Ii nemasri̱ pataturkui Yus seatin
Sep aents Sáuran chicharainiak “Tawit ii nuṉke̱n ¿ú̱mak pujatsuash?” tiarmia nui̱ jú̱naka Tawit áaruiti. Tura kantamniu úuntri̱nkia kitiarja̱i̱ tuntuiyatniuiti.
54
Maa Uunt Yusá, Ame náarmiji̱a̱i̱ uwemtikrurtatúram Ame kakarmarmiji̱a̱i̱ ayamprutkata.
2 Uunt Yusá, wi seajmena nu antukta.
Winia wenurja̱i̱ tájamna nusha anturtukta.
3 Yajaya̱ aents winia kajertuiniak wajatrukiarai
tura yajauch awajkartin ainia nuka mantuataj turutainiawai.
Nu aentska Yúsnaka enentáimtichu áiniawai. (Séraj)
4 Iisiá, winia yainnia nuka Yúsaiti.
Núnisaṉ winia wakantrun wainiainia nuja̱i̱ Uunt Yus yaintiui.
5 Yus winia nemasrunka yajauch túrutairi̱ni̱ṉ iniarat tusa níniak aju̱ntrattawai.
¡Ame nekas túrutairmiji̱a̱i̱ emesrarta!
6 Maa wínia wakeramurja̱i̱ṉ Ámin taṉkun áestuattajme.
Túran Uunt Yusá Ame náarmincha péṉker asamtai pachisan shiir yumiṉsattajai.
7 Ashí jakamnia nekapeamunmaya̱ aṉkant awajtúsu asakmin
wisha íi pujai̱ṉ winia nemasruncha nupetkarun wáinkiarmajai.