Siru chícham najanamun Taríu étserma
6
1-2 Papí aakma ikiutai̱niam e̱a̱ktarum tusa úunt akupin Taríu akupkámiayi. Túram Akmitianan úunt akupniu kuitri̱ ikiutai̱niam papí jú̱nisar áarman wáinkiarmiayi.3-5 “Wi úunt akupin Siru Uunt Yusa Je̱e̱ Jerusaréṉnum ana nu ataksha iwiarkarum je̱a̱mkatarum tusan akupeajai. Tura Uunt Yusa Je̱e̱n takatai̱ kuriji̱a̱i̱ tura kuít jiruja̱i̱ najankamun ataksha Uunt Yusa Je̱e̱n awakeartarum tú aarman wáinkiarmiayi.”
6-10 Tura Taríu Tatnain chichaak “Tuma asamtai entsa amaini̱ aents matsatainia nuna úuntri̱n Tatnaiyá tura suntara úuntri̱tirmesha Jutanmaya̱ uunt ainia nu ataksha iwiarkar Uunt Yusa Je̱e̱n je̱a̱mkarti tusarum tsaṉkatkatarum núnisrumek takakmainia nusha akiktarum. Entsa amaini̱ matsatrumna nusha takat naṉkamamua nu naṉkanka̱i̱ tusarum takakmainia nu kuit akiktarum. Núnisrumek taṉkun maa áestuawar Uunt Yusan shiir awajsatniun atsumainiakuisha mash susatarum. Túrawar úunt akupniu iwiaakmari̱n tura ni uchirí̱ncha Uunt Yusan seatiarti.
11-12 Núnisaṉ yaaksha jú̱ akupkámun yapaji̱akka mantamnattawai. Ántsaṉ chíkich úunt akupniuksha núja̱i̱nchuka chíkich aentskesha Uunt Yus Jerusaréṉnum pujana nuna kajerak ju̱na umikiara̱i̱ṉ tusa yapaji̱átaj tuíniakuiṉkia Uunt Yus núnaka iistí. Wi úunt akupin Taríu ju̱ akupkámu nekas uminkiati tusan akupeajai” tímiayi Taríu.
Yusa Je̱e̱ je̱a̱mar umikma
13 Nuya̱ṉka Yúpratis entsa amaini̱ matsatkamu uuntri̱ Tatnai tura Sétarpusnai ni írutramuri̱ji̱a̱i̱ úunt akupin Taríu chichaman akupkámia núnaka tímiatrusaṉ umikiarmiayi. 14 Tura Israer shuara uuntri̱ armia nusha Yúsnan etserin Ajíu tura Itiu uchirí̱ Sakarías túrunattawai tusa etserkarmia ímiatrusaṉ takainiak núkap kuakarmiayi. Núnisaṉ Israer shuara Yusri̱ timia nuja̱i̱ métek Siru, Taríu, nuyá̱ Artajírjis Pírsianmaya̱ úunt akupin armia nuna chichame̱ja̱i̱ métek je̱a̱mar amukármiayi. 15 Tura úunt akupin Taríu sais uwí náamak Pírsianam pujái̱ uwí amúamu nantu menaintiú tsawantai̱ Uunt Yusa Je̱e̱n amukármiayi. 16 Núnisaṉ Israer shuarsha tura Yúsnan pujurniusha Riwí shuarsha ántsaṉ yajá yaruakma káunkarmia nu Uunt Yusa Je̱e̱ amukman ti shiir wararainiak jú̱ Je̱a̱ Yusna atí tusar Yusan yumiṉsar yurumáwarmiayi. 17 Tura Yusa Je̱e̱ amukma iruntramunam sian waaka áishmaṉkan tusiantu murik áishmaṉkan tura kuatrusiántu murik yamatskaman súsarmiayi. Nuyá̱ ni tunaarí̱ tsaṉkurnarartinniasha Israer shuar tuse wea armia nuja̱i̱ métek tuse chípiun Yusan áestuawarmiayi.
18 Nuna tura umikiar Jerusaréṉnum Yúsnan takarsarat tusar Muisais aarmia tímiatrusaraṉ Yúsnan pujurniuncha ní takatri̱ni̱ṉ tura Riwí shuarnasha ni takatrí̱ji̱a̱i̱ métek akantrar aṉkant aṉkant apujsarmiayi. 19 Núnisaṉ achirar yajá yaruakma káunkarmia nusha emka nantu tsawant katurse jeamtai paṉ karin eṉketáchma Paskua namperan najanawarmiayi. 20 Tura Yúsnan pujurin nuyá̱ Riwí shuar imiatkincha ajasáru ásar Paskua namperan najanainiak achirar yajá yaruakma káunkarununcha tura ni yachi̱ Yúsnan pujurin armia núnanuncha núnisaraṉ ímia niniuncha murikiun mantuawar Yusan áestuawarmiayi. 21 Tura Israer shuar achirar yajá yaruakma káunkarusha núnisaṉ nui̱ pujuarmia nú aentssha nú nuṉkanmaya̱ aentsu yajauch túrutairi̱n iniaisar Israer shuara Uunt Yusri̱n umirkar shiir enentáimtustai tusar pachinkiarusha iruntrar yurumáwarmiayi. 22 Nuya̱ṉka ti shiir warasar paṉ karin eṉketáchma namperan siati tsawant pujursarmiayi. Warí ti shiir warainiak Israer shuara Yusri̱ Je̱e̱n takainiakuisha Pírsianmaya̱a úunt akupniusha Israer shuarnaka shiir enentáimtusarat tusa Uunt Yuska úunt akupniu enentái̱ncha iwiarturmiayi.