Chíkich nuṉkanmaya̱ nuwa̱ ji̱i̱ra akuprarma
10
1-11 Ístras Yusa Je̱e̱ni̱ íimias Yusan áujeak tikishmar útkamaikia aentsu tunaari̱n Yusan ujak pujái̱ Israer shuar tí kuntuts enentáimiainiak útkiar ti untsurí nin irunturarmiayi. Tura Sekanías Ístrasan chicharuk “Iikia Yusai̱ yajauch túrawaruitji. Túrasha Israer shuar naka túramniaka aṉkantka tuke awai. Wats yamaikia Yusja̱i̱ chícham najanatai. Tura ashí nuwa̱ núnisaṉ nu nuwa̱nam yajutmakma ainia nuka akuprartai. Iwiarata, warí ju̱ka ame túratniuitme tura iikia ámiji̱a̱i̱ pujaji tuma asamtai kakaram ajasam túrata” tímiayi. Nuya̱ṉka Ístras wajaki̱ wi tájana nuja̱i̱ métek ashí túrawarat tusa Yus íimmianum nekas umiktatji tumamtikiarmiayi. Nuya̱ṉka menaintiú tsawant naṉkaamasmatai ashí Israer shuar peṉké táamtsuk Jerusaréṉnum iruntrarat tusa nántuka nuiwi tura tsawantka páintitin iruntratniun untsumkamiayi. Yusa Je̱e̱ uraimiunam irunainiak áujmattsartatna nuna enentáimtusar yumisha yuta asamtai kurainiarmiayi. Nuyá̱ Ístras chichaak “Átum chíkich nuṉkanmaya̱ nuwa̱ nuatú pujusrum yajauch túrakrum Israersha núna nukap makururme. Yamaikia átum yajauch túramu Uunt Yus ujaktarum túrarum Ni wakeramu umitiarum. Nu nuṉkanmaya̱ aents matsatainia nuya̱sha tura chíkich nuṉkanmaya̱ nuwa̱nmaya̱sha kanaktiarum” tímiayi.12-17 Nuyá̱ ashí irunar matsamármia nuka tí kakaram aimiainiak “Ee ame támena nuka tímiatrusrik umiktatji. Tura untsurí asar núnisaṉ yumisha yuta asamtai a̱a̱ wajastin jeatsji. Antsu ashikia juátsuk aya ii úuntri̱n ju̱i̱ṉkia juákarti. Tura tsawant tesamu jeamtai chíkich nuṉkanmaya̱ nuwa̱n nuatkaru ainia nuka ni pépruri̱ uuntri̱ tura sumamtikin ainia nuja̱i̱ iruntrar ii Yusri̱ suir kaje̱ntkamun tsaṉkumam káunkarti” tiármiayi. Kame tias nantu juarma tsawantin émamkesar nekaatniunka juárkiar emka nantu juarma tsawantin takatnaka amukármiayi.
Chíkich nuṉkanmaya̱ nuwa̱ nuatramu
18-44 Chíkich nuṉkanmaya̱ nuwa̱n nuatraruka Yúsnan pujurniu uchirí̱ṉkia tiasisiáti ármiayi. Nuyá̱ Riwí shuarka sais ármiayi núnisaṉ kantamin armia nuya̱ṉka chikichik ámiayi tura waiti wáinniuka menaint ármiayi. Núnisaṉ Israer shuar náṉkamas armia nuka uchaintia ármiayi. Kame ashí ju̱ aentska chíkich nuṉkanmaya̱ nuwa̱n nuatkaru ásar chíkichkia uchincha yajutmaku ármiayi.