\id JAS
\h Santiago
\toc1 Santiago
\mt1 Santiago
\mt2 Gyicy nu bzeed Santiag lo de mbecy Israeel
\c 1
\p
\v 1 Ya̱ Santiag, tub yu nu ricy coz nu rnii Ñgyoozh nunu
coz nu rnii Shuaan den Jesucrisht. Shnu̱ de ru, de trocyup
nac nez de mbecy Israeel nu brush las dutuub la gyishlombecy.
\s Shcab nu druu lo Ñgyoozh
\p
\v 2 De ru bicya̱, gush der shcab nu dzi ga nap ornu gzac
der lo de lo la preb,
\v 3 gun rad lagy der nu ornu gyicy der gan de preb
zeꞌ nu nac nu ricy cup der consuel lo Ñgyoozh, orzeꞌ
gac der mbecy nu gagye.
\v 4 Bicy der nu gagyer, gun orzeꞌ gyanap zaꞌ la der.
Nunu orzeꞌ gac der mbecy nu bi gul shcab ni, nunu gac
der mbecy nu wagyicy falt ni tub la coz ni.
\p
\v 5 Na benu ca na der sac shcab nir, orzeꞌ rlagy ñi
nu cyiñ der ñii lo Ñgyoozh. Orzeꞌ mi zeꞌ cuic mi shcab
ni der, gun Ñgyoozh cuic zaꞌ lam shcab ni mbecy, nunu
ni wayicy tañ mi ornu ni cuic mi.
\v 6 Ornu cyiñ der lom, orzeꞌ rlagy ñi nu gyicy cup der
consuel lom, nunu rila walagy ñi nu nii too der nu dzi
ga wayicy mi gal nu nii der. Mbecy nu ni nii too, yu
zeꞌ nay gal nu na nguuly ni nisyudoo. Bi rza nuñ ñi
par re par ii la.
\v 7 Yu nu ni na, cueꞌ la saꞌ lagy yu nu gad coz nu gruu
lo Ñgyoozh niy.
\v 8 Gun na la rnii tooy tub coz. Ina reñaꞌ coz bi rnii
gaꞌ tooy. Orzeꞌ a̱ꞌ fert yu nu de coz nu ricy yu.
\p
\v 9 Na de bicy na nu shni yuꞌ, rlagy ñi nu gyet lagy
yu ornu ricy zily Ñgyoozh yu.
\v 10 Nunu de bicy na nu guaniꞌñ, rlagy ñi nu gyet lagy
yu ornu Ñgyoozh niim loy nu se la la sac yu. Gun yu
guaniꞌñ nay gal nu na tub gyee ni gyish, gun wagagyee
tuñ ñi.
\v 11 Gun ornu driib doo, orzeꞌ yet nu zig, orzeꞌ rawach
gyish zeꞌ. Orzeꞌ rlag gyee niñ. Orzeꞌ nit lo nu cyit
nañ. Niꞌ ziꞌl yu guaniꞌñ ded niy lat nu rded yu dalje̱z
niy.
\s Zu mbecy shcab ti gyicy yu coz cyi
\p
\v 12 Dzi ni de mbecy nu ragyee ornu rac preb yu, gun
ornu gyicy yu gan de preb zeꞌ, orzeꞌ Ñgyoozh gyabic mi
iy. Iy zeꞌ, ndeꞌ nu cui mbañ dey nuy mi tub la. Ndeꞌ
tub i dey nu mniim nu segur la cuic mi ni dey benu rca
dey mi.
\v 13 Benu ca na mbecy nii tooy nu gyicy yu coz cyi,
orzeꞌ cueꞌ niiy nu: “Ñgyoozh bicy mi nu ni rnii to̱o̱”,
niiy. Gun Ñgyoozh rila wagnii toom ti gyicy mi cyi.
Nunu ni wagyicy mi nu nii too mbecy nu gyicy dey cyi.
\v 14 Sinu de coz a̱ꞌ nap nu yuꞌ nañ lardoo mbecy ricy
ñi nu rlagy yu shiñ gyicy yu. Ndeꞌ nu rnii too dey nu
gyicy yu cyi.
