\id 3JN
\h 3 San Juan
\toc1 3 San Juan
\mt1 3 San Juan
\mt2 Gyicy chon nu bzeed waa lo de mbecy ni Crisht
\c 1
\s Waa byabic yu gyel mbecy ni Gayo
\p
\v 1 Ya̱, tub yu bel nu zu riiñ ni Crisht, zeeda̱ gyicy
ii lo ru Gayo, tub amig ne̱ nu dzi rca̱. Ya̱ rca̱ ru tub
mod nu rishli.
\p
\v 2 Ru, bicya̱ nu dzi rca̱, ya̱ diña̱ lo Ñgyoozh nu dub laa
tiem gzac ru lo coz nap, nunu cyiiñ ruub cuerp nir. Gun
bi rad lagya̱ nu nap zu lagy ru nañ lardoor.
\v 3 Tonaꞌ la bet lagya̱ ornu bri la be bicy na, gun byoo
dey rishlo̱ nu ru dzi fert ricy paar nu de riidz rishli
ni Ñgyoozh.
\v 4 Warusu ni tuubaꞌ la coz nu gyicy ñi nu gyet lagya̱
gal nu yet lagya̱ ornu rad lagya̱ nu de mbecy nu na gal
nu na iꞌña̱ rded dey dub gal mod nu rnii de riidz nu
rishli ni Ñgyoozh.
\p
\v 5 Ru, bicya̱ nu dzi rca̱, ru dzi bicy paar ornu rzu bich
ru nu nac deꞌ zir de bicy na nu nac Crisht nunu yegar
ornu rzu bich ru nu nac de mbecy nu druu reñaꞌ gyedz
ornu dri dey lor.
\v 6 De yu zeꞌ, ornu biid dey lat de mbecy ni Crisht
nu yuꞌ par ii, orzeꞌ mnii dey lat dela de yu zeꞌ nu dzi
nap bicy ru nur dey nu nac nu rcar dey. Orzeꞌ por faboor
locyuub ñuur dey ni de coz nu cyiiñ par byaj ni dey
dub gal mod nu gyedzuꞌ lagy Ñgyoozh.
\v 7 Ornu de yu zeꞌ gush nez dey zay nu gyicy yu riiñ
ni Jesucrisht, rila wanshet ic dey nu nlocyuub de mbecy
nu a̱ꞌ yuꞌ lo Ñgyoozh dey.
\v 8 Ndeꞌ nu rlagy ñi nu nap gyicy dun dey ornu ded
yu yuꞌn, gun orzeꞌ locyuub na dey ornu tush las yu de
riidz rishli ni Crisht.
\s Diótrefes nu Demetr
\p
\v 9 Ya̱ bzeeda̱ tub gyicy lo de mbecy ni Crisht, tees
Diótrefes wangyicy cuen yu de riidz nu mne̱e̱, gun dzi
gusht niy nu gyicy yu mandaar.
\v 10 Ndeꞌ nu ornu yapa̱, orzeꞌ rica̱ nu gad lagy der de
mod nu ricy yu. Yu zeꞌ rded yu nu rniiy rishcuen. Nunu
rniiy riidz fals nu za contr ni de ub na. Nunu yu zeꞌ
wazuy conform nu de coz nu bi ricy yu, sinu rlagy zir
yu gyicy yu. Orzeꞌ wacshet ic yu nu chuꞌ de bicy na
nañ yuꞌy ornu dri dey loy. Nunu benu ca na mbecy rlagy
yu nu cuic yu yuꞌy chuꞌ de yu zeꞌ, orzeꞌ wazaan Diótrefes
nu ni gyicy nuy laab de yu zeꞌ. Zeꞌ benu ca na tub mbecy
cuic yu yuꞌ chuꞌ de yu zeꞌ, orzeꞌ Diótrefes cyuu nuy
mbecy nu cuic yuꞌ zeꞌ lat de mbecy ni Crisht.
\p
\v 11 Ru, bicya̱ nu dzi rca̱, cueꞌ syaꞌr lo de mod a̱ꞌ nap
nu ricy mbecy, sinu syaꞌr de mod nap nu ricy dey. Gun
mbecy nu ricy mod nap, yu zeꞌ nac yu ni Ñgyoozh. Zeꞌ
de mbecy nu ricy mod a̱ꞌ nap, yu zeꞌ a̱ꞌ yuꞌ loy Ñgyoozh.
\p
\v 12 Orzeꞌ dela mbecy rnii dey nu Demetr nac yu mbecy
nap. Yu zeꞌ ricy yu mod nu rlagy ñi, nunu nu nac ndeꞌ
rabee nu nac yu mbecy nap. Nunu niꞌ ziꞌl de̱ ya̱ nap rne̱e̱
de̱ niy. Ru rad lagy ru nu rne̱e̱ de̱ coz rishli.
\s Riidz nu blazh ni Waa
\p
\v 13 Yuꞌ zañ coz nu rlagya̱ ne̱e̱ lor, tees walagya̱ ca̱a̱
ñii lo gyicy,
\v 14 gun drish lo̱ nu gyiily la yap güi̱i̱ de ru, nunu
ne̱e̱ du̱ de ru lo nu loo la.
\p
\v 15 Ñgyoozh gyicy mi nu cheti ri añ nir. Dela de amig
ni den zeed dey ñgyoozh nir. Tub ga la amig nin gab
ruy shnuy.