Tawit Sáurai̱ya̱ pisarma
21
Nuya̱ṉka Tawitkia Nup nuṉkanam Yúsnan pujurniun Ajimiríkian werimiayi. Nui̱ aya aneachma Tawitian wainiak chicharuk “¿Ausha urukamtai yaaksha nemarkachmasha ameksha aaní̱ wekaam?” tímiayi. 2 Tutai Tawit aya̱k “Úunt akupin akuptak chichartak ‘Ju̱ túrata tusan akupeajmena núnaka yaaksha peṉké nekashti’ túrutui. Antsu natsach ainia nuka tui̱ iṉkiukartai tajia núnaka nékainiawai. 3 Antsu yamaikia seṉku paṉ nuíchuka warí takakam nu surusta” tímiayi. 4 Takui̱ Yúsnan pujurin aya̱k “Wi páṉkan takakjana ju̱ka náṉkamas páṉchaiti. Antsu ju̱ka Yus susamuiti. Túmaitkiuisha nú natsach áminiu ainia nusha nuwe̱ja̱i̱ tsanitsuk yujainiakuiṉkia amastájai” tímiayi. 5 Nuya̱ṉka Tawit Yúsnan pujurniun aya̱k “Nekas tajai. Yaunchu túrutai̱ya̱ nútiksarik jíinkiur núwa̱ka suritkiamuitji. Tuma ásar jintiá ii wéamuka mui̱jmiai̱ áiniamunmaṉ natsachi̱ aya̱shi̱ṉkia imiatkincha áiniawai. Nuja̱i̱ nekaata yamaikia núna naṉkaamas imiatkincha ajasáruiti” tímiayi. 6 Nuna tura Yúsnan pujurniuka chíkich paṉ atsá asamtai Uunt Yus Iiji̱a̱i̱ Pujuwiti tama páṉkan tsue̱tsue̱tnak eṉkeakᵘ Úunt Yusai̱ya̱ṉka jusa nu páṉkan susamiayi.7-9 Nu tsawantai̱ Etum aents Tuek náartin Saura murikrí̱n wainniu uuntri̱ pujumiayi. Tawit Ajimiríkian anintrak “Mesetnum mánitiai áwak” tutai Jiristíanmaya̱ Kuriatan Tawit mamia nuna puya̱ri̱n Yúsnan pujurin jusa susamiayi.
Tawit Káatnum chíkich wáurkaiti turutiarat tusa anaṉma
10-15 Tawit Sáurai̱ya̱ pisar Jiristíu aents úunt akupniuri̱ Ákisai̱ Káatnum u̱mkamiayi. Nui̱ Ákisa takarniúri̱ chichainiak “Kantampruiniak Saurka mírchiniak tura Tawitkia tias míran maayi tiniu armia ¿nú Tawitchakait?” tiármiayi. Tawit nuna antuk ti sapijmiakmiayi. Túruna wáurkaiti turutiarat tusa susurí̱ni̱ sawinin chukui ajamiayi. Nuna iis Ákis chichaak “¿Kame wáurkaka wini̱ṉkia táamainiawak. Urukamtai wi pujamunmasha wáurkasha itiartintrum?” tímiayi.