Juup Pirtatan ai̱kma
9
Juup Pirtatan aya̱k2 “Wi íismaka nekas ántsaiti tajai, aents imiá yajauchisha Yusai̱sha ¿itiurak péṉker aint?
3 Aents Yusja̱i̱ tunaitniun wakeraksha,
Yus mir inintramun chikichkiṉkisha ái̱kminkiait.
4 Yuska enentáin nékaiti, kakarmatnasha ti kakarmaiti.
¿Yaki Yusan nakitiar wáittsuk péṉker pujususha aa?
5 Yus kajekka náintian umuchir yúmpuiniaiti
tura nu túramuncha peṉké nékainiatsui.
6 Yuska nuṉka ni tépakmari̱ya̱n umuchir pachimniuiti.
7 Núnisaṉ Yus etsa̱n tura yaancha etsantrairap tutaiṉkia etsantracharminiaiti.
8 Yuska aya Niṉki nayaimpincha iwiaṉkármiayi
tura nayantsa tampari̱n wekainiaiti.
9 Ashí yaan, Musachin, Utunmin, Yáṉkuamniasha
tura nuṉkaani̱ u̱kma irunainia nunasha Niṉki najankaiti.
10 Yuska aentstikia nekaachminian, irunainia nunasha tí uuntan
tura nekapmarchamnia tí peṉkeran najankaiti.
11 Tura wi pujamunam Yus pujakuisha wáinkiachaintjiai
tura naṉkatakuisha nekapmamprachaintjiai.
12 Yus nérentin asa warirí̱ṉkish jurukchatpiash nunasha ¿yaki suritiak awaṉtukin?
¿Yaki urukamtai áitkiam tiint?
13 Yus kajekka asuttsukka iniaichaiti.
Tuma asa waantu enentáimin ainia nuna yáintri̱n kakarmaja̱i̱ péejchach awajniuiti.
14 Tura Wisha ¿itiurak Yusnasha ái̱kiaintiaj?
Kame ¿warí chichamnak júuran Yúsja̱i̱sha tunaiwintiaj?
15 Maa, wi péṉkeran túriniaitiatnak ái̱ktinian jeatsjai
antsu waitnentrurta tusan seawaintjiai.
16 Wi Nin untsúam ái̱rkuisha
winia chichamprunapi anturtukia tíchamniaitjiai.
17 Naseja̱i̱ wáitkiaras
ántsan peṉké antar nu arant winia akaṉkainti.
18 Nuna túruta wáitkiarak
ishichiksha peṉké mayatkachmin awajtinti.
19 Ni kakarmari̱ áujmattsamsha nekas ti kakarmaiti.
Tura sumamtiktairi̱ji̱a̱i̱sha yaki Niji̱a̱i̱ métek sumamtikiawaint.
20 Wi péṉkeraitjiai túmamkuisha winia chichampruk makurinti
tura tunaarinchaitjiai tákuisha Niṉki súmamtikruawainti.
21 Wi tunáa túrichuitjiai
tákuncha ímia wíkikia nekamatsjai
tura iwiaaku pujutnaka nakitkíjiai.
22 Ju̱ títin tátrusai
‘Yusan enentáimtichuncha
tura péṉkeran túrinniasha ni iwiaakmari̱n juriniaiti.’
23 Aents asutram aneachma jakamtaiṉkia
umitmákcha wáitiainia nunasha iis Yuska wishikniuiti.
24 Niin enentáimtuiniatsna nuna ju̱ nuṉkan íktusuiti.
Tura sumamtikin ainia nuna ji̱ncha ukusturaruiti.
Nuiṉkia ¿Níchuitkiuisha yaki aint nusha tui̱ pujá?a