Ju̱ papinium Etum emesnaktin etserkamun aya chikichik akankámunmaṉ áujmatui. Kame ju̱ya̱ṉka Yaunchu Chichamnumka Etuma náari̱nkia atakka peṉké páchiatsui. Túmaitiat Yamaram Chichamnum úunt akupin Uunt Irutisna áujmatna nuka Etum shuarauyayi. Kame Kristu akiiniamunmaya̱ uwí sataintiatin Jerusaréṉ emesnakmia nuya̱ṉka nu nuṉka náari̱nkia peṉké páchiatsui.

Uunt nuṉka mátsatkamu Etumnaka Jakupa yachi̱ Esaú, jímiampramuya nu, Esaú wea najanawarmiayi. Kame ni aparí̱ Isak péṉker pujutnum yúmiṉkiamun Jakup kasarkamia nuya̱ṉ Esaú Jakupan suíran kaje̱ntukmia núnaka kajinmátkichuyayi. Tuma ásar Etum shuarka Israer shuarnaka tuke nemasri̱ ármiayi. Enentáimprata. Yusa suntari̱ Jakupan “Israer” anaikiamia nuyá̱ ní wea Israer shuar ármiayi. Nuja̱i̱ Etum emesnaktinian Aptías etserkamia nuka Israer shuara nemasri̱n Yus timia nu paant nekaamniaiti.

Kame Yus Chichamnumka aya jú̱ papinium Aptías wainji. Aptíasa náari̱ṉkia Israer chichamja̱i̱ṉkia “Jiuwáa takarniúri̱” tawai.