Tawit Jiristíu nuṉke̱n u̱mkamu
27
1-4 Tawit ukunmaṉka Saura uwejé̱n jákatniuitjiai tu enentáimsamai. Tura Saur winia enentáimtursatniun iniaisat tusan tura ashí Israer nuṉka ímianaisha e̱a̱tkatniun iniaitiusat tusan Jiristíu nuṉke̱n ú̱mkatniuitjiai nunasha enentáimsamiayi. Nuyá̱ Tawit saisiantu aents irunturar aṉkant aṉkant ní nua̱ri̱ji̱a̱i̱ tura ní shuari̱ncha úunt akupin Ákis pujamunam Káatnum wéarmiayi. Núnisaṉ Tawit jimiará nuwa̱n, Ajinuáman tura Apikiáiran jukimiayi. Tura Tawitkia Káatnum pisaruiti tú tama Saur pujamunam chícham tarimiayi. Nuyá̱ atakka Saurka Tawitniaka e̱a̱kchamiayi.Tawit Sekraknumia̱ jatekratma
5-12 Tawit Ákisan chicharuk “Ame winia waitnentrakmeka waitneasam wi pepru ainia nui̱ pujustin surusta” tímiayi. Takui̱ Ákis Sekrak péprun susamiayi. Tura Tawitkia Jiristíu nuṉke̱n chikichik uwí tura kuatru nantu pujusmiayi. Áishmaṉ Tawitji̱a̱i̱ yujarmia nu Sekraknumia̱ jatekratkar Shúrnumia̱ juarki̱ Ejiptu nuṉka ímianai jatek ejewarmiayi. Tura áishmaṉnasha nuwa̱ncha iwiaaku ikiukchamiayi. Nuyá̱ muriknasha waakancha kawaincha kamiyuncha entsatáincha júkiar Ákisai̱n waketki̱ we wéarmiayi. Tura ashí tsawant Ákis Tawitian inintrak “Yamaisha ¿ya jatekárum?” tutai Tawit chichaak “Jutá nuṉkaani̱” tura chíkich tsawant “Jeraméer nuṉkaani̱sha” nuíchuka “Nuṉkaani̱ Kiin aents pujuinia nui̱ mánaikiarjai” tímiayi. Ákis Tawitian nekas tawai tu enentáimias “Yamaikia Tawitniaka ní shuar nakitiáiniawai tuma asamtai yamaikia Tawitkia winia tuke takartin átatui” tu enentáimtusmiayi.