Yusa Je̱e̱ je̱a̱mtinian iniaisariat ataksha juarma
5
Tura Yúsnan etserin Ajíu nuyá̱ Itiu uchirí̱ Sakaríasja̱i̱ Israer shuar Jutanam núnisaṉ Jerusaréṉnum pujuarmia nuna Israer shuara Yusri̱ nin pujuriarmia nu Yusa náari̱ji̱a̱i̱ chichaman ujakármiayi. 2 Nuya̱ṉka Saratiára uchirí̱ Surupapír tura Jusatáka uchirí̱ Jesúaja̱i̱ ataksha chichamprukar Uunt Yusa Je̱e̱ Jerusaréṉnum je̱a̱mainiayat iniaisámun ataksha naṉkamawarmiayi. Tura Yúsnan etserin armia nusha niji̱a̱i̱ métek pujuiniak ikiakáiniarmiayi. 3 Núnisaṉ Yúpratis amaini̱ uunt mátsatkamu uuntri̱ Tatnai tura Sétarpusnai ni írutramuri̱ji̱a̱i̱ takaarmia nuna tariar chicharainiak “Yusa Je̱e̱ ataksha je̱a̱mtinniasha tura wenuke̱ iwiartuktinniasha ¿ya atumniasha tsaṉkatramkaitrum? 4 Tura ju̱ je̱a̱n je̱a̱mainia nuna náari̱sha ¿ya ainia?” tiármiayi. 5 Kame Taríu papí akuptúkma ni chichame̱ táamam Israer shuara úuntri̱nkia Yus yaya̱mu ásar takatnaka iniaṉnatsuk takakmarmiayi.Tatnai Taríun takatan inintramu
6-17 Kame entsa amaini̱ pujuarmia nuna uuntri̱ Tatnai tura suntara uuntri̱ niji̱a̱i̱ pujuarmia nu Israer shuarka Yusa Uunt Je̱e̱n iwiarak ataksha je̱a̱mainiawai tusa úunt akupin Taríun papin áatrar akuptúkarmiayi. Tura nu túratniuncha ¿ya tsaṉkatramkamarum? ántsaṉ ¿ju̱ takatnasha ya chichampra? nusha anintrúsji tusar úunt akupniun ujakármiayi. Tutai Israer shuarsha chichainiak ni uuntri̱ umikcharmaja̱i̱ nayaimpincha tura nuṉkancha najana nú Yusan akajkarmiayi. Túramu asa achir sepunam yaruakarat ántsaṉ Jerusaréṉnasha nuyá̱ Yusa Uunt Je̱e̱ncha emeskarat tusa Uunt Yus Napukutunusúran akupkámiayi. Nuyá̱ ukunam úunt akupin Siru Uunt Yusa Je̱e̱ iwiarkarum ataksha je̱a̱mkatarum tímiayi. Nuna tura Uunt Yusa Je̱e̱ṉ takatai̱ kuriji̱a̱i̱ tura kuít jiruja̱i̱ najankamun Napukutunusúr yaruakmia nu ame awaiṉkitia tusa Sespasáran uuntri̱ anaikiamia nuna susamiayi. Kame ju̱ péṉkeraitkiuiṉkia úunt akupin Siru umiktin papin áarar ikiusármana nui̱ e̱a̱nak nekanati. Tura ame enentáimmiarmesha etserkata tu áatrarmiayi.