Yus naka túrin asamtai yúmiṉkiamu
Kantamtikniun ju̱ kanta Tawit áaruiti.
9
Maa Uunt Yusá, wikia tuke winia enentái̱rja̱i̱ shiir awajsattajme.Tura aents túrachmin ashí najankaitmena nunasha áujmatsartatjai.
2 Ámin shiir enentáimtakun wararsattajme.
Ashí Naṉkamantuu, Ame náarmin shiir awajkun Ámin kantampruáttajme.
3 Winia nemasur úkumur waketainiak
Ame íimmianum iniarar amuukarmai.
4 Winia naka túramna nu ayamprutkame túram nekasa nuja̱i̱ métek túrutai̱ji̱a̱i̱ sumamtiktai̱ pujutai̱nium pujusúme.
5 Uunt nuṉka mátsatkamu ainia nusha chicharkaruitme túram Yusan enentáimtichu ainia nusha emeskaruitme túram
ni náari̱ṉkia atakka enentáimtunsashtin tuke asakátraruitme.
6 Winia nemasruka matsatainiatsui
tura ni pépruri̱sha emestukarmame túram
yáakesh ní enentáimtutai̱ṉkia niji̱a̱i̱ amukármai.
7 Túrasha Uunt Yuska tuke pujuwiti.
Tuma asa nekasa nuja̱i̱ métek iis nekaawarat tusa Ni akuptai̱ pujutái̱ri̱n apujsamuiti.
8 Ni naka túrutai̱ji̱a̱i̱ aents túramuja̱i̱ métek wainiak nekaawartatui.
9 Uunt Yuska wáitkiasma matsatáinia nuna úmtairi̱nti
tura jakamnia enentáimiainiana nui̱sha úmtainti.
10 Ame náarmin nékainia nuka Ámin enentáimturmasartatui Uunt Yusá
tura e̱a̱tmakarma nuka Ámeka ajapa iniaisacharuitme.
11 Uunt Yus Seúnnum akuptáinium pujuwiti. Ni kantampruátarum.
Nu arant Ni najankamuri̱ aents matsatainiamunmasha etseratarum.
12 Tunamkachun Yapajmiátniuka tuke enentáimtuiniawai
tura wáitkiasma pujuinia nusha untsumkuiṉkia kajinmatainiatsui.
13 Uunt Yusá, winia waitnentrurta.
Ame jatai̱ wáitinmaya̱ iniantukmin asam winia nakitruiniak itiurchat najatruiniana nu íisarta.
14 Seunna nawantri̱ wáitiri̱n
Ámin ashí shiir awajtámsatniun áujmattsarti
tura ame uwemtikkiartutairmiin warastatjai.
15 Uunt nuṉka mátsatkamu ainia nuka wa̱a̱ tá̱i̱wiarma nui̱ṉ waya̱warai
tura neka nenamunam nawe̱nam nemakarmai.
16 Uunt Yuska nekasa nuja̱i̱ métek sumamtikniun túrama nuna nekaamai
núnisaṉ Yusan enentáimtichu ainia nuka ni najanamunmaṉ nemakarmai. (Séraj)
17 Yusan enentáimtichu ainia nusha tura ashí uunt nuṉka mátsatkamunam
Yusan kajinmatainia nuka jakaa matsatainiam junakiartatui.
18 Atsumin ainia nuka tuke kajinmátkimiu áchartatui
tura kuítrincha ainia nu péṉker átinian nákamua nuka niṉkia túkeka meṉkatukchartatui.
19 ¡Maa Uunt Yusá nupetmakta! ¡Ámin aents nupettamkashti!
Tura uunt nuṉka mátsatkamu ainia nu Ame íimmianum sumamtikiawarta.
20 Uunt Yusá, aents sápij eṉketáwarta.
Tura uunt nuṉka mátsatkamu ainia nusha aya áentsketji tu enentáimias nekamawarti. (Séraj)