4 Uunt Yus timia ímiatrusaṉ, emka kayauya núniniak péṉker pakamá iwiaramiayi. Tura Muisaissha káshik jimiará kaya iwiaramun jukí̱ Senái nainnium wakamiayi. 5 Nuya̱ṉka Uunt Yussha yuraṉminiam tarurmiayi. Tura Uunt Yus ni náari̱n kakantar pachikmiayi. 6 Nuyá̱ nui̱ Uunt Yus Muisaisan naka naṉkak kakantar chichaak “¡Uunt Yus, Uunt Yuska, kakarmaiti, yáiṉkratniuiti, wari kajechuiti, ti waitnenkartiniaiti tura nekasa núiti! 7 Núnisnak nekapmarchamnia mir naṉkaamas aentsun waitnenniuitjiai. Tunaan tsaṉkurniuitjiai. Umíachmancha, yajauch túruinia nunasha, aparí̱ tunaari̱n uchirí̱ncha, tiraṉkí̱ncha nuna tiraṉkí̱ncha nuyá̱ tiraṉkí̱ncha nútiksanak menaintiú tura áintiuk weanmaya̱ aentsu tunaari̱ncha asutniuitjiai” tímiayi. 8 Nuna takui̱ Muisaissha wárichik tikishmar tsuntsumá nuṉká antiastatuk ajas 9 chicharuk “¡Uuntá, ti nekas ame waitnentruruitkiumka waitneasam Uuntá, nemarkartusta! Kame ti nekas umichu árini̱ṉ yajauch túramu tura ii tunaarí̱sha tsaṉkurkarturam amé shuar awajkartusta” tímiayi.

10 Muisais takui̱ Uunt Yus chicharuk “Pai yamaikia, ame áentsrum ashí iimmiainiamunam chichaman nájanjai. Túran ashí nuṉkanam aents túrachminian chikichkiksha túrachman Uunt Yus ni kakarmari̱ iniakmamun ashí aents ámiji̱a̱i̱ pujuinia nu wáinkiartatui. Warí atumji̱a̱i̱ṉkia peṉké tsuumainian túrattajai. 11 Kame Wi yamái tájarmena ju̱ umiktarum. Nuyá̱ atumsha íimmianumaṉ Amur aents, Kanaan aents, Jetcha, Pírissha, Jep aentssha tura Jípius aents pujuinia núnaka mash amukártatjai. 12 Tuma asamtai átum jeattarmena nu nuṉkanmaya̱ aentsja̱i̱ nawamnaikiarum chícham najanawairap anaṉnawa̱i̱rum. 13 Antsu ni yusri̱ áestakur tikishmáttai̱ ainia nuka sa̱a̱rkirum najankamu yus ainia nusha tsairatarum. Tura shiir awajtai̱ numi Asera náartin ainia nusha tsupiratarum. 14 Warí ántrarum chíkich yus tikishmátrairap, Yuska ti akasmawiti. Tuma asa ni náari̱ṉkia Akasmatkartin Yúsaiti. 15 Tuma asamtai nú aentsja̱i̱ṉkia chíchamka najanawairap. Warí ni yusri̱ enentáimtakrumka tunáa túrattarme tura taṉkuri̱n máwar áestuiniak ii yusri̱ súamu yuitiarum turamainiakui yuáttarme. 16 Núnisaṉ atumí uchirí̱sha ni nawantri̱n nuatkara̱i̱ṉ tusarum péṉker wáinkiatarum, atumí uchirí̱sha najankamu yusan tikishmátin ainia núnis tikishmátrara̱i̱ṉ tusarum suritkiatarum. 17 Átumka ántar yus nájanji tusarum jiru imintrarum najanawairap.

