Ístras Jerusaréṉnum taama
7
1-5 Pírsianmaya̱ akupin Artajírjis akupmia nui̱ Araun weanmaya̱ Ístras Papirúnianam pujumiayi. 6 Jú̱ Ístras papin ain tura Muisais akupkámu umiktin chichaman tí unuimiátrauya nu Papirúnianmaya̱ Jerusaréṉnum támiayi. Kame Uunt Yus ni Yusri̱ Ístrasan pujuru asamtai ni seammia núnaka úunt akupin ashí susamiayi. 7 Núnisaṉ úunt akupin Artajírjis akupin ajas siati uwí pujái̱ Israernumia̱ Riwí shuar kantamniusha tura Yúsnan pujurniusha waiti wainniusha nuyá̱ Yusa Je̱e̱n takakma áiniasha wárumchik Jerusaréṉnum wéarmiayi.Jerusaréṉnum wáketma Ístrasja̱i̱ irunar
8 Artajírjis úunt akupin ajasmaka siati uwí tura nantusha seṉku jeamunam Ístras Jerusaréṉnum jeamiayi. 9 Tura emka nantu juármanum tsawantka chikichik tsawa̱rmanum Papirúnianmaya̱ waketkitniun naṉkamamiayi. Túruna seṉku nantu juarma tsawantin Jerusaréṉnum jeamiayi. Warí ni Yusri̱ waitnenkartutairi̱ niji̱a̱i̱ pujumiayi. 10 Warí Ístraska Uunt Yus akupkámu chichaman émamkesan unuimiátran péṉker nekaan umíakun Israer shuaran Yusa Chichame̱n tura akupkámuri̱ncha jintintiáwartaj tusa ni enentái̱ncha iwiarnaruyayi.
Artajírjis Ístrasan papí súamu
11 Ju̱i̱ti papin aar chikichnasha núninniak Yúsnan pujurniun tura papí ain Uunt Yusa chichame̱ncha unuimiátra núnisaṉ Yusa chichame̱n Israer shuara jintinniuri̱n Ístrasan úunt akupin Artajírjis áatar susamu. 12 “Artajírjis, úunt akupniu akupniúri̱, nayaimpinmaya̱ Yusa akupkámu papiri̱ áatniuri̱ Ístras. Péṉker aṉkant pujusti. Tura yamaikia 13 yaaksha Israer shuarnumia̱ ákuṉka Yúsnan pujurin áiniasha tura Riwí shuar ainia nusha ámiji̱a̱i̱ Jerusaréṉnum wéartaj tuíniakka wéarti tusan akupeajai. 14 Warí ame Yúsrum akupkámu ame takakma tana nuja̱i̱ métek Jutaja̱i̱ Jerusaréṉ iyutarum tusa úunt akupin tura ni yaintri̱ siati ainia nu akuptámainiawai. 15 Núnisrumek Israera Yusri̱ pujutái̱ri̱nkia Jerusaréṉ asamtai úunt akupin ni yaintri̱ ainia nuja̱i̱ kuít jiruncha tura kurincha ántar suíniamusha jukit tusan akupeajme. 16 Nútiksarmek Papirúnianmaya̱ kurisha núnisaṉ kuitcha irurtatrumna nusha tura shuar Yusan ántar súsarmasha nuyá̱ Yúsnan pujurin ni wakeramuja̱i̱ métek ni Yusri̱ Je̱e̱ Jerusaréṉnum pujana núnan súsarmasha ashí yaruaktiniaitrume.
17-22 Jú̱ kuitji̱a̱i̱ṉkia ame Yúsrumi Je̱e̱ Jerusaréṉnum pujana nui̱ Yus áestuatin atsumamua nuke sumakta. Kuit tiáruja̱i̱ṉkia atumí Yusri̱ túratarum túramprumna nuja̱i̱ métek ame yatsumji̱a̱i̱ túratarum. Tura Yusa Je̱e̱n takakmatai̱ ainia nusha Yus pujamunam Jerusaréṉnum awakeartarum. Nuyá̱ ame Yúsrumi Je̱e̱n wariṉkish atsumnakuiṉkia úunt akupniu kuitri̱ ikiutai̱nmaya̱ susatarum. Wi úunt akupin Artajírjis kuítian wáinin entsa amaini̱ matsatrumna nútirmin Yúsnan pujurin Ístras seamkuiṉkia nuka wárikmasrum ashí susatarum tusan akupeajrume.
23-26 Kame wariṉkish nayaimpinmaya̱ Uunt Yusa Je̱e̱n atsumnakui Uunt Yus seamkui̱ṉkia úunt akupniun uchirí̱ji̱a̱i̱ kajerka̱i̱ṉ tusarum wárikmasrum ashí susatarum. Núnisrumek Yúsnan pujurin ainia nuka Riwí shuar, kantamniusha, waiti wáinin nuíchuka Yusa Je̱e̱n takakma ainia nuka peṉké akikmakcharti. Tura amesha Ístrasá Uunt Yus nekatai̱n amaana nuja̱i̱ métek aents amaini̱ matsatainia nuna nekasa nuja̱i̱ métek sumamtikiainiak ame Yúsrum akupkámun ashí nekaawarat tusam úuntri̱sha nuyá̱ sumamtikniusha anairarta. Áitkiasaṉ ashí umikiarti nuíchuka mámuksha núja̱i̱nchuka nuṉke atankímiuksha túrutskesha sepunam eṉkeamuksha ártatui” Artajírjis Ístrasan áatramiayi.
27 ¡Ii apachri̱ Yusri̱ Uunt Yus shiir awajsamu atí. Warí Níṉkichuk Uunt Yusa Je̱e̱ Jerusaréṉnum pujana nu páantin awajnásti tusa úunt akupniun tú enentáimtikra! 28 Warí Niṉki úunt akupniuncha tura akupniu takarniúri̱ncha núnisaṉ ni yaintri̱ tí kakaram pujuarmia nunasha winia waitnentrurarat tusa enentáincha yapajtiuáwarmai. Túramtai winia Uunt Yusur wiji̱a̱i̱ pujá asamtai kakarmaja̱i̱ nuya̱ṉka wiji̱a̱i̱ waketkiarat tusan Israer shuara peṉkeri̱ arma nuna irurarmajai.