\v 15 Na ornu cuic dey lugaar nu shiñ gnii tooy, orzeꞌ
ndeꞌ gyicy ñi nu ricy dey cyi. Nunu ornu bi gubee dey
nu ricy yu cyi zeꞌ, orzeꞌ ndeꞌ gyicy ñi nu wazacaꞌ dey
lo Ñgyoozh, nunu gat dey.
\p
\v 16 Der bicy ya̱, cueꞌ zaan der nu gadzar.
\v 17 Dela coz nap nunu dela coz nu sac falt ni nu bi
rad ni den, druuñ gal gyibaa. Druuñ gashtal lo la Ñgyoozh,
Uz na, biñ nu psaꞌ lagy dela gyi nu taꞌ baa. Mi zeꞌ rila
wadza nu nam ni ñu miiñ la.
\v 18 Briic mi gyel mbañ ni den nu nac riidz rishli
nim, gun ndeꞌ coz nu ub mi rlagy mi. Nunu orzeꞌ na den
gal nu na cosech nu pteꞌm loga la lo dela coz nu psaꞌ
lagy mi.
\s Mod nu chuꞌ mbecy ni Ñgyoozh
\p
\v 19 Ndeꞌ nu na der bicy na, pcaa ic der de coz nu rne̱e̱
lor. Tub ga la der rlagy ñi nu zu der altant par nu
zuub gyidag der ni de riidz nu rdunii. Tees guly gzu
der par nu niir, nunu gulyaꞌ gzu der par nu chaꞌ ic ru.
\v 20 Gun gyel chaꞌ ic ni mbecy rila wayicy ñi coz nu
gyedzuꞌ lagy Ñgyoozh.
\v 21 Ndeꞌ nu bzaan der dela coz bag, nunu bzaan der
dela cyi nu dzi bded ruꞌ gaꞌ la ricy der. Nunu “O”
mnii der ni de riidz nu bzeeñ Ñgyoozh nañ lardoor. Riidz
zeꞌ cyiiñ ñi gyicy ñi nu gruu mbañ der.
\p
\v 22 Cueꞌ nu zuub gyidag ziꞌl der riidz nim, sinu niꞌ
ziꞌl rlagy ñi nu gyicy yac der niñ. Gun benu nu zuub
gyidag ziꞌl der ñii, orzeꞌ laab ub ziꞌl der rguur ub
ru.
\v 23 Gun cyu ziꞌl mbecy nu rzuub gyidag ziꞌl de riidz
zeꞌ, zeꞌ wagyicy yac yu niñ gal nu rniiñ, orzeꞌ yu zeꞌ
nay gal nu na tub mbecy nu rgüii lo nu tub guan.
\v 24 Na ornu lazh güiiy loy la nay, orzeꞌ nez za ziꞌl
yu bi mniitaꞌ lagy yu la nay.
\v 25 Tees yuꞌ mbecy nu wagnit lagy yu de coz nu reñ
yu. Sinu nap zir rguꞌ cuen yu de leey ni Ñgyoozh nu
sac falt niñ, de leey nu gyicy nu gruu chuy lo cyi. Nap
rsyaꞌy leey zeꞌ, nunu ricy yac yu niñ. Orzeꞌ Ñgyoozh
gyicy mi nu gruu nap de coz nu ricy mbecy zeꞌ.
\p
\v 26 Benu tub mbecy rash yu shcab nu ricy yac yu de
coz nu rlagy Ñgyoozh, tees wagac gyub ic yu de coz nu
rniiy, yu zeꞌ rguuy laab ub yu. Nunu se la la sac ñi
niy mas ricy yu coz nu rlagy Ñgyoozh.
\v 27 Par Ñgyoozh, Uz den, i mod rlagy mi gyicy mbecy
benu rlagy yu mod nu seꞌñ nunu mod nu rishli: orzeꞌ
rlagy ñi nu locyuub dey de yu nguzh zi nu sac uz. Nunu
rlagy ñi nu locyuub dey de byud ornu deet rzac mi. Nunu
rlagy ñi nu cueꞌ shet ic dey nu gabag yu ni de cyi nu
yuꞌ gyishlombecy ii.
\c 2
\s Tub ziꞌl mod gyicy nu der dela mbecy
\p
\v 1 Der bicya̱, como ricy cup der consuel lo Shuaan den
Jesucrisht, biñ nu dzi lily na, walagy ñi nu reñ ga la
mod gyicy nu der tub ga mbecy dub gal nu na dey.
