Aentsu tunaarí̱
Tawit kantamámu
53
Aents nétsea nuka “Yuska atsawai” tu enentáimiainiawai.Kame peṉké yajauch ajasáru ásar peṉké mui̱jmiainian túruiniawai.
Yaaksha péṉkeran túrinkia peṉké atsuiniawai. Rum. 3:10-11
2 Kame Yuska nayaimpinmaya̱ṉ ashí aentsun iis
Winia nekara tura enentáimtursamniasha áwash tusa íismiayi.
3 Túrasha Yúsnaka umirtsuk antsu aṉkant aṉkant ni wakeramuja̱i̱ ti yajauch enentáintin ajasármiayi.
Kame péṉkera túrinkia chikichkisha peṉké atsumiayi.
4 Tunáa takarin ainia nu umitmaktinian wakeruiniak,
shuar apatku yua nútiksaran Yusnaka páchitsuk wi shuaran amuinia nuna
yajauch túramuri̱n ¿nékainiatsuká? Nékainiajanta.
5 Warí Yus ni nemasri̱ ukunchí̱nkia tsakiṉmatkaram
ashamkamnia atsa̱i̱ṉ sapijmiakarmai.
Kame Yusa amek nakitram iniatsá̱rarmame.
6 ¡Iisiá, Seúnnumia̱ uwemtikkiartin Israer shuaran aṉkant awajsaṉka péṉker ainti!
Kame ni shuari̱ achirar yajá yaruakman Yus awakearmataiṉkia
Jakupusha tura ni shuari̱sha wararsatin ártatui.