Papirúnianmaya̱ akupin wishikramu
14
Uunt Yuska ti nekas Jakupan waitnentrattawai tura Israernaka ataksha awaiṉki̱ achik ní nuṉke̱ni̱ṉ matsasártatui. Tura chíkich aentssha nui̱ káunkar niji̱a̱i̱ tsaniṉkiar Jakupa shuari̱ ajasártatui. 2 Nuya̱ṉka chíkich nuṉkanmaya̱ aents Israer shuaran ni nuṉke̱n awaiṉki̱ ikiuwartatui. Túmainiakui Israer shuar Uunt Yusa nuṉke̱n nú aentsun áishmaṉnasha nuwa̱ncha ni iniatairi̱ awajsártatui. Tura nin achirar yaruakarmia nútiksaraṉ nincha achirar yaruakartatui. Túruiniak íksaṉ nin wáitkiasarmia nuna uuntri̱ ajasártatui. 3 Tura takamtikkiur wáitkiatai tura najaimiakrum wáitnenmai ajakrumin Uunt Yus aṉkant awajtámsartatna nu tsawantinkia 4 Papirúnianmaya̱ úunt akupin chicharkuram“Itiurchat aents awajkur wáitkiatai̱ri̱sha
tura ni kakarmari̱ ashí naṉkamantuya nusha itiur amuutumkachia.
5 Tura Yusan enentáimtichu ainia nuna wai̱ri̱
tura akupin ainia nuna akuptai̱ numiri̱ncha Uunt Yuska kupirarai.
6 Kame niṉkia ashí nuṉkanmaya̱ aentsun kajerkar asutiarmia nunasha
tura kajekmája̱i̱ iniaṉnatsuk akuptáiri̱sha itiur amutumkachiá.
7 Túrunamtai ashí nuṉkanmaya̱ aents aṉkant ajasár shiir enentáimiainiak warasar kantamáiniawai.
8 Nu arant sepris numisha tura Ríwianunmaya̱ sétrusha ame warí urukámam nui̱ warasar chichainiak
‘Ame amuukamiamna nuya̱ṉ iin ajatma armia nusha ajatmaktai tusar tarutrámcharuitji’ tiáruiti.
9 Init jaka matsamtaisha ámin iṉkiunmaktai tusar aya wáurkarmai.
Tura jákaru wakaní̱ncha iniantkiarmai.
Núnisaṉ ashí nuṉkanmaya̱ uuntri̱ ainia nunasha
tura ashí akupniuncha ni pujutái̱ri̱ya̱n awajkiarmai.
10 Tura ashí nisha chichartamainiak
‘¡Tsej ausha, amesha iiji̱a̱i̱ métekchak kakarmachu ajaschamek! turamiartatui.
11 Ame naṉkamantu ajatáirmeka tura ke̱e̱ran tuntuitiurmarma nusha jaka matsamtai̱niam aju̱a̱muiti.
Ame peakrumsha ákaiti tura esekmatai̱rmesha aya ákakete.’
12 Yáṉkuamia núnis tsáapninia uchiri̱yá nayaimpinmaya̱sha ¡itiur iniarchamea!
Ámeka ti kakaram ashí nuṉkanmaya̱ aents yajauch awajainia asam nuṉká aju̱a̱muitme.
13 Ame enentáimtumasmekka,
‘nayaimpiniam núna yakí̱ wakan Yusa yaari̱ eketainia ímianai winia pujutái̱run najanattajai.
Tura ashí iimiainiamunam arakaani̱ yajá nainnium pujustatjai.
14 Tura yuraṉmin naṉkaikin nu yakí̱ wakan Yusja̱i̱ métek ajastaj tu enentáimtumasmiame.’
15 Kame tu enentáimpra asam jakaa matsamtai̱niam tura náṉkatkachu wá̱a̱nam aju̱a̱muitme.
16 Tura ámin waitmakartatna nuka ‘tsej aushá’ túramar ti enentáimprar chichartamainiak ‘Ju̱ka nuṉka ukureak núnisaṉ akupeamuncha emesak
17 ashí nuṉkancha atsamunam awajsamai tura aents mátsatkamuncha emesniuya
nuyá̱ sepunam pujuiniancha aṉkantcha awajniuya ¿nu áishmaṉchakait?’ turamartatui.
18-20 Ashí akupin chíkich nuṉkanmaya̱ ainia nuka kajinkiariat shiir awajsamu áiniawai. Túrasha ámeka yajauch uchia núnisam iwiarsamurminia̱sha ajapamuitme. Warí áme nuṉkemek emeska asam tura áme shuarumek kajeṉkam amuku asam ámeka íwiarmanumsha níji̱a̱i̱ṉkia apatnakchattame. Tura yajauch aents ainia nuka ukunmasha ní shuari̱ṉkia peṉké pachittsachma ártatui. 21-23 Ni aparí̱ yajauchiri̱ni̱ṉ ni uchirí̱ kajeṉkártincha iwiarkatarum. Túracharmaka tsakiṉmakar uunt péprun najankar ashí nuṉkanam piákartatui. Kame Ashí Akupin Uunt Yus chichaak Papirúnianka mash amukan asakártatjai” tawai.
Asiria asutniátin etserkamu
24-27 Isayas tuke étsereak, Ashí Akupin Uunt Yus nekas túrattajai taku tímiatrusaṉ túrashtatuak. Ni nuṉke̱n Asirianmaya̱ aentsun itiurchat awajsashtatuak. Túrunamtai ashí shuar aṉkant ajasártatui. Núnisaṉ ashí nuṉkanam uunt mátsatkamun emeskattajai Ashí Akupin Uunt Yus tiniu asamtai ashí nuṉkanam nuka túrunattawai. ¿Nunasha yaki suritkiat? tu áarmiayi Isayas.
Jiristíu asutniátin étserma
28-31 Akupin Akaas jakamia nu uwitin ju̱ asutniátniuka etsernakmiayi. Jiristíu aentsu ame asutiámatniun iniaitiámsa asamtai warasairap. Túrunamtai kuítrincha uchirí̱ iwiá̱i̱ ainia nuka péṉker pujusártatui tura atsumainiasha péṉker enentáimiar pujusártatui. Túrasha amé shuarnaka tsukái ikiajkiattajai. Núnisaṉ iwiaaku juákaruncha ashí amukártatjai. Tuma asamtai Jiristíu aentsu, atumí emestampratniuka mukuintiua núnis araki̱a̱ tí untsurí suntar wininia nui̱ṉkia chikichkisha suntar uku juákuka atsuttawai.
32 Túrasha chichama etserin chíkich nuṉkanmaya̱ akupkarmasha ¿warí titiarmek? Seúnnaka Uunt Yus tí peṉker iwiarka asamtai ni shuari̱ wáitkiatai ainia nuka nui̱ ejamkartatui tu etserkamiayi Isayas.