4 Nekasaiti ii najaimiakur wáitsatniuncha tura ii suṉkuri̱ncha Ni jurutrámkimiaji. Túrasha iikia Yus asutiam wáitiana núnis enentáimtusmiaji. Mat. 8:17 5 Tura ii yajauchiri̱n Niṉkia ijiunmiayi. Ii tunaari̱n awatnármiayi. Ni asutniámuja̱i̱ ii aṉkant ajasmiaji. Tura Ni wáitsamuja̱i̱ iikia péṉker ajasmiaji. 6 Kame iisha murikiua núnisar ashí meṉkakamiaji tura aṉkant aṉkant ii wakeramuri̱ni̱ṉ wekaimiaji. Túrasha Uunt Yuska ashí shuarti yajauch túramuri̱n Nin áentskamiayi.

7 Tura Nisha wáitkiasma tí kuntuts pujayatcha peṉké chichakchamiayi. Murik mátai̱niam júam tura murikiu uré̱ tsúpin tsupiratsa júam chichaatsna núnisaṉ nisha peṉké chichakchamiayi. 8 Tura chíchaman najatawar achikiar sumamtikiawarmai. Kame niniu akiiniamnia nunasha ¿yaki etserkaint? Warí iwiaaku pujuinia nu nuṉkanmaya̱ akannakmiayi. Tura wi shuara yajauch túrutairi̱n akikmatkataj tusa jarukmiayi. 9 Anaṉma ti kajek yajauchi túrichuitiat Yusan enentáimtichuja̱i̱ métek iwiarnastiniuyayi túrasha jakamtai kuítrintin iwiartai̱niam iwiarnasmiayi.

10 Kame Uunt Yuska awatnarti timia nuja̱i̱ métek mantamnamiayi. Tura niṉkia tunaanum taṉku maar áestuatniua núniktin asa ukunam akiiniawartatna nunasha wáinkiartatui. Nuya̱ṉka náṉkatkachu tsawantnum pujustatui tura Uunt Yus wakeramuka níji̱a̱i̱ṉkia tuke péṉker uminkiattawai. 11 Nuyá̱ Ni wakaní̱ wáitsamia nuja̱i̱ tsáapninian wainiak ti shiir enentáimprattawai. Winia takartin tí peṉkera túrin asa ni nékamuriji̱a̱i̱ ti untsurín makuchmin awajsattawai kame niṉkia ashí aentsu tunaari̱n entsaktatui. 12 Nuna túramtai uunt pujuinia nu nin shiir awajsatai tusar tariarti tusan tsaṉkatkattajai tura kakaram ainia nuja̱i̱ nupetmakar ata̱rman akantúnairartatui. Warí ni iwiaakmari̱nkia surumak jakamiayi. Tura yajauch túrin shuarnum sumamauyayi. Ashí aentsu tunaari̱n jurukín asa umichu ainia nunasha Yusan seatiarmiayi.