Takat Najanamu Áujmatma
Ju̱yá̱ aarma winiana nuka Yusa Chichame̱ shuar chichamja̱i̱ áarmaiti. Émkaka Israer chichamja̱i̱ Aram chichamja̱i̱ nuyá̱ Kriaku chichamja̱i̱ aentsun Yus áamtikramainia tímiatrusaṉ jiinkit tusa áarmaiti. Yusa Chichame̱ṉka tuke átin asamtai itiur uwempramniait nuna nékamtikiataj tusa yáunchuya̱ tura yamaiya̱ nuyá̱ ukunam ártatna nu áentsnaka kakaram chicharui.
Kame Yus Papí Yaunchu Aarma ju̱i̱ aarma nuka ii chichameja̱i̱ṉ ashí shuarnum jeat tusa tu enentáimsar kuítniasha waitmainiachiat antsu Yusa kakarmari̱ji̱a̱i̱ tura Ni nekatai̱ri̱ji̱a̱i̱ shuar traintia uwí takakmasmanum ju̱ papikia áarmaiti. Tuma asa ju̱ka shuara takatri̱nti. Chíkich papikia takamtsuk áarchamu áiniawai, warí shuar chichamnumka yamaisha tuke yapaji̱áchma áiniawai. Ju̱ papí táasaru ainia nuna Papí Waintiai̱ tana nui̱ aya náari̱ṉkia eṉkeamu áiniawai. Antsu chíkich papí áiniana nuka mash Shuar chichamnum yapaji̱áchma ásarmatai ju̱ papí jiinkittiana nu̱i̱ṉkia pachikchamu áiniawai.
Yus Papí Yaunchu Áarmanumia̱ papí áiniana nuka untsurí takamtsuka aarma áiniawai. Antsu chíkichkia niisháa retra ju̱i̱ aarma jú̱ninji̱a̱i̱ aarma áiniawai. Tu aarma ju̱ka áyatik warinia takua ta nuna enentái̱ júukar áarmaiti. Wats ju̱ja̱i̱ nekaatai, Ístras papí akankámu 2num aents Papirúnianmaya̱ waketrar káunkarmia nuna náari̱ṉkia áarchamuiti. Áyatik ishichik aentsu naari̱ áakur warí weanmaya̱ ainia nuke áarmaiti.
Yus Papí Yaunchu Áarmanumsha tura Yamaram Áarmanumsha núnintiaku aarma áiniakuiṉkia paant nekanat tusar wariṉkisha ikiursamu áiniawai. Kame Yamaram Papinium Jesus núja̱i̱nchuka ju̱ papin áararu Yaunchu Papiniumia̱n páchiniakuiṉkia nusha túramuiti tusa paant nekanat tu enentáimsar wárichiksha ikiursamu jú̱nin
* tura †
áiniawai. Wats ju̱ja̱i̱ paant nekaatai. Ame papí áujkum chícham áarmanum ayamach yaach yakini̱ jú̱nin* wainkiattame. Tura papí aarma nuṉkaani̱
uchichiji̱a̱i̱ aarma yaach * e̱a̱ktá.
Nuka áyatik nuna paant awajui. Nuyá̱ chíkich ikiursamu awai. Ame papí áujkum chícham áarmanum ayamach naṉki † uchichia nu wainkiattame. Túramka
nu uchichiri̱ni̱ṉ ukunmaani̱ uchichiji̱a̱i̱ aarma e̱a̱ktá.
Nuka tú papinium wainkiamniait nuna iniakmawai. Núnisaṉ Yamaram Papinium áakur Yaunchu Papiniumia̱ áarmakiui̱ṉka jú̱tiksar áarmaiti.
Kame aents Yamaram Papin áararua nuka Yaunchu Papí Israer chichamnumia̱ Aram chichamnum yapaji̱ámu aarma nuna ju̱i̱ṉkia pachikiarua nu paant nekaatniuitji. Antsu yamaikia Yus Papinium Yaunchu aarma ainia nuka Israer chichamnumia̱ nákak yapaji̱ámu áiniawai. Tuma asamtai Yus Papí áujeakmeka Yaunchu Papiniumia̱ Yamaram Papinium aarma ainia nu apatka iyakmeka Yamaram Papinium aarma nu Yaunchu Papí áarmaja̱i̱ métekka áiniatsui. Ju̱ papí shuar chichamnum aartai tusarkia Yus Papí apach chichamja̱i̱ tura chíkichkia Iṉkis chichamja̱i̱ núnisrik chíkichkia Kriaku chichamja̱i̱ áakarma íisarar aarma áiniawai.
Wi shuartiram ashí nunkanam matsatrumna nútiram ju nekaatarum. Iisha AIESEniam páchitkiainiaitji. Atumsha tuke tsawant ju Yus Papí áujsak tusar ii Uunt Yusri seatji. Áujkurmeka Uunt Yus, Ni uchirí̱ Jesukrístu jakamuja̱i̱ ame tunaarmin tsaṉkur uwemtikrampra nu paant nekaattarme. Nu nekaam Jesukrístu nekas enentáiji̱a̱i̱ enentáimtakmeka Yus ti shiir awajtamsattame núnismek waramtiksattame Niniu ajasú asam. Jú̱naka atumí yachi̱ Uunt Yusa anena nu Asociación de Iglesias Evangélicas Shuar del Ecuador (AIESE) túramprume. Uunt Yus yaintmaktarum.