18 Atumsha Awip nantutin Ejiptunmaya̱ jíinkin asarum karin eṉketáchma paṉka namperi̱ nájankuram wi tímiajrumna tímiatrusrumek siati tsawant karin eṉketáchma paṉ yuátarum. 19 Uchi áishmaṉkach iwia̱i̱ri̱ akiiniattana nuka núnisaṉ emka petsakma, waakasha, muriksha, áishmaṉ ártatna nuka ashí Winia ártatui. 20 Kawái emka petsakma murikji̱a̱i̱ yapaji̱átarum, túrachkurmeka kuntuje̱ kupirkarum mátarum. Atumí uchirí̱ iwia̱i̱ri̱ taṉkuja̱i̱ yapaji̱árum surustarum tura Winí̱ winiakka chikichkisha jú̱nikkia táchati.

21 Sais tsawant takakmastarum tura siati tsawantai̱nkia arakmatniuitkiuish júuktiniaitkiuisha ayampratarum. 22 Ashí trikiu eem juukma nuna namperi̱ najatata. Tura ashí júuktatmena nuna namperi̱ṉkia uwí amúamunam najattia. 23 Tura chikichkí uwitin Uunt Yusai̱, Israer shuara Yusri̱n, ashí áishmaṉ niniu ainia nu menaintiú weaniarti. 24 Átum chikichkí uwitin Uunt Yusai̱ menaintiú weankurmiṉkia átum íimmianum Wi chíkich nuṉkanam matsatainia nuna amukáran atumí nuṉke̱n nú uunt awajtústatjarme. Túramtai atumí nuṉke̱nka yaaksha wakerutramkachartatui.

25 Tura taṉku maa súrakrumsha nuna numpé̱ wariṉkish karinji̱a̱i̱ pachimpramu surusairap. Núnisaṉ Paskua nampertin taṉku maa súamu tiármataisha kashiniu ampirairap. 26 Nuyá̱ atumí nuṉke̱n araka neré̱ emka juukma péṉker ainia nu atumí Uunt Yusri̱ Je̱e̱n jútiniaitrume. Tura chipiu uchichikia ni nukurí̱ muntsurí̱ji̱a̱i̱ṉ painkia iniarkaip” tímiayi. 27 Uunt Yus Muisaisan chicharuk “Jú̱ chicham aartá. Jú̱ chichamja̱i̱ métek ámiji̱a̱i̱ tura Israer shuarja̱i̱ chichaman nájanjai” tímiayi. 28 Tura Muisais Uunt Yusja̱i̱ Senainium kuaraintia tsawant tsawai̱sha káshisha yurumtsuk entsankesh umutsuk pujumia nui̱ tias Akupkámu Umiktin Chichaman kayanam áarmiayi.

29 Nuyá̱ Muisais Senainiumia̱ jimiará kayanam Akupkámu Umiktin Chicham áarman takaku támiayi. Nui̱ Muisais Uunt Yusja̱i̱ chichasua tau asa ni yapí̱ winchar ajaamuncha nekaamachmiayi. 30 Nuyá̱ Arauncha tura Israer shuarsha Muisaisa yapi̱ jíitsumir wínchar ajaan wáinkiar weantúktinian ashamkarmiayi. 31 Tura Muisais Araunan núnisaṉ Israer shuara úuntri̱ncha ashí untsukar chichasarmiayi. 32 Nuya̱ṉka ashí Israer shuar iruntrarmatai Uunt Yus Senainium timia nuna mash ujakármiayi. 33 Nui̱ Muisais Israer shuarja̱i̱ chichasua umik ni yapi̱n tarachji̱a̱i̱ nukukmiayi.

34 Tura Muisais Uunt Yusja̱i̱ chichastaj tusa wéakka ni yapi̱n nukukman jusá jú̱nik wá̱i̱miayi. Nuyá̱ jiinkí̱ Israer shuar umiktinian Uunt Yus akupkámun tuke ujarmiayi. 35 Núnisaṉ Israer shuar Muisaisa yapi̱n iisar jíitsumir nekapenakui Muisais ni yapi̱n tarachji̱a̱i̱ nukumiayi. Tura Uunt Yusja̱i̱ chichastajtsa weemam núkumakuk pujúu wémiayi.