Wi kitiamajna tímiatrusan Yusan enentáimtajai
Kurái uchirí̱ aarma
42
Japa entsan e̱a̱k jan jan ajanatímiatrus wikia Yusá e̱a̱jme.
2 Wikia kitiamana tímiatrus Yusá enentáimtajme.
Kame ¿wenasha urutáik Yusai̱ wajasaintiaj?
3 Tuke tsawant chichartuiniak “¿Ame Yusrumsha tui̱ pujá?” turutainiakui
winia nea̱jkirka tsawai̱sha tura káshisha winia yurumkaruiti.
4 Untsurí aentsun yaruakan warasan kantamkin we wémiajai.
Yumiṉsajme tusar nampernum ti untsurí írunna ímiatrusnak wi émtukan Yusa Je̱e̱n niji̱a̱i̱ we wéarmiajai.
Nuna enentáimsan winí̱ init winia wakantrui̱ṉkia ukanájai.
5 ¿Urukamtaik jakamnia nekaprancha tura tí waitsancha pujustataj?
Túrasha winia enentái̱ru ¿urukamtai jakamnia nekapramsha winí̱ initiaani̱sha wáitiam?
Yus enentáimtakum nákasta.
Ánkisha winia Yúsruiti tura uwemtikruru asamtai tuke shiir enentáimtustatjai.
6 Winia Yusru winia enentái̱r tí waitias pujurtawai.
Túrasha Irmun naint tépetra írunna nuyá̱ tura Misar náinniumia̱sha
Jurtan nuṉka ímianai̱ pujayatnak Áminkia enentáimtu pujuttajai.
7 Tuna írunna nuka kunanam iniak nuamtak chichainiawai.
Chíchimiuram tura tamparum winí̱ naṉkatusaru áiniawai.
8 Tsawái̱ Uunt Yus waitnenkartutairi̱n akuptiatui
tura káshikia Nin kantamprittiajai.
Yus iwiaaku pujustinian winia surakui Nin tuke seattajai.
9 Yusan chicharkun “Winia kátsuram kayaru ¿urukamtai winiasha kajinmátruknium?
¿Urukamtai winia nemasur wáitkiarainiakuisha wisha uutú wekaitiaj?”
10 Winia ukunchur najamáiniai̱ṉ, winia nemasur wishikruiniak
tuke tsawant chichartuiniak “Ame Yusrumsha ¿tui̱ pujá?” turutainiawai.
11 ¿Urukamtaik jakamnia nekaprancha tura tí waitsancha pujustataj?
Túrasha winia enentái̱ru ¿urukamtai jakamnia nekapramsha winí̱ initiaani̱sha wáitiam?
Yus enentáimtakum nákasta. Ánkisha winia Yúsruiti
tura uwemtikruru asamtai tuke shiir enentáimtustatjai.