Tawit Sáuran ataksha tsaṉkuramu
26
1-12 Nuyá̱ Sépnumia̱ aents Sáuran chicharainiak “Tawit Akira nainnium ú̱mak ¿pujatsuk?” tiármiayi. Saur nuna antuk menaintiú mir Israernumia̱n áishmaṉkan achir yaruak Tawit e̱a̱ktai tusar ashintiukar Akira nainnium matsamtúkarmiayi. Tawit mamikmau armia nuna akuprar Saur taunka nekamiayi. Tawitia suntari̱ Awisháiji̱a̱i̱ kashi matsamkamunam wéarmiayi. Tura mesetnum mánin áishmaṉ armia nusha Sáuran ajapén etea ashí kanakarmiayi. Tura Saur ní naṉkiri̱ncha nuṉká akuná kánan Tawit wainkiamiayi. Nuyá̱ Awishái chichaak “Yamái Yus ame nemasrumin ame uwejmín íkturmasai, ní naṉkiri̱ji̱a̱i̱ ijiutaj iniaitiusta. Ju̱ ijiuaknak nuṉká iruattajai” takui̱ Tawit chicharuk “Máwaip. ¿Uunt Yus anaikiamu makukratcha mámniakait? Uunt Yus maati nuíchuka tsawantri̱ jeamtai jakati nuíchuka mesetnum we amukati. Uunt Yus Sáuran anaikia asamtai máwa̱i̱j tusa Uunt Yus winia aṉkant awajtusti. Waitneasam naṉki ayamach akunámu ana nu tura entsa yuminiam uwamu pujana nu achikta. Wetái” tímiayi. Kame Uunt Yus nu aentsun tí ikiantrarmatai yaaksha waitmakcharmai tura nekarmacharmai.13-16 Nuyá̱ Tawit arant wajasan suntaran tura Ápnernasha untsúak “¿Apnerá áimkiashtatmek?” takui̱ Ápner chichaak “¿Amesha yáitiam úunt akupin untsutni̱sha?” Tura Tawit Ápnernan inintrak “¿Ame áishmaṉchakaitiam? Israernumka ámijiai métekka atsawai. Warí úuntrum úunt akupin ai̱sha mátaj tusa Israer shuar waintiayi. Amesha tura áminiu ainia nusha jákatniuitrume. ¿Urukamtai atumí uuntri̱ Uunt Yus anaikiamu péṉker wáinkiachmarum? Íimsakia, úunt akupniu naṉkiri̱ tura entsa uwamu atamprusa tepamunam ¿tui̱ pujuinia?” tímiayi.
17-20 Saur Tawitia chichame̱n nekáa chicharuk “Tawit winia uchiru ¿ame chichammechukait?” tutai Tawit aya̱k “Ee winia uuntru úunt akupniu, winia chichampruiti. Tura uuntru ¿urukamtai ame takarniúrmesha jútikiam. Warinia itiurkaitiaj, winia uwejruja̱i̱sha warí yajauchinia túraitiaj? ¿Urukamtai Israera úunt akupniuri̱ sunkun e̱a̱ktaj tusa jíinkiniait tura wa̱a̱ náintiaani̱ wématai shuar patata nútikiait?” tímiayi.
21-25 Nuyá̱ Saur chichaak “Yajauchin túrajai. Winia uchir Tawitiá waketkitia. Atakka peṉké yajauchikia awajsashtatjame. Yamaikia winia iwiaakmarka tí shiir antiṉchamnia tímiatrus enentáimturume. Tura wikia nétsea núnisan túrajme túran ti awajirjai” takui̱ Tawit aya̱k “Juá úunt akupniu naṉkiri̱. Chikichik natsa tarí achikti. Uunt Yus yamái winia uwejruí̱ úunt akupniun íktursa asamtai Uunt Yus ni naka túrutairi̱ji̱a̱i̱ nuyá̱ ni tímiatrus umiktintri̱ji̱a̱i̱ aṉkant aṉkant akikiárti. Túramun wikia Uunt Yus achikma nuna mátniun nakitrájai. Ame iwiaakmarmeka wi íimmianum jú̱ tsawantka naṉkamantuiti núnisaṉ winia iwiaakmarsha Uunt Yus íimmianumka naṉkamantu atí tura ashí kúntutsnumia̱ Ni aṉkant awajtusti” tímiayi. Nuyá̱ Saur aya̱k “Winia uchiru Tawitiá, shiir awajsamu atá. Nekas ámeka ti uunt najantiatme túram ti nekas nupetmaktatme” tímiayi. Nuna takui̱ Tawit wémiayi tura Saurka ní pujutai̱ri̱n waketkimiayi.