\v 2 Gyicy pee lan lat nu yuꞌ tublaazh der ruꞌña tub
mbecy guaniꞌñ gal nu tub mbecy zi. Mbecy guaniꞌñ zeꞌ
ri tub biꞌ or yaay nunu cyit na shab yu. Zeꞌ mbecy zi
zeꞌ cuiñ shab yu.
\v 3 Orzeꞌ nap ricy nu der yu nu nap na shab zeꞌ. Orzeꞌ
nii der gab ruy: “Ii bzub tub lugaar nap”, niir. Zeꞌ
orzeꞌ nii gaꞌr gab ru mbecy zi zeꞌ: “Bzu la ñuu zeꞌ
ga, o bzub la mas ñuu lo yu la ii”, nii der.
\v 4 Benu ni gyicy der, orzeꞌ reñ ga la mod ricy nu der
tub ga losaꞌr, nunu nu nac nu shiñ rnii too der, orzeꞌ
rcui der mbecy nu rnii nur.
\p
\v 5 Der bicy na, bzuub gyidag der. Ñgyoozh bicy mi nu
de mbecy nu gyel zi zu gyishlombecy ii, de yu zeꞌ guaniꞌñ
dey nu nac nu dzi ricy cup dey consuel lom, nunu gyicy
mi nu chuꞌ dey lat de mbecy nu riib ic mi, gun ndeꞌ gyel
nap nu mniim nu segur la cuic mi ni dela mbecy benu
ca dey mi.
\v 6 Tees de ru rboor gyel mbecy ni de mbecy zi. ¿A
walab nu de mbecy guaniꞌñ, de yu zeꞌ ricy yu nu deet
rzac ru? ¿A walab de yu zeꞌ rza nu dey de ru lo de fushtiz?
\v 7 ¿A walab de yu zeꞌ yu nu rnii zi ni Jesucrisht,
biñ nu rzat zi mbecy ornu rzat zi dey de ru?
\p
\v 8 Benu gyicy yac der gal nu rnii leey zub lo ni Ñgyoozh,
zeꞌ nu rniiñ: “Pca der losaꞌr gal nu rcar ub ru”, rniiñ,
benu ni ricy der, orzeꞌ nap.
\v 9 Tees benu reñ ga la mod gyicy nu der mbecy dub
gal nu nay, orzeꞌ ricy der cyi, nunu yuꞌ falt ni der par
lo leey ni Ñgyoozh.
\v 10 Gun benu tub mbecy rzuub gyidag yu ni dela coz
nu rnii leey, zeꞌ grusu tub coz nu wazuub gyidag yu, orzeꞌ
yu zeꞌ yuꞌ falt niy nu dela leey.
\v 11 Gun Ñgyoozh rniim: “Cueꞌ gal ru mbecy nu wanchelaar”,
rniim. Nunu laab mi rniim: “Cueꞌ cut ru losaꞌr”, rniim.
Orzeꞌ benu tub mbecy nu wagal losaꞌ nu wanchelaa, zeꞌ
cut yu losaꞌy, orzeꞌ yu zeꞌ nac yu tub yu nu yuꞌ falt
ni par lo leey.
\v 12 Orzeꞌ bicy cuidad der nu de coz nu gyicy ru, gal
nu de coz nu nii der, gun Ñgyoozh ri beem ni der mod
nu rnii leey nu bicy nu bruu chu den lo de cyi.
\v 13 Tees benu de mbecy wagashni lagy dey losaꞌy, orzeꞌ
niꞌ Ñgyoozh washni lagy mi dey ornu gri beem niy. Tees
de yu nu rashni lagy losaꞌ gruu nap dey tiem nu gri
beem ni dey.
\s De coz nu ricy mbecy ndeꞌ gyicy ñi nu gad lagy na ti ricy cup yu consuel
\p
\v 14 Der bicy na, ¿la ñuu cyiiñ ñi benu tub mbecy rniiy
nu ricy cup yu consuel lo Crisht, zeꞌ wagyicy yu ni tub
la coz nap? ¿A gac gruu mbañ yu nu nac nu ricy cup yu
consuel lom benu ni mod ricy yu? Rila wac gruu mbañ
yu.
\v 15 Gyicy pee lan grusu tub bicy na o tub zan na nu
sac shab dey o nu sac coz nu gow dey.
