Yaunchu Yus Papinium étserma
Yus Papí Yaunchu Aarma Náṉkammari̱ papinium juarui. Nu papiniumka ju̱ nuṉka itiur najanamia tura nui̱ ashí irunainiana nu kashí nantu tura etsa̱sha núnisaṉ yaasha nuyá̱ chíkich nuṉka nayaimpiniam írunna nusha núnisrik ii ashí wainiainiajnia tura ashí nékainiajnia nuna áujmatui. Náṉkammari̱ papí áujsar jú̱ nuṉkasha tura ju̱i̱ ashí írunna nusha itiur najankamuit nuka nékaji.
Núnisrik nu papí áujsar ashí shuarnumia̱ Winia atí tusa Yuska Aprajáman tura ni shuari̱ji̱a̱i̱ achikmia nuka nékaji. Tura nu aentsnumia̱ nuna tiraṉki̱ tura nuyá̱ tiraṉki̱ uunt nuṉka mátsatka Israer náartin ajasarmia nusha nékanui. Tura Yaunchu Yus Papinium chíkich papí ainia nuiṉkia Israer shuarka Yusan péṉker umiriarmia núja̱i̱nchuka urukamtai chíkich tsawantka umircharmia nuna etserainiawai. Túrasha ni yaunchu túrutairi̱n írunna iniaisar Yusan péṉker umirkarat tusar Yúsnan etserin Yus anaikiarma kakantar chichar wéarmiayi. Nútiksaraṉ Yúsnan etserniuka Israer shuar pénker matsamsarat tusar itiurkartatja Yus timia nunasha Israer shuarnaka ujá wéarmiayi. Nuna chíkich papí ainia nuka áujmatainiawai.
Túrasha Israer shuar Yusan umirtsuk ní wakeramunak túriarmiayi. Núnisaraṉ Yúsnan etserniun Yus akupkarmancha anturkatniun nakitiainiak itit awajkartusu iniaikiartustarum ii wakeramu túratai tú wearmiayi. Túmainiak yajauchin túruki̱ wénak aents niin aya̱a̱mach matsamarmia nuna yusri̱n najankamu yusan tikishmatiarmiayi. Tuma asa Yaunchu Papi Aarma jú̱ kuntuts chichamja̱i̱ amúawai. “Pai, yamaikia ji keak weantúkchamnia ajana imianú tsue̱r tsawant winittiawai. Nui̱sha ashí naṉkamantu enentáimtuma ainia nusha tura yajauchin túruinia nuka tsarútrája̱i̱ métek juákartatui. Tuma asamtai nu tsawantinkia ji keek kaṉkaptiuk tura kanawentuk nú aentska áeskam peṉké juákchartatui” tawai Ashí Akupin Uunt Yus. (Marakías 4:1)
Yaunchu Áarmanumka traintinuíwi papí áiniawai túrasha nuka kuatru akankámuiti.
1. Emka akankámunmaṉka seṉku papí áiniawai. Náṉkammari̱ papiji̱a̱i̱ juarki̱ Muisais Ujakma papiji̱a̱i̱ amúawai. Ju̱i̱ṉkia ashí shuarnumia̱ ju̱ nuṉkanam Yusna ártin itiurá uunt nuṉka mátsatkamu ajasaruit nuna áujmatui. Núnisaṉ itiurá Yusan enentáimtusartiniait nunasha mash jintintiáiniawai. Seṉku papí áiniawai.
2. Ju̱ka yaunchu naṉkamasu ujakma papí áiniawai. Nuka Jusuinmaya̱ naṉkama Istirnum amúawai. Jú̱ papiniumka Israer shuar ju̱ nuṉkanam matsamsar urukawaruit nuna ashí áujmatui. Nu ujakmaka Jesus Piriṉnum akiiniatin kuatrusiántu uwí táasmanum naṉkatkawai. Tuse papí áiniawai.
3. Ju̱ akankámunmaṉka kanta núnis (nuka “poesía” apach chichamja̱i̱) aakma áiniawai. Nuka Júupnum juarki̱ Saramúṉka Kantari̱n amúawai. Máshikia seṉku papí áiniawai.
4. Amúamu akankámunmaṉka ukunam urukattawa nu aakma papí áiniawai. Nuka Isayas áarmanumia̱ naṉkama Marakías áarmanum náṉkatkawai. Ashikia tiasisiáti papí áiniawai.
Núja̱i̱ṉkia Yus Papí Yaunchu Aarma Náṉkammari̱nmaya̱ Marakíasnum jeá ashikia traintinuíwi papikia írunui.