Nekatai̱ jintinkratma akupkámu umiktinnia
28
Shuar Yusan enentáimtichua nuka apapéachmaitiataṉ ni enentái̱ji̱a̱i̱ṉ pisawititura péṉker enentáimkiaka úunt ya̱wa̱ wajana tímiatrus wajawiti.
2 Yajauch pampaṉmataiṉkia akupniúsha untsurí ajainiawai.
Antsu péṉker enentáimias akupniua nuka ashí péṉker wáiniuk niṉki akupniuiti.
3 Kuítrinchaitiat chíkich kuítrinchan waitkia nuka
yumi tí yutak arakan emesak tsukamtikiana núnisaiti.
4 Akupeamun umircha ainia nu yajauchia nuna shiir enentáimtuiniawai
tura umirin ainia nuka niji̱a̱i̱ nemasmainiawai.
5 Yajauch shuar ainia nuka péṉker túratniun nékainiatsui
antsu shuar Yus wakeramun túruinia nuka mash nekamnia áiniawai.
6 Kuítrintin yajauch enentáimkia
núja̱i̱ṉkia kuítrincha arankartinia nu nekas péṉkeraiti.
7 Uchi ashí akupeamun uminkia péṉker enentáimkiaiti.
Tura aya yurumkanak enentáimtinji̱a̱i̱ tsaníakka aparí̱ncha natsanmai̱ awajniuiti.
8 Kuítian ikiamas tí nukap patattsar awaṉtukim kuítrintin ajainiakka
kuítrinchan waitnentainiak yain ainia nuna ikiauntuiniawai.
9 Aents Yus akupeamun umiktinian nakitiayat seá núnaka Yuska peṉké mui̱jmiai̱ iyaawai.
10 Naka enentáimkia nuna yajauchiniam aju̱i̱nia nuka nisha nu itiurchatnumaṉ iniartatui
antsu péṉker enentáimkia ainia nuka ukunam ti péṉkeran waitmakartatui.
Nekatai̱ jintinkratma kuitnia
11 Kuítrinniua nuka ni enentáimtumaska nekáa ímianu enentáimtumawiti
antsu neka nuka kuítrinchaitkiusha kuítrinniu enentáimmiari̱n mash nékarui.
12 Péṉker túrin ainia nu awakmainiakka ashí warainiawai
antsu yajauch túrin ainia nu wajararmataiṉkia aents u̱mainiawai.
13 Shuar ni yajauch túrutairi̱n u̱á̱ nuka péṉker áchattawai
antsu ni tunaari̱n etserak yajauch túrutairi̱n ikiuana nuka waitnennar tsaṉkurnartatui.
14 Yusan ashamak tuke shiir awajna nuka ti waraawai
antsu ni enentái̱n ikiatsua nuka yajauchiniam iniartatui.
15 Akupin ni pépruri̱ kuítrincha áinian nékayat yajauch akupea nuka úunt ya̱wa̱ shiniana tura chai̱ tsukamana núnisaiti.
16 Akupin enentáimchaka ni aentsri̱ kuítrinchan nékayat kakarmaja̱i̱ atannuiti.
Antsu nekascha nuja̱i̱ kuit ikiauṉkatniun mui̱jmiai̱ enentáimtinkia núkap tsawant iwiaaku pujustatui.
17 Maṉkartinia nuka aya písataik jákatniunam wéakuisha núnaka yaaksha emetacharti.
18 Makuchma péṉker wekáa nuka yajauchinmaya̱ uwemprattawai
antsu yajauch enentáiji̱a̱i̱ wekáa nuka aya aneachma emesnartatui.
19 Ni nuṉke̱n takakmana nuka taramka asa tsukamáshtatui
antsu nakia nuja̱i̱ tsaniṉ wekáa nuka peṉké kuítri̱ncha juáktatui.
20 Tuke péṉker túrinia nuka shiir enentáimtusma tura péṉker pujutnum yumiṉkramu átatui
antsu kuítriniataj tusa wáurtana nuka urutáiṉkish ásutniatniukete.
21 Aents métek enentáimtunaischatniuka péṉkerchaiti.
Aya apatuk púusar susamuja̱i̱ṉ aents yajauchin túrawai.
22 Áishmaṉ yajauch enentáinniuka wárik kuítriniattsa núkap takustinian wakeriniaiti
túrasha kuítrincha juáktatna núnaka nekamatsui.
23 Aents ántar péṉker chicharu ajana
núja̱i̱ṉkia nekaska péṉker chicharkainia nuna naṉkaamas yumiṉsamu átatui.
24 Shuar ni aparí̱ncha nukurí̱ncha kasarkayat
“ju̱ túratniuka tunaachuiti” tana
nuka emeskartinian amikri̱nti.
25 Kakaram enentáimtuma nuka aya mánaiktinniak wakeriniaiti
antsu Uunt Yusan enentáimtinia núja̱i̱ṉkia ashí péṉker átatui.
26 Aya ní enentái̱ji̱a̱i̱ṉ enentáimtuma nuka nétsete
antsu nekatai̱ji̱a̱i̱ wekáa nuka aṉkant awajnástatui.
27 Kuítrinchan yayá̱ nuka peṉké atsumashtatui
tura kusurua núnis kuítrinchan peṉké enentáimtatsna nuka ti yajauchiniam yumiṉnartatui.
28 Yajauch shuar ainia nu wajararmataiṉkia aentsush u̱mainiawai
tura yajauch shuar amukarmataiṉkia péṉker aents ainia nu káwenawai.