\v 16 Benu nii der: “Gua na, nunu Ñgyoozh gac num ru;
pchaꞌ lagy ru na, nunu bdow nap”, nii der, orzeꞌ ¿la cyiiñ
ñi? Benu wabic der de coz nu galagy ñi ni dey par nu
zu nap lagy yu, orzeꞌ ndeꞌ se la la cyiiñ ñi.
\v 17 Orzeꞌ benu consuel ziꞌl gyicy cup na lo Crisht
par wacabee ti nap ricy na, orzeꞌ consuel nu ricy cup
na lom zeꞌ, ndeꞌ nañ gal nu na tub coz gut.
\p
\v 18 Tees cyup ridz grusu mbecy lat der nu niiy: “Ru
ricy cup ru consuel. Zeꞌ ya̱ ricya̱ coz nap”, niiy. Orzeꞌ
ru rila wac gyicy ru nu cheña lagya̱ nu ricy cup ru consuel
lo Ñgyoozh benu se la la coz nap ricy ru. Tees ya̱ gac
gyicya̱ nu cheña lagy ru nu ricy cupa̱ consuel lom nu
nac de coz nap nu ricya̱.
\v 19 ¿A zeña lagy ru nu zu tub zi Ñgyoozh? Dzi ga nap
benu ni zeña lagy ru, tees niꞌ de nuras zeña lagy dey
nu zu tub zi Ñgyoozh. Nunu rash la bis dey nu tantaꞌ
rdzib yu.
\v 20 ¡Mbecy ton! ¿A rlagy der lyu̱u̱ nir nu benu ricy
cup der consuel lom, par wacabee ti nap ricy ru, orzeꞌ
se la la cyiiñ ñi nu ricy cup ru consuel lom?
\v 21 Ñgyoozh bicy mi Abraham gyitoo bel ni den par
tub mbecy nap nu nac de coz nap nu bicy yu ornu pshet
ic yu nu cut yu iꞌñ yu Isaac par tub gun lo mez ni gun
nim.
\v 22 Orzeꞌ Abraham cyup coz nu bicy yu. Bicy cup yu
consuel lom, nunu bicy yu coz nu rlagy mi. Nunu rabee
nu rishli bicy cup yu consuel lom nu nac de coz nu bicy
yu.
\v 23 Orzeꞌ guc ñi gal nu rnii riidz ni Ñgyoozh zeꞌ
nu rniiñ: “Abraham bicy cup yu consuel lo Ñgyoozh, nunu
nu nac ndeꞌ Ñgyoozh bicy mi yu par tub mbecy nap”, rniiñ.
Ndeꞌ nu rnii dey, “Abraham, yu zeꞌ nac yu amig ni Ñgyoozh”,
rnii dey.
\p
\v 24 Orzeꞌ rad lagy den nu mbecy gyanap dey lo Ñgyoozh
nu nac de coz nap nu ricy yu, walab tub lo ziꞌl nu nac
nu gyicy cup yu consuel lom.
\v 25 Niꞌ ziꞌl mod bzac tub biñ congal nu la Rahab.
Byanap mi lo Ñgyoozh nu nac de coz nu bicy mi ornu briic
mi yuꞌ nu guꞌ de mbecy Israeel, nunu blocyuub mi dey
ornu briic mi reñaꞌ nez nu briib dey dze ga.
\v 26 Orzeꞌ benu tub cuerp sac espiriit niñ, orzeꞌ ndeꞌ
tub cuerp gut. Niꞌ ziꞌl nu gyicy cup den consuel lo
Crisht, ndeꞌ nañ gal nu na tub coz gut benu wacabee ti
coz nap ricy den.
\c 3
\s Lyudz mbecy
\p
\v 1 Der bicy na, walagy ñi nu dzi zañ der gac ru moscuel,
gun bi rad lagy der nu ya̱ nu de moscuel ta zir gyicy
nu Ñgyoozh de̱ ornu gri beem ne̱ de̱.
\v 2 Dela den zañ tir radzan. Benu tub mbecy wagadzay
nu nac de riidz nu rniiy, orzeꞌ yu zeꞌ sac la falt niy.
Gac gyub ic yu dutuub la cuerp niy.
\v 3 Gyicy pee lan gal tub cuay, ornu zuun fren ruꞌ ma.
