Uunt Yusa Je̱e̱n je̱a̱mara̱i̱ṉ tusa tsanumma
4
Kame achirar yajá yaruakma káunkar Uunt Yusan Israera Yusri̱ Je̱e̱n je̱a̱mainiawai táman Jutá tura Piṉjiamín shuara nemasri̱ antukarmiayi. 2 Tura Surupapíran núnisaṉ uunt armia nuna weriar chicharainiak “Iisha atumji̱a̱i̱ irunturar ju̱ je̱a̱ je̱a̱mtai. Warí iisha atumji̱a̱i̱ métek atumí Yusri̱ e̱a̱ji. Tura Asirianmaya̱ úunt akupin Esarjatún ju̱i̱ ikiatmakmiaj nuyá̱ juárkimiuk yamaiya̱ ju̱i̱sha enentáimtukir murikkia Ni áestukir winiaji” tiármiayi.3 Túrasha Surupapír, Jesúa, núnisaṉ Israer shuara uuntri̱ armia nu chichainiak “Ii Yusri̱ Je̱e̱ṉka atumji̱a̱i̱ iruntrarkia je̱a̱rchatniuitji. Antsu Pírsianmaya̱ úunt akupin Siru akupkámuja̱i̱ métek Uunt Yus Israer shuara Yusri̱ Je̱e̱ṉka iik je̱a̱rtiniaitji” tiármiayi.
4 Túrasha Jutá shuar sapijmiainiak je̱a̱mcharat tusar nu nuṉkanmaya̱ aents itit awajiármiayi. 5 Ni túramun umikiara̱i̱ṉ tusar aentsu chicharniun akikiar Pírsianam úunt akupin Siru pujumia nuyá̱ juárkimiuk úunt akupin Taríu pujumia tímianaisha itit awajsarmiayi.
6 Núnisaṉ Asueru úunt akupin náamak juármanum Jutanmaya̱ tura Jerusaréṉnum aents matsatainia nuna yajauch túruiniawai tusar papin najatawarmiayi.
Artajírjis takat iniaṉnakma
7-16 Yaunchu úunt akupin Asnapár achir yaruak Samaria péprunam matsasmia nu tura chíkich uuntri̱ entsa amaini̱ matsasármia nuímiak Artajírjis pujumia nu tsawantin ni uuntri̱ armia nuna úunt akupin Artajírjisan Israer shuarka ántichu áiniawai tusar waitruawar papin tu áatrarmiayi. Jerusaréṉ je̱a̱mtinian tura Jutá wenuke̱ takakmakir wétin tsaṉkateakmiṉkia Israer shuarnumia̱ ainia nuka kuit akikmaktin timia nuna akikmakchartatui tusa úunt akupniun ujakármiayi. Jerusaréṉnumia̱ aents yaunchu ni Yusri̱n umircha armia nuna nui̱ papí áarar ikiusma írunna nui̱ iis úunt akupin nekaat tusa útsukarmiayi.
17-22 Uunt akupin Artajírjis chichaman akupeak “Papikia achikmaji tura Jerusaréṉnasha anintrúsar péṉker nekaaji. Kame yáunchuka tí kakaram úunt akupin Jerusaréṉnum pujusármai. Tura nui̱ pujusár Jerusaréṉnumia̱ juárkiaran uunt entsa tímianai akupkarmai. Núnisrik ni takarniúri̱ ásarar kuitcha akikiármaji. Tuma asamtai pepru ataksha iwiarkarum je̱a̱mkatarum tama chícham yamaram táamam takaarmena nusha iniaisatarum. Ántsarmek nú arant ajakrum wi tájana nu chícham umitsuk iniaisairap” tímiayi.
23 Uunt akupin Artajírjisan chichame̱n antukar Samarianmaya̱ uunt armia nu tura chíkich uuntri̱ entsa amaini̱ matsamármia nuna Israer shuaran takatan kakarmaja̱i̱ tsuriṉ initiustai tusar tí warik Jerusaréṉnum wéarmiayi. 24 Kame nuna túruiniakui Uunt Yusa Je̱e̱ je̱a̱mtinian Jerusaréṉnum naṉkamawarmia núnaka iniaisarmiayi. Taríu Pirsia nuṉkanam úunt akupin ajasma jimiará uwí pujumia ímianai̱ iniaisarmiayi.