Saur Tawitian mátaj taun Junatán ayamprúkma
19
1-7 Saurka Tawitian mátaj tusa ni uchirí̱ Junatánan tura ni takarniúri̱n ashí ujakármiayi. Túrasha Junatán Tawitniaka ujakmiayi. Tura Junatán ni aparí̱n chichastai tusa kampunniunam jukí̱ chicharuk “Ame takartámin Tawitkia kajerkam yajauch awajsaip. Warí áminkia yajauchikia awajtámkachuiti. Antsu ni túrutairi̱ṉkia tí peṉkeraiti ántsan amincha tí yaintmakuiti” tímiayi. Tura Saur nuna antuk nekas tajai tusa “¡Uunt Yus iwiaakui Tawitkia jákashtatui!” tímiayi. Nuyá̱ Junatán Tawitian untsuk úunt akupniu chichame̱n ujakmiayi. Nuya̱ṉka Saur pujamunam Tawitian ejemiayi. Túruna Tawit yaunchu Saurja̱i̱ pujuya núnis ataksha pujusmiayi.Tawitian Mikiar uwemtikramu
8-17 Mesetan ataksha najanawarmiayi tura Tawitkia Jiristíuja̱i̱ mánik ti nupetmamiayi. Nuyá̱ yajauch wakan Úunt Yusai̱ya̱ Sáuran eṉkemtuamiayi. Túrunamtai Tawitkia árpan tuntuitimiayi. Saurka naṉkin takus eketu asa Tawitian naṉkiji̱a̱i̱ ijiun tanishnum akunátaj tu enentáimsamiayi. Túrasha Tawitkia naṉkin uwemturmiayi. Nuyá̱ Tawitian kashin káshik máwarat tusa Saurka ni takarniúri̱n Tawitia je̱e̱n akuprámiayi. Túrasha ni nua̱rí̱ Mikiar chicharuk “Jú̱ kashi ame iwiaakmaram uwemtikchakmeka kashinkia ámeka jakam tsawa̱rtatme” tímiayi. Nuyá̱ Mikiar Tawitian ánkamunmaani̱ ji̱i̱ki̱ akupkámiayi. Túram nú kashi Tawitkia pisarmiayi.
Tawit Nayut Ramanam u̱mkamu
18-24 Tawitkia pisar Ramanam Samuir pujamunam wémiayi tura Saur warí itiurkamia núnaka Samuiran ashí ujakmiayi. Tura Samuirja̱i̱ tsaniṉ Nayutnum wéarmiayi. Saursha nuna nekáa aents tu̱á̱karun émkasha nuyá̱ ataksha tura núna ukunmasha Tawitian achikiárat tusar akuprámiayi. Túrasha Yusa Wakaní̱ eṉkemtuawaran ukunam túrunattana nuna aṉkant aṉkant etseriarmiayi. Nuya̱ṉka Saursha ímia niṉki patakamiayi tura ni pushiri̱n áimiak Samuir pujamunam jeá ukunam túrunattana nuna étserak tsawai̱sha káshisha misú tepesmiayi.