Yúsnan etserin
Amus
aarma
Uunt nuṉka mátsatkamu ayaam matsatainia asutniáwartin
1
Kame Jutá shuara akupin Usías tura Israer shuara akupniúri̱, Juasa uchirí̱ Jirupuám pujuiniai̱ ú̱u̱rkatin jimiará uwí taasu ai̱, Tekua péprunmaya̱ áishmaṉkan murikiu wáinniun Amusan Israer shuarnum túrunattana nuna Yus ujakmiayi. 2 Amus chichaak “Uunt Yus Jerusaréṉnum Seun nainniumka úunt ya̱wa̱ ánis chichaakui murikiu wainniu nuṉke̱ṉka núnisaṉ Karmiriu pakarí̱ṉsha káakarai” tímiayi.Tamasku sumamtikiamu
3-5 Uunt Yus chichaak “Tamaskunka yajauch tí túrukmanum peṉké tsaṉkurashtatjai. Warí Karaat péprun tsai̱ tsai̱ awajsaruiti tuma asamtai úunt akupin Jasaéra je̱e̱ncha jiji̱a̱i̱ amukan nú jiji̱a̱i̱ṉ Piniatáta akupin pujutái̱ri̱ncha amutkattajai. Tura Tamasku wáitiri̱ jirurí̱n tsairartatjai. Núnisnak nuṉka pakarí̱n Awinnium matsatainianka ashí amukártatjai. Tura Piteténka akupniúri̱ncha amuktatjai tura Sírianmaya̱ aentska achirar yajá yaruakma ártatui” tawai Uunt Yus.
Jiristía pépruri̱ Kaasa sumamtikiamu
6-8 “Tura Kaasa péprunka yajauch tí túrukmanum peṉké tsaṉkurashtatjai. Warí ashí aentsun achir yaruak Etumai̱ surukarmiayi. Núnisaṉ wenuke̱ncha jinia akuptúktatjai. Túran akupniu je̱e̱ ainia núnaka amukártatui. Astutnumia̱ aentsnasha tura Askarúna akupniúri̱ncha áintsanak Ikrunnasha núnisnak Jiristíanmaya̱ iwiaaku juákaru ainia nunasha ashí amukártatjai.
Tiru sumamtikiamu
9-10 Tiru pépruncha áitkiasnak yajauch tí túrukmanum peṉké tsaṉkurashtatjai. Warí ni yachi̱ji̱a̱i̱ chichaman najanawarmia núnaka enentáimtutsuk ashí aentsun péprunmaya̱ achir yaruakar Etuman súsaruiti. Tuma asamtai wenuke̱n jinia akuptúkartatjai. Túram akupniu je̱e̱ áiniancha amukártatui.
Etum sumamtikiamu
11-12 Etumnumia̱ aentsnasha nútiksanak yajauch tí túrukmanum peṉké tsaṉkurashtatjai. Warí waitnenkartutairi̱ṉkia iniais ni yachi̱n puya̱ja̱i̱ apapéku asamtai tura kajekka tuke tsai̱ tsai̱ awajniuiti núnisaṉ tuke itit enentáimniuiti. Tuma asamtai Temannasha jinia akuptúkan akupniu je̱e̱ Púsranam ainia nunasha amukártatjai.
Amun sumamtikiamu
13-15 Amuna shuari̱ncha yajauch tí túrukmanum peṉké tsaṉkurachartatjai. Warí nuṉke̱n iwiaṉkartai tusar Karaatnumia̱ nuwa̱ ajaprukaru áinianka ajapeyarmiayi. Núnisnak Rapá wenuke̱ncha jinia ikiapátran akupniu je̱e̱nkia mesetja̱i̱ kakaram untsummaja̱i̱ amutkartatjai tura yumitinkia nasé naseja̱i̱ ti kakaram yútak amukártatui. Tura akupniúsha péṉkeri̱ ainia nuja̱i̱ achirar yajá yaruakma ártatui” tíniuiti Uunt Yus.