Akaar Ismaerja̱i̱
16
Aprama nuwe̱ Sarái uchin takuchuyayi. Tura Saraikia Ejiptunmaya̱ nuwa̱n Akaaran ni iniatairi̱n aya̱kuyayi. 2 Saraikia Apraman chichareak “Wíniaka Uunt Yus kaa awajtúsuiti. Tuma asamtai winia iniatai̱r nuatkam yajutmarta. Tura uchi akíawakminkia winia atí tusan wakerakun tájame” tímiayi. Nui̱ṉkia Apramka Sarái táman ímiatrusaṉ umirkamiayi. 3 Nuyá̱ Kanaannum tias uwí pujusármia nui̱ Saraikia Ejiptunmaya̱n iniatairi̱n Akaaran nuatkata tusa Apraman susamiayi. 4 Túram Apramka nuatak ajaprumtikiamiayi. Tura Akaarsha ajaprukjai tusa ni úuntri̱n Sarain wishikmiayi. 5 Túram Sarái Apraman chicharuk “Wi yajauch nekapeaj nuka ame iistá. Kame nuwa̱n amasmajna nu yamaikia ajapruk wíji̱a̱i̱ṉkia naṉkamantu enentáimtumawai. Yátsuk itiurchatnasha túrait núnaka Yusak iirmastai” tímiayi.6 Takui̱ Apram aya̱k “Wats yamaikia iniatairmin ame wakeram nu niji̱a̱i̱ túrata tusan tsaṉkateajme” tímiayi. Tutai Saraikia nuya̱i̱k Akaaran tí waitkiamiayi. Tura ti wáitkiam pisarmiayi. 7 Tura pisar kampuntin atsú nuṉkanam Shur jintia nui̱ yumirmat yantam Uunt Yusa suntari̱ Akaaran wainkiamiayi. 8 Tura wainiak chichareak “Sarái takarniúri̱ Akaará, ¿tuyá̱ winiam tura tui̱ wéam?” tutai chichaak “Winia apujtus pujurtin Sarai̱ya̱ pisaajai” tímiayi. 9 Nu tutai Yusa suntari̱ chichareak “Antsu Sarai̱n waketkitia. Túram ni tana nu mash umirkata” tímiayi. 10 Nu arantcha Yusa suntari̱ Akaaran chicharuk
“Ame shuarumin nekapmarchamnia awajsattajai.
11 Ajamtiniaitmena nu, uchi takustatme.
Tura ame itiurchat pujakum útmiam nuna Uunt Yus anturtamka asamtai
uchi áishmaṉ takustatmena nuna naari̱ Ismaer átatui.
12 Kame ame uchirmeka kampunniunmaya̱ yajasma núnis
ashí aentsja̱i̱ nemasmanaikiu asa nisha kajertai̱ átatui.
Nisha ni yachí̱ pujuiniamunmaṉ etsa̱ jintiainmaani̱ niṉki matsamin ártatui” tímiayi.
13 Akaarka Uunt Yus winia waitnia nuna wainkiayatan tuke iwiaaktsujak tu enentáimias “Ámeka winia Waitniua nú Yusaitme” tu anaikiamiayi. 14 Tuma asamtai nu yumirmata náari̱ṉkia “Iwiaaku Yus Iirna Nu” tu anaikiamiayi. Nu yumirmatka Káatishnum tura Piritnium ajapén étentkamunmaiti.