Tawit Junatánja̱i̱ nawamnaiyamu
18
Tawit Saurja̱i̱ chichaasua umikmatai Junatána wakaní̱ṉkia Tawitia wakaní̱ji̱a̱i̱ jiṉkiamua núnis juákmiayi. Tuma asa Junatán ni aya̱shí̱n anea tímiatrus Tawitian anemiayi. 2 Nu tsawantinkia ni aparí̱ je̱e̱n waketki̱ tusa Saur emetamiayi.3 Nuyá̱ ni aya̱shí̱n aneana tímiatrusaṉ anea asa Junatán Tawitji̱a̱i̱ chichaman najanawarmiayi. 4 Nuyá̱ Junatánka pushin entsaruya nuna ai̱k chíkich iwiarmamtai niniu armia nuja̱i̱ irur puya̱ncha tíshimkiuncha emenmamke̱ncha Tawitian susamiayi.
5 Tawitkia Saur akupmia nui̱ we wémiayi. Túrasha ashí túrimia nuka tí peṉker jiintiu wémiayi. Tuma asamtai Saurka suntara uuntri̱ anaikiamiayi. Núnaka ashí Israer shuarsha tura Saura takarniúri̱ armia nusha tí peṉker enentáimtiarmiayi.
Tawit náatkamtai Saur suir iisma
6 Tura Tawit Jiristíun mamtai mesetnumia̱ waketrar suntar wininiakui nuwa̱ ashí Israer péprunmaya̱ shakapan tura chíkich tuntuitiai̱ ainia nuna takarainia kantamáiniak ti warasar jantsemkiar úunt akupin Saur iṉkiuṉtai tusar jíintrarmiayi. 7 Nuyá̱ kantamki̱ jantsemáiniak nuwa̱sha ju̱na tiármiayi
“Saurka míran maayi antsu Tawitkia tias míran maayi.” Tú kantampriarmiayi. 8 Túrasha Saurka ti kajekmiayi. Nuna antuk yajauch nekaper enentáimias “Tawitniaka tias míran tura wíniaka aya mírchiniak maayi tuíniatsuk. ¡Tura aya wi akupeamu súsatniukchak táattsara!” tu enentáimsamiayi. 9 Tura nu tsawantnumia̱ṉ juarki̱ Saurka Tawitian niisháa íimiayi.
10-16 Tuma asamtai Saurka Tawitian itiurkesh mátniun wakerukmiayi. Kame Tawit máchmaka ukunam úunt akupin ajastatna nuna Saur nekamiayi. Uunt Yus Tawitji̱a̱i̱ pujá asamtai Saurka Tawitian ashammiayi. Antsu Sáurai̱ya̱ṉka Yuska kanakmiayi. Ashí Israernumia̱ tura Jutanmaya̱ shuari̱sha Tawitniaka anearmiayi. Warí mesetan émtinkia níyayi.
Tawit Saura we̱a̱rí̱ ajasma
17-30 Saura nawantri̱ Mikiar Tawitian anemia nuna nekaamiayi. Tura Tawitian chicharuk “Sian Jiristíu máwakmin winia nawantur Mikiar nua̱ram atí tusan susattajme” tímiayi. Saurka Tawitian Jiristíu uwejé̱n íktuan iniaisataj tu enentáimmiayi. Tawit ni shuari̱ji̱a̱i̱ wéar tusiantu Jiristíun mámiayi. Túramtai Saur ni nawantri̱ Mikiaran nuatkat tusa susamiayi.