2 Kame nu tsawantinkia Úunt Yusai̱ya̱ jé̱e̱rtatna nuka ti shíiram núnisaṉ tí paantin wararsamu átatui. Tura nu nuṉka arakri̱ nere̱ja̱i̱ ti wararsamu nuyá̱ Israer shuar iwiaaku pujuartatna nuna iwiarmamke átatui. 3 Tura Jerusaréṉnum juákaru ainia nuka kame Seúnnum ikiukmia tunaarincha áiniawai tunartatui. Kame Jerusaréṉnum pujuinia nu ashí ni naari̱ papinium anujkamu áiniawai. 4 Tura Uunt Yus sumamtiktai̱ tura asutkiartutai̱ wakanja̱i̱ asutiá Seuna nawantri̱ mui̱jmiai̱ntri̱n tura Jerusaréṉnum numpa upuramun japirartatui. 5 Nuiṉkia ashí Seun nainnium tura iruntai̱nmasha Uunt Yus tsawai̱kia yuraṉmin tura káshikia ji kean ikiustatui. Warí ashí nui̱ Ni kakarmari̱ tarach ayapá̱rar nukukma núnis átatui. 6 Kame tsawai̱kia tsue̱r asamtai ejamkatniun mikintra awajsat tusa nuyá̱ yumi, naseja̱i̱, chárimp, peemja̱i̱ ajakui áreṉkat tusa núnaka túrattawai.