Orzeꞌ nap gyeñ ma. Orzeꞌ gac lyuun ni ma ca ziꞌl zeꞌ
nu galagy na cha dun ma.
\v 4 O gyicy pee lan gal nu ricy tub barc. Coz ily nac
ñii, nunu bi ily rzuub yaañ ñi. Tees nu nac tub timo̱o̱
miꞌ, orzeꞌ yu nu rsaañ gac cha nuy ñi ca ziꞌl zeꞌ nu
galagy yu.
\v 5 Niꞌ ziꞌl rzac de ub na nu lyuudz na. Ndeꞌ tub lugaar
miꞌ ni cuerp ni den, tees tonaꞌ la coz ily gac gyicy
ñi. Gush der shcab nu nac tub gyi miꞌ. Gac caañ gyi
tub la ngush ily tonaꞌ la.
\v 6 Lyudz na nañ gal nu na gyi. Tonaꞌ la coz a̱ꞌ nap
nac ñii nu ricy cup cuerp ni den. Gnuuñ dutuub la cuerp
ni den. Nunu gashtal gabily rad baloor niñ. Dzi coz
ily ricy nuñ den dub laa lat nu mbañ naa: nese lat nu
gumiiñ na gashtal gat lan.
\v 7 Mbecy bi ricy dey gan de lo la bañcyug. Bi ricy
dey gan bañ gyish. Bi ricy dey gan chigyiñ. Bi ricy
dey gan de bañcyug nu rgaꞌ nañ lo yu. Nunu bi ricy dey
gan bel nu yuꞌ lo nis.
\v 8 Tees rila wagyicy dey gan lyudz yu. Ndeꞌ nañ gal
nu na tub coz a̱ꞌ nap nu dza laa nañ ñi yuꞌ benen par
nu cut ñi.
\v 9 Nu lyudz den ryabic na gyel mbecy ni Ñgyoozh, Uz
den. Nunu laab nu lyuudz na rzaa lagy na ni losaꞌn, de
yu nu psaꞌ lagy Ñgyoozh nu na gal nu na ub mi.
\v 10 Nunu laab nu ruꞌ den ryabic na gyel mbecy ni Ñgyoozh.
Nunu laab nu ruꞌ den rzaa lagy na ni losaꞌn. Rup laa
coz zeꞌ druuñ laab tub ziꞌl ruꞌn. Ndeꞌ rila walab seꞌñ
der bicy na.
\v 11 Rila sac tub lugaar nu driib nis nu tub seꞌ ziꞌl
grib cyup lo nis: laab zeꞌ nu grib nis ish, nunu laab
zeꞌ grib nis lya.
\v 12 Der bicy na, tub yalas wac cuic ñi uugy ni ya oliva.
Nunu tub lyucy urbyay wac cuic ñi uugy ni yalas. Niꞌ
ziꞌl tub zo, zeꞌ nu yuꞌ nis riꞌ wac cuic ñi nis ish.
\s Shcab nu druu lo Ñgyoozh
\p
\v 13 ¿A ruu su tub mbecy lat der nu yuꞌ shcab niy nunu
siñ tooy? Orzeꞌ rlagy ñi nu gyicy yu nu gabey nu ni
nay nu nac de coz nap nu ricy yu. Orzeꞌ gyicy yu gal
nu ricy tub mbecy shni.
\v 14 Tees benu zaan der nu cheti gyel saap lagy nañ
lardoor, nunu benu nu nac ub ziꞌl der zu bich ru, orzeꞌ
walagy ñi gyicy der nu nac ru tub mbecy nu dzi yuꞌ shcab
ni. Orzeꞌ za der contr ni de coz rishli.
\v 15 Gun shcab zeꞌ, ndeꞌ walab shcab nu druu lo Ñgyoozh,
sinu ndeꞌ shcab ni gyishlombecy ziꞌl ii. Ndeꞌ shcab
nu yuꞌ nañ lardoo mbecy, nunu shcab nu druu lo nuras.
\v 16 Gun zeꞌ nu rasaap lagy mbecy, nunu zeꞌ nu rzu bich
mbecy nu nac ub ziꞌl yu, lugaar zeꞌ yuꞌ coz deet. Nunu
de lo la coz a̱ꞌ nap rac zeꞌ.
