Yus kúntutsnumia̱ aṉkant awajma
107
¡Uunt Yus nekas péṉker asa tura Ni waitnenkartutairi̱ṉkia amuicha asamtai nekas yumiṉsatarum! YKan. 136:12 Tuma asamtai aents ni nemasri̱ kakarmari̱ya̱ Uunt Yus uwemtikrarma ainia nusha
3 tura etsa̱ jintiainmaani̱ya̱ nuyá̱ akatainmaani̱ya̱sha
núnisaṉ arakaani̱ya̱sha nuyá̱ nuṉkaani̱ya̱sha uwemtikrarma ainia nu tu chicharnaisar nuní̱ tiartí.
4 Aents atsamunmaani̱ wákar wekaikiní̱ yujarmai
péprunam pujusmin ainti tusar túrasha peṉké wáinkiacharmai.
5 Tsukamainia tura kitiamainia ásar kakarmachu ajasármai
túmainiak jasattuk ajasármai.
6 Nuyá̱ jakamnia nekapenak Uunt Yusan untsukarmai
tura aṉkant awajsar ni itiurchatri̱ya̱ uwemtikrarmai.
7 Tura nekasa nú jintianmaani̱ yaruakar matsamsartatna nú péprunam júkiarmai.
8 ¡Uunt Yus aents túrachminia nuja̱i̱ aentsun yaiṉkiu asamtai
Ni waitnenkartutairi̱ yumiṉsarti!
9 Kame Yuska wakan kitiama nuna kitiakén imiktiniaiti
núnisaṉ wakan tsukamá nuna péṉkera nuja̱i̱ ejemamtikiar imiktiniaiti.
10 Chíkichkia jiruja̱i̱ jiṉkiar sepunam ti kiritniunam
tura wariṉsha íischamnia wáitkiasar wáitnenmai ajá matsamin pujusár
11 tura Uunt Yusa chichame̱n ántichu ajasár
Ashí Naṉkamantu chicharmasha peṉké nakitín ajasármai.
12 Tuma asamtai takat ti itiurchat takamtikiainiam ni enentái̱nkia péejchach awajsarmai
túrasha tukumak iniaiyarmia nuyá̱ yáiṉtintri̱ṉkia yáakesh atsumai.
13 Nuyá̱ jakamnia nekapenak Uunt Yusan untsukarmai
tura aṉkant awajsar ni itiurchatri̱ya̱ uwemtikrarmai.
14 Kirit téenam jákatniunam matsatun ji̱i̱rarmai
tura jiṉkiamuri̱n tsurintrarmai.
15 ¡Uunt Yus aents túrachminia nuja̱i̱ aentsun yaiṉkiu asamtai Ni waitnenkartutairi̱ yumiṉsarti!
16 Warí yaṉkú jiruja̱i̱ waiti najanamun kupirmai
tura jirú winiaṉkencha kupí kupí awajtúsmai.
17 Chikitcha enentáimcha armia nuka umichu ajasár
ní yajauchiri̱ni̱ṉ wáitsarmai.
18 Ashí yurumkancha nakitrarmai
túrawar jatak ajasármai.
19 Nuyá̱ jakamnia nekapenak Uunt Yusan untsukarmai
tura aṉkant awajsar ni itiurchatri̱ya̱ uwemtikrarmai.
20 Ni chichame̱ja̱i̱ tsuararmai.
Túrawar jákatniunmaya̱ aṉkant awajsarmai.
21 ¡Uunt Yus aents túrachminia nuja̱i̱ aentsun yaiṉkiu asamtai Ni waitnenkartutairi̱ yumiṉsarti!
22 Yumiṉsajme tusar Yus ántar susamu áestuawarti.
Nuyá̱ Ni najankamu ainia nu etserawarti tura warasar kantamáwarti.
23 Chikitcha kanuja̱i̱ nayantsanam akaikiar uunt entsanam kuítian súmainiak,
24 Uunt Yusa túramuri̱n wáinkiaruiti.
Kame nayantsa kunarí̱n Ni túramuri̱n tí peṉkera nuna wáinkiaruiti.
25 Ni nayantsan chicharkarmiayi.
Túram kakaram nase umpuim tamparukmiayi.
Túruna tampari̱ yakí̱ takuniarmiayi.
26 Yakiini̱ṉkia ti yakí̱ wákaar nuṉkaani̱ṉkia tí init nánatamunan ataksha tárarmai.
Túmakui̱ nu itiurchatri̱n wáinkiar ni enentái̱ṉkia miniankiararmai.
27 Nampekua núnisar pemperakut ajarmai
túrunawar nékachu ajasármai.
Tura ashí ni nekatairi̱ ántrauyi.
28 Nuyá̱ jakamnia nekapenak Uunt Yusan untsukarmai
tura aṉkant awajsar ni itiurchatri̱ya̱ uwemtikrarmai.
29 Nuyá̱ náseṉmaaka meṉkakamai.
Tura nayantsa tampari̱ miaku ajasármai.
30 Nayantsa tampari̱ miaku ajasmatai warasarmai.
Nuní̱ tura wakeriarmia nui̱ Ni júkiarmai.
31 ¡Uunt Yus aents túrachminia nuja̱i̱ aentsun yaiṉkiu asamtai Ni waitnenkartutairi̱n yumiṉsarti!
32 Aents iruntramunmasha Nin naṉkamantu awajsarti.
Núnisaṉ pepru uuntri̱ irunainia nui̱sha shiir awajsarti.
33 Niṉkia entsancha kukach awajás kampuntin atsú awajeawai.
Núnisaṉ púkunincha ju̱ju̱ptin awajniuiti.
34 Nui̱ matsatainia nuna yajauchiri̱n tará nuṉká jeaku awajniuiti.
35 Nisha atsamunmaya̱itiat yapajniá entsa pajamtai najanaiti.
Tura nuṉka ju̱ju̱ptinia núnaka púkuni awajniuiti.
36 Nui̱ṉkia tsukamainia nú aentsun iruntrarmatai péprun najanainiawai.
37 Kampunniun takakmasar uwa ajan ajamiar arakma tí nukap neré juíniawai.
38 Tí peṉker matsámtánam yumiṉkramu ásar tí nukap pampainiawai
tura ni waakari̱sha menarainiatsui.
39 Kame wáitkiainiamu ásar ti wáitiainiak
tura kúntuts nekapenak jakamnia enentáimiainiak menaki̱ ishichik ajakí̱ wénawai.
40 Núnisaṉ úunt akupniu uchirí̱ muí̱jkiatin enentáin aentsun eṉketáiniawai.
Túramu ásar nakirí̱i̱n jíntiachunam weká núnisar wekaikiní̱ ajainiawai.
41 Tura aents peṉké takurmakcha núnaka atsamunmaya̱ṉka jíiniaiti.
Tura murik pampaak urukniuit timianú untsurí shuarnasha awajniuiti.
42 Aents péṉker enentáimkia ainia nuka nuna iisar warasarti.
Antsu ashí yajauch enentáimkia ainia nuka chichatsuk pujuwiti.
43 Yaaksha ju̱na nekáa tura esetas anturak umía nuka
Uunt Yusa waitnenkartutairi̱n nekaattawai.a