Pachimnair nuatnairamunam itiurchat wainma
9
1-2 Nu naṉkaamasmatai uuntri̱ ainia nu chichartuiniak “Israer shuarsha núnisaṉ Yúsnan pujurin ainia nusha tura Riwí shuarsha nuyá̱ chíkich aents túrutairi̱ túrin ainia nuya̱ṉka kanakcharuiti. Warí nisha tura uchirí̱ncha nuyá̱ aentsu nawantri̱ji̱a̱i̱ nuatmamtikiaruiti. Tura pepru uuntri̱ núnisaṉ suntara uuntri̱ ainia nusha nú yajauch túratniunka nekaska niá niá émtuku áiniawai” tiármiayi.3-9 Nuna antukan winia pushirun já̱a̱kmajai tura winia intiashruncha tura susurnasha uwermajai túran nuya̱ṉka kakarmachu ajasan pujusmajai. Nuyá̱ aents Israera Yusri̱ chichame̱n ashamin arma nu wi pujamunam iruntrarmai. Kame aaṉkú taṉku maar aestai̱ ura jeamunam wi wáitsar pujamunmaya̱ wajaki̱n tikishmaran winia Úunt Yusrun uwejrun takurin chichareakun “Winia Yusru paṉkain Ámin íistiniasha natsaamajai. Warí ii yajauch túrutai̱ tí untsurí ajasár iincha amutmá nayaimpinmasha jeayi. Ii uuntri̱ matsamin armia ímianiaṉ makuntraitji. Tuma asar chíkich nuṉkanmaya̱ úunt akupniu uwejé̱e̱n íktusar iniaisámu asar achirar yajá yaruakma natsanmai̱ ajarmaji. Túmarin Ame waitnenkarturam ishichik juákaru ainia ju̱ waketkiartin tsaṉkatkaitme. Kame iniatai̱ pujuiniayatrik Yus ii ji̱n sukutrami paant awajtúrmasakrin ajintruamunam wariṉkish awaṉkeastinia nútiksar Yusa Je̱e̱n imiá nekasaiti tu enentáimtustin tsaṉkamkaitme. Núnismek úunt akupniusha iin waitmakat tura ii Yusri̱ Je̱e̱ je̱a̱mtinniasha yaintmakat tusam útsukuitme.
10-15 Tura maa Yusru ¿yamaisha warintiajik? Ame akupkámusha ajapa ikiukniuitji. Tura ju̱ naṉkaamasainia ju̱sha ii yajauch tura makumarmanum tarutrámniuitji. Nekaamaji, warí ii yajauch túramunam asutkiartuatniuitmena nuja̱i̱ ishichik asutkiartuamna nu iwiaaku juárkaru wáinkiarji. Nuikia ataksha umitsuk chíkich aentsja̱i̱ nuatnaiyakur mui̱jmiainian túruiniana ¿núkek waketrukiartatajⁱ? ¿Kame kajekmeka amukratkashtatmek tura iwiaaku juákaruka peṉkek atsuartata? Maa Uunt Yusru, Ámeka nekas péṉker naka túriniaitme. Maa yajauch áyatrik iikia Amiini̱ pujuiniaji. Warí, yaaksha yajauchikia Aminí̱ṉkia peṉké pujuschamniaiti” Ístras tímiayi.