñ der lom
nu dzach grush las de riidz ni Shuaan den Jesuuz dela
lugaar nunu cyiñ der lom nu ca lagy de mbecy loñ gal
nu guc lat de ru.
\v 2 Niꞌ ziꞌl cyiñ der lom nu cueꞌ zaan mi nu shiñ gyicy
nu de mbecy a̱ꞌ nap de̱ ya̱. Gun walab dela mbecy ricy
cup dey consuel lo de riidz ni Shuaan na.
\v 3 Tees Shuaan den Jesucrisht, mi zeꞌ nac mi biñ nu
ricy paa. Nunu mi zeꞌ cuic mi fers ni der. Nunu co chum
der lo nuras a̱ꞌ nap.
\v 4 Nunu mi zeꞌ ricy mi nu gyicy cup de̱ consuel lo
der, gun rad lagy de̱ nu ricy der de coz nu mne̱e̱ de̱, nunu
segur la zaab gyicy la der ñii par lo.
\p
\v 5 Na Shuaan den Jesuuz locyuub mi der nu ca der de
mbecy, gal nu rca Ñgyoozh den, nunu cuic mi fers ni der
par nu gagye der ornu gzac zir.
\s Rlagy ñi gyicy den riiñ
\p
\v 6 Der bicy na, ya̱ rne̱e̱ lo der nu nac rishbeey ni Shuaan
den Jesucrisht nu gruu chu der lo ca ziꞌl na bicy na
nu walagy gyicy riiñ, gal nu lo de yu nu wagyicy gal
nu rnii de riidz nu blyu̱u̱ de̱ ni der.
\v 7 De ru nap rad lagy der nu rlagy ñi gyicy der gal
nu bicy de̱. Walab nu wangyicy de̱ riiñ lat nu pcyiiñ
de̱ lat der.
\v 8 Nunu wanta̱w leew de̱ gyit, sinu brish de̱ gyiꞌñ. Lugaar
nu gazed de̱, ca nu bloo lo̱ de̱ nu bicy de̱ riiñ dzi rel
la, gun wangalagy de̱ nu riiba̱ de nu ndeꞌ ic der.
\v 9 Yad ñi nu diñ de̱ nu da̱w lo der. Tees wantiñ de̱
gun rlagy de̱ nu gyicya̱ tub mod nap par nu zac der, gun
orzeꞌ gyicy der gal nu bicy de̱ ya̱.
\v 10 Lat nu pcyiiñ de̱ lat der, i mod mne̱e̱ de̱ lo der:
“Mbecy nu washet ic nu gyicy riiñ, orzeꞌ yu zeꞌ cueꞌ
goy gyit.”
\v 11 Bi neñ de̱ nu yuꞌ la be mbecy lat der nu wagyicy
yu riiñ. Se la la coz ricy dey. Nomaas nu rneꞌ ziꞌl
ruꞌ dey lat asunt ni mbecy.
\v 12 Orzeꞌ nu nac rishbeey ni Shuaan den Jesucrisht,
ya̱ rne̱e̱ lo de mbecy zeꞌ nunu rdu̱ꞌ riiñ yaa dey nu cueꞌ
nid ruꞌ dey, sinu gyicy dey riiñ par nu gad coz nu gow
dey.
\p
\v 13 Der bicy na, cueꞌ gazed der nu gyicy der de coz
nap.
\v 14 Benu ca na tub mbecy walagy yu zuub gyidag yu
de riidz nu rne̱e̱ lo der lo gyicy ii, orzeꞌ bduꞌ cuen
der yu, nunu cueꞌ gac nu der yu. Gun orzeꞌ gat loy.
\v 15 Tees cueꞌ gyicy ruy par losaꞌ yuur, sinu byoo rishloy
gal nu ricy nur bicy ru.
\p
\v 16 Orzeꞌ Shuaan den Jesuuz, biñ nu rbic gyel ri zu,
zeed mi gyel ri zu lat der dub laa tiem nunu dela mod.
Mi zeꞌ gac num dela der.
\p
\v 17 Ya̱ Baly, zeeda̱ ñgyoozh ni der nu letr nu rca̱a̱ nu
ya̱a̱. Ni mod rca̱a̱ nu la̱ lo dela gyicy nu rzeeda̱ lo mbecy.
Ni mod rca̱a̱.
\v 18 Shuaan den Jesucrisht gyicy mi faboor nu nap gyicy
num dela der.