Wáitsar pujakur yaintkiat tusar seamu
Tawit kantamámu
25
Uunt Yusá winia wakantrunka Ámin íktajme.2 Winia Yusru Ámin enentáimta asan
natsan awajit tusam iniaitiusaip
ántsaṉ winia nemasruka warartuscharti.
3 Ti nekas Ámin enentáimturmainia nuka chikichkisha peṉké natsa̱a̱rchartatui.
Antsu peṉké ántar Amiin kajertamainia nuka natsa̱a̱rartatui.
4 Maa Uunt Yusá Ame jintim jintintruata.
Túram Ame jintim iniaktursata.
5 Winia uwemtikrin Yus asam
péṉkeran túrataj ewekátsam jintintruata.
Tsawant takamtsuk Ámin nákasmajme.
6 Maa Uunt Yusá Ame waitnenkartutairmeka náṉkatkachu áiniawai.
Tuma asamtai Ame waitnenkartiniaitmena nuja̱i̱ enentáimturata.
7 Wi natsa asanak tunáa túramiaj nusha tura umikchatin enentáiji̱a̱i̱ pujumiaj nusha enentáimtursaip.
Ame waitnenkartutairmiji̱a̱i̱ métek winiasha Uunt Yusá
Ame tí peṉker asam waitnenkartutairmiji̱a̱i̱ enentáimtursata.
8 Uunt Yuska péṉkeraiti tura nákaiti.
Tuma asa yajauch shuar ainia núnaka jintian nekaprua ininiuiti.
9 Péejchach ainia núnaka péṉker túrutainmaani̱ ewekásartatui
núnisaṉ imianchach ainia núnaka ni jinti̱n wekasatniun unuiniarartatui.
10 Uunt Yusa jintí̱ ainia nuka waitnenkartutairi̱sha tura nekasa nuja̱i̱ métek áiniawai.
Kame chícham najanamun tura akupkámun umirainia núnaka Yus nékainiawai.
11 Uunt Yusá Ame náarmin arantin árat tusam
winia tunaar tí nukap irunainiaiṉᵏⁱ tsaṉkurturta.
12 Ya áishmaṉka Uunt Yusan ashama núnaka
jú̱ jintia achikta tusa jintintiá ininiawai.
13 Nu áishmaṉka wakaní̱ṉkia péṉker pujustinnium ayamprattawai.
Tura ni shuari̱nkia nuṉka sunastatui.
14 Uunt Yusan nekas ashamak tsanias pujana nuna
Yus nekaska Ni enentáimta nuna nékamtikiattawai.
15 Winia jí̱runka Uunt Yusai̱ Níni̱ṉ tuke íimiak áiniawai.
Kame Níyaiti winia nawerun nekanmaya̱ jurutna nuka.
16 Íirsam winia waitnentrurta.
Wáitiayatnak wiki pujajai.
17 Winia enentái̱r jakamnia nekapeamunmaya̱ nu arant ajasjai.
Tura jata nekapeaj nuyá̱ jurusta.
18 Winia wáitiamursha tura winia takatrusha iistá
túram ashí winia tunaar tsaṉkurturarta.
19 Winia nemasrusha urutmá nukapea kawentrukara nu íisaria.
Ti kajertuku ásar peṉké nakitruiniawai.
20 Winia wakaniur waitrukta túram aṉkant awajtusta.
Wi natsa̱a̱ra̱i̱j tusan Ámin ejamkájai.
21 Esetrar wekasatin tura naka túrutai̱sha wíniaka wáitkiarti.
Warí wikia aya Amiiniak nákasjame.
22 Israer shuar jakamnia nekapena nuyá̱ awakearta Yusá.