Seun wáketma
126
Achira yaruakman Uunt Yus achir yarurmakarmiaj nuna Seúnnum awaketmararmiaj nukamesekranam yarumma núnikiarmiaji.
2 Nuya̱ṉka warainiakur wishirarmiaji
tura warasar kantamámiaji.
Nuya̱ṉka uunt nuṉka mátsatkamunam chichartamainiak
“Uunt Yus ju̱ aentsun tí peṉkera nuja̱i̱ yaiṉkiaruiti” turamarmaji.
3 Nekas Uunt Yus aents túrachminian iiji̱a̱i̱ túraiti tusar waraaji.
4 Maa Uunt Yusa ii achir yarurmakarmiaj
nuyá̱ atsunum ashints wáinkiatniua nútikiam awaketmarta.
5 Útkamaikia arakmainia nuka waras júukartatui.
6 Kustarnum arakri̱n eṉkea jukí̱ utki̱ arakmattsa wea nuka
sewata nere̱n juuk waras wakitkittiawai.