\v 17 Zeꞌ de yu nu ricy cup shcab nu druu lo Ñgyoozh
nu loga la rzuꞌ dey nu gyel cacy. Niga gac yu mbecy
nu rzuꞌ nu gyel ri zu. Nunu gac yu mbecy gugy na. Nunu
gac yu mbecy nu “O” rnii nu deꞌ zir losaꞌ nu nap rnii.
Nunu rashni lagy dey losaꞌy. Nunu ricy dey coz nap.
A̱ꞌ nac dey mbecy nu rcui losaꞌ. Nunu a̱ꞌ nac dey mbecy
nu ricy cyup ic.
\v 18 Nunu de yu nu ricy rishnap nu losaꞌ, yu zeꞌ ricy
yu nu rzuꞌ gyel ri zu lat dey. Orzeꞌ ndeꞌ ricy ñi nu
rzuꞌ dey mod nu rlagy Ñgyoozh.
\c 4
\s Coz ni gyishlombecy
\p
\v 1 ¿Ca druu de gyel yuu, gal nu de gyel deet nu yuꞌ
lat der? Druuñ lat de coz a̱ꞌ nap nu ricy gyel yuu nañ
lardoo der.
\v 2 Rlagy der nu gad la coz nir, tees wagad ñi ni der.
Orzeꞌ rzu lily der nu cut ru losaꞌr. Rzaab lagy der
la coz, tees wagad ñi ni der. Orzeꞌ rucoo der, nunu rtub
su losaꞌ der. Wagad coz nu rlagy der, gun wacyiiñ der
ñii lo Ñgyoozh.
\v 3 Nunu mas rgyiiñ der ñii lo Ñgyoozh, tees wagyicy
mi gal nu rnii der lom, gun rgyiiñ ton der. Rgyiiñ der
coz nu yet ziꞌl lagy der.
\v 4 ¡A̱ mbecy wagyicy paa! ¿A wagad lagy der nu benu
yet lagy ru de coz a̱ꞌ nap nu ricy mbecy ni gyishlombecy,
orzeꞌ yac losaꞌ yuu der Ñgyoozh? Cyu ziꞌl mbecy nu rlagy
gac amig ni de coz ni gyishlombecy, yac losaꞌ yuuy Ñgyoozh.
\v 5 ¿Walab gaal rnii too der nu se la la sac riidz
ni Ñgyoozh zeꞌ nu rniiñ: “Ñgyoozh tonaꞌ la rcam espiriit
nu brim nañ lardoo den, nunu se par ub ziꞌl mi rlagy
mi ñii”, rniiñ?
\v 6 Tees Ñgyoozh faboor ily zir ricy num de ub na gal
nu rniiñ lat de riidz nim: “Ñgyoozh zam contr ni de
mbecy leꞌ, tees ricy mi faboor num de yu nu ricy gyel
gyidz ni”, rniiñ.
\v 7 Orzeꞌ “O” mnii der ni Ñgyoozh. Gua der contr
ni nuras, gun orzeꞌ ruu chuy lo der.
\v 8 Bechaꞌ der lo Ñgyoozh. Orzeꞌ Ñgyoozh gyechaꞌ gaꞌm
lo der. Gal nu ricy der ornu rgyiib ru yaar, ni bdiib
der de coz cyi nu ricy ru, de ru mbecy cyi. ¡Bicy der
nu gyacaacy lardoor, de ru mbecy nu ricy cyup ic!
\v 9 ¡Bicy shni der! ¡Bzu der rishsulagy! ¡Biiñ der!
¡Lugaar nu gyigy der, orzeꞌ biiñ der! ¡Lugaar nu yet
lagy der, bicy shni der!
\v 10 Bicy gyidz der ub ru lo Ñgyoozh, gun orzeꞌ gyicy
mi nu gyac der mbecy nu gya zu.
\s Cueꞌ nii der ti yuꞌ falt ni bicy ru
\p
\v 11 Der bicy na, tub ga la der walagy ñi nu nii zi
der ni losaꞌr. Nunu walagy ñi nu nii der nu yuꞌ falt
niy. Yu nu rnii zi ni bicy o yu nu rnii nu yuꞌ falt
ni bicy, orzeꞌ yu zeꞌ rnii ziy ni leey ni Ñgyoozh, nunu
rniiy nu yuꞌ falt niñ, gun wacsuub gyidag yu niñ. Benu
rniiy nu yuꞌ falt ni leey, orzeꞌ yu zeꞌ walab tub yu
nu rzuub gyidag niñ, sinu tub yu nu rnii nu yuꞌ falt
niñ.
