15 Entsa Ajawanmaani̱ naṉkaamana nui̱ ayamach iruntramji. Túrar nui̱ṉ menaintiú tsawant pujusármaji. Nui̱ pujusan aentsnumsha tura Yúsnan pujurin ainia nui̱sha e̱a̱karmajai túrasha Riwí shuarnaka peṉké wáinkiacharmajai.

18 Ii Yusri̱ waitnenkartutairi̱ iiji̱a̱i̱ pujá asamtai Riwí weanmaya̱n áishmaṉ neka Majri uchirí̱ Serepíasan itiartámarmaji. Tura niji̱a̱i̱ ni uchirí̱sha tura Serepíasa yachi̱ji̱a̱i̱ irurmaka tiasiúchu ármiayi. 19 Núnisaṉ Mirari uchirí̱ncha Asapiásan tura Jesayásan ni yachi̱ji̱a̱i̱ uchirí̱ji̱a̱i̱ irurar painti aentsun itiartámarmaji. 20 Yusa Je̱e̱n takakmainiak Riwí shuaran yaiṉkiarat tusa Tawit uuntri̱ armia nuja̱i̱ anairar apujsarmia nunasha tusiantu painti aentsun wáinkiarmiayi tura ni náari̱ji̱a̱i̱ métek papinium ashí áakarmiayi.

21 Tura Ajawa entsanam ayamach matsamsar ii Yusri̱ íimmianum péejchach ajastai tusar núnisrik wéajnia nui̱sha iincha tura ii uchirí̱ncha nuyá̱ ii warirí̱ncha ii Yusri̱ péṉker waitramkat tusar ijiarmár ii Yusri̱ seawartai tiármajai. 22 Kame úunt akupniun suntarum tura kawainium ekeemtan unuimiátka jintiá wéamunam ii nemasri̱ya̱ ayamkartukarat tusan seatniuncha natsantramjai. Warí úunt akupin chichareakur “Ii Yusri̱ṉkia Nin e̱a̱inia núnaka waitnentainiak tí peṉkeran súwiti antsu Ni kakarmari̱ṉkia tura kajetáiri̱sha Niya̱ kanainia nuna áiniawai” tiármaji. 23 Kame ijiarmár ii Yusri̱ ashí seamji tura seamajnia nunasha ashí anturtamkamji.

24 Nuya̱ṉka Yúsnan pujurin peṉkeri̱ arma nuna tuse akankámjai. Nusha Serepías nuyá̱ Asapiás tura tiaska ni yachi̱ chíkich armai. 25 Tura kuítniasha kurincha nuyá̱ takatai̱ najankamun úunt akupin núnisaṉ chichaman iwiarniuri̱ nuyá̱ úuntri̱sha ántsaṉ ashí aents Israernum matsatainia ii Yusri̱ Je̱e̱n ántar súsarma nuna kijin nekapmatai̱niam ashí nekapmatawarmajai. 26 Nuya̱ṉka kuítniaka saisiantu seṉkuintia tarentu nuyá̱ kuít jiruja̱i̱ piniṉ najankamuka sian tarentu nuyá̱ kúrikia sian tarentu jean ni uwejé̱n súsarmajai. 27 Nu arantcha painti amamuk kuriji̱a̱i̱ najanamu mir trakma jeá nuyá̱ jimiará tsapa yaṉkú jiruja̱i̱ najanamu kuria imianú péṉker armai. 28 Nuya̱ṉka chicharainiakun “Átumka Uunt Yusna atí tusarum íktusmaitrume. Nuyá̱ takatai̱ najankamu ainia nusha núnisaṉ akantúkma áiniawai. Antsu kuitkia tura kurisha Uunt Yus atumí aparí̱ Yusri̱ ántrarik súsarma áiniawai. 29 Jerusaréṉnum jearum Uunt Yusa Je̱e̱n tesarma ainia nui̱ Yúsnan pujurin peṉkeri̱ tura Riwí shuarsha núnisaṉ Israer shuara uuntri̱ áiniana nu iimiainiamunam kijin nekapmatai̱niam nekapmamam péṉker wainkiarum ikiustarum” tiármajai. 30 Nuya̱ṉka Yúsnan pujurniusha tura Riwí shuarsha kuítian kurin tura takatai̱ najankamu ainia nuna Jerusaréṉnum ii Yusri̱ Je̱e̱n júkitin nekapmawarman wi suiniam nisha achikiármai.

31 Tura emka nantu tsawantka tuse tsawa̱rmanum Jerusaréṉnum wáketkur Ajawa éntsaka ikiukmiaji. Kame jintiasha ii Yusri̱ iiji̱a̱i̱ pujá asa ii nemasri̱ya̱sha tura kasa shuar ainia nuya̱sha aṉkant awajtámsamji. 32 Jerusaréṉnum jear menaintiú tsawant ayampramji. 33 Ayamprar kuatru tsawantinkia ii Yusri̱ Je̱e̱n kuitcha kurisha tura takatai̱ najankamu armia nusha kijin nekapmatai̱niam nekapmawarmaji. Túrar Yúsnan pujurniun Uríasa uchirí̱ Mirimiút súsarmaji. Núnisaṉ Piniasa uchirí̱ Iriasársha tura Riwí shuarsha Jesúa uchirí̱ Jusapát nuyá̱ Piniuí uchirí̱ Nuatías niji̱a̱i̱ pujuarmiayi. 34 Nu tsawantin ashí nekapmanar tura kijin nekapmatai̱nmasha nekapmana ashí irurmasha urutmá kijiniait nunasha áatrarmiayi. 35 Achirar yaruakma waketkiar káunkar Uunt Yusan takamtsuk áestuawarmiayi. Ashí Israer shuarnan tuse waaka áishmaṉkan tura nuwintisáis murik áishmaṉkan núnisaṉ sataintisiáti murik yamatskaman ántsaṉ yajauch túrawarmanumka tuse chipiu áishmaṉkan Uunt Yusan takamtsuk áestuawarmiayi.