16
1-2 Kame ashí Muápnumia̱tirmeka yamaikia ame takarniuitji tusarum Seúnnumia̱ úunt akupin murik akuptúktarum. Tura Muápnumia̱ṉka sapijmiainiak chiṉkí pasuṉke̱ya̱ ji̱i̱rma núnikiaruiti.3-5 Warí yamaikia wáitsatniuka naṉkaamaschaik. Tuma asamtai Muápnumia̱ ji̱i̱ra akuprámu ainia nuka átum ayamprúktarum tura iisha atumji̱a̱i̱ matsamsatai. Nu túrakrumni̱ṉkia atumí waitnenkartutairi̱n nekasa nuja̱i̱ métek akupkatin Tawit shuarnumia̱ apujnastatui.
6-12 Jutá shuar chichainiak “Tura Muap naṉkamantu enentáimtumatairi̱sha antukmaiti túrasha peṉké antar tu enentáimtumainiawai. Tuma ásar ashí Muápnumia̱ṉka kúntuts enentáimprartatui. Núnisaṉ uwa ajasha tí peṉker neren áiniayataṉ ashí amukártatui. Túrunamtai ni waratáiri̱sha peṉké atsuttawai tura winiú najanniusha najanachartatui. Túrunamtai Muap tí pimpiki̱ naint wákar ni yusri̱ áujtai̱niam yusri̱ seamsha peṉké anturkashtatui” tiármiayi.
13-14 Muap nuṉkanmaṉka jú̱nis túrunattawai tusa yaunchu Yus etserkamiayi. Antsu yamaikia Uunt Yus chichaak “Menaintiú uwí naṉkaamasmatai Muapka ashí amuukattawai. Túrunamtai juákarusha peṉké ishichik tura aya uchik ásar kakarmachu ártatui” tawai Uunt Yus tusa Isayas etserkamiayi.