\v 12 Tees tub zi Ñgyoozh briic mi leey, nunu tub zi
lam gac niim nu yuꞌ falt ni den. Tub zi lam gac co mbañ
mi, nunu tub zi lam gac nit lom. Zeꞌ de ru, ¿cyu guc ru
par nu niir nu yuꞌ falt ni losaꞌr?
\s Wagad lagy mbecy la coz zac yu ina
\p
\v 13 Na bzuub gyidag der ne̱, de ru mbecy nu rnii: “Dzi
na o ina chan ca na gyedz. Zeꞌ cyiiñ den tub ñaꞌn. Gyicy
den dalje̱z. Gyicy den gan tiñ”, rnii der.
\v 14 Tees wagad lagy der la coz zac ru ina. De ru na
der gal nu na za nu taꞌ baa. Nañ tub miiñ ziꞌl gruu
zac ñi nunu nañ tub miiñaꞌ ziꞌl bi mniit ñi.
\v 15 Coz nu rlagy ñi nu nii der, orzeꞌ i niir: “Benu
Shuaan den rlagy mi, orzeꞌ cui mbañ na. Orzeꞌ gyicy na
nii o nde”, nii der.
\v 16 Tees na ricy der gyel leꞌ nir, nunu rnii der nu
dzi coz ily ricy ru. Ndeꞌ rila a̱ꞌ nap nu ni mod rnii
der.
\v 17 Mbecy nu rad lagy nu gyicy coz nap, zeꞌ wagyicy
yu, yu zeꞌ ricy yu cyi.
\c 5
\s De mbecy guaniꞌñ rlagy ñi gyicy cuidad dey ub yu
\p
\v 1 ¡Na de ru mbecy guaniꞌñ bzuub gyidag der ne̱! ¡De
ru gun der, nunu cush ti der nu nac de gyel zi nu gzac
der!
\v 2 De gyel nap ni der bi rtop ñi, nunu de shab der
bi row bigyich ñi.
\v 3 De or gal nu de plat ni der bi driib guul ñi. Nunu
guul zeꞌ, ndeꞌ tub teshtig nu shiñ ricy der. Ndeꞌ tub
coz nu nit loñ der gal nu ricy gyi nu tub la coz. Na
ornu bi rlazh tiem, orzeꞌ cyaañ der gyel nap nir.
\v 4 Nunu ni wangyabic der i de yu nu bicy riiñ nir,
de yu nu rteꞌ cosech ni der. Nunu ndeꞌ zañ contr ni
der. Nunu Shuaan na, biñ nu riib ic de anc zigy, reñ mi
ornu de yu nu bicy riiñ ni der zeꞌ rguꞌ cyiy de ru lom
nu nac riiñ nu bicy dey nir.
\v 5 Gyishlombecy ii tonaꞌ la zu baa der nunu ricy der
gusht nir. Nunu bicy reꞌñ der ub ru gal nu ricy reꞌñ
dey tub chigud nu cut yu.
\v 6 Rnii der nu yuꞌ falt ni de mbecy nu sac falt ni,
nunu rut der dey. Ii se la la coz bicy dey ornu gut
yu.
\s De mbecy rlagy ñi gyicy cup yu pase̱z
\p
\v 7 Ndeꞌ nu der bicy na, bicy cup der pase̱z gashtal
cyid la Shuaan na. Bduꞌ cuen der mod nu ricy mbecy nu
rnuuz la coz. Nu pase̱z rbez yu nu teꞌy cosech nu dzi
sac. Nu loga la rbez yu nu pase̱z nu gri gyey loga. Niga
rbezaꞌy nu gri gyey cyup.
\v 8 Orzeꞌ ni rlagy ñi nu gyicy cup der pase̱z. Cueꞌ
shiꞌñ der baloor, gun bi shuub dzi nu cyid Shuaan den
tuubaꞌ tir.
\p
\v 9 Der bicy na, tub ga la der walagy ñi nu nii deet
ru nu nac de losaꞌr, gun orzeꞌ Ñgyoozh waniim ti yuꞌ
falt ni der. Tees Ñgyoozh, biñ nu gri bee ni mbecy, bi
yad shuub dzi nu ruꞌñam.
