Jutai̱ Je̱a̱ Iruntai̱
33
Nuna túramia nuyá̱ Uunt Yus Muisaisan chicharuk “Wats, yamaikia Aprajáman, Isakan tura Jakupan Wi chicharkun ‘Amé aentsun nu nuṉkan nekas súsartiniaitjiai’ tímiaj nui̱, Ejiptunmaya̱ jí̱i̱rmam nuja̱i̱ wetarum. 2 Tura Winia nayaimpinmaya̱ suntarun átum wéamunam eem akuptúkan Kanaannumia̱ aents, Amur aents, Jet aents, tura Píris aents, Jep aents nuyá̱ Jípius aents matsatainia núnaka ji̱i̱rartatjai. 3 Nuyá̱ tí peṉker nuṉka ashí arak tsapáu asamtai muntsu míshkiji̱a̱i̱ entsa núnis akamunmasha nú nuṉkanam wetarum. Túrasha peṉké umirtichu asakrumin jintiá amuká̱i̱jrum tusan, Wikia atumji̱a̱i̱ṉkia wéchattajai.” 4 Takui̱ nu kúntuts chichaman antukar tí kuntuts pujuinia ásar kuriji̱a̱i̱ aki̱i̱tiai̱ najankamuncha aki̱a̱rcharmiayi. 5 Nuya̱ṉka Uunt Yus Muisaisan chicharuk “Israer shuar chicharainiakum ‘Átumka peṉké umichu áentsuitrume. Tuma asakrumin Wi atumji̱a̱i̱ ishichik pujusnaka ashí amukáintjiarme. Tuma asamtai átum iwiarmamtai kuriji̱a̱i̱ najankamu ainia nuka ukuintratarum. Túrawakrumin warí itiurkattajrumea núnaka Wi nekaatajai tawai’ titiá” tímiayi. 6 Nuya̱ṉka Israer shuarka Urep nainnium pujuarmia nui̱ṉ kuriji̱a̱i̱ aki̱i̱tiai̱ najankamu armia núnaka mash ukuintrar ikiusármiayi.7 Muisaiska nuap je̱a̱ matsamkamunmaya̱ jukí̱ arant je̱a̱mmiayi tura jutai̱ je̱a̱ iruntai̱ anaikiamiayi. Tura yaaksha Uunt Yusa enentáimtustinian wakerakka jutai̱ je̱a̱ iruntai̱niam ashinin ármiayi. 8 Jutai̱ je̱a̱ iruntai̱ Muisais wéakuiṉkia ashí Israer shuarka ni je̱e̱n wá̱i̱ti̱a̱i̱ri̱n wajasaraṉ iyá iyakua jutai̱ je̱a̱ iruntai̱niam waya̱mtai iinin ármiayi. 9 Nuyá̱ Muisais waya̱mtai jutai̱ je̱a̱ iruntai̱ wá̱i̱ti̱a̱i̱ri̱n yuraṉkim kauntramtai Uunt Yus Muisaisja̱i̱ chichamiayi. 10 Tura Israer shuarka jutai̱ je̱a̱ iruntai̱ wá̱i̱ti̱a̱i̱ri̱n yuraṉkim káuntran wáinkiarka aṉkant aṉkant ni je̱e̱ni̱ṉ wá̱i̱ti̱a̱i̱ri̱n tikishmátrar shiir awajiármiayi. 11 Uunt Yus Muisaisja̱i̱ṉkia aents ni amikrí̱ji̱a̱i̱ iṉkiunaik áujnaiya núnis chichasua umik matsamkamunam waketniuyayi. Túrasha natsa Nuuna uchirí̱ Jusuí Muisaisa yáintri̱ṉkia jutai̱ je̱a̱ iruntai̱n peṉké ikiuchmiayi.
Muisais Uunt Yusan seamu
12 Tura Muisais Uunt Yusan chicharuk “Ame chichartakum ‘Israer shuar júkiarta’ túrutme, tura ¿ya winia nemartustata? nusha ujatkachume. Túrayatmek ‘Ame waitnenkartutairmin wáitkiajme, núnisaṉ ame náarmiji̱a̱i̱ nékajme’ túrutme. 13 Wats, Ame winia waitnenkartutair waitrukmeka ame jintim iniaktursata. Wisha ame waitnenkartutairmin wáinkiataj. Tura ju̱ aentssha waitnentrata. Warí ame shuarum áiniawai” tímiayi. 14 Tutai Uunt Yus chichaak “Wiki ámiji̱a̱i̱ wétatjai, túran ayamtikrattajme” tímiayi. 15 Nuyá̱ Muisais Yusan chicharuk “Winia nemartuschattakmeka ju̱ya̱ṉka jukartukip. 16 ¿Tura wi nuyá̱ amé shuarum waitnenkartin íkrattsaitmena ju̱nasha tura ame iin nemartamkakminkia ashí nuṉkanmaya̱ aentssha ame shuar akankaitmena nunasha nekaachartatuak?” tímiayi. 17 Nuyá̱ Uunt Yus Muisaisan chicharuk “Winia waitnenkartutair wainkia asakmin núnisnak náarmin nekáa asan támena núnaka ímiatrusnak túrattajai” tímiayi. 18 Tutai Muisais chicharuk “¡Nuiṉkia kakarmarmiji̱a̱i̱ wincharum iniaktursata!” tímiayi. 19 Takui̱ Uunt Yus aya̱k “Winia péṉkerun iniaṉkatkittiajme núnisaṉ Uunt Yusa náari̱n nekamtikiattajme. Túran Wi wakerakun waitnentaj nunak waitnentrattajai” tímiayi. 20 Nuya̱sha chicharuk “Winia yapirka íischamniaitme. Warí aents chikichkisha winia wáitkiaṉka iwiaaku pujuschamniaiti.” 21 Nu arant Uunt Yus chicharuk “Wajajna ju̱i̱ aṉkant awai. Ámeka kaya éṉkentamunam ju̱i̱ wajasta. 22 Tura winia winchar naṉkamakui Wi kaya éṉkentamunam apujsattajme. Núnisnak Wi naṉkaamam uwejruja̱i̱ ejaktatjame. 23 Nuya̱ṉka winia uwejrun jusattajai. Túramtai aya winia tuntupruk wainkiattame tura winia yapirka peṉké wáinkiashtatme” tímiayi Uunt Yus.