\p
\v 10 Der bicy na, pcaa ic der de yu nu psaa raso̱o̱ ni
Shuaan den, de yu nu mnii por cuen nim gulas, gun orzeꞌ
gad lagy der lac mod gyicy ru. Benu rlagy der gad lagy
ru lac mod gagyer ornu gzac zir, orzeꞌ bduꞌ cuen der
lac mod gugyee dey ornu bzac ziy.
\v 11 De ru rad lagy der nu de ub na ricy na de mbecy
nu ragyee ornu rzac zi par tub mbecy nu dzi ni. Bi rad
lagy der nu Job gugyeey ornu bzac ziy. Rad lagy der
lac mod bicy nu Ñgyoozh yu. Nunu rad lagy der nu Shuaan
den dzi gushni lagy mi yu. Nunu nap bicy num yu.
\p
\v 12 Der bicy na, mod nu ricy zir ñi presis, benu nii
der tub coz lo losaꞌr, cueꞌ zat der ni tub la coz par
nu gabe nu rishli gal nu rnii der. Cueꞌ zat der gyibaa.
Ni cueꞌ zat der gyishlombecy. Ni cueꞌ zat der ni tub
la coz. Tees benu laab ni rlagy der niir, orzeꞌ laab
ni niir. Nunu benu walab ni rlagy der niir, orzeꞌ walab
ni niir. Gun orzeꞌ Ñgyoozh waniim ti yuꞌ falt ni der.
\p
\v 13 ¿A yuꞌ mbecy lat der nu dzi rzac zi dey? Orzeꞌ
rlagy ñi nu cyiñ yu lo Ñgyoozh. ¿A yuꞌ mbecy lat der
nu zu cyit lagy yu? Orzeꞌ rlagy ñi nu gul yu nunu gyabicy
yu gyel mbecy nim.
\v 14 ¿A yuꞌ mbecy rat lat der? Orzeꞌ rlagy ñi nu cuedz
dey de yu bel nu zu riiñ lat de mbecy ni Crisht. Orzeꞌ
cyiñ dey lo Ñgyoozh nu nac yu rat zeꞌ. Nunu coo dey
asecy tooy. Orzeꞌ nii dey lo Shuaan den nu gyicy yac
mi yu.
\v 15 Orzeꞌ nu nac nu gyicy cup dey consuel lo Ñgyoozh
lat nu cyiñ yu lom, orzeꞌ yu rat zeꞌ gyac yu. Nunu Ñgyoozh
gyicy yac mi yu. Nunu gyicy sulagy mi de cyiy.
\v 16 Orzeꞌ tub ga la der bicy caacy der cyir lo losaꞌr.
Nunu tub ga la der bdiiñ der lo Ñgyoozh ni losaꞌr. Nunu
ornu tub mbecy nap cyiñ yu lo Ñgyoozh nu dutuub la lardooy,
orzeꞌ tonaꞌ la coz ily gyicy ñi.
\v 17 Elías, tub yu nu mnii por cuen ni Ñgyoozh, guc yu
tub mbecy gal nu na de ub na. Na ornu bdiiñ yu lo Ñgyoozh
nu dutuub la lardooy nu cueꞌ gyet gyey, orzeꞌ gyey wangyet
ñi lugaar zeꞌ chon ñaꞌn nu.
\v 18 Na despuees ornu bdiiñaꞌy lo Ñgyoozh, orzeꞌ brugyiꞌ
gaꞌ nu yet gyey, nunu yu briic ñi cosech.
\p
\v 19 Der bicy na, benu rusu tub mbecy lat der nu ruu
chuy lo de coz rishli, nunu benu tuubaꞌ mbecy gyicy yu
nu cush cya gaꞌy lo coz rishli,
\v 20 orzeꞌ bi neñ der nu cyu ziꞌl mbecy nu gyicy yu
nu mbecy cyi zaan yu de coz a̱ꞌ nap nu ricy yu, nunu orzeꞌ
cush cyay lo Ñgyoozh, orzeꞌ yu nu ni bicy zeꞌ gyicy yu
nu gruu mbañ mbecy cyi zeꞌ, nunu gyicy yu nu gyicy sulagy
Ñgyoozh dela cyiy.